Klistfuɛ awlobo mun, an nanti Zezi i ajalɛ’n su!
“Krist [...] yoli sɔ kɛ an nian su naan an nanti i ajalɛ liɛ’n su.”—1 PIƐR 2:21.
1. (a) ?Ninnge’m be yilɛ nun’n, junman benin yɛ Ɲanmiɛn i Wa’n dili ɔ? (b) ?Kɛ Zezi wo sran’m be afiɛn’n, ɔ yo i sɛ?
I NUN mɔ Ɲanmiɛn bó ɲanmiɛn su lɔ nin asiɛ’n, nn i Wa klikli’n o i wun lɛ i “sa o junman’n su.” Kɛ Zoova bó asiɛ’n su nnɛn fanunfanun mun nin waka nin ijreijre m’ɔ́ síesíe asiɛ’n mán klɔ sran mun kɛ be tran nun’n, i Wa’n nin i yɛ be dili junman’n niɔn. Ɲanmiɛn i Wa’n, mɔ i sin’n be wa flɛli i Zezi’n, ɔ kloli klɔ sran mun kpa. Ɔ seli kɛ: “Kɛ n wo sran’m be afiɛn’n, ɔ yo min fɛ.”—Nyanndra Mun 8:27-31; Bo Bolɛ 1:26, 27.
2. (a) ?Ngue yɛ Zoova fa mannin klɔ sran mɔ fɔ o be nun’n naan be fa uka be wun ɔn? (b) ?Yɛ like benin nun yɛ Biblu’n kle e atin ɔn?
2 Kɛ klɔ sran klikli’m be yoli sa tɛ’n, ɔ nin i fatali kɛ be kpɔ be ti. I sɔ’n yoli like cinnjin kpa mɔ Zoova buli i akunndan ɔn. Zoova maan Klist kpɔli sran’m be ti. (Rɔmfuɛ Mun 5:8) Asa ekun’n, Zoova fɛli i nuan Ndɛ’n mɔ yɛle Biblu’n, ɔ mannin e. Ɔ kle e atin naan kannzɛ bɔbɔ sa tɛ’n ti e fɛ’n, y’a kwla jran kekle. (Jue Mun 119:105) Ɲanmiɛn i Ndɛ’n nun’n, Zoova man sran’m be afɔtuɛ naan be awlobo’m be taka kpa. Kɛ Bo Bolɛ fluwa’n kán aja’n i ndɛ’n, ɔ se kɛ ɔ fata kɛ yasua’n “fɛ i wun mɛntɛn i yi naan be nnyɔn’n be kaci sran wunmuan.”—Bo Bolɛ 2:24.
3. (a) ?Aja’n i su like benin yɛ Zezi kleli i ɔ? (b) ?Ngue like yɛ é wá wún i like suanlɛ nga nun ɔn?
3 Kɛ Zezi o asiɛ’n su wa’n, ɔ tinnin su kpa kɛ aja’n ti anannganman like. Yɛ ɔ kleli Ɲanmiɛn mmla ng’ɔ fata kɛ awlobofuɛ’m be nanti su naan b’a yoman like ng’ɔ kwla saci be aja’n nin be awlobo tranlɛ fɛ’n. (Matie 5:27-37; 7:12) Wafa nga Zezi kleli like’n ɔ nin wafa nga i ajalɛ’n kwla uka siɛ nin niɛn nin ba mun naan b’a di aklunjuɛ’n, é wá wún be like suanlɛ nga nun.
Wafa nga Klistfuɛ kun kwla bu i yi sran’n
4. ?Wafa sɛ yɛ Zezi i junman’n nin Klistfuɛ nga be le bla’n be junman’n, be fa be wun ɔn?
4 Kɛ nga Zezi fa sie asɔnun’n sa’n, Ɲanmiɛn fali awlo’n i sielɛ’n wlali yasua’n i sa nun. Akoto Pɔlu seli kɛ: “Yasua yɛ ɔ ti bla i su kpɛn kɛ Krist kusu ti Asɔnun i su kpɛn’n sa. I yɛ ɔ ti Asɔnun’n b’ɔ ti i wunnɛn’n i Defuɛ-ɔ. Yasua mun, kɛ Krist kloli Asɔnun’n, amun kusu an klo amun yi mun sɔ. Afin Asɔnun’n ti, ɔ fɛ i wun mannin.” (Efɛzfuɛ Mun 5:23, 25, 26) Nanwlɛ, wafa nga Zezi nin i sɔnnzɔnfuɛ’m be trannin’n, ɔ ti ajalɛ m’ɔ kle wafa ng’ɔ fata kɛ Klistfuɛ’m be nin be yi’m be tran ɔn. Wafa nga ninnge wie’m be nun Zezi dili i sran sielɛ junman nga Ɲanmiɛn fa mɛnnin i’n, maan e fa e ɲin sie su.
