Maan e yo naan akunndan kpa ng’ɔ o asɔnun’n nun’n ɔ ka sɔ titi
“Maan e Min Zezi Klist yra amun akunndan bulɛ wafa’n su naan ɔ yo amun ye.”—FIL. 4:23, NW.
?SA NGA’M BE NUN’N, WAFA SƐ YƐ E NZUƐN’N KWLA UKA ASƆNUN’N NUNFUƐ MUN NAAN B’A YI NZUƐN KPA WIE’M BE NGLO Ɔ?
E nin be e tranlɛ’n nun.
Kɛ e bo jasin fɛ’n i juejue su’n.
Kɛ sran kun yo sa tɛ mɔ e bo su e kle asɔnun kpɛnngbɛn mun’n.
1. ?Ngue ti yɛ be yili asɔnun nga be o Filipu nin Tiatiri lɔ’n be ayɛ ɔ?
AKOTO’M be blɛ su’n, Klistfuɛ nga be o Filipu lɔ’n be ti yalɛfuɛ. Sanngɛ be sa timan tankaan yɛ be kle be wiengu Klistfuɛ’m be kɛ be klo be kpa. (Fil. 1:3-5, 9; 4:15, 16) I sɔ’n ti’n fluwa nga akoto Pɔlu klɛli ko mannin be’n i atabo’n nun’n, ɔ seli kɛ: “Maan e Min Zezi Klist yra amun akunndan bulɛ wafa’n su naan ɔ yo amun ye.” (Fil. 4:23, NW) Akunndan nga Filipu lɔfuɛ’m be buli’n, i wie yɛ Klistfuɛ nga be o Tiatiri lɔ’n be buli ɔ. Ɔ maan Zezi Klist seli be kɛ: “N si amun nyoliɛ’n, nin klolɛ bɔ an fa klo min’n, nin n su bɔ an lafi’n, nin amun junman’n, ɔ nin anwlɛn bɔ an lɛ i’n. N si kɛ sa nga an yo be siɛn’n be kpa tra laa liɛ’n.”—Ngl. 2:19.
2. ?Wafa sɛ yɛ e bɔbɔ e aeliɛ’n kwla uka asɔnun’n nunfuɛ mun annzɛ ɔ saci be ɔ?
2 Andɛ kusu’n, ɔ le Zoova i Lalofuɛ’m be asɔnun kun nin like nga i nunfuɛ’m be yo i kpa mɔ be kwla fa sie be nzɔliɛ ɔ. Asɔnun wie’m be nun’n, sran klolɛ nin sran yɛyɛlɛ’n yɛ i ɲin fite kpa ɔ. Wie’m be nun kusu’n, jasin fɛ’n bolɛ junman’n nin blɛ kwlaa nun Ɲanmiɛn junman’n yɛ be wla be wun ase be di i kpa ɔ. Kɛ e tinuntinun e mian e ɲin kpa e yo like ng’ɔ ti kpa’n, i sɔ’n yo maan asɔnun’n nunfuɛ’m be bo yo kun, yɛ nzuɛn kpa nga asɔnun’n yi i nglo’n i ɲin fite kpa titi. (1 Kor. 1:10) Sanngɛ sɛ asɔnun’n nunfuɛ wie’m be yoman like ng’ɔ ti kpa’n, ɔ kwla yo maan asɔnun’n nunfuɛ onga’m be kpɔnzɔ Ɲanmiɛn i sulɛ’n nun, kpɛkun sɛ be nun kun yo sa tɛ kpa kun bɔbɔ’n, be kwla yo kɛ be wunmɛn i sa. (1 Kor. 5:1; Ngl. 3:15, 16) ?Nzuɛn benin yɛ amun asɔnun’n nunfuɛ’m be yi i nglo kpa ɔ? ?Wafa sɛ yɛ amun bɔbɔ amun kwla yo naan nzuɛn kpa wie’m be nglo yilɛ’n w’a yo amun asɔnun’n nunfuɛ’m be cinnjin ɔn?
MAAN E AELIƐ’N UKA ASƆNUN’N NUNFUƐ MUN
3, 4. ?Wafa sɛ yɛ e kwla manman Zoova asɔnun’n nun ɔn?
