Zoova i Sufuɛ’n ‘nyannin kannin mɔnnɛnmɔnnɛn i wunnɛn’n su e sa tɛ’m bɔ e yo be’n be ti’
“E sa tɛ’m bɔ e yo be’n be ti yɛ ɔ nyannin kannin mɔnnɛnmɔnnɛn i wunnɛn’n su ɔ. E fɔnlɛ mɔ e fɔn’n, i ti yɛ be sisili i wunnɛn nin-ɔn. [...] Yɛ i wunnɛn’n susuwa’n nin i kannin’m be ti yɛ maan e yo juejue ɔ.”—EZAI 53:5.
1. ?Kɛ e kɔ e Wla Kpɛnlɛ Cɛn’n i bo’n, ngue yɛ ɔ fataman kɛ e wla fi su ɔ? ?Yɛ Ɲanmiɛn nuan ndɛ benin yɛ ɔ uka e i sɔ yolɛ’n nun ɔn?
KƐ Ɔ ko yo naan e wla w’a kpɛn Klist i wie’n ɔ nin like kwlaa nga i wie sɔ’n ɔ nin i cɛnlɛ’n ti’n be yoli ye’n be su’n, i ti yɛ e kɔ e Wla Kpɛnlɛ Cɛn’n i bo ɔ. Cɛn’n sɔ’n maan e wla kpɛn su kɛ Zoova le atin sie nglo nin asiɛ’n sakpa. Kpɛkun ɔ yo maan e wla kpɛn i dunman’n i sanwun yolɛ’n ɔ nin i klun sa’n i su kpɛnlɛ’n, yɛ klɔ sran’m be ti ɲanlɛ’n, be su wie. Klist i wun ng’ɔ fa kpɔli e ti’n ɔ nin like nga i sɔ’n yo i ye’n, Ɲanmiɛn nuan ijɔfuɛ’m be ndɛ nga be klɛli be Biblu’n nun’n, be yiyi nun. Sanngɛ atrɛkpa’n ndɛ sɔ’m be wie fi yiyiman nun kɛ nga Ezai 53:3-12 ɔ fa yiyi nun’n sa. Ezai kannin Ɲanmiɛn i Sufuɛ’n i ɲrɛnnɛn ng’ɔ́ wún i’n i ndɛ. Kpɛkun wafa nga Klist wú ɔ nin suralɛ nga i sɔ’n ti’n, i niaan nga be kpali be sieli be ngunmin’n ɔ nin be nga be o i “bua’m be wie” be nun’n bé ɲɛ́n i’n, ɔ yiyili nun.—Zan 10:16.
2. ?Ngue yɛ Ezai i ndɛ ng’ɔ kannin’n, ɔ kle ɔ? ?Yɛ i sɔ’n yó e sɛ?
2 Afuɛ 700 tra su kwlaa naan b’a wu Zezi’n, Zoova maan Ezai kannin kɛ i Sufuɛ’n su kpɔcimɛn i le. Naan kannzɛ bɔɔ bé klé i ɲrɛnnɛn sɛ’n, ɔ nin Ɲanmiɛn bé nánti titi. I sɔ’n kle kɛ Zoova lafi i Wa’n su kpa. Ɲanmiɛn nuan ijɔfuɛ’n i ndɛ nga é wá yíyí nun yɛ’n, ɔ́ wlúwlú e wun dan. Kpɛkun ɔ́ yó maan é láfi Ɲanmiɛn su kpa ekun.
“Be yoli i finfin” kpɛkun b’a “bumɛn i like fi”
3. ?Ngue ti yɛ Zuifu mun yɛ ɔ fata kɛ be sɔ Zezi nun klanman ɔn? ?Sanngɛ wafa sɛ yɛ be sɔli i nun ɔn?