5. ?Wafa sɛ yɛ Zezi sieli i sɔnnzɔnfuɛ mun ɔn?
5 Zezi ‘ti sran wɛtɛɛ yɛ i anwlɛn’n ti flɔlɔ.’ (Matie 11:29) Kusu ɔ ti sran wakawakafuɛ. W’a fɛmɛn i junman’n i dilɛ’n w’a trɛtrɛmɛn i sa bɛ’n nun. (Mark 6:34; Zan 2:14-17) Klolɛ su ɔ mɛnnin i sɔnnzɔnfuɛ’m be afɔtuɛ. Sɛ bɔbɔ ɔ fata kɛ ɔ kan flan nun’n, ɔ kan flannin nun. (Matie 20:21-28; Mark 9:33-37; Lik 22:24-27) Sanngɛ, Zezi w’a ijɔmɛn i sɔnnzɔnfuɛ mun le, annzɛ w’a kleman kɛ ɔ kloman be kun. Annzɛ kusu w’a kleman kɛ be su kwlaman junman ng’ɔ fa mannin be’n, i di. Sanngɛ ɔ yoli be mo, yɛ ɔ wlali be fanngan naan be yo like ng’ɔ ti kpa’n. (Lik 10:17-21) Nán ngbɛn ti yɛ Zezi i sɔnnzɔnfuɛ’m be ɲin yili i’n niɔn. Afin, ɔ kloli be yɛ ɔ sili be aunnvuɛ!
6. (a) ?Wafa nga Zezi nin i sɔnnzɔnfuɛ’m be trannin’n, afɔtuɛ benin yɛ ɔ o nun man yasua kun ɔn? (b) ?Ngue like yɛ Piɛli wlali yasua nga be le bla’n be fanngan kɛ be yo ɔ?
6 Zezi i ajalɛ’n kle Klistfuɛ nga be le bla’n be kɛ ɔ fataman kɛ, kɛ bé síe be yi mun’n, be yo be kpokokpoko. Sanngɛ ɔ fata kɛ be tu be klun be klo be. Akoto Piɛli wlali Klistfuɛ nga be le bla’n be fanngan kɛ be nian wafa nga Zezi fa yoli ninnge mun klolɛ su’n i su. ‘Be nin be [yi’m be] tran kpa.’ Naan be “bu be sran.” (An kanngan 1 Piɛr 3:7 nun.) ?Ɔ maan, wafa sɛ yɛ kɛ yasua kun síe i yi’n, ɔ kwla bu i sran ɔn?
7. ?Ninnge benin nun yɛ yasua’n kwla bu i yi sran ɔn? An yiyi nun.
7 Wafa kun mɔ yasua kun kwla kle kɛ ɔ bu i yi sran’n, yɛle kɛ ka naan yasua’n w’a fa ajalɛ wie m’ɔ kan awlo’n, ɔ fata kɛ ndɛ nga bla’n kan’n, ɔ fɛ i ɲin sie su. Atrɛkpa’n, ajalɛ’n kwla yo awlo nga be tran nun’n, i nun jasolɛ. Annzɛ junman ng’ɔ di’n i kacilɛ. Annzɛ like uflɛ wie kɛ lika nga bé kó ló wunmiɛn’n, annzɛ wafa nga be kwla yo be sika’n i cɛcɛ’n. Kɛ mɔ ajalɛ sɔ’m bé kán awlo’n ti’n, ɔ nin i fata kɛ yasua’n tie bla’n i nuan ndɛ ka. I sɔ’n ti kpa. Afin ɔ kwla ukɛ i naan w’a bu ajalɛ’n i su akunndan kpa naan w’a yo sɛsɛ i falɛ’n nun. Kpɛkun i sɔ’n maan bla’n kwla suɛn i bo kpa. (Nyanndra Mun 15:22) Klistfuɛ yasua nga be bu be yi’m be sran’n, be yi’m be klo be yɛ be ɲin yi be. Sanngɛ nɛ́n i ngba ɔ. Zoova kusu i klun jɔ be wun wie.—Efɛzfuɛ Mun 5:28, 29.
