?Yasua mun, amun lo amun wun man Klist kɛ ɔ sie amun?

“Krist yɛ ɔ sie yasua-a.”—1 KOR. 11:3.

1. ?Ngue yɛ ɔ kle kɛ Zoova ti Nyanmiɛn m’ɔ kloman sa sukusuku ɔ?

SA NGLO YILƐ 4:11 se kɛ: “E Min Nyanmiɛn, kɛ bé yí wɔ ayɛ bé mánmán wɔ bɔ be se kɛ a kwla sa’n kwlaa yo’n i su-ɔ, afin wɔ yɛ a yili like’n kwlaa-a, a klo kɛ á yí be ti yɛ a yili be-ɔ, yɛ ɔ ti yɛ be o lɛ-ɔ.” Kɛ mɔ Ɲanmiɛn Zoova yɛ ɔ yili like kwlaa’n ti’n, i yɛ ɔ Sie like kwlaa ɔ. Zoova ti Nyanmiɛn m’ɔ ‘yo sa i nuan su, ɔ klo-man sa sukusuku.’ I ti’n, ɔ siesieli anzi nin klɔ sran mun. Ɔ maan, sran kun le i like liɛ m’ɔ fata kɛ ɔ yo ɔ.—1 Kor. 14:33; Eza. 6:1-3; Ebr. 12:22, 23.

2, 3. (a) ?Sran klikli nga Zoova yili’n yɛle wan? (b) ?Siɛ’n nin i Wa klikli’n be tranlɛ nun’n, wan yɛ ɔ sie i wiengu ɔ?

² Blɛ mɔ like fi nunman lɛ’n, nn Ɲanmiɛn o lɛ w’a di afuɛ kpanngban kpa. Like klikli ng’ɔ yili’n, yɛle aolia nun sran nga be flɛ i “Ndɛ’n.” Be flɛ i sɔ afin i yɛ ɔ ti Zoova i nuan ijɔfuɛ ɔ. Ndɛ’n i ja nun yɛ Ɲanmiɛn sinnin naan w’a yi ninnge’n kwlaa ɔ. I sin’n, ɔ bali asiɛ’n su wa kɛ klɔ sran mɔ fɔ nunmɛn i nun’n sa. Be flɛli i Zezi Klist.—An kanngan Zan 1:2-3, 14 nun.a

³ ?Ɲanmiɛn Ndɛ’n nun’n, Ɲanmiɛn nin i Wa klikli’n, wan yɛ ɔ le ɲrun trɛ i wiengu ɔ? Ɲanmiɛn maan akoto Pɔlu klɛli i kɛ: “Kusu n klo kɛ an wun i wlɛ kpa kɛ Krist yɛ ɔ sie yasua-a, yasua kusu yɛ ɔ sie bla-a, yɛ Nyanmiɛn kusu sie Krist.” (1 Kor. 11:3) Ɔ ti weiin kɛ Klist i Si yɛ ɔ sie i ɔ. Kɛ ɔ ko yo naan lika’n w’a yoman sukusuku naan anzi nin klɔ sran’m b’a kwla di alaje’n, ɔ fata kɛ be lo be wun man sran kun naan ɔ sie be. Sran nga bɔbɔ mɔ ‘i yɛ Nyanmiɛn maan ɔ yili ninnge’n bɔ be o nyanmiɛn su lɔ nin asiɛ’n su wa be kwlaa’n,’ ɔ fata kɛ ɔ lo i wun man Ɲanmiɛn kɛ ɔ sie i.—Kol. 1:16.

4, 5. Ɔ fata kɛ Zezi lo i wun man Zoova kɛ ɔ sie i. ?Ɔ buli i sɔ’n sɛ?

