Maan “e tu e klun yo sran ye”!
“E ti Jésus ɔ fɛli i wun mannin naan ɔ́ yí ye sa tɛtɛ’n kwlaa nun naan e kaci i sa ti sran bɔ e wun sa tɛtɛ’n kwlaa w’a wie, bɔ e tu e klun yo sran ye.”—TIT 2:14.
1. ?Afuɛ nga be flɛ i 33 i anglo ng’ɔ suan Nisan i cɛn ba 10 su’n, kɛ Zezi juli Ɲanmiɛn sua’n nun lɔ’n, ngue yɛ ɔ yoli ɔ?
AFUƐ nga be flɛ i 33 nun’n, Nisan i cɛn ba 10 su’n, kɛ ɔ́ cɛ́ kaan’n bé wá dí delɛ cɛn’n, sran kpanngban kpa be yiali Zerizalɛmu Ɲanmiɛn sua’n nun lɔ. Be su minndɛ cɛn sɔ’n. ?Kɛ Zezi wá jú lɛ’n, ngue yɛ ɔ́ yó ɔ? Matie nin Marki yɛ Liki mɔ be klɛli Zezi i su ndɛ’n wie’n, be kwlaa be waan kɛ Zezi juli lɛ’n, ɔ fuannin aata difuɛ nin be nga be to ninnge lika sɔ’n nun lɛ’n ekun. I kpɛ nɲɔn yɛ ɔ́ fúan be yɛ. Ɔ suli sika mma kacifuɛ’m be tabli’n nin be nga be yo okunmomo atɛ’n be bia’m be bo guali. (Matie 21:12; Mark 11:15; Lik 19:45) Wafa kunngba nga i afuɛ nsan yɛ Ɲanmiɛn i sua’n i klolɛ’n ti Zezi fuannin sran mun’n, kɛ ɔ wa yoli i sɔ’n ekun’n, ɔ kle kɛ Ɲanmiɛn i sua’n i klolɛ’n nin a kanman ase.—Zan 2:13-17.
2, 3. ?Wafa sɛ yɛ e si kɛ Ɲanmiɛn sua’n i klolɛ mɔ Zezi klo i’n, w’a kaman sua’n i sanwun yolɛ ngunmin su ɔ?
2 Ndɛ nga Matie klɛli’n kle kɛ Ɲanmiɛn sua’n i klolɛ mɔ Zezi klo i’n w’a kaman sua’n i sanwun yolɛ ngunmin su. Sanngɛ ɔ yoli aɲinsifuɛ nin cɛcɛwafuɛ mɔ be bɛli i wun lɛ’n be juejue wie. (Matie 21:14) Liki ndɛ liɛ’n fa e ɲin sie i like uflɛ mɔ Zezi yoli’n su. Ɔ klɛli i kɛ: “Cɛn kwlaa [Zezi] kle be like Nyanmiɛn i sua’n nun.” (Lik 19:47; 20:1) Klolɛ mɔ Zezi kloli Ɲanmiɛn i sua’n i ɲin fiteli Ɲanmiɛn junman ng’ɔ dili’n i nun.
3 I sin’n, akoto Pɔlu klɛli fluwa kun ko mannin Titi. Ɔ yiyili nun kɛ “e ti Jésus ɔ fɛli i wun mannin naan ɔ́ yí ye sa tɛtɛ’n kwlaa nun naan e kaci i sa ti sran bɔ e wun sa tɛtɛ’n kwlaa w’a wie, bɔ e tu e klun yo sran ye.” (Tit 2:14) ?Andɛ’n, wafa sɛ yɛ e kusu e kwla “tu e klun yo sran ye” ɔ? ?Yɛ wafa sɛ yɛ Zida famiɛn kpafuɛ’m be ajalɛ’n kwla wla e fanngan ɔn?
Maan e tu e klun e bo jasin fɛ’n yɛ e kle sran’m be like
4, 5. ?Wafa sɛ yɛ Zida famiɛn nnan be tuli be klun be suli Ɲanmiɛn ɔn?