3 Jue kun nun’n, Davidi seli Zoova kɛ: “Ḿ mánmán wɔ anyia dan’n nun. Ḿ mánmán wɔ nzrafuɛ’m be nyrun.” (Jue. 35:18) Kɛ Davidi nin i wiengu Ɲanmiɛn sufuɛ’m be o likawlɛ’n, ɔ manmannin Zoova. Aɲia nga e yo be le mɔcuɛ kwlaa nun’n, be nun kun yɛle Sasafuɛ Tranwlɛ’n i nun like suanlɛ’n. Kɛ e kɔ aɲia sɔ’m be bo’n, ɔ ti blɛ mɔ e kwla tɛ kosan’m be su e fa kle kɛ e lafi Ɲanmiɛn su naan e ti juejue i sulɛ’n nun ɔn. Ɔ maan ɔ fata kɛ e usa e wun kɛ: ‘?N nian nun kpa n tɛ kosan’m be su aɲia’m be bo? ?N siesie min wun kpa naan m’an tɛ kosan’m be su klanman? ?Sɛ n ti awlobo kpɛn’n, n uka min mma mun naan b’a siesie be wun, naan kɛ bé tɛ́ kosan’m be su’n b’a ijɔ kɛ nga be fa ijɔ titi’n sa?’
4 Wafa nga e fa to jue e aɲia’m be bo’n, ɔ kwla yi i nglo kɛ e wla w’a gua ase naan y’a gugu kɛ é yó sa ng’ɔ ti kpa’n. Davidi seli kɛ: “Ee Nyanmiɛn, min wla w’a gua ase o, min wla w’a gua ase. Ń tó jue, ń tó jue ḿ mánmán wɔ.” (Jue. 57:8) E aɲia’m be bo’n, jue’m be ti like mɔ e kwla tu e klun e fa ‘manman’ Zoova ɔ. Sɛ e siman jue sɔ’m be nun wie’m be to’n, blɛ nga é sú Ɲanmiɛn awlo lɔ’n, e kwla suan be tolɛ. Maan e ta nda kɛ é yó kɛ jue tofuɛ’n i liɛ’n sa. Ɔ seli kɛ: “Kɛ min nyin tɛ o su’n, ń tó jue ḿ mánmán Anannganman. Kɛ n nian wu-man’n, ń sró jue ḿ bó ń flɛ́ min Nyanmiɛn’n.”—Jue. 104:33.
5, 6. ?Wafa sɛ yɛ e kwla sɔ sran nun yɛ e cɛ sran like ɔ? ?Ngue yɛ i sɔ yolɛ’n su asɔnun’n nunfuɛ’m be bo kɛ be yo ɔ?
5 E niaan’m be nun sɔlɛ’n ti like kun ekun mɔ e kwla yo naan klolɛ’n w’a tran asɔnun’n nun ɔn. Fluwa nga Pɔlu klɛli ko mannin Ebre mun’n i ndɛ tre kasiɛn’n nun’n, ɔ wlali be fanngan kɛ: “An klo amun wun kpa kɛ sran nin i niaan sa tititi. Sran ng’ɔ to amun’n, an sike i.” (Ebr. 13:1, 2) Wafa nga e kwla kle kɛ e sɔ sran nun’n, i kun yɛle kɛ maan e yia akpasua sunianfuɛ’n nin i yi, annzɛ blɛ kwlaa nun Ɲanmiɛn junman difuɛ mun naan e wlu awlo. Ɔ ju wie’n, angbeti mmla mun annzɛ awlobo nga i nun’n siɛ’n annzɛ niɛn’n i kunngba yɛ ɔ tɛ i mma mun’n, annzɛ sran uflɛ mun, e kwla yo i sɔ liɛ’n be lika wie. Annzɛ kusu e kwla flɛ be e awlobofuɛ’m be Ɲanmiɛn sulɛ’n i bo.
