?Ɲanmiɛn sulɛ wafa’n kwlaa ti kpa?

BE DIMAN Ɲanmiɛn sulɛ wafawafa’m be yalɛ mɛn nga nun. Koko nga nun wa’n, be kunndɛli Ɲanmiɛn sulɛ wafa mun. Be wunnin Ɲanmiɛn sulɛ wafa dandan 19, kpɛkun kanngan ko ju 10.000. I sɔ Ɲanmiɛn sulɛ wafa kpanngban liɛ’n ti’n, wafa nga sran kun kwla su Ɲanmiɛn andɛ’n w’a sɔn kpa. ?Ɔ maan Ɲanmiɛn sulɛ wafa nga e o nun’n, ɔ ti cinnjin man Ɲanmiɛn?

Sran wie’m be waan Ɲanmiɛn sulɛ wafawafa’m be ti kɛ akpɔ fanunfanun nga be fa fu oka kun su’n sa. Be liɛ’n nán akpɔ nga be fa su’n yɛ ɔ ti cinnjin ɔn. Afin be waan be kwlaa be kɔ lika kunngba’n. Be waan Ɲanmiɛn mɔ like fi nunmɛn i sin’n ti kunngba. Ɔ maan saan Ɲanmiɛn klun jɔ́ i sulɛ wafa’n kwlaa su.

?Ɲanmiɛn klun jɔ i sulɛ wafa’n kwlaa su?

?Ngue ndɛ yɛ Zezi Klist m’ɔ ti Ɲanmiɛn sulɛ wafa kun i nun like klefuɛ dan kpa’n, ɔ kɛn i i sɔ liɛ’n su ɔ? Ɔ seli i sɔnnzɔnfuɛ’m be kɛ: “An sin anuan fii’n nun.” ?Ngue ti ɔ? “Afin sɛ be sin anuan tɛtrɛ’n nun’n, be kpɛn atin dan’n bɔ i awieliɛ ti nyrɛnnɛn’n nun, yɛ be nga be fa atin sɔ’n su’n, be sɔnnin. Sanngɛ anuan nin atin nga be sin nun-ɔn be nyan nguan’n be ti kaan, yɛ be nga be kunndɛ be wun i’n, b’a sɔn-man.”—Matie 7:13, 14.

?Zezi su se sakpa kɛ Ɲanmiɛn sulɛ wafa wie’m be kwla fa sran mun yi i “nyrɛnnɛn’n nun”? ?Annzɛ ɔ su se kɛ saan be nga be lafiman Ɲanmiɛn su’n, be yɛ be sin anuan tɛtrɛ’n nun ɔn? ?Naan be nga be lafi Ɲanmiɛn su’n, kannzɛ be Ɲanmiɛn sulɛ wafa’n ti sɛ’n, sanngɛ be sin anuan fii mɔ be sin nun ɔn be ɲan nguan’n i nun?

Kɛ Zezi kannin kɛ atin’n ti nɲɔn cɛ’n, ɔ kɛnnin i ekun kɛ: “An sasa amun wun be nga be tɔn be wun suɛn kɛ be ti Nyanmiɛn nuan ijɔfuɛ’n be lika. Be fa bua kplo wla be wun, be ba amun wun, sanngɛ be ti gboklo be saci nnɛn mun.” (Matie 7:15) I sin’n ɔ seli kɛ: “Nán sran’m be kwlaa bɔ be flɛ min be Min’n be ngba yɛ Nyanmiɛn síe be sakpa-a, saan sran ng’ɔ yo min Si b’ɔ o nyanmiɛn su lɔ’n i klun sa’n, i yɛ ɔ́ síe be sakpa-a.” (Matie 7:21) Sɛ be flɛ sran kun kɛ Ɲanmiɛn nuan ijɔfuɛ annzɛ i waan Zezi ti i “Min’n,” be kwla se kɛ sran sɔ’n lafi Ɲanmiɛn su. I sɔ’n kle weiin kɛ Zezi su wla e su nun kɛ nán Ɲanmiɛn sulɛ i wafa’n kwlaa yɛ ɔ ti kpa ɔ. Asa kusu nán be nga be kle Ɲanmiɛn su like’n be ngba yɛ ɔ fata kɛ e lafi be su ɔ.

?Amun kwla wun atin kaan’n i wlɛ?