3 An kanngan Ezai 53:3 nun. Ɲanmiɛn i Wa kunngba cɛ’n i junman ng’ɔ di i Si wun lɔ’n, ɔ yo i fɛ kpa. Sanngɛ ɔ nin i sɔ ngba’n, ɔ bali asiɛ’n su wa. Ɔ wa fɛli i wun kpɔli klɔ sran’m be ti naan b’a ɲan be ti sa tɛ’n nin wie’n be sa nun. Kɛ ɔ yoli sɔ’n, maan e bu wafa i wun fa yoli i’n i sin kan e nian! (Filipfuɛ Mun 2:5-8) Moizi mmla’n m’ɔ se kɛ be yi tɛ man Ɲanmiɛn’n, ɔ ti kɛ Zezi i tɛ liɛ’n i wawɛ sa. Sanngɛ Zezi i tɛ liɛ’n ti yɛ maan Ɲanmiɛn yáci klɔ sran’m be sa tɛ’n cɛ́ be mlɔnmlɔn ɔn. (Ebre Mun 10:1-4) ?Ɔ maan ɔ nin i fataman kɛ sran’m be sɔ i nun naan be yi i ayɛ? ?I li’n, nán Zuifu mɔ i blɛ sɔ nun’n be su minndɛ Mɛsi mɔ Ɲanmiɛn seli be kɛ ɔ́ bá’n, yɛ ɔ fata kɛ be sɔ i nun naan be yi i ayɛ ɔ? (Zan 6:14) Sanngɛ Zuifu’m b’a yoman sɔ. Kɛ nga Ezai fa kannin’n sa’n, ‘be yoli Klist i finfin,’ b’a “bumɛn i like fi.” Akoto Zan klɛli i kɛ: “Ɔ bɛli i bɔbɔ nvle’n nun, b’a sɔmɛn i nun.” (Zan 1:11) Akoto Piɛli liɛ’n, ɔ seli Zuifu’m be kɛ: “E nannan’m be Nyanmiɛn kusu’n, ɔ yoli maan i Sran Jésus nyannin ɲrun, i yɛ an fɛ i mannin sran mun’n nin-ɔn, i yɛ kɛ Pilat waan ɔ́ yáci i nun, amu’an kplinman su, bɔ an yili i blo’n nin-ɔn. Nyanmiɛn i Sran’n, sran Nanwlɛfuɛ’n sɔ’n, an yili i blo.”—Sa Nga Be Yoli’n 3:13, 14.
4. ?Wafa sɛ yɛ Zezi sili like nga be flɛ i tukpacɛ’n niɔn?
4 Ezai kannin ekun kɛ Zezi ‘wún ɲrɛnnɛn sa tititi [ɔ́ sí like nga be flɛ i tukpacɛ’n, NW].’ I nun nga Zezi dí i junman’n asiɛ’n su wa’n, ɔ juli blɛ wie’n, ɔ fɛli. Sanngɛ b’a klɛmɛn i lika fi kɛ ɔ tɔli tukpacɛ. (Zan 4:6) Sanngɛ be nga ɔ boli jasin fɛ’n kleli be’n, ɔ sili like nga be flɛ i tukpacɛ’n m’ɔ o be su’n. Ɔ sili be aunnvuɛ yɛ ɔ yoli be nun kpanngban be juejue. (Mark 1:32-34) Ɔ maan Zezi yoli Ɲanmiɛn ndɛ nga i nuan su like. Ndɛ sɔ’n waan: “Sanngɛ kusu wuun e tukpacɛ’n yɛ ɔ fa suali ɔ, yɛ ye afɛ’n yɛ ɔ fali ɔ.”—Ezai 53:4a; Matie 8:16, 17.
“E waan wuun Nyanmiɛn su tu i fɔ”
5. ?Zuifu kpanngban be ɲrun’n ngue ti Zezi wuli ɔ? ?Yɛ ngue ti yɛ i sɔ’n yoli maan i afɛ’n ukali su ɔ?
