Junman nga Mali di i Ɲanmiɛn i klun sa’n i yolɛ’n nun’n

BLƐ nga Zezi bó jasin fɛ’n, ɔ tili bla kun i nɛn sran’m be afiɛn. Bla’n seli kɛ: “Bla ng’ɔ wunnzɛli wɔ’n, nin nyɔnflɛn nga a nɔnnin’n, be liɛ su ti ye!” Sɛ ɔ ti kɛ Zezi waan be mɛnmɛn i nin’n, nn w’a ɲɛn i sɔ kanlɛ’n i wun atin klanman kpa. Sanngɛ w’a kplinman su sɔ. I ti’n, ɔ seli kɛ: “Se kɛ, sran ng’ɔ tie Nyanmiɛn ndɛ’n b’ɔ fa su’n, i liɛ su ti ye!”—Lik 11:27, 28.

Zezi w’a mɛnmɛnmɛn i nin kaan sa. Yɛ kusu w’a semɛn i sɔnnzɔnfuɛ’m be kɛ be yo sɔ le. ?Yɛ nn, ɔ yo sɛ ti yɛ sran sunman mɔ be lafi Ɲanmiɛn su kpa’n, be manman Mali sɔ ɔ? Maan e fa Zezi i nin’n i su like nga be kle’n mɔ w’a tru kpokpaa’n e fa sunnzun ndɛ nga Biblu’n kan’n.

“A le muae dan,” “mmla’m be nun Nyanmiɛn a bu wɔ sran”

Anzi Gabliɛli kannin junman nga Mali dí i Ɲanmiɛn i klun sa’n i yolɛ’n nun’n kleli i. Blɛ sɔ nun’n, ɔ yoli i like, ɔ seli i kɛ: “Ɔ liɛ su ti ye! Maan e Min Nyanmiɛn’n jran ɔ sin!” (Lik 1:28) Be kacili ndɛ sɔ’n ekun kɛ: “Ń úsa wɔ aɲin Mali, a le muae dan, e Min nin wɔ tran.” Kɛ ɔ dili le nɲɔn kun’n, Elizabɛti yoli Mali like seli kɛ: “Eee, mmla’m be nun Nyanmiɛn a bu wɔ sran, yɛ ba’n b’ɔ o ɔ klun lɔ’n, i kusu Nyanmiɛn bu i sran.” (Lik 1:42) ?Ndɛ sɔ’m be kleman kɛ ɔ fata kɛ be manman Mali?

Cɛcɛ, nɛ́n i sɔ ɔ. Kannzɛ bɔbɔ Katoliki’m be fa ndɛ sɔ’n be wlɛ i Mali i srɛlɛ nun’n, sanngɛ Biblu’n seman kɛ e srɛ i. Gabliɛli nin Elizabɛti be si kɛ wunnzɛlɛ mɔ Mali wunnzɛli Mɛsi’n, ɔ ti i cenjele like. Sanngɛ i srɛlɛ liɛ’n, nanwlɛ Biblu’n w’a kanman sɔ mlɔnmlɔn. Kɛ Zezi i sɔnnzɔnfuɛ’m be seli i kɛ ɔ kle be Ɲanmiɛn srɛlɛ’n, ɔ kleli kɛ i Si yɛ ɔ fata kɛ be srɛ i ɔ. I kpa bɔbɔ’n, Ɲanmiɛn srɛlɛ i wun ajalɛ nga Zezi kleli’n, ɔ bo i bo kɛ: ‘E Si bɔ a o nyanmiɛn su lɔ’n.’—Matie 6:9.

Ɔ o be nga bé síe asiɛ’n be nun wie

Like uflɛ ekun mɔ be kle i Mali su’n, yɛle kɛ, kɛ é sé yɛ’n, ɔ ti “ɲanmiɛn su lɔ Famiɛn Bla.” Biblu’n flɛmɛn i sɔ kaan sa. Ndɛ ng’ɔ kan’n yɛle kɛ Mali di junman ngunmin kun ninnge nga Ɲanmiɛn siesieli be ɲanmiɛn su lɔ’n nun. ?Ngue yɛle junman sɔ’n?

Zezi kleli kɛ i sɔnnzɔnfuɛ nga b’a kpɔcimɛn i’n, be nun wie’m be nin i bé dí famiɛn i Sielɛ Blɛ’n nun. (Lik 22:28-30) Zezi mán sran sɔ’m be kwlalɛ kpɛkun ‘bé káci e Nyanmiɛn’n i awlo sran bɔ be trɛn i nyrun’n. Be yɛ bé síe sran mun asiɛ’n su wa-a.’ (Sa Nglo Yilɛ 5:10) Sran nga be wá dí cenjele junman sɔ’n, Biblu’n kle e weiin kɛ Mali o be nun wie. ?Ngue ti yɛ e kwla se sɔ ɔ?