Ɲanmiɛn klun jɔman Ɲanmiɛn sulɛ wafa’n kwlaa su. ?Kɛ m’ɔ ti sɔ’n, wafa sɛ yɛ amun kwla wun i wafawafa kpanngban sɔ’n i nun kpafuɛ ng’ɔ kwla fa amun sie i atin kaan ng’ɔ man nguan’n su ɔ? Maan e nian sunnzun ase nga. Maan ɔ yo amun kɛ amun a mlin klɔ dan kun su sa. Amun waan bé sé sran naan ɔ kle amun atin. Sran kun m’ɔ lafi su kpa kɛ ɔ si atin’n, ɔ se amun kɛ amun wɔ bɛ su. Kun kusu waan amun wɔ fama su. Kun ekun se kɛ atin nga amun bɔbɔ amun klo kɛ bé fá su’n maan amun fa su. I sin’n, sran uflɛ fa wafa nga klɔ’n fa ti’n i nzɔliɛ ng’ɔ o fluwa su’n, ɔ fa kle amun atin kpafuɛ’n. Kpɛkun ɔ fa fluwa sɔ’n man amun naan sɛ amún kɔ́’n amun a nian su. ?Sɛ ɔ yo sɔ’n, amun su lafiman su siɛn’n kɛ amún jú amun kɔwlɛ’n sakpa?

I kunngba’n yɛle Ɲanmiɛn sulɛ wafa ng’ɔ ti kpa’n i kunndɛlɛ’n. Ɔ nin i fata kɛ e ɲan like kpa kun m’ɔ kwla kle e atin ɔn. ?Sanngɛ e kwla ɲɛn i sɔ like liɛ’n? Ɛɛn e kwla ɲɛn i. I sɔ like’n yɛle Biblu’n. Biblu’n se kɛ: “Nyanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli-ɔ. Be fa kle like, be fa kle sran mun lele be wun nanwlɛ’n, be fa tu be fɔ, be fa kle be sa nga be yo-ɔ ɔ ti kpa’n.”—2 Timote 3:16.

Atrɛkpa’n amun le Biblu’n amun aniɛn’n nun mɔ amun kwla fa kunndɛ wafa nga amun kwla su Ɲanmiɛn kpa ɔ. Zoova i Lalofuɛ mun mɔ be yi fluwa nga’n, be yi Biblu’n kpa kun. Be flɛ i kɛ Les Saintes Écritures - Traduction du monde nouveau. Sanngɛ sɛ amun timan Zoova i Lalofuɛ’n, atrɛkpa’n kɛ amún kúnndɛ Ɲanmiɛn sulɛ ng’ɔ ti kpa’n ɔ nin ng’ɔ ti tɛ’n be ngbaciɛ’n, amun kunndɛ kɛ amún fá Biblu’n uflɛ. I sɔ’n ti’n, ndɛ nga be lɔngɔ su yɛ’n be nun’n, Biblu wie mɔ Ɲanmiɛn sulɛ wafa kpanngban be ɲin yi be’n, be boboli be su.

Kɛ amún kánngan ndɛ nga bé bá lɛ’n be nun’n, amun fa like nga amun si i’n be sunnzun nga Biblu’n kan’n. Wafa nga amun kwla wun ngbaciɛ ng’ɔ o Ɲanmiɛn sulɛ kpafuɛ’n ɔ nin ng’ɔ timan su’n be afiɛn mɔ Zezi kɛnnin i ndɛ’n, nán amun wla fi su. Ɔ seli kɛ: “Waka kpa kwlaa su mma kpakpa, sanngɛ waka b’ɔ ti-man kpa’n kusu ɔ su-man mma kpakpa. Waka kpa’n ɔ kwlá su-man mma tɛtɛ, yɛ waka b’ɔ ti-man kpa’n ɔ kwlá su-man mma kpakpa.” (Matie 7:17, 18) Waka mma kpakpa nga Biblu’n waan bé fá síe “waka kpa’n” i nzɔliɛ’n, maan e fa e ɲin e sie be nun nsan su.

[Ndɛ kwle, bue 3]

Biblu’n ti kɛ lika’m be nzɔliɛ fluwa sa. Ɔ kwla uka sran kun naan w’a wun Ɲanmiɛn sulɛ kpafuɛ’n.