5 An kanngan Ezai 53:4b nun. Zezi i blɛ su sran’m be dan lika b’a wunman sa nga ti yɛ ɔ wunnin ɲrɛnnɛn m’ɔ wuli’n i wlɛ. Be buli i kɛ Ɲanmiɛn yɛ ɔ su tu i fɔ ɔ. Naan i fɔ tulɛ sɔ’n ti kɛ tukpacɛ tɛ wie yɛ Ɲanmiɛn fa yili i su sa. (Matie 27:38-44) Be waan Zezi saci Ɲanmiɛn dunman. (Mark 14:61-64; Zan 10:33) E si kɛ Zezi timan sa tɛ yofuɛ annzɛ Ɲanmiɛn dunman sacifuɛ mlɔnmlɔn. Ɔ maan kɛ be seli kɛ ɔ saci Ɲanmiɛn dunman ti yɛ bé kún i’n, i m’ɔ ti Zoova i Sufuɛ’n, i afɛ’n ukali su. Afin i Si i klolɛ m’ɔ klo i’n ti dan’n. Ɔ nin i sɔ ngba’n, like nga Zoova kunndɛ kɛ ɔ yo’n yɛ ɔ loli wun yoli ɔ.—Matie 26:39.
6, 7. ?Wafa sɛ yɛ Zoova maan ‘afɛ’n’ tɔli i Sufuɛ kpa’n i su ɔ? ?Yɛ ngue ti yɛ i sɔ’n jɔli Ɲanmiɛn klun ɔn?
6 Ezai i ndɛ nun’n, sɛ ɔ se kɛ sran wie’m bé bú i kɛ ‘Ɲanmiɛn su tu Klist i fɔ’n,’ ɔ boman e nuan. Sanngɛ kɛ ɔ se kɛ ‘Anannganman bɔbɔ klun su i waan afɛ tɔ́ i su’n,’ i liɛ’n ɔ kwla bo e nuan. (Ezai 53:10) Afin Zoova bɔbɔ seli kɛ: “Amun nian, min sufuɛ [...] yɛ. Ɔ ti min sran, i yɛ n kpɛli i ɔ, i su yɛ n fa n wla’n kwlaa n gua-a.” ?Ɔ maan ngue ti yɛ Zoova “bɔbɔ i klun su i waan afɛ tɔ́ i su” ɔ? (Ezai 42:1) ?Kɛ be se kɛ afɛ ng’ɔ́ tɔ́ Zezi su’n, ɔ ti Zoova i klun su’n i bo’n yɛle benin?
7 Sɛ e kunndɛ kɛ é wún ndɛ sɔ’n i wlɛ’n, ɔ fata kɛ akplowa nga Satan kpɛli i Zoova i nglo nin asiɛ’n be sielɛ’n su’n, e wla kpɛn su. Ɔ seli kɛ i Ɲanmiɛn i sufuɛ nga be o nglo lɔ’n nin o i be nga be o asiɛ’n su wa’n nin o, sɛ be sa mian’n bé kpɔ́ci Ɲanmiɛn. (Zɔb 1:9-11; 2:3-5) Zezi w’a kpɔciman Ɲanmiɛn lele ɔ fa wuli. Ɔ maan ɔ kpɛli Satan i akplowa sɔ’n nun klanman kpa. Ɔ ti su kɛ Zoova kplinnin su kɛ Klist i kpɔfuɛ’m be kun i. Sanngɛ kɛ ɔ wunnin kɛ be su kun i Sufuɛ m’ɔ kpɛli i’n, e si jrɛiin kɛ ɔ yoli i ya. Sanngɛ kɛ Zoova nían mɔ i Wa’n w’a kpɔcimɛn i kaan sa’n, ɔ yoli i fɛ dan. (Nyanndra Mun 27:11) Asa ekun’n, ɔ si like nga i Wa’n i wie’n ti’n, sran nga be kaci be nzuɛn’n bé ɲɛ́n i’n. Ɔ maan i klun jɔli kpa.—Lik 15:7.
