Like nga ti yɛ e tran e Min’n i aliɛ’n i dilɛ’n i bo’n

1, 2. ?Afuɛ nga be flɛ i 33 nun, Nisan’n i le 14 su’n i nnɔsua nun’n, ngue yɛ Zezi yoli ɔ? (An nian desɛn ng’ɔ o kan like suanlɛ’n bo i bo lɛ’n.)

AFUƐ nga be flɛ i 33 nun’n, Nisan’n i le 14 su’n i nnɔsua nun’n, Zezi nin i sɔnnzɔnfuɛ’m be yiali be dili Delɛ cɛn’n. Kɛ ɔ́ yó sɔ’n, nn anglo ba’n, ɔ ta kpa. Yɛ ɔ kpaja Zerizalɛmu klɔ’n su. Kɛ bé dí cɛn sɔ’n, nn Zoova deli Izraɛlifuɛ mun Eziptifuɛ’m be sa nun w’a di afuɛ 1.500. Zuifu’m be di Delɛ cɛn’n be fa kpɛn be wun wla. Kɛ Zezi nin i sɔnnzɔnfuɛ 11 bé dí like’n, ɔ kpɛli cɛn uflɛ ngunmin kun i dilɛ ba. Cɛn sɔ’n yɛ i sɔnnzɔnfuɛ’m bé wá yía bé dí i afuɛ kwlaa siɛn’n niɔn. Kɛ bé wá dí’n, be wla kpɛ́n Zezi i wie’n su.a​—Mat. 26:1, 2.

² Zezi fali kpanwun mɔ kpanwun ayre nunman nun’n, kpɛkun, ɔ srɛli Ɲanmiɛn. Kɛ ɔ srɛli Ɲanmiɛn wieli’n, ɔ bubuli nun fa mɛnnin i sɔnnzɔnfuɛ mun naan w’a se be kɛ: “An fa di.” I sin’n, Zezi fali klowa kun mɔ be guali nun divɛn’n. Kpɛkun, ɔ srɛli Ɲanmiɛn ekun. I sin’n, ɔ fa mannin be yɛ ɔ seli be kɛ: “Amun kwlaa an nɔn nzan ng’ɔ o nun’n.” (Mat. 26:26, 28) Kpanwun nin divɛn mɔ Zezi fa mɛnnin i sɔnnzɔnfuɛ mun’n, be ti nzɔliɛ like. Kɔnguɛ sɔ’n nun’n, Zezi kleli i sɔnnzɔnfuɛ nanwlɛfuɛ 11 be ninnge kpanngban kpa.

3. ?Kosan benin mun yɛ like suanlɛ nga wá tɛ́ be su ɔ?

³ Zezi kunndɛli kɛ i sɔnnzɔnfuɛ’m be wla kpɛn i wie’n su. Kɛ ɔ́ kɔ́ i ɲrun’n, be wla kpɛnlɛ cɛn sɔ mɔ be yia be di’n, be wa flɛli i kɛ “e Min’n i aliɛ’n.” (1 Kor. 11:20) Kosan nga e kwla fa usa e wun’n yɛle kɛ: ?Ngue ti yɛ ɔ fata kɛ e wla kpɛn Zezi i wie’n su ɔ? ?Ngue yɛ kpanwun’n nin divɛn’n be ti be nzɔliɛ ɔ? ?Wafa sɛ yɛ e kwla buabua e wun e Wla kpɛnlɛ cɛn aɲia’n i blɛ’n nun ɔn? ?Wan mun yɛ be kwla di kpanwun’n, kpɛkun be kwla nɔn nzan’n niɔn? ?Like nga Ɲanmiɛn fa sie e ɲrun mɔ e wla o su kɛ é ɲɛ́n i’n, wafa sɛ yɛ e kwla kle kɛ e bu be like dan ɔn?

LIKE NGA TI YƐ Ɔ FATA KƐ E WLA KPƐN ZEZI I WIE’N SU’N

4. ?Kɛ Zezi toli e ti’n ti, ngue yɛ e lafi su kɛ cɛn wie lele é ɲɛ́n i ɔ?