4 Aza, Zozafati, Ezekiasi nin Zoziasi be fali ajalɛ naan b’a nunnun amuin sɔlɛ’n kwlaa Zida nvle’n nun. Aza “nunnunnin amuɛn’m be sraka yiwlɛ mun nin be sua mun. Ɔ bubuli yɛbuɛ nga be takali be’n, yɛ ɔ kpɛkpɛli waka nga be sɔ be’n mun.” (2 Be Nyoliɛ 14:2) Zoova i sulɛ’n i klolɛ’n m’ɔ kunnin Zozafati kpo’n ti’n, “Zida lɔ sraka yiwlɛ lika nga be o kpɔlɛ’m be su’n nin waka bɔ be takali be bɔ be sɔ be’n, ɔ nunnunnin be kwlaa kpan.”—2 Be Nyoliɛ 17:6; 19:3.a
5 Ezekiasi siesieli i kɛ be di delɛ cɛn Zerizalɛmu lɔ cɛn ba nso. Kɛ be wieli i di’n, “Izraɛlfuɛ nga be o lɛ’n be ɔli Zida klɔ’m be su. Be ko sacili yɛbuɛ nga be takali be’n. Be bubuli waka nga be kplannin be bɔ be sɔ be’n mun. Be sacili be nga be si-man Nyanmiɛn’n be sraka yiwlɛ lika nga be o kpɔlɛ’m be su’n mun nin amuɛn sɔwlɛ mun. Be yoli i sɔ Zida nin Bɛnzamɛn akpasua’n, nin Efraim nin Manase be akpasua’m be su.” (2 Be Nyoliɛ 31:1) Kɛ Zoziasi yó famiɛn’n nn ɔ le afuɛ mɔcuɛ cɛ. Ɲanmiɛn Ndɛ’n waan: “Kɛ ɔ yoli famiɛn’n, i afuɛ mɔcuɛ su’n, bɔ wuun ɔ tɛ yo gbanflɛn’n, ɔ fɛli i wun mantannin i nannan David i Nyanmiɛn’n. Sraka yiwlɛ lika mun nin waka nga be kplan be bɔ be sɔ be’n, ɔ nin amuɛn wafa-wafa’n kwlaa, i afuɛ nnan su’n, ɔ yili be Zerizalɛm lɔ nin Zida mɛn wunmuan’n nun.” (2 Be Nyoliɛ 34:3) E wun i lɛ kɛ famiɛn nnan sɔ’m be kwlaa be tuli be klun be suli Ɲanmiɛn.
6. ?Ngue ti yɛ be kwla fa e jasin fɛ’n nga e bo’n sunnzun junman nga Zida famiɛn kpa’m be dili’n niɔn?
6 I sɔ wafa kunngba’n wie yɛ e yo i andɛ ɔ. Yɛle kɛ ninnge nga Ɲanmiɛn sulɛ wafa ng’ɔ timan su’n be kle’n mɔ i wie yɛle kɛ sran’m be sɔ amuin’n, e uka sran mun naan b’a faman be su kun. Awloawlo’m be nun jasin fɛ’n nga e bo’n maan e to sran wafa kwlaa. (1 Timote 2:4) Talua kun m’ɔ fin Azi mɛn’n nun lɔ’n, i wla kpɛn wafa nga be sua’n nun lɔ’n, i nin le ninnge kpanngban m’ɔ koto be bo manman be’n. Ɔ seli i wun kɛ ninnge kpanngban sɔ’m be kwlaa be kwlá yoman Ɲanmiɛn Kpli. Ɔ srɛli Ɲanmiɛn kpɛ sunman kɛ ɔ́ sí i sakpa. Cɛn kun’n, be boboli i anuan’n. Kɛ ɔ tikeli’n, ɔ wunnin kɛ Zoova i Lalofuɛ bla nɲɔn ɔn. Be kplinnin su kɛ bé úkɛ i naan ɔ si Ɲanmiɛn bɔbɔ i dunman mɔ yɛle Zoova’n. Kɛ ɔ sili amuin’m be su nanwlɛ ndɛ’n, nanwlɛ ɔ yoli i fɛ dan! Siɛn’n, ɔ tu i klun bo jasin fɛ’n, yɛ ɔ uka sran mun naan be si Zoova nin i klun sa’n.—Jue Mun 83:18, NW; Ju 115:4-8; 1 Zan 5:21.