“Ɔ nyannin kannin mɔnnɛnmɔnnɛn i wunnɛn’n su”
8, 9. (a) ?Wafa sɛ yɛ ‘e sa tɛ bɔ e yo be’n be ti yɛ Zezi ɲannin kannin mɔnnɛnmɔnnɛn i wunnɛn’n su’ ɔ? (b) ?Yɛ wafa sɛ yɛ Piɛli kannin ndɛ kunngba sɔ’n wie ɔ?
8 An kanngan Ezai 53:6 nun. Klɔ sran mɔ be ti sa tɛ yofuɛ’n b’a bo je kɛ bua mɔ b’a mlin’n sa. Be kunndɛ kɛ bé ɲán be ti tukpacɛ’n nin wie’n mɔ Adam fa sali be’n be sa nun. (1 Piɛr 2:25) Kɛ mɔ fɔ o Adam i osu nunfuɛ’m be kwlaa be nun’n ti’n, be wie fi kwlá yoman naan like ng’ɔ fili Adam i sa’n, b’a ɲɛn i ekun. (Jue Mun 49:8) Sanngɛ klolɛ dan mɔ Zoova klo e’n ti’n, ɔ ‘fali e kwlaa e fɔnlɛ bɔ e fɔnnin’n i su afɛ’n fa guali’ i Wa m’ɔ klo i kpa’n m’ɔ ti i Sufuɛ’n i su. ‘E sa tɛ bɔ e yo be’n be ti Klist nyannin kannin mɔnnɛnmɔnnɛn i wunnɛn’n su.’ Kpɛkun ‘e fɔnlɛ mɔ e fɔn’n, i ti be sisili i wunnɛn’n.’ I sɔ ninnge mɔ Klist kplinnin be su’n, maan ɔ jrannin e sa tɛ’m be nuan, be boboli i waka’n su. Ɔ maan ɔ wuli e nuan.
9 Akoto Piɛli klɛli i kɛ: “I sɔ yolɛ ti yɛ Nyanmiɛn flɛli amun ɔn, afin amun ti, Krist bɔbɔ wunnin nyrɛnnɛn. Ɔ yoli sɔ kɛ an nian su naan an nanti i ajalɛ liɛ’n su. Krist bɔbɔ jrannin e sa tɛ’n i nuan be boboli i waka’n su naan e nin sa tɛ’n e bu, yɛ e yo sa ng’ɔ ti kpa’n.” Kpɛkun Piɛli niannin ndɛ nga Ezai kannin’n su kan guali su kɛ: “I wunnɛn susuwa’n ti yɛ maan y’a yo juejue ɔ.” (1 Piɛr 2:21, 24; Ezai 53:5) I sɔ’n yoli maan sa tɛ yofuɛ’m be nin Ɲanmiɛn be afiɛn kwla sɛ ekun kɛ nga Piɛli fa kɛnnin i ekun yɛ’n sa. I waan: “Amun ti tɛ yɛ Krist fɛ i wun yili ɔ. Ɔ yoli i kpɛ kunngba. Ɔ su yomɛn i kun. I b’ɔ ti sran kpa’n, sa tɛ yofuɛ’m be ti ɔ wuli naan ɔ́ fá amun mán Nyanmiɛn.”—1 Piɛr 3:18.
“Ɔ yoli kɛ bua bɔ be su fɛ i kɔ i kunlɛ’n sa”
10. (a) ?Zan batɛmu yofuɛ’n waan wan yɛle Zezi? (b) ?Ngue ti yɛ Zan i ndɛ ng’ɔ kannin’n ti su ɔ?