⁴ Sa tɛ mɔ Adam nin Ɛvu be yoli’n ti’n, fɔ o e kwlakwla e nun yɛ e wu. (Rɔm. 5:12) I sɔ’n ti, sran fi kwlá manman Ɲanmiɛn i like kɛ ɔ́ fá tó i bɔbɔ i ti. Yɛ sran kun sa de i niaan uflɛ ɔ, ɔ yoman ye. (Jue. 49:6-9) Sanngɛ Zezi liɛ’n, fɔ nunmɛn i nun. Kɛ ɔ wuli mɔ i mmoja’n guali ase’n, ɔ toli e ti. I sin’n, ɔ sɛli i sin ɲanmiɛn su lɔ ko jrannin Ɲanmiɛn ɲrun. I sɔ’n ti, e lafi su kɛ cɛn wie lele’n, é ɲán nguan tititi. Yɛle kɛ fɔ su tranman e nun kun, yɛ e su wuman kun.​—Rɔm. 6:23; 1 Kor. 15:21, 22.

5. (a) ?Ngue yɛ Ɲanmiɛn nin Zezi be yoli m’ɔ kle kɛ be klo e ɔ? (b) ?Ngue ti yɛ ɔ fata kɛ e tran e Wla kpɛnlɛ cɛn aɲia’n i bo ɔ?

⁵ Ɲanmiɛn klo sran mun. I ti yɛ ɔ fali Zezi mannin naan ɔ to e ti ɔ. (Zan 3:16) Zezi kusu klo sran mun wie. I ti yɛ ɔ fɛli i wun toli e ti ɔ. I nun m’ɔ nin a baman asiɛ’n su wa bɔbɔ’n, ɔ kleli kɛ ɔ klo sran mun. Ɔ seli kɛ: “Kɛ n wo sran’m be afiɛn’n, ɔ yo min fɛ.” (Nya. 8:30, 31) Like nga Ɲanmiɛn nin Zezi be yoli’n, ɔ yo e fɛ dan. I sɔ’n ti, e kunndɛ kɛ é trán e Wla kpɛnlɛ cɛn aɲia’n i bo. Zezi bɔbɔ seli kɛ: “An yo i kɛ nga n yo i yɛ’n sa, maan amun wla kpɛn n su.”​—1 Kor. 11:23-25.

LIKE NGA KPANWUN NIN NZAN’N BE TI BE NZƆLIƐ’N

6. ?Kpanwun nin nzan nga Zezi fa mɛnnin i sɔnnzɔnfuɛ mun’n, be ti i wunnɛn’n ɔ nin i mmoja’n jrɛiin?

⁶ Kɛ Zezi nin i sɔnnzɔnfuɛ’m bé dí like’n, w’a yiman atrɛ naan i wunnɛn’n kaci kpanwun. Yɛ w’a yiman atrɛ naan i mmoja’n kaci nzan. Kɛ ɔ́ fá kpanwun’n mɛ́n i sɔnnzɔnfuɛ mun’n, ɔ seli kɛ: “Kpaun ng’ɔ o yɛ’n ti min wunnɛn’n i nzɔliɛ.” Kpɛkun kɛ ɔ́ fá nzan’n mán be’n, ɔ seli kɛ: “Like ng’ɔ o klowa nga nun’n, ɔ ti min mmoja, ɔ ti aenguɛ uflɛ nga Nyanmiɛn waan ɔ nin amun tra’n, i nzɔliɛ.” (Lik 22:19, 20) I sɔ’n kle weiin kɛ kpanwun’n nin nzan’n be ti like nzɔliɛ.

7. ?Ngue ti yɛ kɛ é yó e Wla kpɛnlɛ cɛn aɲia’n, e fa kpanwun mɔ kpanwun ayre nunman nun’n niɔn?

