?Wan yɛle Ɲanmiɛn?
?AMÚN tɛ́ kosan sɔ’n su sɛ? Sran sunman be bu i kɛ Ɲanmiɛn o lɛ, yɛ be su i kpɛkun be sro i. Sanngɛ sran kpanngban be simɛn i kpa. ?Sɛ amun lafi Ɲanmiɛn su’n, wafa sɛ yɛ amún tɛ́ kosan nga be lɔngɔ su yɛ’n be su ɔ?
1. ?Ɲanmiɛn o lika kwlaa?
2. ?Ɲanmiɛn le dunman?
3. ?Zezi nin Ɲanmiɛn mɔ like fi nunmɛn i sin’n be ti kun?
4. ?Min ndɛ lo Ɲanmiɛn?
5. ?Ɲanmiɛn kplin i sulɛ’n i wafa kwlaa su?
Sɛ amun fa kosan sɔ mun usa sran mun’n, ndɛ nga bé kán’n bó amun nuan. Afin sran kun le i ndɛ liɛ m’ɔ́ kán ɔn. Ɔ maan, sɛ Ɲanmiɛn i su ato ndɛ’m b’a tru’n, ɔ boman e nuan.
Like nga ti yɛ kosan sɔ’m be su tɛlɛ’n ti cinnjin’n
Zezi Klist wunnin bla kun m’ɔ lafi Ɲanmiɛn su’n gbo kun su. Kɛ Zezi nin bla’n bé íjɔ’n, ɔ kleli kɛ ɔ ti cinnjin kɛ e si Ɲanmiɛn i su ndɛ ng’ɔ ti nanwlɛ’n. Bla sɔ’n m’ɔ ti Samarifuɛ’n wunnin i wlɛ kɛ Zezi ti Ɲanmiɛn i nuan ijɔfuɛ. Sanngɛ sa kun sɛnngɛnnin i akunndan’n. Yɛle kɛ ɔ nin Zezi be Ɲanmiɛn sulɛ wafa’n timan kun. Kɛ bla’n boli i sɔ liɛ’n su’n, Zezi tuli i ɲin weiin kleli i kɛ: “Amun Samarifuɛ mun’n, an si-man sran nga an koto i bo an mɛnmɛn i’n.” (Zan 4:19-22) Ndɛ sɔ mɔ Zezi kannin’n, ɔ kle weiin kɛ nán sran nga be su Ɲanmiɛn’n be kwlaa yɛ be si i su ndɛ ng’ɔ ti nanwlɛ’n niɔn.
?I ndɛ sɔ’n m’ɔ kannin’n kle kɛ sran fi kwlá siman Ɲanmiɛn? Cɛcɛ, nɛ́n i sɔ ɔ. Afin Zezi seli bla’n i ekun kɛ: “Be bɔ be koto e Si’n bo be mɛnmɛn i sakpa’n, bé kóto i bo bé mɛ́nmɛ́n i be akunndan’n nun nanwlɛ nun, afin be nga be manman e Si’n sɔ’n, be sɔfuɛ mun yɛ ɔ kunndɛ be-ɔ.” (Zan 4:23) ?Amun o be nga be manman Ɲanmiɛn ‘akunndan’n nun nanwlɛ nun’n,’ be nun wie?
Ɔ ti cinnjin kpa kɛ amun si kosan sɔ’n i su tɛlɛ kpafuɛ’n. ?Ngue ti ɔ? Afin Zezi i srɛlɛ kun nun’n, ɔ jrannin su kpa kɛ Ɲanmiɛn i silɛ kpa’n ti like nanndoliɛ. I waan: “Kɛ be se kɛ bé nyán anannganman nguan’n, i bo’n yɛlɛ kɛ bé sí wɔ bɔ ɔ kunngba cɛ yɛ a ti Nyanmiɛn’n nin Jésus-Krist bɔ a sunmɛnnin i’n.” (Zan 17:3) Ɔ ti weiin kɛ, sɛ amun kunndɛ kɛ cɛn wie lele amun liɛ yo ye’n, san kɛ amun a si Ɲanmiɛn i su nanwlɛ ndɛ’n!
?Sanngɛ be si Ɲanmiɛn i su nanwlɛ ndɛ’n ɔ yo ye? Ɛɛn! ?Yɛ amún yó sɛ naan amun a si i? Zezi kɛnnin i bɔbɔ i ndɛ seli kɛ: “Min yɛ n ti atin nin nanwlɛ nin nguan nin-ɔn. Sran nga w’a sin-man min nun’n, ɔ ju-man e Si wun lɔ.” (Zan 14:6) Ɔ seli ekun kɛ: “Sran fi si-man Nyanmiɛn Wa’n i Si’n, saan Ba’n bɔbɔ ɔ nin sran ng’ɔ klo kɛ ɔ́ fɛ́ i Si klé i’n, i yɛ ɔ si i-ɔ.”—Lik 10:22.
Ɔ maan sɛ amun waan amún sí Ɲanmiɛn’n, like nga Zezi Klist m’ɔ ti Ɲanmiɛn i Wa’n kle’n, ɔ fata kɛ amun nian su. Zezi bɔbɔ seli kɛ: “Sɛ an fa min ndɛ nga n kan’n su kpa’n, wuun an ti n sɔnnzɔnfuɛ sakpa, wuun amún sí ndɛ ng’ɔ ti nanwlɛ’n, yɛ ndɛ nanwlɛ sɔ’n ti amún nyán amun ti.”—Zan 8:31, 32.
?Sanngɛ wafa sɛ yɛ Zezi tɛ́ kosan nnun nga e kannin be ndɛ lɛ’n be su ɔ?
[Foto, bue 4]
?Amun si sran nga amun koto i bo amun mɛnmɛn i’n kpa?