10 An kanngan Ezai 53:7, 8 nun. Kɛ Zan batɛmu yofuɛ’n wunnin Zezi m’ɔ su bɛ i wun lɛ’n, ɔ seli kɛ: ‘An nian Nyanmiɛn Bua Gbanflɛn’n b’ɔ wá fɛ́ i wun yí mɛn’n i ti tɛ’n yɛ.’ (Zan 1:29) Zan seli kɛ Zezi ti Ɲanmiɛn i bua gbanflɛn’n. Atrɛkpa’n Ezai i ndɛ nga o i klun ti yɛ maan ɔ seli sɔ ɔ. Ezai seli kɛ: “Ɔ yoli kɛ bua bɔ be su fɛ i kɔ́ i kunlɛ’n sa.” (Ezai 53:7) Ɔ seli ekun kɛ: “I bɔbɔ kplinnin su kɛ ɔ́ wú.” (Ezai 53:12) Nga e kwla fa e ɲin sie su’n, yɛle kɛ kɔnguɛ nga Zezi mannin e Wla Kpɛnlɛ Cɛn’n i su mmla’n, ɔ mɛnnin i akoto 11 nga be ti kpa’n be nzan klowa kun. Kpɛkun ɔ seli kɛ: “Ɔ ti min mmoja b’ɔ ti aenguɛ uflɛ nga Nyanmiɛn waan ɔ nin sran’m bé trá’n i nzɔliɛ. Sran sunman be ti yɛ bé gúɛ i ase ɔ, ɔ maan Nyanmiɛn yáci be sa bɔ be yoli i’n cɛ́ be.”—Matie 26:28.
11, 12. (a) Izaaki kplinnin su kɛ be fɛ i be yi tɛ. ?Ngue yɛ i sɔ’n kle e Zezi i wun ng’ɔ fa mannin’n su ɔ? (b) ?Kɛ e kɔ e Wla Kpɛnlɛ Cɛn’n i bo’n, ngue yɛ ɔ fataman kɛ e wla fi su Zoova mɔ ti Abraamu Danfuɛ’n i su ɔ?
11 Kɛ Izaaki sa’n, Zoova i klun sa’n i yolɛ’n ti’n, Zezi kplinnin su kɛ be fɛ i be yi tɛ. (Bo Bolɛ 22:1, 2, 9-13; Ebre Mun 10:5-10) Izaaki kplinnin su kɛ be fɛ i be yi tɛ, sanngɛ Abraamu yɛ i waan ɔ́ fɛ́ i yí tɛ sɔ’n niɔn. (Ebre Mun 11:17) I kunngba’n Zezi kplinnin su kɛ be kun i sanngɛ Zoova yɛ ɔ siesieli i sɔ ɔ. Kɛ Ɲanmiɛn fɛli i Wa’n fa yili tɛ’n, i sɔ’n kle kɛ ɔ klo sran’m be kpa liɛ su.
12 Zezi bɔbɔ seli kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlinman, sanngɛ ɔ nyan Anannganman nguan.” (Zan 3:16) Akoto Pɔlu klɛli i kɛ: “Nyanmiɛn kle ye kɛ ɔ klo e, afin kɛ e ti sa tɛ yofuɛ’n, e ti ɔ maan Krist wuli.” (Rɔmfuɛ Mun 5:8) I sɔ’n ti’n, kɛ e wla kpɛn Klist i wie’n su’n mɔ é yí i ayɛ’n nán maan e wla fi su le kɛ sran ng’ɔ siesieli i sɔ like’n yɛle Zoova m’ɔ ti Abraamu Danfuɛ’n. I manmanlɛ ti yɛ e kɔ e Wla Kpɛnlɛ Cɛn’n i bo ɔ.
Ɲanmiɛn i Sufuɛ’n “ɔ́ wá yó maan be nun kpanngban bé yó kpa”
13, 14. ?Wafa sɛ yɛ Zoova i Sufuɛ’n ‘yoli maan sran kpanngban be yo kpa’ ɔ?