⁷ Delɛ cɛn dilɛ’n i kpanwun kunngba’n yɛ Zezi bubuli nun fa mɛnnin i sɔnnzɔnfuɛ mun ɔn. Kpanwun ayre nunman nun. (Tul. 12:8) Ɲanmiɛn Ndɛ’n fa kpanwun ayre’n sunnzun sa tɛ’n. (Mat. 16:6, 11, 12; Lik 12:1) Kɛ Zezi fa kpanwun mɔ kpanwun ayre nunman nun’n sunnzun i wunnɛn’n, i su ɔ. Afin, fɔ nunmɛn i nun. (Ebr. 7:26) I sɔ’n ti, kɛ é yó e Wla kpɛnlɛ cɛn aɲia’n, e fa kpanwun mɔ kpanwun ayre nunman nun’n.

8. ?Ngue yɛ nzan nga be fa di e Min’n i aliɛ’n, ɔ ti i nzɔliɛ ɔ?

⁸ Nzan nga Zezi fa mɛnnin i sɔnnzɔnfuɛ mun kɛ be nɔn’n, ɔ ti i mmoja’n i nzɔliɛ. Divɛn ɔkwlɛ yɛle nzan sɔ’n. Andɛ kusu kɛ é yó e Wla kpɛnlɛ cɛn aɲia’n, divɛn ɔkwlɛ yɛ e fa ɔ. Zerizalɛmu lɔ lika nga be flɛ i kɛ Gɔlgota’n i su lɔ yɛ be kunnin Zezi ɔ. Zezi i mmoja mɔ guali ase’n ti’n, Ɲanmiɛn “yáci [sran mun] be sa bɔ be yoli i’n cɛ́ be.” (Mat. 26:28; 27:33) ?Sɛ e bu tɛ mɔ Zezi fɛli i wun yili’n i like dan’n, ngue yɛ é yó ɔ? E Wla kpɛnlɛ cɛn aɲia’n i blɛ’n nun’n, é búabúa e wun naan é trɛ́n i bo. ?Wafa sɛ yɛ e kwla buabua e wun ɔn?

WAFA NGA E KWLA BUABUA E WUN’N

9. (a) ?Biblu’n i bue ng’ɔ fata kɛ e kanngan be nun e Wla kpɛnlɛ cɛn aɲia’n i blɛ’n nun’n, ngue ti yɛ ɔ fata kɛ e kanngan be nun ɔn? (b) ?Wafa sɛ yɛ a bu tɛ mɔ Zezi fɛli i wun yili’n niɔn?

⁹ Biblu’n nun ndɛ mma ng’ɔ fata kɛ e kanngan be nun e Wla kpɛnlɛ cɛn aɲia’n i blɛ’n nun’n, be o fluwa Maan e nian Ɲanmiɛn Ndɛ’n nun cɛn kwlaa i nun. Maan e kanngan Biblu’n nun ndɛ mma sɔ’m be nun, yɛ e bu be su akunndan. Wafa nga e kwla buabua e wun’n i kun yɛ ɔ o lɛ ɔ. Sɛ e yo sɔ’n, é wún sa nga be juli Zezi su’n be wlɛ. Aniaan bla kun seli kɛ: “Min ɲin o e Wla kpɛnlɛ cɛn aɲia’n i sin kpa. Afuɛ kwlaa nun kɛ n trɛn i bo’n, ɔ yo min fɛ dan. Min wla kpɛn blɛ mɔ bé yó min si’n i sɛ’n su. [...] Kɛ n wunnin i saka m’ɔ la lɛ’n, yɛ n wunnin i wlɛ kɛ e ti kpɔlɛ tɛ mɔ Zezi yili’n, ɔ ti kpa dan ɔn. [...] I yo, n si wie’n i su ndɛ nga Biblu’n kan’n i kpa. Yɛ n yiyi nun n kle sran mun titi. Sanngɛ, kɛ min sran sacili mɔ m buli ninnge nga e ti kpɔlɛ tɛ’n ti, e kwla ɲan be’n i akunndan’n, min wla guali ase dan.” Like nga e ti kpɔlɛ tɛ mɔ Zezi fɛli i wun yili’n ti é ɲɛ́n i’n, maan e bu i akunndan e Wla kpɛnlɛ cɛn aɲia’n i blɛ’n nun. Sɛ e yo sɔ’n, é klé kɛ e su buabua e wun.

