Maan e sɔ nun klanman yɛ e man sran like klun ufue su

E SI Zoova m’ɔ o ɲanmiɛn su lɔ m’ɔ klo e’n, e ndɛ lo i kpa. Ɲanmiɛn Ndɛ’n gua e awlɛn su nzue kɛ Ɲanmiɛn niɛn i sufuɛ’m be kwlaa be lika kpa. (1 Piɛr 5:7) Wafa kun mɔ Zoova fa yi i nglo kɛ ɔ nian e lika’n, yɛle ukalɛ fanunfanun ng’ɔ uka e naan y’a su i kpa’n. (Ezai 48:17) I li kɛ ɲrɛnnɛn wie ti e o afɛ’n nun’n, Zoova klo kɛ e fa ninnge ng’ɔ man e’n, e uka e wun. Mmla ng’ɔ fa mannin Moizi’n, ɔ yi i sɔ liɛ’n i nglo.

Moizi Mmla nun’n, klolɛ su Zoova kleli kɛ ɔ fata kɛ be nian “yalɛfuɛ” kɛ aika nin angboti nin aofuɛ mun sa’n be lika. (Saun Yolɛ 19:9, 10; Mmla’n 14:29) Ɔ si kɛ ɔ ju wie’n, i sufuɛ wie’m be sa mian ukalɛ wun naan ɔ fata kɛ be wiengu Klistfuɛ’m be uka be. (Zak 1:27) Ɔ maan, ɔ fata kɛ Zoova i sufuɛ’m be kwlaa be sɔ ukalɛ nga Zoova sin sran uflɛ lika uka be’n, i nun klanman. Kannzɛ bɔbɔ ɔ ti sɔ’n, sanngɛ maan e si ukalɛ sɔ’n i nun sɔ.

Asa kusu’n, Ɲanmiɛn Ndɛ’n fa e ɲin sie su kɛ, Ɲanmiɛn i sran’m be kwla cɛ sran uflɛ like. “Angboti bla yalɛfuɛ” nga Zezi wunnin i Ɲanmiɛn sua ng’ɔ o Zerizalɛmu lɔ’n i nun’n, maan e ɲin kpɛn i su. (Lik 21:1-4) Mmla nga klolɛ su Zoova fa mannin Moizi’n m’ɔ se kɛ be nian angboti’m be lika’n, bla sɔ’n dili su wie. Kannzɛ ɔ ti yalɛfuɛ’n, sanngɛ sɛ e wla kpɛn i su’n, nán like mɔ be fa mɛnnin i’n ti ɔ. Sanngɛ like m’ɔ fa mannin’n ti ɔ. I klun m’ɔ tuli mannin like’n, ɔ mɛnnin i aklunjuɛ. Afin Zezi seli kɛ: “Sɛ a cɛ sran like’n, ɔ ti kpa tra kɛ be cɛ wɔ like’n.” (Sa Nga Be Yoli’n 20:35) ?I sɔ’n ti’n, wafa sɛ yɛ e kwla “cɛ sran like” naan y’a si aklunjuɛ ng’ɔ o nun’n niɔn?—Lik 6:38.

“?Nguɛ cɛ yɛ ń nyɛ́n i ń fá lɛ́ i ase ɔ?”

Jue tofuɛ’n usɛli i wun kɛ: “?Naan nɛnnɛn kpli nga Anannganman w’a di min yɛ’n, nguɛ cɛ yɛ ń nyɛ́n i ń fá lɛ́ i ase ɔ?” (Jue Mun 116:12) ?Nɛnnɛn benin yɛ Ɲanmiɛn dili i ɔ? I nun mɔ ‘nyrɛnnɛn dan tɔli i su mɔ awlaboɛ’n ɔ kunnin i kpo’n,’ Zoova suɛnnin i bo. Asa ekun’n, Zoova ‘deli i wie’n i nuan’n nun.’ Siɛn’n, jue tofuɛ’n su kunndɛ wafa ng’ɔ ko ‘la [Zoova] i ase’n.’ ?Ngue yɛ jue tofuɛ’n kwla yo ɔ? I waan: “Ninnge nga n tali nda kɛ ń yó be ḿ mán Anannganman’n, ń yó be.” (Jue Mun 116:3, 4, 8, 10-14) Ɔ fali ajalɛ kɛ nda kwlaa ng’ɔ tali Zoova’n, ɔ́ yía be nuan. Kpɛkun ninnge ng’ɔ fata kɛ ɔ yo be Zoova i sulɛ’n nun’n, ɔ́ yó be.