13 An kanngan Ezai 53:11, 12 nun. Zoova kɛn i Sufuɛ m’ɔ kpɛli i’n i ndɛ se kɛ: “N sran kpa sɔ’n [...], ɔ́ wá yó maan be nun kpanngban bé yó kpa.” ?Wafa sɛ yɛ ɔ kwla yo sɔ ɔ? Ndɛ mma 12 i agualiɛ su’n tu i sɔ’n i ɲin. Ɔ se kɛ: “Ɔ kpatali sa tɛ yofuɛ’m be ti.” Adam i osu’n nunfuɛ’m be nin ‘sa tɛ yolɛ’n’ be fin be nin klun. Ɔ maan be ɲan “sa tɛ’n i akatua’n” yɛle kɛ be wu. (Rɔmfuɛ Mun 5:12; 6:23) Ɔ nin i fatali kɛ Zoova nin klɔ sran mɔ be ti sa tɛ yofuɛ’n, be siesie be afiɛn. Wafa nga Zezi “kpatali” klɔ sran’m be ti’n, Ezai ndɛ tre 53 yiyi nun klanman kpa. Ɔ se kɛ: “E fɔ b’ɔ fata kɛ be tu ye naan y’a nyan aunjuɛ’n yɛ ɔ tɔli i su ɔ. Yɛ i wunnɛn’n susuwa’n nin i kannin’m be ti yɛ maan e yo juejue ɔ.”—Ezai 53:5.
14 E sa tɛ mɔ Klist fali be m’ɔ wuli e ti’n ti’n, ‘sran kpanngban be yoli kpa.’ Pɔlu klɛli i kɛ: “Nyanmiɛn wun kɛ ɔ ti kpa kɛ i wafa kwlaa ng’ɔ ti’n, Krist kusu yo sɔ. Yɛ ɔ siesieli i [nin] sran mun nin ninnge’m be kwlaa be afiɛn Jésus nun. Kɛ Jésus wuli waka’n su’n, Nyanmiɛn siesieli sa ng’ɔ o i nin like nga be o asiɛ’n su wa nin nyanmiɛn su lɔ’n be kwlaa be afiɛn, ɔ maan sa fi nunman lɛ kun.”—Kolɔsfuɛ Mun 1:19, 20.
15. (a) ?Wan mun yɛle ‘like nga be o Ɲanmiɛn su lɔ’n’ mɔ Pɔlu kannin be ndɛ’n? (b) ?Kɛ e tran e Wla Kpɛnlɛ Cɛn’n i bo’n, wan’m be ngunmin yɛ be kwla di kpaun’n yɛ be nɔn nzan’n niɔn? ?Yɛ ngue ti ɔ?
15 “Like nga be o nyanmiɛn su lɔ’n” yɛle Klistfuɛ nga Ɲanmiɛn kpa be sie be ngunmin mɔ be nin Klist bé dí famiɛn ɲanmiɛn su lɔ’n. Klist i mmoja maan, Zoova siesieli i bɔbɔ ɔ nin be, be afiɛn’n. Klistfuɛ nga ‘Ɲanmiɛn flɛ be’n’ ɔ “bu be sran kpa, ɔ maan bé nyán nguan.” (Ebre Mun 3:1; Rɔmfuɛ Mun 5:1, 18) Kɛ ɔ yo sɔ’n, Ɲanmiɛn fa be kaci kɛ i klun ba sa. Ɲanmiɛn wawɛ’n kle be weiin kpa kɛ like nga Ɲanmiɛn ‘fá mán Krist’n, bé bó be dunman nun wie.’ (Rɔmfuɛ Mun 8:15-17; Sa Nglo Yilɛ 5:9, 10) Be kaci ‘Izraɛlfuɛ nga be ti Ɲanmiɛn liɛ sakpa’n,’ i nunfuɛ. Be yɛ Ɲanmiɛn nin be tra ‘aenguɛ uflɛ’n’ niɔn. (Zeremi 31:31-34; Galasifuɛ Mun 6:16) Ɔ maan, kɛ be kɔ e Wla Kpɛnlɛ Cɛn’n i bo’n, be di kpaun’n yɛ be nɔn nzan’n mɔ be ti nzɔliɛ ninnge’n. Nzan sɔ’n i su ndɛ nga Zezi kannin’n yɛ: ‘Like ng’ɔ o klowa nga nun’n, ɔ ti min mmoja, ɔ ti aenguɛ uflɛ nga Nyanmiɛn waan ɔ nin amún trá’n, i nzɔliɛ, amun ti yɛ be su wa guɛ i ase ɔ.’—Lik 22:20.