10. ?E Wla kpɛnlɛ cɛn aɲia’n i blɛ’n nun’n, ngue ekun yɛ e kwla yo ɔ?

¹⁰ Wafa nga e kwla buabua e wun ekun’n yɛle kɛ, maan e fa blɛ kpanngban e bo jasin fɛ’n. I wie yɛle kɛ, e kwla yo cɛn kunngun atin bofuɛ blɛ sɔ’n nun. I liɛ’n, é kwlá yía sran kpanngban. Kɛ é kán Ɲanmiɛn nin Zezi be ndɛ é klé sran mun’n, mɔ é kán ninnge nga Ɲanmiɛn seli kɛ ɔ́ yó mán e’n be ndɛ’n, ɔ yo e fɛ dan. Afin e si kɛ like nga Zoova se kɛ e yo’n, yɛ e su yo ɔ.​—Jue. 148:12, 13.

11. ?Ngue ti yɛ Pɔlu se kɛ Klistfuɛ nga be o Korɛnti lɔ’n, be nun wie’m be saci e Min’n i wunnɛn nin i mmoja’n niɔn?

¹¹ Kɛ é búabúa e wun’n, maan e bu ndɛ nga akoto Pɔlu kan kleli Klistfuɛ nga be o Korɛnti lɔ’n i akunndan. (An kanngan 1 Korɛntfuɛ Mun 11:27-34 nun.) Pɔlu seli kɛ sran kwlaa ng’ɔ yo sa m’ɔ timɛn i nuan su’n, m’ɔ di kpanwun’n yɛ ɔ nɔn nzan’n, ɔ “saci e Min’n i wunnɛn nin i mmoja’n.” I sɔ’n ti’n, sɛ Ɲanmiɛn kpali sran kun sieli i ngunmin’n, ɔ fata kɛ “ɔ dun mmua niɛn i bɔbɔ wun kpa.” Sɛ w’a yoman sɔ’n, ɔ kwla “kpɛ saɛ mɛn i bɔbɔ wun.” Atrɛkpa’n, Korɛnti lɔ Klistfuɛ’m be nun wie’m be di aliɛ, yɛ be nɔn nzan be bo naan b’a ba e Min’n i aliɛ’n i dilɛ. Wie’m be liɛ kusu atrɛkpa’n, aɲia’n i bo lɔ yɛ be yo sɔ ɔ. I sɔ ti’n, be ɲin tranman aɲia’n i su kpa.

12. (a) ?Be nga be yia e Min’n i aliɛ’n i wun be di’n, afɔtuɛ benin yɛ Pɔlu mannin be ɔ? (b) ?Sɛ be nga Ɲanmiɛn kpali be sieli be ngunmin’n be nun kun yo sa tɛ’n, ngue yɛ ɔ fata kɛ ɔ yo ɔ?

¹² Pɔlu mannin be nga be di e Min i aliɛ’n, be afɔtuɛ. Ɔ seli be kɛ: “An kwlá nɔn-man e Min’n i klowa’n nun naan amun kunngba’n amu’an nɔn mmusu’m be liɛ’n nun. Yɛ amun nin e Min’n kwlá wla-man asa naan amun kunngba’n amun nin mmusu mun amu’an wla asa.” (1 Kor. 10:16-21) Sɛ be nga Ɲanmiɛn kpali be sieli be ngunmin’n be nun kun yo sa tɛ’n, ɔ fata kɛ ɔ kan kle asɔnun kpɛnngbɛn mun naan be ukɛ i. (An kanngan Zak 5:14-16 nun.) Sɛ ɔ ‘yo sa kpa b’ɔ kle kɛ w’a kaci i nzuɛn’n,’ ɔ kwla di kpanwun’n yɛ ɔ kwla nɔn nzan’n i ekun. I lɛ’n nun’n, ɔ kle kɛ ɔ buman e ti kpɔlɛ tɛ mɔ Zezi fɛli i wun yili’n i like finfin.​—Lik 3:8.

13. ?Kɛ é srɛ́ Ɲanmiɛn e Wla kpɛnlɛ cɛn’n i blɛ’n nun’n, ngue ti yɛ ɔ fata kɛ e kan like nga e wla o su kɛ é ɲɛ́n i’n i ndɛ e wla nun ɔn?

