?Ɲanmiɛn o lika kwlaa?
Wafa nga sran sunman be tɛ su’n:
◼ “Ɲanmiɛn o lika kwlaa, ɔ o like kwlaa nun. Ɔ ti kɛ aunmuan sa.”
◼ “Ɔ timan sran. Sanngɛ ɔ ti like kun mɔ sran fi wunmɛn i wlɛ ɔ.”
?Ngue ndɛ yɛ Zezi kannin ɔn?
◼ “N Si i awlo lɔ tranwlɛ’n sɔnnin.” (Zan 14:2) Zezi kannin Ɲanmiɛn ndɛ kɛ sran m’ɔ le awlo sa.
◼ “N fin e Si’n wun lɔ yɛ m bali-ɔ. Siɛn’n, n su jao mɛn nga nun ń kɔ́ i wun lɔ ekun.” (Zan 16:28) Zezi w’a bumɛn i kɛ Ɲanmiɛn ti tinmin kun m’ɔ o lika kwlaa ɔ. Sanngɛ ɔ seli kɛ Ɲanmiɛn le i tranwlɛ.
KƐ ZEZI kán Ɲanmiɛn i ndɛ’n, w’a kɛnmɛn i ndɛ kɛ like ngbɛn wie sa. Sanngɛ, ɔ kannin ndɛ kleli i. Ɔ flɛli Zoova kpɛ sunman kɛ i Si m’ɔ o ɲanmiɛn su lɔ’n. I sɔ’n kle kɛ ɔ nin Ɲanmiɛn be afiɛn’n mantan kpa.—Zan 8:19, 38, 54.
Ɔ ti su kɛ “sran fi nian wun-man Nyanmiɛn le,” naan “Nyanmiɛn ti aolia nun sran.” (Zan 1:18; 4:24) Sanngɛ, i sɔ’n kleman kɛ ɔ leman wunnɛn. Biblu’n se e kɛ: “Kɛ bɔ klɔ sran wunnɛn o lɛ’n, i kunngba nin-ɔn, aolia nun wunnɛn kusu o lɛ wie.” (1 Korɛntfuɛ Mun 15:44) ?Ɔ maan, Zoova le aolia nun wunnɛn?
Ɛɛn. Kɛ be cɛnnin Zezi’n, ɔ “ɔli nyanmiɛn bɔbɔ’n su lɔ Nyanmiɛn wun lɔ, ɔ maan kɛ é sé yɛ’n, ɔ jran e nuan.” (Ebre Mun 9:24) I sɔ’n kle e like cinnjin nɲɔn Ɲanmiɛn su. I klikli’n yɛle kɛ Ɲanmiɛn le lika kun m’ɔ tran ɔn. I nɲɔn su’n yɛle kɛ ɔ timan like ngbɛn kun sa m’ɔ o lika kwlaa ɔ.
?Ɔ maan, wafa sɛ yɛ Ɲanmiɛn kwla yo ninnge mun lika kwlaa ɔ? Yɛle kɛ Ɲanmiɛn kwla fɛ i wawɛ’n, m’ɔ ti i wunmiɛn’n m’ɔ fa di junman’n, ɔ yo ninnge mun lika kwlaa. Kɛ siɛ kun sa m’ɔ kwla fɛ i sa suɛn i mma’m be bo’n, i kunngba’n niɔn. Ɲanmiɛn kusu fɛ i wawɛ’n fa yo i klun sa’n.—Jue Mun 139:7.
Ɔ le ninnge wie mɔ Ɲanmiɛn klo be’n, ɔ nin ng’ɔ kloman be’n. Yɛ sa wie’m be kwla yo i ya annzɛ be kwla yo i fɛ. Biblu’n se kɛ Ɲanmiɛn klo i nvle’n nunfuɛ mun, naan ɔ di ninnge ng’ɔ yili be’n be su aklunjuɛ, yɛ ɔ kloman amuin sɔlɛ’n, kpɛkun kɛ be yo klunwi’n, ɔ yo i ya. (Bo Bolɛ 6:6; Mmla’n 16:22; 1 Famiɛn Mun 10:9; Jue Mun 104:31) Ɲanmiɛn di aklunjuɛ. Ɔ maan, nán ngbɛn ti yɛ Zezi seli kɛ e suan Ɲanmiɛn sɔ’n i klolɛ naan e fa e wla’n kwlaa guɛ i su’n niɔn!—Mark 12:30.a
[Ja ngua lɛ ndɛ’n]
a Sɛ amun kunndɛ kɛ amún sí ndɛ sɔ’n i su like kpa ekun’n, amun nian fluwa ?Ngue like yɛ Biblu’n kle i sakpasakpa ɔ? i ndɛ tre 1 nun. Zoova i Lalofuɛ mun yɛ be yili ɔ.
[Ndɛ kwle, bue 5]
Kɛ siɛ kun sa m’ɔ fɛ i sa’n yo like’n, Ɲanmiɛn fɛ i wawɛ’n fa yo i klun sa’n wie.