Wafa nga bla kun kle kɛ i ɲin yi i wun’n
8. ?Ngue ti yɛ ɔ fataman kɛ bla’m be fa Ɛvu i ajalɛ’n su ɔ?
8 Sran’n i sran bulɛ’n nun’n, Zezi kle Klistfuɛ bla’m be ajalɛ kpa. Nanwlɛ, wafa nga Zezi wun be nga be sie e’n, ɔ nin aeliɛ nga bla klikli’n yili i nglo’n, ngbaciɛ dan o be afiɛn! Ɛvu w’a kleman bla’m be ajalɛ kpa. Ɲanmiɛn yɛ ɔ mannin Adam i atin kɛ ɔ sie Ɛvu ɔ. Yɛ ndɛ nga Zoova kán klé Ɛvu’n, Adam ja su yɛ ɔ sin ɔn. Sanngɛ Ɛvu w’a nantiman i sɔ ajalɛ’n su. Mmla nga Adam kan kleli i’n, w’a nantiman su. (Bo Bolɛ 2:16, 17; 3:3; 1 Korɛntfuɛ Mun 11:3) Ɔ ti su kɛ be lakali Ɛvu. Sanngɛ kɛ sran kun seli kɛ “Nyanmiɛn bɔbɔ si” sɔ’n m’ɔ tili’n, sɛ ɔ ti kɛ ɔ dun mmua usɛli i wun’n ka naan w’a fa su’n, nn i bo guali kpa mɛnnin i. Sanngɛ Ɛvu w’a yoman sɔ. Ɔ yacili Adam lɛ, ɔ fɛli i bɔbɔ i akunndan liɛ’n ng’ɔ sunnzunnin’n su. Ɔ ti kɛ i yɛ ɔ sieli Adam ɔn.—Bo Bolɛ 3:5, 6; 1 Timote 2:14.
9. ?Sran i sran bulɛ’n nun’n, ajalɛ benin yɛ Zezi kleli ɔ?
9 Sanngɛ Zezi liɛ’n, w’a yoman sɔ mlɔnmlɔn. Sran ng’ɔ sie i’n i sran bulɛ’n nun’n, ɔ kleli e ajalɛ kpa. Wafa nga Zezi fa yoli ninnge mun nin i mɛn dilɛ’n be kleli kɛ ‘w’a kunndɛman kɛ ɔ́ fɛ́ i wun súnnzun Nyanmiɛn.’ Sanngɛ “ɔ yoli i wun kanga.” (Filipfuɛ Mun 2:5-7) Andɛ bɔbɔ mɔ Zezi su di Famiɛn’n, akunndan kunngba’n yɛ ɔ te bu ɔ. Sa kwlaa nun’n, Zezi lo i wun mɛn i Si kɛ ɔ sie i. Ɔ suɛn i Si i Sielɛ’n i bo.—Matie 20:23; Zan 5:30; 1 Korɛntfuɛ Mun 15:28.
10. ?Wafa sɛ yɛ bla kun kwla suan i wun i sielɛ’n i bo ɔ?
10 Klistfuɛ bla’m be kusu ɔ fata kɛ be nian Zezi liɛ’n su naan be suan be wun’m be sielɛ’n i bo! (An kanngan 1 Piɛr 2:21; 3:1, 2 nun.) Maan e nian sa wie mun mɔ be nun’n, bla’m be kwla yi i sɔ liɛ’n i nglo’n. Ba kun waan ɔ́ yó like kun. Ɔ si kɛ ɔ fata kɛ i si nin i nin be mɛn i wun atin. Ɔ maan ɔ se i nin kɛ ɔ mɛn i atin naan ɔ yo like sɔ’n. Kɛ mɔ siɛ’n nin niɛn’n b’a dunman mmua b’a kokoman i sɔ’n su yalɛ ti’n, ɔ nin i fata kɛ niɛn’n usa ba’n kɛ: “?A kan kleli ɔ si?” Sɛ ba’n w’a kan klemɛn i si’n, ɔ fata kɛ ɔ nin i wun’n be dun mmua koko su yalɛ ka naan b’a fa ajalɛ kun. Asa kusu’n, ɔ nin i fataman kɛ sɛ Klistfuɛ bla kun i wun fa ajalɛ kun’n, ɔ nin i be si su akplowa ba’m be ɲrun lɛ. Sɛ ndɛ nga i wun kannin’n timɛn i liɛ’n su’n, ɔ fata kɛ ɔ nin i be koko su yalɛ aamiɛn.—Efɛzfuɛ Mun 6:4.