¹³ Kɛ é srɛ́ Ɲanmiɛn e Wla kpɛnlɛ cɛn aɲia’n i blɛ’n nun’n, maan e kan like nga e wla o su kɛ é ɲɛ́n i’n i ndɛ e wla nun. Wafa nga e kwla buabua e wun’n, i kun ekun yɛ ɔ o lɛ ɔ. Sɛ e wla o su kɛ é kɔ́ ɲanmiɛn su o, annzɛ é trán asiɛ’n su wa o, e kunndɛ kɛ é bú tɛ mɔ Zezi fɛli i wun yili’n i like dan. I sɔ’n ti’n, sɛ sran kun bu i klun lɔ nian naan ɔ kwlá dimɛn e wun nanwlɛ weiin kɛ ɔ́ kɔ́ ɲanmiɛn su’n, ɔ fataman kɛ ɔ di kpanwun’n yɛ e nɔn nzan’n. ?Ngue yɛ maan sran kun kwla wun i wlɛ weiin kɛ ɔ kwla di e Min’n i aliɛ’n wie ɔ?

?WAN YƐ Ɔ KWLA DI KPANWUN’N YƐ Ɔ KWLA NƆN NZAN’N NIƆN?

14. ?Ngue yɛ Klistfuɛ nga Ɲanmiɛn nin be trali aenguɛ uflɛ’n, be yo ɔ?

¹⁴ Be nga be si jrɛiin kɛ Ɲanmiɛn nin be trali aenguɛ uflɛ’n, be yɛ be di kpanwun yɛ be nɔn nzan’n niɔn. Kɛ Zezi fá nzan’n mán i sɔnnzɔnfuɛ mun’n, ɔ seli kɛ: “Like ng’ɔ o klowa nga nun’n ɔ ti min mmoja b’ɔ ti aenguɛ uflɛ nga Nyanmiɛn waan ɔ nin amún trá’n i nzɔliɛ.” (1 Kor. 11:25) Ɲanmiɛn seli kɛ ɔ nin sran’m bé wá trá aenguɛ uflɛ naan aenguɛ ng’ɔ nin Izraɛlifuɛ’m be trali’n, be su diman su kun. (An kanngan Zeremi 31:31-34 nun.) Ɲanmiɛn nin Izraɛlifuɛ nga be ti i liɛ sakpa’n yɛ be trali aenguɛ sɔ’n niɔn. (Gal. 6:15, 16) Zezi i mmoja m’ɔ guɛli i ase’n i ti yɛ be kwla di aenguɛ sɔ’n i su ɔ. (Lik 22:20) Zezi yɛ ɔ ti aenguɛ sɔ’n i nun jranfuɛ’n niɔn. Klistfuɛ nga Ɲanmiɛn kpali be sieli be ngunmin’n mɔ be nin i be nanti klanman be guɛ i ti nin bo’n, be nin Zezi bé trán ɲanmiɛn su lɔ.​—Ebr. 8:6; 9:15.

15. (a) ?Wan mun yɛ Zezi nin be trali aenguɛ ɔ? (b) ?Sɛ be nanti klanman be guɛ i ti nin i bo’n, mmlusuɛ benin yɛ bé ɲɛ́n i ɔ?

¹⁵ Be nga be si jrɛiin kɛ Zezi nin be trali aenguɛ kɛ ɔ nin bé dí famiɛn’n, be yɛ be di kpaun’n yɛ be nɔn nzan’n niɔn. (An kanngan Lik 22:29 nun.) Zezi i sɔnnzɔnfuɛ nga be nantili klanman’n, be yɛ ɔ nin be trali aenguɛ sɔ’n niɔn. Be wunnin “nyrɛnnɛn ng’ɔ wunnin i’n” wie. (Fil. 3:10) Andɛ’n, be nga Ɲanmiɛn kpali be sieli be ngunmin’n, be di aenguɛ sɔ’n su wie. Ɔ maan, be nin Zezi bé dí famiɛn ɲanmiɛn su lɔ tititi. (Ngl. 22:5) I sɔ’n ti’n, be yɛ be di e Min’n i aliɛ’n niɔn.

