?Ɲanmiɛn kplin i sulɛ’n i wafa kwlaa su?
Wafa nga sran sunman be tɛ su’n:
▪ “Ɲanmiɛn sulɛ wafa’n kwlaa kwla yo naan y’a si Ɲanmiɛn.”
▪ “Like ng’ɔ ti cinnjin yɛle kɛ like nga sran kun i wla o su’n, ɔ nian nun yo.”
?Ngue ndɛ yɛ Zezi kannin ɔn?
▪ “An sin anuan fii’n nun, afin sɛ be sin anuan tɛtrɛ’n nun’n, be kpɛn atin dan’n bɔ i awieliɛ ti nyrɛnnɛn’n nun, yɛ be nga be fa atin sɔ’n su’n, be sɔnnin. Sanngɛ anuan nin atin nga be sin nun-ɔn be nyan nguan’n be ti kaan, yɛ be nga be kunndɛ be wun i’n, b’a sɔn-man.” (Matie 7:13, 14) Zezi w’a bumɛn i kɛ Ɲanmiɛn sulɛ wafa’n kwlaa kwla yo naan y’a si Ɲanmiɛn.
▪ “Jɔlɛ dilɛ cɛn nun’n, sran kpanngban kpa bé wá úsa n kɛ: ‘?Nannan, Nannan, ɔ dunman nun y’a kanman Nyanmiɛn ndɛ? ?Ɔ dunman nun y’a fuan-man asiɛ usu? ?Yɛ ɔ dunman nun y’a yo-man sa kekleekle mun?’ Yɛ ń sé be kɛ: ‘Amun bɔ an saci mmla’n, an fa jao min wun lɛ. N si-man amun mlɔnmlɔn.’” (Matie 7:22, 23) Nán be kwlaa nga be waan be ti Zezi i sɔnnzɔnfuɛ’n, yɛ ɔ sɔ be nun ɔn.
SRAN kpanngban be ninnge nga be lafi su’n ɔ nin be nannan’m be nzuɛn’n be ti be cinnjin kpa. ?Yɛ sɛ ninnge sɔ’m be nin Biblu’n m’ɔ ti Ɲanmiɛn Ndɛ’n be kɔman likawlɛ’n nin? Zezi kleli kɛ be nga be fa sran’m be nzuɛn’n su’n, ɔ́ yó tɛ mán be. I sɔ ti’n, ɔ seli i blɛ su Ɲanmiɛn sulɛ wafa’m be su kpɛnngbɛn’m be kɛ: “Amun nzuɛn’n i falɛ’n nun an yi Nyanmiɛn ndɛ’n blo.” Kpɛkun ɔ boli Ɲanmiɛn ndɛ nga su. I waan: “Sran nga’m be kɛn i be nuan bui su kɛ be bu n sran, sanngɛ be anwlɛn nun-man min su. Be manman min ngbɛn, yɛ be kle like nga sran’m be kan’n kɛ ɔ ti Nyanmiɛn mmla.”—Matie 15:1-9; Ezai 29:13.
Nán ninnge nga e lafi su ngunmin yɛ ɔ ti cinnjin ɔn. E aeliɛ’n kusu ti cinnjin wie. Sran wie mɔ be waan be ti Ɲanmiɛn sufuɛ’n, Biblu’n kan be ndɛ se kɛ: “Be yo be wun kɛ be si Nyanmiɛn, sanngɛ sa nga be yo’n ɔ kle-man kɛ be si i.” (Tit 1:16) Kɛ Biblu’n kán e blɛ sufuɛ’m be ndɛ’n, ɔ seli kɛ: “Bé kló mɛn dilɛ’n trá Nyanmiɛn, bé yó be wun kɛ be sro Nyanmiɛn sa, sanngɛ be su lafi-mɛn i su kɛ ɔ kwla sa yo. Nán fa ɔ wun mantan sran sɔ mun.”—2 Timote 3:4, 5.
Ɔ nin i fata kɛ e tu e klun e su Ɲanmiɛn sanngɛ nɛ́n i ngba ɔ. ?Ngue ti ɔ? Afin sran kun kwla tu i klun yo like ng’ɔ bu i kɛ ɔ ti kpa’n kusu nn ɔ timan kpa. Ɔ maan ɔ ti cinnjin kpa kɛ e si Ɲanmiɛn kpa. (Rɔmfuɛ Mun 10:2, 3) Sɛ e si Ɲanmiɛn kpa naan e nian ndɛ nga Biblu’n kan’n su e nanti’n, Ɲanmiɛn klun jɔ́ e wun. (Matie 7:21) Kɛ nga e fa wun i lɛ’n, sran ng’ɔ o Ɲanmiɛn sulɛ wafa ng’ɔ ti kpa’n nun’n, i klun akunndan’n nin i aeliɛ’n be ti kpa, yɛ like nga ɔ lafi su’n, ɔ ti su. Kɛ be se kɛ e aeliɛ’n ti kpa kusu’n, yɛle kɛ e yo Ɲanmiɛn klun sa cɛn kwlakwla!—1 Zan 2:17.
Sɛ amun kunndɛ kɛ amún sí like nga Biblu’n kle i Ɲanmiɛn su’n i kpa ekun’n, amun wun Zoova i Lalofuɛ’m be wun naan be kle amun Biblu’n nun like amun awlo lɔ. Dein su fiteman nun.
[Ndɛ kwle, bue 9]
Sran ng’ɔ o Ɲanmiɛn sulɛ wafa ng’ɔ ti kpa’n nun’n, i klun akunndan’n nin i aeliɛ’n be ti kpa, yɛ like ng’ɔ lafi su’n ɔ ti su.