Kɛ Zezi wuli’n, i sɔnnzɔnfuɛ’m be nin Mali, yɛ Zezi i niaan bian mun be kwlaa be bo yoli kun ‘be nin Nyanmiɛn be kokoli yalɛ.’ Atrɛkpa’n ndɛ sɔ’n te o amun klun. Sran sɔ mɔ be yiali’n, “be nin bla mun” be kwlaa be ti 120. (Sa Nga Be Yoli’n 1:12-15) Biblu’n se kɛ: “Kɛ Pantekɔtu’n juli’n, be kwlaa be yiali lika kun.” Kpɛkun Ɲanmiɛn fɛli i wawɛ’n mannin be. Ɔ maan be kwla kannin aniɛn uflɛ wie mun.—Sa Nga Be Yoli’n 2:1-4.

Mali o be nga be ɲɛnnin i sɔ cenjele like’n be nun wie. I sɔ’n kle kɛ ɔ nin bla uflɛ nga be ɲannin Ɲanmiɛn wawɛ’n, be sieli be kɛ be nin Zezi be di famiɛn Ɲanmiɛn i Sielɛ nun lɔ. Ɔ maan, e kwla lafi su kɛ, kɛ é sé yɛ’n, Mali nin Zezi be o ɲanmiɛn su lɔ. (Rɔmfuɛ Mun 8:14-17) Ninnge cinnjin nga Mali nin be nga be nin Zezi bé dí famiɛn’n bé yó be Ɲanmiɛn i klun sa yolɛ’n nun’n, an bɔbɔ an bu i akunndan kan be nian.

Be yo maan e ɲan suralɛ

Sa Nglo Yilɛ fluwa’n waan bé cɛ́n sran 144.000 ɲanmiɛn su lɔ, yɛ be nin Zezi bé yó Ɲanmiɛn ɲrun jranfuɛ, bé dí sran’m be jɔlɛ, yɛ bé dí famiɛn. (Sa Nglo Yilɛ 14:1, 4; 20:4, 6) Kɛ mɔ be ti Ɲanmiɛn ɲrun jranfuɛ’n, be kwlakwla yɛ bé yó maan klɔ sran nga be yoli aɲinyiɛfuɛ’n, bé ɲán Zezi i wun ng’ɔ fa kpɔli e ti’n, i su mmlusuɛ’n wie ɔ. Yɛle kɛ klɔ sran sɔ’m be Ɲanmiɛn sulɛ nun’n, ɔ nin be nzuɛn’n nun’n, yɛ be wunnɛn’n nun’n, fɔ kaan sa su tranman nun. (Sa Nglo Yilɛ 21:1-4) Kɛ Zoova i sufuɛ kpa’m bé wá wún i sɔ liɛ’n, nanwlɛ ɔ́ yó be fɛ dan!a

Mali dili junman Zoova i klun sa yolɛ’n nun, yɛ andɛ nin andɛ ɔ te di i sɔ junman’n. Asa ekun’n, ɔ yoli wun ase kanfuɛ, ɔ lafili Ɲanmiɛn su kpa, ɔ yoli aɲinyiɛfuɛ, ɔ yoli niɛn kpa. I awlɛn m’ɔ trali fuɛ’n be boman wɛ be kanman. Mali i nzuɛn klanman sɔ’n, ɔ nin i fata kɛ e nian su. Yɛ kɛ mɔ i yɛ ɔ wuli Mɛsi’n, m’ɔ o be nga bé yó maan sran’m bé ɲán suralɛ’n be nun wie’n ti’n, ɔ nin i fata kɛ e ɲin yi i kpa.

Sanngɛ, like cinnjin kpafuɛ nga e suɛn i Mali su’n, yɛle kɛ ɔ nin Ɲanmiɛn i sufuɛ kpa’m be kwlaa be su Zoova kunngba cɛ. Mali nin be nga be nin Zezi bé dí famiɛn ɲanmiɛn su lɔ’n, be man be nɛn’n su be se kɛ: “Maan e manman sran ng’ɔ ti bia su’n [Nyanmiɛn Zoova] nin Bua Gbanflɛn’n [Zezi Krist], e yi be ayɛ, e yɛyɛ be, yɛ e se kɛ be ti kpli tititi.”—Sa Nglo Yilɛ 5:13; 19:10.

[Ja ngua lɛ ndɛ’n]

[Ndɛ kwle, bue 4]

Ɔ fata kɛ e nian Mali i wun ase kanlɛ’n, ɔ nin i Ɲanmiɛn sulafilɛ’n, yɛ i aɲinyiɛ’n be su.