⁴ Ɔ fata kɛ Zezi lo i wun man Zoova kɛ ɔ sie i. ?Ɔ buli i sɔ’n sɛ? ?Yɛ wafa sɛ yɛ ɔ buli asiɛ’n su balɛ’n niɔn? Ɲanmiɛn Ndɛ’n waan: “An bu akunndan kunngba nga Krist-Jésus buli’n wie. I b’ɔ nin Nyanmiɛn be ti kun’n, w’a kunndɛ-man kɛ ɔ́ fɛ́ i wun súnnzun i. W’a bu-mɛn i sɔ’n like fi, ɔ yoli i wun kanga, ɔ yoli i wun kɛ klɔ sran sa. Kɛ ɔ kacili i wun sran sɔ’n, ɔ yoli i wun aenvuɛ, ɔ yoli anyinyiɛfuɛ lele ɔ fa wuli, waka’n su yɛ ɔ wuli-ɔ.”—Fil. 2:5-8.

⁵ Zezi i Si i klun sa yolɛ nun’n, ɔ leman cɛn kun sa mɔ w’a lomɛn i wun w’a mɛnmɛn i Si ɔ. Ɔ seli kɛ: “M bɔbɔ n kpɛ-man n ti nun yo-man like fi. [...] Jɔlɛ nga n di’n ti nanwlɛ, afin nán m bɔbɔ n klun sa yɛ n klo kɛ ń yó-ɔ, sanngɛ sran ng’ɔ sunmannin min’n i klun sa yɛ n yo-ɔ.” (Zan 5:30) Ɔ seli ekun kɛ: “N yo [min Si] klun sa cɛn kwlaa.” (Zan 8:29) Kɛ ɔ ka kaan sa Zezi kɔ́ ɲanmiɛn su’n, ɔ srɛli i Si kɛ: “N yoli maan a nyannin kɔmin asiɛ’n su wa, yɛ junman nga a mannin min kɛ n di’n, n wieli i di.” (Zan 17:4) Ɔ ti weiin kɛ Zezi loli i wun mannin Ɲanmiɛn kɛ ɔ sie i. Yɛ i sɔ yolɛ’n w’a yoman kekle w’a mɛnmɛn i.

Kɛ Ba’n loli i wun mɛnnin i Si’n, ɔ ɲannin su ye

6. ?Nzuɛn kpa benin yɛ Zezi yili i nglo ɔ?

⁶ I nun mɔ Zezi o asiɛ’n su wa’n, i nzuɛn nga ɔ yili i nglo’n ɔ yoli kpa ngunmin. I wie yɛle kɛ ɔ kleli kɛ ɔ klo i Si kpa. Ɔ seli kɛ: “N klo e Si’n.” (Zan 14:31) Ɔ kloli sran’m be kpa kusu. (An kanngan Matie 22:35-40 nun.) Zezi w’a yoman sran’m be kpokokpoko le. Sanngɛ ɔ nin be trannin klanman. Yɛ w’a tumɛn i wun le. Ɔ seli kɛ: “Amun kwlaa bɔ an sua trɔ bɔ amu’an fɛ’n, an bla min sin, ń síke amun, yɛ amún dé wunmiɛn. An fa amun ti wla n kɔmin su waka’n bo, yɛ an fa min nzuɛn’n su, afin n ti sran wɛtɛɛ yɛ min anwlɛn’n ti flɔlɔ. Yɛ amun wla wá gúa ase. Afin n kɔmin su waka’n i sualɛ yo fɛ, yɛ n trɔ’n yo-man nɔnnin.” (Mat. 11:28-30) Zezi i nzuɛn kpa nin i ndɛ fɛ m’ɔ kan’n ti’n, sran nga sran’m be buman be like fi’n, be wun fali be feke.

7, 8. ?Moizi Mmla nun’n, sɛ mannza tɛnndɛn o bla kun wun’n, ngue yɛ ɔ leman atin yoman ɔn? ?Sanngɛ wafa sɛ yɛ Zezi yoli bla kun m’ɔ le i sɔ tukpacɛ’n niɔn?