6 Pɔlu seli Timote kɛ ɔ wla sran’m be fanngan kɛ “be yo sa ng’ɔ ti kpa’n, yɛ be yo sran ye, i sɔ’n yɛ ɔ ti anyanbeun kpa nin-ɔn. Maan be yo aklunye, yɛ be cɛ sran like. Sɛ be yo sɔ’n, wuun bɛtrɔ kpa kun b’ɔ saci-man’n yɛ b’a kpɛ b’a sie-ɔ, yɛ bé nyán nguan sakpa.” (1 Tim. 6:17-19) Pɔlu su se i wiengu Klistfuɛ’m be kɛ be suan sran like cɛlɛ. Kɛ sika’n ndɛ’n jran kpa bɔbɔ’n, e kwla cɛ sran like. I wie yɛle kɛ sɛ e le loto’n, kɛ é kɔ́ jasin fɛ’n bolɛ’n annzɛ aɲia’m be bo’n e kwla fa aniaan mun. Sɛ e leman loto’n e kwla man be sika naan be fa fu loto. ?Yɛ be nga be uka be’n kusu’n, ngue yɛ be kwla yo naan b’a kle kɛ be si ye ɔ? Be kwla man sran ng’ɔ fali be loto’n nun’n i like kan naan ɔ fa ukɛ i sa su to sannzi annzɛ ɔ niɛn i loto’n i lika. Sran nga be waan bé túɛ i loto kpa’n kusu’n, sɛ ɔ kwla tuɛ i bue’n, maan ɔ tua. Like kun ekun mɔ e kwla yo naan e niaan Klistfuɛ’m b’a si kɛ be ndɛ lo e naan e klo be’n, yɛle kɛ e fa e wun e mantan be. Kɛ e yo “e niaan nga e nin be e lafi Krist su’n” be kpa’n, mɔ e fa blɛ e uka be yɛ e fa e sa nun ninnge mun e suan be bo’n, klolɛ nga e klo be’n ɔ yo dan tra laa’n. Kɛ ɔ yo sɔ’n e uka asɔnun’n nunfuɛ mun naan be yo maan asɔnun’n nun yo fɛ.—Gal. 6:10.
7. ?Sɛ e si e nuan tra’n, wafa sɛ yɛ i sɔ’n úka asɔnun’n nunfuɛ mun naan b’a klo be wun kpa ɔ?
7 Ninnge wie mun ekun mɔ be yo maan e nin e wiengu Klistfuɛ mun e klo e wun kpa ekun’n yɛle janvuɛ tralɛ’n nin be nuan tralɛ’n. (An kanngan Nyanndra Mun 18:24 nun.) Sɛ e janvuɛ kun kɛn i klun ndɛ kle e’n, naan y’a kanman y’a kleman sran uflɛ’n e kle kɛ e ti janvuɛ kpa. Kɛ e niaan’m be kan be klun ndɛ be kle e mɔ be si kɛ e su kan kleman sran’n, wafa nga e fa klo e wun’n ɔ yo dan tra laa’n. I sɔ’n ti’n, maan e yo janvuɛ kpa m’ɔ si i nuan tra ɔ, naan e uka asɔnun’n nunfuɛ mun naan be yo kɛ awlobo kun mɔ i nunfuɛ’m be klo be wun’n sa.—Nya. 20:19.
MAAN E YO JUEJUE JASIN FƐ’N BOLƐ’N NUN
8. ?Afɔtuɛ benin yɛ Zezi mannin Laodisefuɛ mun ɔn? ?Yɛ ngue ti ɔ?
8 Zezi seli Laodise lɔ asɔnun’n i nunfuɛ’m be kɛ: “N si amun nyoliɛ’n. Sɛ an ti kɛ nzue sa’n, wuun ń sé kɛ an jɔ-man kusu an lo-man. N klo kɛ an jɔ annzɛ an lo! Kɛ bɔ an jɔ-man, kusu an lo-man, bɔ an ti mlɛnmlɛnmlɛn’n ḿ má gúa amun ase.” (Ngl. 3:15, 16) Laodisefuɛ’m be diman Ɲanmiɛn junman’n i juejue su. I sɔ aeliɛ’n i ɲin fiteli wafa nga be nin be wiengu’m be tran’n i nun. Ɔ maan klolɛ su Zezi seli be kɛ: “Be kwlaa nga n klo be sa’n, n ijɔ be, yɛ n tu be fɔ. I sɔ’n ti’n, an yaci amun nyrun kouun yolɛ’n, yɛ an kaci amun nzuɛn’n.”—Ngl. 3:19.
9. ?Wafa sɛ yɛ jasin fɛ’n i bolɛ juejue su’n, ɔ uka asɔnun’n nunfuɛ mun ɔn?