E kwla yo kɛ i sa. ?Wafa sɛ? Yɛle kɛ maan e mɛn dilɛ’n nun’n, e nanti Ɲanmiɛn mmla’n su titi. I ti’n, e mɛn dilɛ’n nun’n, maan like ng’ɔ ti e cinnjin kpafuɛ’n yo Zoova i sulɛ’n. Yɛ e yo naan e ajalɛ kwlaa nun’n, Ɲanmiɛn wawɛ’n sie e. (Akunndanfuɛ’n 12:13; Galasifuɛ Mun 5:16-18) Nanwlɛ, sɛ e waan é níɛn i sa’n, ninnge beblebe nga Zoova yoli mannin e’n, ɔ leman like kun sa mɔ e kwla yo naan y’a lɛ i ase ɔ. Sanngɛ kɛ Zoova wun kɛ e tu e klun e di i junman’n, i ‘klun jɔ.’ (Nyanndra Mun 27:11) ?Nanwlɛ e wunman kɛ, kɛ e yo sɔ mɔ Zoova i klun jɔ’n, ɔ ti e cenjele like dan’n?

Maan e yo naan asɔnun’n nun yo fɛ

E si jrɛiin kɛ ninnge nga e ɲannin be Klistfuɛ asɔnun’n nun’n, be diman be yalɛ. Zoova sin asɔnun’n i lika man e aliɛ kpanngban i ninnge’m be nun. Ndɛ nanwlɛ nga e ɲɛn i’n ti’n, e wunnin Ɲanmiɛn sulɛ wafa’m be ato ndɛ’m be wlɛ. Ɔ maan e fin be nun fiteli. Yɛ e sili Ɲanmiɛn, ɔ nin ninnge nga i waan ɔ́ yó be’n, be kpa. (Zan 8:32) “Sran kpa nanwlɛfuɛ b’ɔ si ngwlɛlɛ’n” siesie asɔnun aɲia mun nin aɲia dandan mun man e. Aɲia sɔ mun maan e sili ndɛ nanwlɛ nga mɔ i ti’n e kwla ɲan anannganman nguan mɛn klanman nun asiɛ’n su wa’n. Mɛn sɔ nun kusu’n, afɛ’n nin ɲrɛnnɛn’n be su tranman lɛ kun. (Matie 24:45-47) ?Ninnge beblebe nga e ɲannin be’n, ɔ nin nga é ɲán be Ɲanmiɛn i asɔnun’n nun’n, e si be nuan? ?I sɔ’n ti’n, e kusu ngue yɛ e kwla fa man asɔnun’n niɔn?

Akoto Pɔlu klɛli i kɛ: “Wunnɛn wunmuan’n kwlaa [...] i lika kun junman liɛ nga be kleli i kɛ ɔ di’n yɛ ɔ di-ɔ, afin be kwlaa be sasa su. Ɔ yo maan wunnɛn sɔ’n ɔ nyin, yɛ ɔ yo kpa klolɛ bɔ i lika sɔ’n be klo be wun’n ti.” (Efɛzfuɛ Mun 4:15, 16) Ɔ ti su kɛ Biblu’n i bue sɔ’n dun mmua kan Klistfuɛ nga be kpali be sieli be ngunmin’n be akpasua’n i ndɛ. Sanngɛ akunndan ng’ɔ o ndɛ sɔ’n nun’n, ɔ kwla kan Klistfuɛ’m be kwlaa andɛ. Asɔnun’n nunfuɛ’m be kwlaa be kwla yo naan asɔnun’n i nun yo fɛ, kpɛkun ɔ yo kpa tra laa’n. ?Wafa sɛ yɛ e kwla yo sɔ ɔ?