7. ?Wafa sɛ yɛ e kwla nian mmla klefuɛ nga Zozafati blɛ su’n, be kleli nvle wunmuan’n nunfuɛ’m be like’n be liɛ’n su ɔ?
7 ?Kɛ é bó jasin fɛ’n awloawlo’m be nun mɔ be man e jasin bowlɛ lika kun’n, e tu e klun e di junman lele e guɛguɛ i bo? Kɛ Zozafati yoli famiɛn’n, i afuɛ nsan su’n, ɔ sunmɛnnin i awlo lɔ sran dandan nnun nin Levifuɛ ngwlan yɛ Ɲanmiɛn ɲrun jranfuɛ nɲɔn. Ɔ seli be kɛ be wɔ klɔklɔ’m be kwlaa be su naan be ko kle sran mun Zoova i mmla mun. Junman sɔ mɔ be wlali be wun ase be dili i kpa’n ti’n, nvlenvle nga be mantan be lɛ’n be sroli Zoova kpa. (An kanngan 2 Be Nyoliɛ 17:9, 10 nun.) Kɛ e kɔ awloawlo’m be nun’n, sɛ e kacikaci dɔ’n nin cɛn’n, e nin awlo kun nunfuɛ kaka é kwlá kókó yalɛ.
8. ?Ngue yɛ e kwla yo naan y’a bo jasin fɛ’n y’a kle sran kpanngban ɔn?
8 E blɛ liɛ nga nun’n, Ɲanmiɛn i sufuɛ kpanngban be yacili be tranwlɛ’m be lɛ be ɔli jasin bolɛ kan nga be di jasin bofuɛ yalɛ lɔ’n. ?E kwla yo sɔ wie? E nun wie mɔ be kwlá kɔman lika uflɛ’n, be mian be ɲin be bo jasin fɛ’n be kle be nga be o be tranwlɛ nun lɔ mɔ be kan aniɛn uflɛ’n. Aniaan bian kun m’ɔ le afuɛ 81 mɔ be flɛ i Rɔn, ɔ suannin sran like yolɛ aniɛnaniɛn 32 nun! Afin i jasin fɛ’n bowlɛ lika’n nun lɔ’n, sran’m be fin nvle wafawafa nun. Koko nun wa’n, ɔ nin bian kun nin i yi mɔ be fin sran ble mɛn’n nun wa’n, be yiali nun. Ɔ yoli be like Yoruba m’ɔ ti be klɔ aniɛn’n nun. Kɛ ɔ yoli sɔ’n, be usɛli i kɛ w’a ba sran ble mɛn’n nun wa le. Kɛ ɔ tɛli be su kɛ “cɛcɛ’n,” be usɛli kɛ ɔ yo sɛ yɛ maan ɔ kwla kan be aniɛn’n niɔn. I sɔ’n yoli maan ɔ kwla boli jasin fɛ’n kleli be klanman kpa. Be fali Biblu’n i akua ng’ɔ fa mannin be’n ndɛndɛ kpa, kpɛkun be fali be adrɛsi’n mɛnnin i. Rɔn fali adrɛsi sɔ’n mannin asɔnun ng’ɔ o be bue liɛ’n su lɔ’n i nunfuɛ mun, naan be nin be b’a kwla suan Biblu’n nun like.
9. ?Ngue ti yɛ kɛ é bó jasin fɛ’n ɔ ti cinnjin kɛ e kanngan Biblu’n nun trele ɔ? An fa sa kun yiyi nun.