9 Sɛ e waan é yó naan asɔnun’n nun yo fɛ’n, ɔ fata kɛ e bo jasin fɛ’n juejue su. Like nga ti yɛ asɔnun’n o lɛ’n, i kun yɛle sran kpa’m be kunndɛlɛ ɔ nin be Ɲanmiɛn ndɛ’n i klelɛ. Ɔ maan ɔ fata kɛ e yo kɛ Zezi sa. Yɛle kɛ e wla e wun ase e kunndɛ sran mun naan be kaci i sɔnnzɔnfuɛ. (Mat. 28:19, 20; Lik 4:43) Kɛ é yó juejue kpa jasin fɛ’n i bolɛ nun é kɔ́’n, nn e mɔ “e nin Nyanmiɛn yɛ e di junman’n” e afiɛn’n sɛ́ kpa trá laa’n. (1 Kor. 3:9) Kɛ e nin e niaan mun é bó jasin fɛ’n mɔ e wun wafa nga be yiyi ninnge nga be lafi su’n be nun kle sran mun’n, mɔ be kle kɛ be klo Zoova nin ndɛ nanwlɛ’n, i sɔ’n yo maan e klo be kpa tra laa’n yɛ e ɲin yi be kpa ekun. Asa ekun’n, kɛ e ‘bo yo kun’ e bo jasin fɛ’n, i sɔ’n yo maan asɔnun’n nunfuɛ’m be di anuannzɛ.—An kanngan Sofoni 3:9 nun.
10. ?Wafa sɛ yɛ e ɲin mɔ e mian naan y’a si jasin fɛ’n i bo kpa ekun’n, ɔ uka asɔnun’n nunfuɛ mun ɔn?
10 E ɲin mɔ e mian naan y’a si jasin fɛ’n i bo kpa ekun’n, ɔ uka e niaan mun wie. Sɛ e jasin bowlɛ nun lɔfuɛ’m be ndɛ lo e kpa naan e mian e ɲin naan ndɛ nga e kan’n w’a kan be awlɛn’n, é yó juejue jasin fɛ’n bolɛ’n nun trá laa’n. (Mat. 9:36, 37) Sɛ e yo sɔ’n, be nga e nin be e bo jasin’n bé yó sɔ wie. Zezi w’a semɛn i sɔnnzɔnfuɛ’m be kɛ be wɔ kunngunngun be ko bo jasin fɛ’n. Sanngɛ ɔ sunmannin be nɲɔnnɲɔn. (Lik 10:1) I sɔ liɛ’n wlali be fanngan yɛ ɔ yoli maan be sa tɔli junman’n nun. Sanngɛ nɛ́n i sɔ ngunmin ɔn. Ɔ yoli maan be boli jasin fɛ’n i juejue su kpa wie. Kɛ e nin be nga be ti juejue jasin fɛ’n i bolɛ’n nun e bo jasin’n, nanwlɛ ɔ yo e fɛ dan! Be aeliɛ’n wla e fanngan yɛ ɔ uka e naan y’a bo jasin fɛ’n i titi.—Rɔm. 1:12.
NÁN E IJƆ E KONVIABO ANNZƐ E FIA SA TƐ DAN WIE SU
11. ?Moizi blɛ su’n, nzuɛn benin yɛ Izraɛlifuɛ wie’m be yili i nglo ɔ? ?Be aeliɛ sɔ’n ti’n, ngue yɛ be wa yoli ɔ?
11 Kɛ Zoova maan Izraɛlifuɛ’m be kacili nvle kun’n, w’a cɛman yɛ be boli be konviabo ijɔlɛ’n bo ɔ. Be aeliɛ sɔ’n ti’n, be wa yoli ɲin kekle Zoova nin i janunfuɛ’m be su. (Tul. 16:1, 2) Izraɛlifuɛ nga be fin Ezipti lɔ fiteli’n, be nun kaan sa yɛ be kwla wluli mɛn nga Ɲanmiɛn waan ɔ́ fá mán be’n i nun lɔ ɔ. Moizi bɔbɔ w’a kwlá wluman mɛn sɔ’n nun wie. Afin Izraɛlifuɛ’m be aeliɛ tɛtɛ’n ti’n, ɔ fɔnnin Ɲanmiɛn wun. (Mml. 32:48-52) ?Andɛ’n, ngue yɛ e kwla yo naan nzuɛn tɛ wie w’a saciman e ɔ?
12. ?Ngue yɛ ɔ kwla uka e naan y’a ijɔijɔman e konviabo ɔ?