⁷ Maan e nian wafa nga Zezi buli bla mun’n. Awlanmannun’n, yasua’m be yo bla’m be tɛtɛ. Kɛ laa Izraɛli lɔ Ɲanmiɛn sulɛ wafa’m be su kpɛnngbɛn’m be yoli sɔ ɔ. Sanngɛ Zezi liɛ’n, ɔ buli bla’m be wie. Kɛ ɔ yoli bla kun mɔ mannza tɛnndɛn o i wun w’a di afuɛ 12 i sɔ ɔ. Bla sɔ’n “w’a fɛ dan kpa ayrefuɛ sunman be sa nun.” Ɔ sacili i ninnge b’ɔ o i sa nun’n kwlaa, naan w’a kwla yo juejue. “Sanngɛ w’a yo-man ye, i tukpacɛ’n ɔli i nyrun tititi.” Moizi mmla’n nun’n, bla sɔ’n o fiɛn nun. Sran ng’ɔ kɛn i’n, nn i bɔbɔ w’a wlu fiɛn’n nun wie.—Sau. 15:19, 25.

⁸ Kɛ bla’n tili i kɛ Zezi su yo sran’m be juejue’n, ɔ wluli sran nga be sin yiɛli i’n, be afiɛn. Ɔ seli i wun kɛ: “Sɛ n kwla kɛn i tralɛ’n bɔ cɛ’n, ń yó juejue.” Ɔ kannin Zezi kpɛkun i osu kunngba’n nun lɛ i tukpacɛ’n wieli. Zezi si kɛ ɔ fataman kɛ bla’n kɛn i tralɛ’n. Sanngɛ kannzɛ bla’n yoli i sɔ’n w’a tutumɛn i. Ɔ yoli bla’n i kpa. Ɔ wunnin kɛ bla’n o afɛ nun w’a cɛ kpa naan ɔ fata kɛ be ukɛ i. Zezi seli bla’n i aunnvuɛ su kɛ: “N wa, Nyanmiɛn su bɔ a lafi’n ti, w’a nyan ɔ ti. Gua ɔ wla ase, kɔ, maan ɔ tukpacɛ’n wie.”—Mar. 5:25-34.

9. ?Kɛ sran’m be fali be mma kanngan mun blɛli Zezi mɔ i sɔnnzɔnfuɛ’m be ijɔli be’n, ngue yɛ Zezi yoli ɔ?

⁹ Bakanngan mun bɔbɔ’n kɛ be o Zezi wun’n, ɔ yo be fɛ dan. Cɛn kun’n, sran’m be fali be mma kanngan mun blɛli Zezi. Sanngɛ i sɔnnzɔnfuɛ’m be ijɔli be. Afin be buli i kɛ nn Zezi kloman kɛ bakanngan’m be kle i yalɛ. Sanngɛ nɛ́n i sɔ akunndan yɛ Zezi bu ɔ. Ɲanmiɛn Ndɛ’n se kɛ: “Kɛ Jésus wunnin i sɔ’n, w’a yo-mɛn i fɛ, naan w’a se [i sɔnnzɔnfuɛ mun] kɛ: ‘An yaci ba kanngan’m be nun maan be bla n sin, nán an fuan be, afin be bɔ be yo be wun kɛ ba kanngan nga mun sa’n, be yɛ Nyanmiɛn sie be-ɔ.’” I sin’n, “ɔ to i sa blali be, ɔ fɛ i sa fuafuali be su, yɛ ɔ yrali be nguan.” Zezi w’a manman bakanngan’m be atin kɛ be blɛ i wun lɛ sa ngbɛn. Sanngɛ ɔ sɔli be nun klanman.—Mar. 10:13-16.

10. ?Ngue ti yɛ Zezi i nzuɛn’n yoli kpa sɔ ɔ?

¹⁰ ?Ɔ yo sɛ yɛ kɛ Zezi bali asiɛ’n su wa’n, i nzuɛn’n yoli kpa sɔ ɔ? Yɛle kɛ i nun m’ɔ o ɲanmiɛn su lɔ’n, ɔ niannin wafa nga i Si fa yo ninnge mun’n, i su cɛli kpa. Kpɛkun i Si i nzuɛn’n kɛli i nun. (An kanngan Nyanndra Mun 8:22, 23 nun.) Ɔ wunnin wafa nga klolