Like nga ti yɛ Biblu’n nun afɔtuɛ’n ti kpa man e andɛ’n

“Nyanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli-ɔ. [...] Be fa kle be sa nga be yo-ɔ ɔ ti kpa’n.”—2 TIMOTE 3:16.

BIBLU’N yoli maan sran wafawafa kpanngban be mɛn dilɛ yoli kpa. Ɔ sɔli i sɔ yolɛ’n nán andɛ sa ɔ. Biblu’n nun ndɛ mma ng’ɔ o nglo lɛ’n, ɔ kle sa nga ti yɛ Biblu’n kwla yo sran’m be ye sɔ’n. Yɛle kɛ i nun ngwlɛlɛ’n fin Ɲanmiɛn. Kannzɛ bɔbɔ klɔ sran mun yɛ be klɛli’n, sanngɛ Ɲanmiɛn bɔbɔ i akunndan’n yɛ ɔ o nun ɔn. Biblu’n se kɛ: “Afin Nyanmiɛn ndɛ nga sran’m be kannin’n, [...] i wawɛ’n yɛ ɔ fa wla be nuan yɛ be kannin-ɔn.”—2 Piɛr 1:21.

Biblu’n kwla kle atin kpa like kpanngban nun. Be nun nɲɔn yɛ. I klikli’n, ɔ kle e mɛn dilɛ ng’ɔ ti kpa’n nanwlɛ su. I nɲɔn su’n, ɔ yo maan sran kun fa ajalɛ ng’ɔ nin i fata’n naan i mɛn dilɛ’n w’a yo kpa w’a tra laa’n. Maan e fa e ɲin e sie i ninnge nɲɔn sɔ’m be su.

Like klelɛ m’ɔ bo e ɲrun atin’n

Biblu’n nun’n, Ɲanmiɛn tali nda kɛ: “Ń wá klé wɔ like, yɛ ń wá klé wɔ atin ng’ɔ ti bɔ a fa su’n. Ń wá mán wɔ afɔtuɛ, ń nían wɔ su.” (Jue Mun 32:8) Maan e sie i nzɔliɛ kɛ Ɲanmiɛn man sran’m be afɔtuɛ. Sanngɛ nɛ́n i ngba ɔ. Ɔ kle sran’m be like. I sɔ’n kusu yɛ ɔ kwla uka be naan b’a wun sa’m be bo kpa ɔ. Kɛ sran kun ko wun like nga sɛ ɔ yo’n, ɔ kwla yo i ye sakpa’n, i sɔ’n ukɛ i naan w’a diman finfin w’a yoman ninnge ngbɛnngbɛn mun.

I wie yɛle kɛ like ng’ɔ ti sran sunman be cinnjin’n, yɛle sika nin aɲrunɲan’n. Fluwa nga sran’m be kanngan nun be fa uka be wun mɔ be kle sran’m be wafa nga be kwla ɲan ɲrun’n, ɔ nin sika kpanngban’n, be diman be yalɛ. Sanngɛ Biblu’n liɛ’n, ɔ se e kɛ: “Sran’m be klo kɛ bé yó kɛ be wiengu’m be sa, [...] yɛ i kwlaa ti afɛ ngbɛn. Ɔ ti kɛ sran kun waan ɔ́ fúan aunngban’n naan ɔ́ kó trɛ́ i sa.” “Sran ng’ɔ klo sika dan’n, i nyin yi-man ng’ɔ lɛ i’n.” (Akunndanfuɛ’n 4:4; 5:9) ?I sɔ afɔtuɛ’n kwla yo e ye andɛ?

Maan e fa Akinori m’ɔ fin Zapɔn’n i su ndɛ’n, naan e wun sa nga ti yɛ Biblu’n i nun afɔtuɛ’n te yo kpa te man e andɛ’n. Ɔ trɛli i awlɛn kplili kpa naan w’a ɲan ɲrun. Ɔ maan ɔ ɲannin inivɛsite dan kun nun diplɔmu. I sin’n, ɔ ɲannin junman dan kun. Kɛ a wun i sa’n, ɔ waan nn w’a ɲɛn i ti. Sanngɛ i aɲrunɲan’n w’a mɛnmɛn i aklunjuɛ ng’ɔ kunndɛli’n. Afɛ’n yɛ ɔ tinnin i su ɔ. Ɔ maan ɔ tɔli tukpacɛ. I janvuɛ ng’ɔ nin be di junman’n b’a kwlá ukɛmɛn i. I akunndan’n sanngannin. I ti’n, ɔ yoli nzanbɔɛfuɛ. Ɔ buli i wun kunlɛ akunndan bɔbɔ. Kɛ ɔ yoli sɔ’n, ɔ nin Zoova i Lalofuɛ’m be wa boli Biblu’n nun like suanlɛ bo. Ninnge ng’ɔ suannin be’n, be yoli maan ninnge nga be ti i cinnjin’n, ɔ wa buli be wun akunndan uflɛ. W’a cɛman, i akunndan’n m’ɔ sanngannin’n wa yoli kpa. Akinori w’a fɛmɛn i wun w’a wlaman aɲinkpli nin aɲrunɲan ninnge’m be kunndɛlɛ nun kun. Ɔ maan, ɔ wunnin kɛ ɲanndra ng’ɔ o Biblu’n nun yɛ’n ti nanwlɛ. I waan: “Be wla b’ɔ gua ase’n ɔ yo maan be yo juejue.”—Nyanndra Mun 14:30.

?Ngue yɛ amun bu i kɛ ɔ ti like cinnjin kpa m’ɔ fata kɛ amun yo ɔ? ?Ngue yɛ amún yó mɔ maan amun klun jɔ́ sakpa ɔ? ?Aklunjuɛ mɔ amun kunndɛ kɛ ɔ tran amun aja’n nun’n niɔn? ?Annzɛ like nga amun ko yo naan amun mma’m b’a bo be bo kpa’n niɔn? ?Janvuɛ tralɛ’n niɔn? ?Amun mɛn dilɛ mɔ amun kunndɛ kɛ ɔ yo fɛ’n niɔn? I kwlaa ngalɛ’n be ti like kpa mɔ amun kwla yo ɔ. I kpa’n, Biblu’n wla e fanngan kɛ e yo i sɔ ninnge mun. Sanngɛ nán e fa cici e ti. Biblu’n mɔ i nun ngwlɛlɛ’n yo sran ye’n, ɔ kan like cinnjin kun mɔ sran kun kwla yo naan w’a di aklunjuɛ’n i ndɛ. I waan: “Maan ɔ nyin yi Nyanmiɛn, yɛ nanti i mmla’m be su. Like ng’ɔ fata kɛ klɔ sran kwlakwla yo’n yɛ ɔ o lɛ-ɔ.” (Akunndanfuɛ’n 12:13) Sɛ sran kun yomɛn i sɔ’n, i mɛn dilɛ’n ti ngbɛn. Kpɛkun ɔ diman aklunjuɛ, annzɛ ninnge ng’ɔ yo be’n be yoman ye. Sanngɛ Biblu’n se e kɛ: “Sran ng’ɔ fɛ i wun wla Anannganman sa nun’n, i wun jɔ i fɔuun.”—Nyanndra Mun 16:20.

Wafa nga Biblu’n maan sran’m be kaci’n

Akoto Pɔlu klɛli i kɛ: “Nyanmiɛn i ndɛ nga ɔ ko kan’n, wuun w’a kan ɔ kaci-mɛn i, ɔ maan sran’m be kaci.” Sɛ é kwlá sé’n, ɔ ti kɛ tokofi mɔ i bue nɲɔn’n ɔ la’n sa. Ɔ kwla wɔ ɔ wlu sran’n i nun lele ju i awlɛn’n nun. Ɔ maan ɔ yi i klun akunndan’n i nglo. (Ebre Mun 4:12) Biblu’n kwla kaci sran’m be mɛn dilɛ wafa’n. Afin, ɔ uka be naan be bɔbɔ be wun sran wafa nga be ti i sakpa’n, naan b’a jranman sran wafa nga be bu i kɛ be ti’n, i su. Kɛ ɔ yo sɔ’n, be nga be awlɛn ti kpa’n, bé wún i wlɛ kɛ ɔ fata kɛ be kaci be nzuɛn’n. I wie yɛle Klistfuɛ nga be o Korɛnti lɔ asɔnun’n nun laa’n. Laa’n, wie’m be ti awiefuɛ, ɔ nin nzanbɔɛfuɛ, ɔ nin bla nin bian kunndɛfuɛ sukusuku, ɔ nin sran wafa tɛ uflɛ wie mun ekun. Pɔlu seli be kɛ: “Kɛ laa amun nun sran wie’m be ti sɔ-ɔ. Sanngɛ siɛn’n, e Nyanmiɛn a wunnzin amun, [...] i wawɛ’n i fanngan nun.” (1 Korɛntfuɛ Mun 6:9-11) Zoova i wawɛ’n te le tinmin yɛ ɔ te di junman andɛ. Yɛ ɔ kwla su sran’m be bo maan be kaci like ng’ɔ fata kɛ be kaci i be mɛn dilɛ’n nun’n.