16. An yiyi Rɔmfuɛ Mun 8:15-17 i nun kan.

¹⁶ Klistfuɛ nga Ɲanmiɛn kpali be sieli be ngunmin’n, Ɲanmiɛn wawɛ’n kle be weiin kpa be anwlɛn’n nun kɛ be ti Ɲanmiɛn i mma mun. I sɔ’n ti yɛ be di kpanwun’n yɛ be nɔn nzan’n niɔn. (An kanngan Rɔmfuɛ Mun 8:15-17 nun.) Pɔlu seli kɛ be kpan flɛ Ɲanmiɛn kɛ: “Baba!” I sɔ’n kle kɛ be nga Ɲanmiɛn kpali be sieli be ngunmin’n, be nin Ɲanmiɛn be afiɛn mantan kpa kɛ siɛ kun nin i mma mun sa. Ɲanmiɛn Ndɛ’n waan b’a “kaci kɛ Nyanmiɛn klun ba sa.” Yɛ Ɲanmiɛn wawɛ’n ‘kle be weiin kpa be anwlɛn’n nun’ kɛ be ti Ɲanmiɛn i mma mun sakpa. Nán kɛ asiɛ’n i su tranlɛ’n, ɔ yoman be fɛ ti ɔ. Sanngɛ be si kɛ “Nyanmiɛn fɛ i Wawɛ’n mannin” be naan be nin Zezi bé dí famiɛn ɲanmiɛn su lɔ. Be kwlaa be nuan ti sran 144.000. Be nunfuɛ nga be te o asiɛ’n su wa’n b’a sɔnman. (1 Zan 2:20; Ngl. 14:1) Kɛ mɔ be nin Ɲanmiɛn be afiɛn mantan kpa’n ti’n, be flɛ i kɛ “Baba!”

MAAN LIKE NGA E WLA O SU KƐ É ƝƐ́N I’N, Ɔ YO E AWLƐN SU LIKE

17. (a) ?Ngue yɛ Klistfuɛ nga Ɲanmiɛn kpali be sieli be ngunmin’n, be wla o su kɛ bé ɲɛ́n i ɔ? (b) ?Wafa sɛ yɛ be bu i sɔ liɛ’n niɔn?

¹⁷ ?A o be nga Ɲanmiɛn kpali be sieli be ngunmin’n, be nun wie? Sɛ ɔ ti sɔ’n, maan ɲanmiɛn su lɔ kɔlɛ’n, ɔ yo wɔ awlɛn su like kpa. Fa wlɛ i wɔ srɛlɛ’n nun titi. Klistfuɛ nga bé kɔ́ ɲanmiɛn su’n, Ɲanmiɛn Ndɛ’n se kɛ be ti kɛ talua mɔ b’a ‘trɛ i ase’ b’a man yasua kun sa. Yasua sɔ’n yɛle Zezi Klist. Yɛ ɔ́ wá fá atɔnvlɛ’n ɲanmiɛn su lɔ. Kɛ a kanngan ndɛ sɔ’n nun’n, a wun i wlɛ kɛ ɔ ti ɔ liɛ wie. Ɔ maan, ɔ wun blibli ɔ kɛ “atɔnvlɛ” sɔ’n i falɛ’n ju ndɛndɛ. (2 Kor. 11:2; Zan 3:27-29; Ngl. 21:2, 9-14) Asa ekun’n, kɛ Ɲanmiɛn kan wafa ng’ɔ klo be ng’ɔ kpali be sieli be ngunmin’n i ndɛ’n, a si kɛ ndɛ sɔ’n ti ɔ liɛ wie. Yɛ kɛ a kanngan Biblu’n nun mɔ a wun like nga Ɲanmiɛn se be ng’ɔ kpali be sieli be ngunmin’n mun kɛ be yo’n, Ɲanmiɛn wawɛ’n uka wɔ maan a nanti su. Ɲanmiɛn wawɛ’n ‘kle wɔ weiin wɔ kpa’ kɛ á kɔ́ ɲanmiɛn su.