12 Ɔ fata kɛ e nian e wun kpa naan y’a ijɔijɔman e konviabo. E wun ase kanlɛ’n ɔ nin e ɲin m’ɔ yi be nga be sie e’n, yɛ ɔ kwla uka e naan y’a ijɔijɔman e konviabo ɔ. Asa ekun’n, ɔ fata kɛ e kpa be nga e nin be é sán nun’n be nun kpa. Sɛ e fa like tɛ e yiyi e ɲin su’n, annzɛ e nin e wiengu junman difuɛ mun annzɛ e wiengu suklu ba mɔ be suman Zoova’n e san nun’n, i bo’n kwla gua tɛ man e. Be nga be ijɔijɔ be konviabo’n annzɛ be kunndɛman kɛ sran sie be’n, nán maan e fa e wun e mantan be ngboko.—Nya. 13:20.
13. ?Kɛ aniaan wie’m be ijɔijɔ be konviabo titi’n, ngue ekun i sɔ’n kwla kpɛ i ba ɔ?
13 Asɔnun’n nun’n, kɛ sran wie’m be ijɔijɔ be konviabo titi’n, be aeliɛ’n kwla kpɛ ninnge tɛtɛ wie mun ekun be ba. I wie yɛle kɛ ɔ kwla yo naan fɔundi nin bo kun yolɛ’n b’a tranman nun kun. Asa ekun’n, sɛ aniaan kun kɛn i wiengu Klistfuɛ’m be wun ndɛ sin’n, ɔ kpɛ be awlɛn. Sanngɛ nɛ́n i ngba ɔ. I sɔ’n kwla yo maan ɔ tɔ sran suɛn tɔnlɛ nin sran nzowa kpɛlɛ mɔ be ti sa tɛ’n, be nun wie. (Sau. 19:16; 1 Kor. 5:11) Klistfuɛ klikli’m be blɛ su’n, asɔnun’n nunfuɛ wie mɔ be ijɔijɔ be konviabo’n, b’a “buman Ɲanmiɛn like fi, yɛ be kpɛ be nga be le ɲrun’n be nzowa.” (Zid 8, NW, Zid 16) Kɛ be ijɔijɔli sran nga be dun asɔnun’n i ɲrun mmua’n w’a yoman Ɲanmiɛn i fɛ kaan sa.
14, 15. (a) ?Sɛ aniaan kun yo sa tɛ dan kun naan e tɛman su’n, ngue sa yɛ ɔ kwla ju asɔnun’n su ɔ? (b) ?Sɛ e wun i kɛ sran kun fia yo sa tɛ dan kun’n, ngue yɛ ɔ fata ke e yo ɔ?
14 ?Sɛ e wun i kɛ sran kun yo sa tɛ dan kun nvialiɛ nun’n, é yó i sɛ? Ɔ kwla yo nzan nɔnlɛ ngboko annzɛ bian nin bla nna nga be fa fite nzra nun’n i nianlɛ, annzɛ kusu sa sukusuku uflɛ yolɛ. (Efɛ. 5:11, 12) Sɛ e wun i sɔ naan e tɛman su’n, Zoova kwla yi i wawɛ’n asɔnun’n su. Yɛ i sɔ’n kwla yo naan alaje w’a traman asɔnun’n nun kun. (Gal. 5:19-23) Pɔlu seli Korɛnti lɔ Klistfuɛ’m be kɛ be yi sa tɛ’n be afiɛn. I wafa kunngba’n, ɔ fata kɛ e yi like kwlaa ng’ɔ kwla saci asɔnun’n naan alaje w’a tran nun titi. ?Ngue yɛ e kwla yo naan alaje w’a tran asɔnun’n nun ɔn?
15 Kɛ nga e fa wunnin i sa’n, sɛ sran lafi e su naan ɔ kɛn i klun ndɛ kle e’n, ɔ ti cinnjin kɛ e si e nuan tra. Sɛ sran kun kɛn i klun ndɛ kle e naan e kan sin’n, nanwlɛ, i sɔ’n ti tɛ dan! Kannzɛ ɔ ti sɔ’n, sanngɛ sɛ sran kun yoli sa tɛ dan kun naan e si nun’n, ɔ fata kɛ asɔnun kpɛnngbɛn’m be ti nun. Afin be yɛ Ɲanmiɛn sieli be kɛ be siesie i sɔ ndɛ mun ɔn. (An kanngan Saun Yolɛ 5:1 nun.) Ɔ maan sɛ e si kɛ aniaan kun w’a yo sa tɛ dan kun’n, ɔ fata kɛ e se i kɛ ɔ ko bo su kle asɔnun kpɛnngbɛn mun naan be ukɛ i. (Zak 5:13-15) Sanngɛ sɛ e wun kɛ ɔ su cɛ ngboko’n, ɔ fata kɛ e bɔbɔ e ko bo su e kle be.