Mario m’ɔ tran Abloki lɔ’n, ɔ ti nzaje sa yofuɛ, ɔ nɔn drɔgi nga be flɛ i marijuana’n, kpɛkun ɔ yo wie atɛ. Le kun polisi bian kun deli i drɔgi’n. I sɔ’n ti’n, ɔ fali ya dan kpa yɛ ɔ yoli i like yaya kpa kpɛkun ɔ sacili i loto’n. Asa ekun’n, Mario diman junman yɛ kalɛ’n sɔnnin i su. Kɛ ɔ wunnin kɛ i ngunmin kwlá ɲanman i su sa’m be trawlɛ’n, ɔ kplinnin su kɛ ɔ́ súan Biblu’n nun like. Kɛ ɔ́ kɔ́ i ɲrun Ɲanmiɛn ninnge’m be nun’n, ɔ wa kacili. W’a nɔnman drɔgi kun yɛ w’a yomɛn i atɛ kun. W’a yoman nzaje sa mun kun. I sɔ’n boli be nga be si i laa’n be nuan. Kɛ be wun i’n, be jrɛn i be usɛ i kɛ: “?Mario, wɔ yɛle nga a o yɛ’n?”

?Ngue yɛ ɔ su sran kɛ Akinori nin Mario sa’n, be bo maan be kaci be mɛn dilɛ wafa’n mɔ i ti’n, be di aklunjuɛ ɔ? Ɔ ti weiin kɛ Biblu’n nun like suanlɛ mɔ i ti be wa sili Ɲanmiɛn’n niɔn. Saan Ɲanmiɛn yɛ ɔ kwla kle e atin ng’ɔ kwla yo e ye naan e liɛ w’a yo ye andɛ, naan y’a lafi su kɛ é ɲán anannganman nguan ɔn. Kɛ Siɛ kun sa’n, Ɲanmiɛn Zoova sin Biblu’n i lika ɔ nin e ijɔ. Ɔ se e kɛ: “Min wa, sie ɔ su, sie ɔ su naan tie min aniɛn’n. Sɛ a tie min aniɛn’n, ɔ ti ɔ nguan nyanman su salɛ. [...] Sɛ a nanti su-ɔ, ɔ ja su kpla-man. Yɛ kusu sɛ ɔ ti wanndilɛ-ɔ, a su tɔ-man. Like nga be kle wɔ’n, tra nun kpa, nán yaci nun. Fa sie, afin i yɛ ɔ ti ɔ nguan nyanman nin-ɔn.” (Nyanndra Mun 4:10-13) Be man e afɔtuɛ kɛ e kunndɛ atin nga e Yifuɛ’n kle e’n. ?Afɔtuɛ benin yɛ i kpa tra ngalɛ’n niɔn?

[Kuku/Foto, bue 7]

Afɔtuɛ wie mɔ be kwla yo e ye andɛ’n

Biblu’n man e afɔtuɛ cinnjin mɔ andɛ’n, be kwla uka e e mɛn dilɛ wafa kwlaa nun’n. Be wie mun yɛ:

• E nin e wiengu mun e tranlɛ klanman

“Like kwlaa nga an klo kɛ sran yo man amun’n, an yo i kunngba sɔ’n man be.”—Matie 7:12.

“An bu sran wie’m be sran tra amun bɔbɔ.”—Filipfuɛ Mun 2:3.

“An yo aklunyefuɛ.”—Rɔmfuɛ Mun 12:13.

• Ninnge nga be kwla saci e’n, be ɲrun jranlɛ

“Sran ng’ɔ fɛ i wun mantan ngwlɛlɛfuɛ’n, ɔ kaci ngwlɛlɛfuɛ. Sran nga kusu b’ɔ fɛ i wun mantan sinnglinfuɛ’n, ɔ kaci sinnglinfuɛ.”—Nyanndra Mun 13:20.