16. ?‘Like nga be o asiɛ’n su wa’n’ yɛle benin? ?Wafa sɛ yɛ Zoova bu be sran kpa ɔ?
16 ‘Like nga be o asiɛ’n su wa’n’ yɛle be nga bé ɲán anannganman nguan asiɛ’n su wa mɔ be ti Zezi i bua’m be wie mun’n. Be kusu’n, Zoova i Sufuɛ’n i dunman nun’n, Zoova bu be sran kpa. Be lafi Zezi m’ɔ fɛli i wun kpɔli sran’m be ti’n i su. I su mɔ be lafi’n kle kɛ “be kpuli be tralɛ mun Bua Gbanflɛn’n i mmoja’n nun yɛ be fieli.” Ɔ maan, Zoova bu be sran kpa. Kannzɛ ɔ faman be kaciman kɛ i klun ba sa’n sanngɛ be kaci i janvuɛ. Yɛ ɔ́ yó maan bé fín “afɛ dan’n” nun bé fíte. I sɔ’n ti be cenjele like. (Sa Nglo Yilɛ 7:9, 10, 14; Zak 2:23) Be boman be dunman aenguɛ uflɛ’n nun. Yɛle kɛ ɲanmiɛn su lɔ tranlɛ’n timan be liɛ. Ɔ maan, kɛ be tran e Wla Kpɛnlɛ Cɛn aɲia’n i bo’n, be tran aɲinyiɛ nun. Be diman kpaun’n yɛ be nɔnman nzan’n.
Maan e la Zoova nin i Sufuɛ m’ɔ fɛ i wla’n guɛ i su’n, be ase lele
17. ?Wafa sɛ yɛ Ɲanmiɛn nuan ijɔfuɛ Ezai i ndɛ nga e suannin’n, ɔ uka e maan e ɲin o cɛn nga é wlá kpɛ́n Zezi i wie’n su’n, i sin kpa ɔ?
17 Ɲanmiɛn nuan ijɔfuɛ Ezai, i ndɛ ng’ɔ kannin be Ɲanmiɛn i Sufuɛ’n su mɔ e yiyili nun’n, ɔ yoli e ye dan. Ɔ maan, e ɲin wo cɛn nga é wlá kpɛ́n Klist i wie’n su’n, i sin kpa. Ndɛ sɔ mɔ e yiyili nun ti’n, ‘e kpɛ e nyin nian Jésus mɔ e Nyanmiɛn sulafilɛ’n fin i mɔ i yɛ maan é láfi i su lele gúɛ i ti nin i bo’n.’ (Ebre Mun 12:2) E wunnin i wlɛ kɛ Ɲanmiɛn Wa’n i ɲin timan kekle. Ɔ timan kɛ Satan sa. Kɛ Zoova kle i atin’n, ɔ yo i fɛ. I liɛ’n, ɔ si kɛ Zoova yɛ ɔ sie mɛn wunmuan’n niɔn. Kusu’n, e wunnin kɛ, i nun mɔ Zezi o asiɛ’n su wa m’ɔ́ bó jasin fɛ’n, ɔ sili sran’m be aunnvuɛ. Ɔ yoli be juejue yɛ ɔ ukali be naan b’a kwla fa Ɲanmiɛn i atin’n su. I sɔ m’ɔ yoli’n kle kɛ, kɛ ɔ́ wá yó Mɛsi’n i Sielɛ’n i su famiɛn mɛn uflɛ nun’n, ‘ɔ́ yó maan asiɛ’n sufuɛ’m be kwlaa bé sí sa kpa yolɛ’n i atin’n.’ (Ezai 42:4) I m’ɔ ti “mɛnmɛn’m be like m’ɔ kpaja be atin’n su’n,” wafa ng’ɔ wlɛli i wun ase boli Ɲanmiɛn Sielɛ jasin fɛ’n, ɔ fata kɛ e nian su. Yɛle kɛ maan e kusu’n, e bo jasin fɛ’n juejue su asiɛ wunmuan’n su.—Ezai 42:6.