18. ?Ngue yɛ be nga be ti Klist i “bua’m be wie” mun’n, be wla o su kɛ bé ɲɛ́n i ɔ? (b) ?Wafa sɛ yɛ be bu i sɔ liɛ’n niɔn?

¹⁸ Be nga be ti Klist i “bua’m be wie” mun’n, be ti “sran kpanngban kpa.” Be liɛ’n, be lafi su kɛ bé trán asiɛ’n su wa tititi. (Ngl. 7:9; Zan 10:16) ?A lafi su kɛ á trɛ́n i sɔfuɛ’m be nun wie? Sɛ ɔ ti sɔ’n, kɛ a kanngan mɛn klanman’n i su ndɛ nga Biblu’n kan’n, ɔ wun blibli wɔ kɛ ɔ ju ndɛndɛ. Blɛ sɔ’n nun’n, a nin wɔ osufuɛ nin ɔ janvuɛ’m bé trán fɔuun. Sran’m be kwlakwla bé ɲán aliɛ bé dí. Yalɛ’n, nin tukpacɛ’n, nin ɲrɛnnɛn’n, ɔ nin wie’n be su tranman lɛ kun. (Jue. 37:10, 11, 29; 67:6; 72:7, 16; Eza. 33:24) E sran kpa nga be wuli’n bé cɛ́n. (Zan 5:28, 29) Kɛ a kɛnngɛn i sɔ ndɛ mun’n, ɔ yo wɔ fɛ dan. Ɔ maan, a la Ɲanmiɛn ase. Yɛ kannzɛ a diman e Min’n i aliɛ’n wie’n, sanngɛ a trɛn i bo wie. Afin, a bu e ti kpɔlɛ tɛ mɔ Zezi fɛli i wun yili’n i like dan.

?AMÚN TRƐ́N I BO WIE?

19, 20. (a) ?Sɛ e waan é ɲán nguan titi’n, ngue yɛ ɔ fata kɛ e yo ɔ? (b) ?Sɛ e Min’n i aliɛ’n i dilɛ cɛn’n ju’n, ngue ti yɛ ɔ fata kɛ a mian ɔ ɲin trɛn i bo ɔ?

¹⁹ Sɛ e wla o su kɛ é kɔ́ ɲanmiɛn su lɔ o, annzɛ é ká asiɛ’n su wa o, ɔ fata kɛ e lafi Ɲanmiɛn Zoova nin Zezi Klist be su. Yɛ maan e bu e ti kpɔlɛ tɛ mɔ Zezi fɛli i wun yili’n i like dan. Kɛ e tran e Wla kpɛnlɛ cɛn aɲia’n i bo’n, maan e bu like nga e wla o su kɛ é ɲɛ́n i’n i akunndan. Yɛ maan e bu like cinnjin kpa nga ti yɛ Zezi wuli’n, i akunndan wie. Afuɛ 2015 nun, Avrili i le 3 su’n, ɔ ti Ya cɛn. Cɛn sɔ’n i nnɔsua nun’n, sran kpanngban kpa bé wá yía Ɲanmiɛn Sielɛ sua’m be nun, annzɛ lika uflɛ asiɛ wunmuan’n su. Kpɛkun, bé wlá kpɛ́n e Min’n i wie’n su.

²⁰ Kɛ e tran e Wla kpɛnlɛ cɛn aɲia’n i bo’n e kle kɛ e ti kpɔlɛ tɛ mɔ Zezi fɛli i wun yili’n, ɔ yo e fɛ naan e si ye. I sɔ’n ti’n kɛ e trɛn i bo’n, maan e sie e su kpa nzra nun ijɔlɛ’n i bo. I liɛ’n, é kwlá kán klolɛ mɔ Zoova klo e’n, ɔ nin ninnge kpakpa ng’ɔ seli kɛ ɔ́ yó mán e’n, be ndɛ é klé e wiengu. (Mat. 22:34-40) Nanwlɛ, sɛ e Min’n i aliɛ’n i dilɛ cɛn’n ju’n, maan e mian e ɲin e trɛn i bo.