“Nán kɔ nzannunmunfuɛ’m be wun.”—Nyanndra Mun 23:20.

“Sran ng’ɔ ti ya fafuɛ’n, nán fa ɔ wun mɛntɛn i.”—Nyanndra Mun 22:24.

• E aja’n i takalɛ kpa

“Maan yasua kun klo i yi kɛ ɔ fa klo i bɔbɔ wun’n sa, yɛ maan mmla’m be kusu be bu be wun’m be sran.”—Efɛzfuɛ Mun 5:33.

“Maan sran’m be yo amun annvɔ, an yo be kpa, an yo amun wun aenvuɛ, an yo wɛtɛɛfuɛ, yɛ an blu sa’m be su. [...] Sa nga amun wiengu yo bɔ an wun i’n, maan ɔ sɔn amun nun, sɛ sran kun yo i wiengu sa’n, maan ɔ yaci cɛ i.”—Kolɔsfuɛ Mun 3:12, 13.

• Ba’m be ukalɛ

“Atin b’ɔ ti klanman bɔ bakan’n ko fa su’n, kle i i bakan nun. I liɛ’n, kɛ ɔ́ fá yó kpɛnngbɛn’n, ɔ su yaci ko fa-man uflɛ.”—Nyanndra Mun 22:6.

“Nja mun, amun kusu, nán an yo sa b’ɔ kun amun mma’m be ya, sanngɛ an ta be kpa e Min’n liɛ’n su, yɛ an tu be fɔ, an kle be ngwlɛlɛ.”—Efɛzfuɛ Mun 6:4.

• Kɛ ɔ ko yo naan ndɛnngan w’a tɔman’n

“Sɛ sran fa ya kan ndɛ tɛ kle wɔ naan a tɛ i su amanniɛn su’n, i ya’n ɔ jɔ. Jɔlɛ tɛ’n ɔ klɔklɔ ya.”—Nyanndra Mun 15:1.

“An dun mmua bu amun wiengu sran.”—Rɔmfuɛ Mun 12:10.

Sɛ bɔbɔ e nin e janvuɛ e nuan sɛ e wun kɛ é dí aata likawlɛ’n, maan e yo i wun fluwa. I liɛ’n, ndɛnngan su tɔman e afiɛn. I ti’n, Ɲanmiɛn sufuɛ Zeremi klɛli i kɛ: “N klɛli i tolɛ’n i wun fluwa nnyɔn, n fali min nzɔliɛ’n n sieli kun su, n kɛtɛli i ti lalofuɛ’m be nyrun yɛ n sunnzunnin sika’n toe su m mɛnnin i-ɔ.”—Zeremi 32:10.

• E nzuɛn’n i kpa yolɛ’n

“Maan amun akunndan’n tran like kwlaa ng’ɔ ti kpa’n, nin sa kwlaa bɔ sran yo-ɔ ɔ ti kpa’n be su, yɛlɛ: ‘Ndɛ nanwlɛ’n, [...] nin like ng’ɔ ti klanman’n, yɛ ndɛ nga be ti-ɔ ɔ jɔ be klun’n.’”—Filipfuɛ Mun 4:8.

Biblu’n wla e fanngan kɛ nán e bu akunndan tɛ naan e “fa sa’n kwlaa gua sran wie’m be su.” Sanngɛ e ‘nyin b’ɔ wo e Min’n i sin’n ti, e gua e wla ase.’—Zid 4, 16; Rɔmfuɛ Mun 12:12.

Sɛ e nanti ndɛ sɔ’m be su’n, kɛ é sé yɛ’n, é dí alaje kpɛkun like nga e le i’n, ɔ́ jú e. Sanngɛ nɛ́n i ngba ɔ. I sɔ’n úka e kusu naan y’a yo like nga Ɲanmiɛn kunndɛ kɛ e yo naan w’a ra e su’n. Biblu’n waan: “Mɛn’n ɔ́ yó sran kpa’m be liɛ. Bé trán nun tititi.”—Jue Mun 37:29.

[Foto mun, bue 5]

I nun mɔ Akinori te di i junman’n (bɛ su) yɛ andɛ ɔ nin i yi be su kan Ɲanmiɛn Ndɛ’n.