Sɛ e mian e ɲin e kɔ aɲia’m be bo naan e wla e wiengu fanngan Ɲanmiɛn i sulɛ nun’n, yɛ é kwlá yó sɔ ɔ. (Rɔmfuɛ Mun 14:19) Like nga e kwla yo i ekun naan sɛ é kwlá sé’n, ‘wunnɛn sɔ’n w’a nyin’n,’ yɛle kɛ e yi sa nga Ɲanmiɛn wawɛ’n maan sran yo’n i nglo e niaan Klistfuɛ’m be lika. (Galasifuɛ Mun 5:22, 23) Asa ekun’n, “maan e yo sran’m be kwlaa be ye, sanngɛ maan e dun mmua yo man e niaan nga e nin be e lafi Krist su’n.” (Galasifuɛ Mun 6:10; Ebre Mun 13:16) E kwlaa nga e o asɔnun’n nun’n, maan e yo aniaan bla annzɛ aniaan bian, maan e yo bakan annzɛ kpɛnngbɛn, e kwlaa e kwla yo naan wunnɛn sɔ’n, ɔ ‘yo kpa klolɛ bɔ i lika sɔ’n be klo be wun’n ti.’

Asa ekun’n, e kwla fa like nga e si i yo’n, annzɛ e wunmiɛn’n annzɛ e sa nun ninnge mun e suan jasin fɛ’n bolɛ junman mɔ asɔnun’n di’n i bo. Zezi Klist seli kɛ: “N fɛ i sɔ yolɛ’n n cɛli amun.” ?Yɛ e li ngue yɛ ɔ fata kɛ e yo ɔ? Zezi bɔbɔ se kɛ: “An kusu nán an de like fi.” (Matie 10:8) I ti’n, maan e tu e klun e di junman cinnjin mɔ yɛle jasin fɛ’n i bolɛ’n nin Zezi i sɔnnzɔnfuɛ’m be kunndɛlɛ’n i kpa. (Matie 24:14; 28:19, 20) ?I sɔ yolɛ’n nun’n, amun leman wunmiɛn kɛ laa’n sa? Maan an wla kpɛn angboti bla yalɛfuɛ nga Zezi kɛnnin i ndɛ’n, i su. Like ng’ɔ fa mannin’n juman lika fi. Sanngɛ, Zezi seli kɛ ɔ mannin like kpanngban trali be nga mun. Afin, like kwlaa ng’ɔ kwla man’n yɛle ng’ɔ mɛnnin i lɛ’n.—2 Korɛntfuɛ Mun 8:1-5, 12.

Maan e si nun sɔ

Ɔ ju blɛ wie’n, asamian’n ti’n ɔ fata kɛ asɔnun’n uka e. Sɛ mɛn tɛ nga ti’n, afɛ’n tin e su naan asɔnun’n waan ɔ́ úka e’n, nán e cuɛncuɛn e ja ase naan y’a sɔ nun. Zoova sieli sran nga be sa w’a tɔ i junman’n nun’n kɛ be ‘nian [...] i Asɔnun’n’ i lika. (Sa Nga Be Yoli’n 20:28) Ɔ maan, blɛ kekle nun’n, asɔnun kpɛnngbɛn nin asɔnunfuɛ’m be kunndɛ kɛ bé fɔ́nvɔ e, bé súan e bo yɛ bé sása e.— Galasifuɛ Mun 6:2; 1 Tɛsalonikfuɛ Mun 5:14.

Kɛ be uka e’n, maan e si nun sɔ. Ɔ maan, kɛ é sɔ́ ukalɛ sɔ’n nun’n, maan cɛn kwlaa e si su ye. Maan ɔ yo e kɛ Ɲanmiɛn i aklunye’n ti yɛ be su uka e sa. (1 Piɛr 4:10) ?Ngue ti yɛ i sɔ’n ti cinnjin ɔn? Afin, e kunndɛman kɛ é yó kɛ nga mɛn’n nunfuɛ’m be sunman lika be yo’n sa. Yɛle kɛ, kɛ be man be like’n be siman su ye.