16. ?Kɛ sran kun yo sa tɛ dan wie mɔ e kan kle asɔnun kpɛnngbɛn mun’n, wafa sɛ yɛ i sɔ’n sasa asɔnun’n niɔn?
16 Asɔnun’n ti lika m’ɔ fata kɛ i nun tranlɛ’n yo fɛ ɔ. Ɔ maan sɛ sran kun yo sa tɛ dan kun’n, ɔ fata kɛ e kan naan asɔnun’n nun tranlɛ’n w’a yo fɛ titi. Sɛ asɔnun kpɛnngbɛn’m be uka sa tɛ yofuɛ sɔ’n, naan i aeliɛ’n yo i nsisɔ’n naan ɔ kaci i sa’n, asɔnun’n su saciman. Sanngɛ sɛ i aeliɛ’n yomɛn i nsisɔ naan afɔtuɛ nga asɔnun kpɛnngbɛn’m be mɛn i klolɛ su’n ɔ sɔman nun’n, be tu i asɔnun’n nun. Kɛ e nin i sɔ sran mun e ‘sanman nun’n,’ be aeliɛ tɛ’n kwlá saciman asɔnun’n. Kpɛkun i nun tranlɛ’n yo fɛ titi. (An kanngan 1 Korɛntfuɛ Mun 5:11 nun.) E ngba yɛ ɔ fata kɛ e yo naan asɔnun’n nun tranlɛ’n w’a yo fɛ titi ɔ. Ɔ maan sɛ e wun i kɛ sran kun yoli sa tɛ dan wie’n, ɔ fata kɛ e kan kle asɔnun kpɛnngbɛn mun yɛ ajalɛ nga be fa’n, maan e suɛn i bo. Like ng’ɔ ti kpa man e niaan mun’n, maan e yo naan be wun be wun fɛ asɔnun’n nun.
MAAN E YO NAAN E ‘BO YO KUN’ TITI
17, 18. ?Ngue yɛ ɔ́ úka e naan e bo w’a yo kun asɔnun’n nun titi ɔ?
17 Zezi i sɔnnzɔnfuɛ klikli’m be kwla yoli naan bo kun yolɛ’n w’a tran asɔnun’n nun, afin ‘be fali be su sieli be bɔ Jésus sunmannin be’n be ndɛ’n su kpa’n.’ (Yol. 2:42) Atin nga kpɛnngbɛn’m be niannin Ɲanmiɛn Ndɛ’n nun be kleli be’n, i su falɛ’n yoli be cinnjin kpa. I wafa kunngba’n, andɛ’n, kɛ mɔ asɔnun kpɛnngbɛn’m be fa atin nga sran kpa nanwlɛfuɛ m’ɔ si ngwlɛlɛ’n kle be’n su’n ti’n, be kwla uka asɔnun’n nunfuɛ’m be kwlaa yɛ be wla be fanngan naan be bo w’a yo kun titi. (1 Kor. 1:10) Like nga Zoova i anuannzɛ’n jran Biblu’n su kle e’n, ɔ nin atin nga asɔnun kpɛnngbɛn’m be kle e’n, kɛ e fa be su’n, e kle kɛ ‘e bo bɔ Nyanmiɛn Wawɛ’n maan w’a yo kun anuansɛ bɔ e di’n ti’n, e nian su kpa maan ɔ yo sɔ tititi.’—Efɛ. 4:3.
18 Maan e ngba e yo like kwlaa nga e kwla yo’n naan e aeliɛ’n yo kpa naan asɔnun’n nun tranlɛ’n yo fɛ titi. Sɛ e yo sɔ’n, e kwla lafi su kɛ ‘e Min Zezi Klist yrá e akunndan bulɛ wafa’n su [yɛ] ɔ́ yó e ye.’—Fil. 4:23, NW.
[Foto, bue 24]
?Amun siesie amun wun kpa naan amun a tɛ kosan’m be su klanman naan asɔnun’n nun tranlɛ’n w’a yo fɛ?
[Foto, bue 25]
Amun suan e jue’m be tolɛ naan ɔ wla asɔnun’n nunfuɛ’m be fanngan.