9 Like klefuɛ nga Zozafati seli be kɛ be sinsin nvle wunmuan’n nun’n, kɛ bé kɔ́’n “be fali Nyanmiɛn i mmla fluwa’n be ɔli.” Kɛ mɔ Biblu’n ti Ɲanmiɛn Ndɛ’n ti’n, e mian e ɲin e fa kle sran’m be like mɛn wunmuan’n nun. Kɛ é bó jasin fɛ’n, e kanngan Biblu’n nun trele naan sran’m be wun ndɛ ng’ɔ o nun’n. Awlofuɛ kun seli Linda m’ɔ ti Zoova i Lalofuɛ’n kɛ ɔ kwlá jranman anuan’n nun lɛ naan ɔ nin i b’a koko yalɛ. Afin i wun kpinndinman naan ɔ fata kɛ be trɛn i wun lɛ. Bla’n kokoli seli kɛ: “N siman like nga n yoli mɔ i ti yɛ Ɲanmiɛn yaci sa nga nun m’ɔ ju min su’n.” Linda tɛli i su kɛ: “?N kwla kan ndɛ kun n kle wɔ?” Yɛ ɔ kanngannin ndɛ ng’ɔ o Zak 1:13 nun’n kleli i ɔ. Kpɛkun ɔ kan guali su kɛ: “Ɲrɛnnɛn ng’ɔ tɔ e bɔbɔ nin e awlɛn su sran’m be su’n, ɔ finman Ɲanmiɛn.” Kɛ bla’n tili i sɔ’n, ɔ ka lɛ tɔli Linda nun. Linda dili i nanwlɛ kɛ: “Biblu’n mɔ n fali’n ti’n, n kwla fɔnvɔli bla’n. Ɔ ju wie’n, ndɛ mma nga e kanngan be Biblu’n nun’n, sran’m be nin a timan be le.” Yalɛ mɔ Linda nin bla’n be kokoli’n ti’n, siɛn’n be suan Biblu’n nun like.
Gbanflɛn nin talua’m nga be tu be klun be di Ɲanmiɛn junman’n
10. ?Andɛ’n, wafa sɛ yɛ Klistfuɛ nga be ti gbanflɛn nin talua’n be kwla nian Zoziasi i ajalɛ klanman’n su ɔ?
10 Kɛ e fa e ɲin e sie i Zoziasi i ndɛ’n su ekun’n, e wun i kɛ i gbanflɛn nun yɛ ɔ fɛli i wun wlali Ɲanmiɛn sulɛ kpafuɛ’n nun ɔn. Yɛ kɛ ɔ ɲannin afuɛ ko ju 20 yɛ ɔ fɛli i wun wlɛli i amuin sɔlɛ’n i nunnunlɛ nun kpa liɛ su ɔ. (An kanngan 2 Be Nyoliɛ 34:1-3 nun.) Andɛ kusu’n, gbanflɛn nin talua kpanngban be tu be klun be di Ɲanmiɛn junman’n i sɔ wie.
11-13. ?Ngue yɛ gbanflɛn nin talua nga be tu be klun be su Zoova andɛ’n be ajalɛ’n kwla kle e ɔ?
11 Ana le afuɛ 13 yɛ ɔ tran Angle’m be mɛn’n nun lɔ. Be suklu lɔ’n be suan blɔfuɛ kanlɛ. Ɔ tili i kɛ be su yo aɲia blɔfuɛ nun klɔ kun m’ɔ mantan be lɛ’n su’n. I si ko sunmɛnnin i aɲia sɔ’m be bo. Dɔ nga su’n, Ana le afuɛ 18. Ɔ ti titi atin bofuɛ yɛ ɔ bo jasin fɛ’n i juejue su blɔfuɛ nun. ?Amun kusu amun kwla suan aniɛn uflɛ naan amun a uka sran uflɛ mun naan b’a si Zoova?