18. ?Ngue ti yɛ Ɲanmiɛn nuan ijɔfuɛ Ezai i ndɛ ng’ɔ kannin ti’n, e si Zoova nin i Sufuɛ kpa’n be ye dan ɔn?
18 Ezai i ndɛ’n maan e wun like kun wlɛ kpa ekun. Yɛle kɛ, kɛ Zoova sunmɛnnin i awlɛn su ba asiɛ’n su wa kɛ ɔ wun ɲrɛnnɛn lele naan ɔ yi e ti tɛ’n, w’a yoman pɔpɔ w’a manman Zoova. I Wa’n i afɛ m’ɔ wunnin i’n, w’a yomɛn i fɛ. Sanngɛ kɛ ɔ wunnin kɛ Zezi w’a kpɔcimɛn i lele fa wuli’n, i sɔ liɛ’n, ɔ yoli i fɛ. Ɔ fata kɛ e kusu ɔ yo e fɛ wie. Afin Klist i ajalɛ’n ti maan Zoova dunman’n yoli sanwun’n. Ɔ kleli kɛ Zoova yɛ ɔ fata kɛ ɔ sie nglo nin asiɛ’n sakpa naan Satan ti atofuɛ. Sanngɛ, nɛ́n i ngba ɔ. Afin Zezi suali e sa tɛ’n kwlaa yɛ ɔ fɛli i wun kpɔli e ti. I sɔ mɔ yoli’n ti’n, i niaan mɔ Ɲanmiɛn fɛli i wawɛ’n mannin be mɔ be ti kɛ bua akpasua kaan kun sa’n, Zoova bu be sran kpa. Zezi i bua be wie’m be kusu’n Zoova bu be sran kpa. I sɔ’n ti’n, kɛ é yía e Wla Kpɛnlɛ Cɛn’n i bo’n, nán maan Zoova nin i Sufuɛ kpa’n be asenna’n wie e nuan nun.
?Wafa sɛ amún tɛ́ su ɔ?
• ?Kɛ be se kɛ Ɲanmiɛn “klun su” yɛ ‘afɛ tɔli’ i Wa’n su’n, i bo’n yɛle benin?
• ?Wafa sɛ yɛ ‘e sa tɛ mɔ e yo be’n ti ezi ɲannin kannin mɔnnɛnmɔnnɛn i wunnɛn’n su ɔ’?
• ?Wafa sɛ yɛ Ɲanmiɛn Sufuɛ’n yoli maan ‘sran’m be nun kpanngban bé yó kpa’ ɔ?
• ?Wafa sɛ yɛ Ɲanmiɛn nuan ijɔfuɛ Ezai i ndɛ nga e yiyili nun yɛ’n ti’n, amun ɲin tran e Wla Kpɛnlɛ Cɛn’n su ɔ?
[Foto, bue 26]
“E yoli i finfin, y’a bumɛn i like fi.”
[Foto, bue 28]
“I bɔbɔ kplinnin su kɛ ɔ́ wú.”
[Foto, bue 29]
Be nga be ti “bua’m be wie” mun’n, be tran e Wla Kpɛnlɛ Cɛn’n i bo aɲinyiɛ nun.