Maan e yo sɛsɛfuɛ nin ngwlɛlɛfuɛ

Kɛ Pɔlu klɛli Klistfuɛ asɔnun ng’ɔ o Filipu lɔ’n i fluwa’n, ɔ kannin Timote i su ndɛ nga: “Afin i kunngba cɛ yɛ ɔ nin min e akunndan’n ti kun bɔ amun ndɛ lo i kpa-a.” Sanngɛ Pɔlu kan guali su kɛ: “Be nga’m be liɛ’n, be bɔbɔ be ninnge’n yɛ ɔ lo be-ɔ, Krist-Jésus liɛ’n lo-man be.” (Filipfuɛ Mun 2:20, 21) ?Sɛ Pɔlu i ndɛ cinnjin sɔ’n ka e klun’n, wafa sɛ yɛ e kusu andɛ’n e kwla yo naan e ‘bɔbɔ e ninnge’n w’a loman e’ ɔ?

Kɛ asɔnun’n nun’n, e niaan’m be fa be blɛ’n be uka e sa nga be tɔ e su’n be nun’n, ɔ fataman kɛ e mianmian be i sɔ’n nun. ?Ngue ti ɔ? Maan e bu ndɛ nga i akunndan e nian. Sɛ kekle’n o e su naan aniaan kun man e like’n, ɔ́ yó e fɛ kpa. ?Sanngɛ é kó míɛn i kɛ ɔ man e like sɔ’n kekle nun? Cɛcɛ. I kunngba’n, kannzɛ kɛ e niaan’m be uka e ɔ yo be fɛ’n, sanngɛ sɛ e kunndɛ kɛ be fa be blɛ’n be uka e’n, ɔ fata kɛ e yo i ngwlɛlɛ su nin sɛsɛ su. I kwlaa yoli o, like kwlaa nga e wiengu Klistfuɛ’m be yo man e blɛ kekle nun’n, e kunndɛ kɛ be yo i be klun su.

E kwla lafi su kɛ sɛ kekle o e su’n, e niaan Klistfuɛ’m be o lɛ naan bé úka e be klun su. Sanngɛ wie liɛ’n, be su kwlá ukaman e. Sɛ ɔ yo sɔ’n, maan e lafi su kɛ sa kwlaa ng’ɔ́ tɔ́ e su’n i nun’n, Zoova súan e bo kɛ ng’ɔ fa suannin jue tofuɛ’n i bo’n sa.—Jue Mun 116:1, 2; Filipfuɛ Mun 4:10-13.

I kwlaa ngalɛ’n ti’n, like kwlaa nga Zoova yo man e’n, maan e sɔ nun klanman. I li kɛ kekle’n o e su’n, yɛ ɔ fata kɛ e yo sɔ kpa’n niɔn. (Jue Mun 55:23) Ɔ kunndɛ kɛ e yo sɔ. Ɔ kunndɛ kusu kɛ e man e wiengu’m be like “klun-ufue su.” I sɔ’n ti’n, e ta nda kɛ like nga e le i mɔ e “bu i akunndan” kɛ é fá súan Ɲanmiɛn sulɛ kpafuɛ’n i bo’n, maan e fa man. (2 Korɛntfuɛ Mun 9:6, 7) Sɛ e yo sɔ’n é kwlá yó ninnge nɲɔn nga mun. Yɛle kɛ, kɛ be man e like’n, é sɔ́ nun klanman kpɛkun é cɛ́ e wiengu’m be like klun ufue su.

[Kuku/Foto mun, bue 32]

“?Naan nɛnnɛn kpli nga Anannganman w’a di min yɛ’n, nguɛ cɛ yɛ ń nyɛ́n i ń fá lɛ́ i ase ɔ?”—Jue Mun 116:12.

▪ Maan e kunndɛ wafa nga e kwla ‘yo sran’m be kwlaa be ye’n.’

▪ Maan e wla e wiengu’m be fanngan Ɲanmiɛn i sulɛ’n nun.

▪ Maan e tu e klun e bo jasin fɛ’n e ju kan nga e sa ju lɛ’n.