12 Rasɛli kloli video nga be flɛ i kɛ Poursuivez des objectifs qui honorent Dieu i nianlɛ kpa. Kɛ ɔ boli Zoova sulɛ bo afuɛ nga be flɛ i 1995 nun’n, akunndan ng’ɔ bu’n, ɔ kɛnnin i ndɛ seli kɛ: “N buli i kɛ wafa nga n fa su Zoova laa’n ɔ ti kpa.” Kpɛkun ɔ kan guali su kɛ: “Kɛ n niannin video sɔ’n, n wunnin i wlɛ kɛ kannzu afuɛ kpanngban nga be sinnin lɛ’n nun’n, Zoova i sulɛ’n i su didilɛ yɛ n didili sa lelele ɔ. Ɔ nin i fatali kɛ n mian min ɲin naan n fa min wun n wla min bɔbɔ min jasin bolɛ’n nin min like suanlɛ’n nun kpa.” Siɛn’n, Rasɛli wun kɛ ɔ tu i klun su Zoova kpa tra laa’n. ?I sɔ’n i bo’n guali sɛ? Ɔ seli kɛ: “E nin Zoova e afiɛn’n w’a mantan kpa. N tu n klun n srɛ Ɲanmiɛn kpa siɛn’n, kpɛkun n nian nun n suan Biblu’n nun like kpa ɔ maan ɔ uka min. Asa ekun’n, Biblu’n nun ndɛ’m be timan ndɛ ngbɛn sa min ɲrun kun. I kwlaa sɔ’n ti’n, n di aklunjuɛ jasin fɛ’n i bolɛ’n nun kpa, yɛ kɛ n wun kɛ Zoova i ndɛ’n fɔnvɔ sran mun’n, n klun jɔ dan.”
13 Video kun ekun mɔ be flɛ i Les jeunes s’interrogent... Que vais-je faire de ma vie ? ɔ wlali gbanflɛn kun mɔ be flɛ i Liki’n i fanngan kpa wie. Kɛ Liki niannin video sɔ’n, ɔ klɛli i kɛ: “Ɔ yoli maan n wa buli wafa nga n fa di min mɛn’n i akunndan.” Ɔ seli ekun kɛ: “Laa’n, sran’m be mian min kɛ n di suklu dandan naan cɛn wie lele m’an ɲan sika. Sɛ n wie i sɔ’n i yo’n yɛ ń bú Zoova i ninnge’m be akunndan ɔn. I sɔ liɛ’n, ɔ kwlá ukaman sran kun naan ɔ nin Zoova be afiɛn’n w’a mantan kpa. Sanngɛ ɔ yo maan ɔ kpɔnzɔ.” ?Gbanflɛn nin talua mun, kɛ Ana sa’n, ngue ti yɛ amun nianman naan sɛ amun kwla fa like nga amun suɛn i suklu lɔ’n, be di Zoova i junman’n nin o? ?Yɛ ngue ti yɛ amun nianman Rasɛli i ajalɛ liɛ’n su naan be yoman like ng’ɔ kwla manman Ɲanmiɛn’n niɔn? Amun fa Liki i ajalɛ’n su naan ninnge nga be yoli kɛ aya sa gbanflɛn nin talua wie’m be ɲrun’n, amun a tɔman nun.
Kɛ be man e afɔtuɛ’n maan e fa su ndɛndɛ
14. ?Wafa sɛ yɛ Zoova kunndɛ kɛ be su i ɔ? ?Ngue ti yɛ i sɔ yolɛ’n timan pɔpɔ andɛ ɔ?
14 Sɛ Zoova i sufuɛ’m be kunndɛ kɛ ɔ sɔ sulɛ nga be su i nun klanman’n, ɔ fata kɛ be yo sanwun. Ezai seli kɛ: “Amun bɔ amun sua Anannganman i sulɛ ninnge mun’n, amun wɔ, amun wɔ, amun fite! Nán amun kan ninnge fiɛn fi. Amun fin Babilɔni lɔ fite, amun yo amun wun saun!” (Ezai 52:11) Afuɛ kpanngban ka naan Ezai w’a klɛ ndɛ sɔ’n, Famiɛn Aza m’ɔ yoli famiɛn kpa’n, ɔ nunnunnin sa sukusuku yolɛ’n Zida nvle’n nun. (An kanngan 1 Famiɛn Mun 15:11-13 nun.) Kɛ ɔ cɛli kpa ekun’n, akoto Pɔlu kan kleli Titi kɛ Zezi fɛli i wun mannin naan i sɔnnzɔnfuɛ’m be yo sanwun, naan be “kaci i sa ti sran” naan be ‘tu be klun yo sran ye.’ (Tit 2:14) Andɛ’n, sa tɛ yolɛ’n yɛ ɔ ti sran’m be nzuɛn mɛn’n nun ɔn. I sɔ’n ti’n kɛ ɔ ko yo naan gbanflɛn nin talua’m b’a ka sanwun’n, ɔ timan pɔpɔ. Afin, sran’m be ci bian nin bla nga be su kunndɛ be wun’n be foto dandan be tɛtɛ i lika’m be nun. Annzɛ be kle be televiziɔn nun, annzɛ flimu’m be nun. I ng’ɔ ti tɛtɛ bɔbɔ’n, be fa fite ɛntɛnɛti su. Ɲanmiɛn i sufuɛ’m be kwlakwla, i kpɛnngbɛn o, i gbanflɛn nin talua o, ɔ fata kɛ be mian be ɲin naan b’a nianman i sɔ ninnge mun.
15. ?Ngue yɛ ɔ kwla uka e naan y’a kpɔ sa tɛ’n niɔn?
15 Kɛ Ɲanmiɛn man e afɔtuɛ mɔ e fa su ndɛndɛ’n, i sɔ’n uka e naan y’a kpɔ sa tɛ’n. (Jue Mun 97:10; Rɔmfuɛ Mun 12:9) Aniaan kun waan bian nin bla nna nga be fa fite nzra nun’n, i nianlɛ’n i yacilɛ’n ti kɛ “dinanmo m’ɔ mantan like kun su tankaan mɔ i cuɛnlɛ’n timan pɔpɔ’n sa.” Sɛ e kunndɛ kɛ é yáci i sɔ like’n i nianlɛ’n, ɔ fata kɛ e kpɔ like sɔ’n kpa. Kɛ dinanmo nɲɔn be mantan su’n, sɛ sran kun waan ɔ́ tí be nun’n, ɔ fata kɛ i wunmiɛn’n tra dinanmo’m be liɛ’n. I kunngba’n niɔn, ɔ fata kɛ e mian e ɲin kpa naan y’a nianman bian nin bla nna nga be fa fite nzra nun’n. Sanngɛ sɛ e wun wafa nga like sɔ’n i nianlɛ’n kwla yo e abɔlɛ’n i wlɛ’n, ɔ kwla uka naan w’a yo e kain kpa. Aniaan bian kun miɛnnin i ɲin kpa naan w’a kwla yaci ɛntɛnɛti su bian nin bla nna nga be fa fite nzra nun’n i nianlɛ’n. Ɔ fɛli i ɔrdinatɛli’n sieli i lika nga i awlo lɔ sran ngba kwla wun i’n, i nun. Asa ekun’n, ɔ tali nda kɛ ɔ́ yó i wun sanwun naan ɔ́ tú i klun sú Ɲanmiɛn kpa. Ɔ fali ajalɛ uflɛ ekun bɔbɔ. Kɛ mɔ ɛntɛnɛti yɛ ɔ fa di i junman’n, ɔ tali nda kɛ saan sɛ i yi o lɛ’n yɛ ɔ́ fá dí junman ɔn.
E aeliɛ kpa’n ti kpa
16, 17. ?E Klistfuɛ aeliɛ kpa’n kwla yo be nga be wun e’n be sɛ? An fa sa kun yiyi nun.
16 Nanwlɛ, Zoova i nvle’n nun gbanflɛn nin talua’m be aeliɛ’n i kpa m’ɔ ti’n, ɔ yo sran’m be ɲɛnmɛn dan! (An kanngan 1 Piɛr 2:12 nun.) Bian kun ɔli Lɔndri lɔ Betɛli’n i nun mannzin nga be fa yi fluwa’n be su junman dilɛ. Ɔ dili junman cɛn ba kun. Kɛ ɔ yoli sɔ’n, ɔ kacili akunndan ng’ɔ bu i Zoova i Lalofuɛ’m be lika’n. I yi’n m’ɔ nin Zoova i Lalofuɛ’m be suan Biblu’n nun like’n, ɔ sieli i nzɔliɛ kɛ i wun’n yoman be kɛ laa’n sa kun. Afin laa’n, ɔ kunndɛman kɛ Zoova i Lalofuɛ’m be wɔ i awlo lɔ. Sanngɛ kɛ ɔ ko dili junman Betɛli lɔ bali cɛ’n, wafa nga be sɔli i nun klanman’n ti’n w’a yaciman be ayɛ yilɛ. Ɔ seli kɛ ndɛ tɛ fi finman be nun wie fi i nuan fiteman. Be kwlaa be yoman ninnge gblugblu su, kpɛkun ndɛnganndɛngan nunman be afiɛn. Like ng’ɔ yoli i ɲɛnmɛn dan’n yɛle wafa nga jasin fɛ’n ti’n, gbanflɛn nin talua’m be fa be wunmiɛn’n nin be blɛ’n be di junman mɔ be seman kɛ be tannin be kalɛ’n.
17 I sɔ kunngba’n, aniaan nga be di junman be fa nian be awlofuɛ’m be lika’n, be tu be klun be di i kpa. (Kolɔsfuɛ Mun 3:23, 24) I sɔ’n yo maan be junman’n kwlá fiman be sa ndɛndɛ. Afin kɛ mɔ be di junman kpa’n ti’n, be junman su min’m be kunndɛman kɛ bé yáci be nun.
18. ?Wafa sɛ yɛ “e [kwla] tu e klun yo sran ye” ɔ?
18 Kɛ e lafi Zoova su mɔ e nanti i afɔtuɛ’m be su mɔ e nian e aɲia yowlɛ’m be lika’n, e kle kɛ Zoova i sua’n i klolɛ’n w’a kun e kpo ɔ. Asa ekun’n, e kunndɛ kɛ é bó Ɲanmiɛn Sielɛ’n i jasin fɛ’n yɛ é klé sran’m be like kpa naan be kaci Zezi sɔnnzɔnfuɛ. Yɛ e kunndɛ kɛ é yó sɔ lele é fá jú kɛ e sa kwla ju lɛ’n. Kannzɛ e ti gbanflɛn annzɛ kpɛnngbɛn’n, sɛ e mian e ɲin kpa e fa Ɲanmiɛn i mmla’m be su’n, é ɲán su mmlusuɛ kpa. Yɛ sran’m bé wún i titi kɛ e ti sran mɔ “e tu e klun yo sran ye” ɔ.—Tit 2:14.
[Ja ngua lɛ ndɛ’n]
a Atrɛkpa’n, Aza nunnunnin amuin’m be sɔwlɛ nga be o kpɔlɛ’m be su’n. Sanngɛ w’a nunnunman Zoova i suwlɛ nga be o kpɔlɛ’m be su’n. Annzɛ kusu atrɛkpa’n, kɛ Aza i famiɛn dilɛ’n wá wíe’n, be kplannin amuin sɔwlɛ wie mun ekun kpɔlɛ’m be su yɛ i sin i wa Zozafati nunnunnin be ɔ.—1 Famiɛn Mun 15:14; 2 Be Nyoliɛ 15:17.
?Sran’m be ajalɛ ng’ɔ o Biblu’n nun nin andɛ liɛ’n, ngue yɛ be kle amun
• wafa nga amun kwla tu amun klun bo jasin fɛ’n nin like klelɛ’n i su ɔ?
• wafa nga gbanflɛn nin talua’m be kwla ‘tu be klun yo sran ye’n’ i su ɔ?
• wafa nga amun kwla yaci ninnge tɛtɛ’m be yolɛ’n i su ɔ?
[Foto, bue 18]
?Kɛ é bó jasin fɛ’n e kanngan Biblu’n nun titi?
[Foto, bue 20]
Sɛ suklu ba’m be suan aniɛn uflɛ’n, i sɔ’n kwla uka be naan b’a bo jasin fɛ’n b’a kle sran uflɛ.