Ajalɛ nga Zezi kle siɛ nin niɛn mun’n
11. ?Ajalɛ benin yɛ Zezi kleli siɛ nin niɛn mun ɔn?
11 Kannzɛ bɔbɔ Zezi w’a jaman bla annzɛ w’a wuman ba’n, sanngɛ ɔ kle Klistfuɛ nga be le ba’n, be ajalɛ kpa. ?Wafa sɛ? Klolɛ su ɔ trɛli i awlɛn kleli i sɔnnzɔnfuɛ’m be like i ndɛ ng’ɔ kannin’n, ɔ nin i aeliɛ’n nun. Ɔ kleli be wafa ng’ɔ fata kɛ be di junman ng’ɔ fa mannin be’n. (Lik 8:1) Wafa nga Zezi nin i sɔnnzɔnfuɛ’m be nantili’n, ɔ kleli be wafa ng’ɔ fata kɛ be kusu be nin be wiengu’m be tran’n.—An kanngan Zan 13:14-17 nun.
12, 13. ?Sɛ siɛ nin niɛn’m be waan be mma’m be ɲin yi Ɲanmiɛn’n, ngue yɛ ɔ fata kɛ be yo ɔ?
12 Like nga siɛ nin niɛn’m be yo’n, sɛ ɔ ti kpa o, sɛ ɔ ti tɛ o, i su yɛ ba’m be nian ɔn. Ɔ maan, siɛ nin niɛn mun amun usa amun wun kɛ: ‘?Blɛ nga e fa nian televiziɔn’n, yɛ nga e fa yiyi e ɲin su’n, ɔ kle e mma’m be sɛ? ?Kpɛkun blɛ nga e fa suan Biblu’n nun like yɛ nga e fa bo jasin fɛ’n, ɔ nin nga e fa yo Ɲanmiɛn ninnge’m be nun like uflɛ mun’n, ɔ kle e mma’m be sɛ? ?E awlobo’n nun’n, ngue yɛ e fa sie i e like kwlaa ɲrun ɔn? ?Ajalɛ nga e fa be’n, be kle e mma mun kɛ Ɲanmiɛn sulɛ kpa’n yɛ ɔ o e like kwlaa ɲrun ɔn?’ Sɛ siɛ nin niɛn’m be waan be mma’m be ɲin yi Ɲanmiɛn’n, ɔ fata kɛ be bɔbɔ be dun mmua fa Ɲanmiɛn mmla’n sie be klun.—Mmla’n 6:6.
13 Sɛ siɛ nin niɛn’m be mian be ɲin be fa Biblu’n nun mmla’m be su cɛn kwlaa’n, be mma’m be sie i nzɔliɛ. Kpɛkun ndɛ nga be kan’n, ɔ́ ɲán ta kpa be mma’m be su. Sanngɛ sɛ be mma’m be wun i kɛ be bɔbɔ be faman ndɛ nga be kan’n su’n, be kwla bu i kɛ Biblu’n nun mmla’m be timan cinnjin annzɛ be kwlá yoman sran ye. Sɛ ɔ yo sɔ’n mɛn’n nun ninnge’m bé ɲán ta be su.
14, 15. ?Ngue ninnge mun yɛ ɔ fata kɛ siɛ nin niɛn’m be uka be mma mun naan be yo ɔ? ?Yɛ wafa nga be kwla yo sɔ’n, i kun yɛle benin?
14 Klistfuɛ siɛ nin niɛn’m be wun i wlɛ kɛ nán ninnge nga be mian ba’n i sa’n mɔ be fa mɛn i’n, yɛ be flɛ i ba talɛ’n niɔn. Ɔ maan, sɛ be kle be mma’m be kɛ like ng’ɔ ti cinnjin’n, yɛle aɲanbeun ninnge’m be kunndɛlɛ’n, ɔ timan ngwlɛlɛ aeliɛ. (Akunndanfuɛ’n 7:12) Zezi kleli i sɔnnzɔnfuɛ mun kɛ like cinnjin ng’ɔ fata kɛ be yo’n, yɛle kɛ be dun mmua fa be wun man Ɲanmiɛn naan ɔ sie be naan be yo i klun sa’n. (Matie 6:33) Ɔ maan, kɛ Zezi sa’n, ɔ fata kɛ Klistfuɛ siɛ nin niɛn’m be mian be ɲin naan be mma’m be ɲin tran Ɲanmiɛn i klun sa yolɛ’n su.
15 Wafa kun mɔ be kwla yo sɔ’n, yɛle kɛ be yo naan be mma’m be nin be nga be di blɛ kwlaa nun Ɲanmiɛn junman’n be san nun. Sɛ ba’m be nin titi atin bofuɛ nin akpasua sunianfuɛ’n nin i yi’n be san nun’n, wafa ng’ɔ kwla wla be fanngan’n maan e bu i akunndan. Kɛ be kɔ ngaliɛ difuɛ mun, ɔ nin Betɛli lɔfuɛ mun, ɔ nin be nga be kplan Ɲanmiɛn sua mun nvlenvle’m be nun be wun’n, aniaan sɔ’m be kwla kan aklunjuɛ nga be di i Zoova i sulɛ’n nun’n i ndɛ kle be. Sɛ be kɔ aniaan sɔ’m be wun’n, bé kán ndɛ fɛfɛ klé be. Be klun mɔ be tu be su Ɲanmiɛn’n, ɔ́ úka amun mma’m be kpa naan b’a fa ajalɛ kpa Ɲanmiɛn i sulɛ’n nun. Asa kusu’n, i sɔ’n úka be naan b’a wun suklu ng’ɔ fata kɛ be di naan b’a kwla fa suan be blɛ kwlaa nun Ɲanmiɛn junman dilɛ’n i bo’n.
?Ba mun, ngue yɛ ɔ́ úka amun naan amun a fa Zezi i ajalɛ’n su ɔ?
16. ?Wafa sɛ yɛ Zezi buli i si nin i nin nga be tɛli i asiɛ’n su wa’n, ɔ nin i Si m’ɔ o ɲanmiɛn su lɔ’n be sran ɔn?
16 Ba mun, Zezi kle amun ajalɛ kpa wie. Be fali Zezi be wlali Zozɛfu nin Mali be sa nun kɛ be tɛ i. Zezi kusu i ɲin yili be. (An kanngan Lik 2:51 nun.) Zezi si kɛ kannzɛ fɔ o be nun’n, sanngɛ Ɲanmiɛn mannin be atin kɛ be niɛn i su. I ti’n, ɔ fata kɛ ɔ bu be sran. (Mmla’n 5:16; Matie 15:4) Kɛ Zezi ɲinnin’n, like ng’ɔ jɔ i Si m’ɔ o ɲanmiɛn su lɔ’n i klun’n, yɛ ɔ yoli i titi ɔ. Yɛle kɛ ɔ jrannin Satan i ɲrun kekle. (Matie 4:1-10) Ba mun, ɔ ju wie’n, ɔ yo amun kɛ nán amun ɲin yi amun si nin amun nin. ?Nɛ́n i ɔ? ?Sɛ ɔ yo amun sɔ’n, ngue yɛ ɔ kwla uka amun naan amun a fa Zezi i ajalɛ’n su ɔ?
17, 18. (a) ?Sa benin yɛ ɔ tɔ ba’m be su suklu lɔ ɔ? (b) ?Ngue yɛ sɛ be wla kpɛn su’n, ɔ kwla uka be naan b’a jran kekle ɔ?
17 Atrɛkpa’n, amun suklu lɔ janvuɛ’m be sunman lika be buman Biblu’n nun mmla’n i like fi. Wie liɛ’n, be se amun kɛ amun yo like tɛ wie. Yɛ sɛ amun kplinman su’n, be yo amun finfin. ?Kɛ amun nin be yomɛn i sɔ ninnge mun’n, be tɔn amun dunman? ?Sɛ ɔ ti sɔ’n, ngue yɛ amun yo ɔ? Amun si kɛ sɛ srɛ’n ti’n amun nin be yo like tɛ’n, amun si nin amun nin, ɔ nin Zoova be klun su jɔman amun wun. ?Sɛ amun su amun wiengu suklu ba’m be su’n, ngue sa yɛ ɔ́ ɲán amun ɔn? Atrɛkpa’n, amun klo kɛ amún yó titi atin bofuɛ annzɛ asɔnunfuɛ’m be lika nianfuɛ. Annzɛ amún kó bó jasin fɛ’n kɛ be le jasin bofuɛ awuliɛ lɔ’n, annzɛ amún dí junman Betɛli. ?Sɛ amun nin amun wiengu suklu ba’m be san nun’n, amún kwlá yó i sɔ ninnge mun?
18 ?Amun gbanflɛn nin talua mun mɔ amun o asɔnun’n nun’n, sa wie tɔli amun su m’ɔ sali amun Ɲanmiɛn sulafilɛ’n niɔn? ?Amun yoli sɛ? Maan amun bu amun ajalɛ klefuɛ Zezi i akunndan. W’a yacimɛn i wun lɛ naan b’a lɛkɛ i. Ɔ jrannin kekle. Afin ɔ si like ng’ɔ ti kpa’n. Sɛ amun wla kpɛn i sɔ’n su’n, ɔ́ úka amun naan amun a se amun wiengu suklu ba’m be kɛ amun yoman like tɛ nga be yo’n wie. Kɛ Zezi sa’n, wafa nga amun kwla fa be wun wlɛ i Zoova i junman dilɛ’n nun naan amun ɲin w’a yi i’n, amun fa be ɲin be sie su. Afin, i sɔ’n man aklunjuɛ.—Ebre Mun 12:2.
Nga mɔ maan awlobo’n nun tranlɛ’n kwla yo fɛ’n
19. ?Mɛn dilɛ wafa benin yɛ ɔ man aklunjuɛ ɔ?
19 Like ng’ɔ ti kpa man klɔ sran mun’n, yɛ Ɲanmiɛn Zoova nin Zezi Klist be kunndɛ ɔ. Kannzɛ bɔbɔ fɔ’n o e nun’n, sanngɛ e kwla di aklunjuɛ. (Ezai 48:17, 18; Matie 5:3) Zezi kleli i sɔnnzɔnfuɛ mun Ɲanmiɛn sulɛ’n nun ndɛ nanwlɛ ng’ɔ kwla yo naan klɔ sran’m b’a di aklunjuɛ’n. Sanngɛ nɛ́n i sɔ ngunmin yɛ ɔ kleli be ɔ. Ɔ kleli be mɛn dilɛ kpafuɛ’n. Asa ekun’n, ɔ kleli ajalɛ naan sran’m be mɛn dilɛ’n yo sɛsɛ naan be nzuɛn’n yo kpa. E kwlaa e kwla niɛn i ajalɛ’n su. Ɔ maan, yasua mun nin bla mun, ɔ nin siɛ nin niɛn mun, yɛ ba mun an fa Zezi i ajalɛ’n su! Ninnge nga Zezi kleli’n, ɔ nin ajalɛ ng’ɔ kleli’n i su falɛ’n, yɛ maan e awlobo’n nun tranlɛ’n, ɔ kwla yo fɛ ɔ.
?Amún tɛ́ su sɛ?
• ?Sielɛ mɔ Ɲanmiɛn waan yasua’n sie awlobo’n, wafa sɛ yɛ ɔ fata kɛ ɔ yo i ɔ?
• ?Wafa sɛ yɛ bla kun kwla nian Zezi i ajalɛ’n su ɔ?
• ?Wafa nga Zezi nin i sɔnnzɔnfuɛ’m be trannin’n, afɔtuɛ benin yɛ ɔ o nun man siɛ nin niɛn mun ɔn?
• ?Wafa sɛ yɛ ba’m be kwla nian Zezi i ajalɛ’n su ɔ?
[Foto, bue 13]
?Ka naan yasua kun m’ɔ klo i awlobofuɛ mun’n w’a fa ajalɛ wie m’ɔ kwla kan awlo’n, ngue yɛ ɔ yo ɔ?
[Foto, bue 14]
?Sa benin nun yɛ bla kun kwla kle kɛ ɔ suan i wun i sielɛ’n i bo ɔ?
[Foto, bue 15]
Ba’m be nian siɛ nin niɛn’m be aeliɛ kpa’n su.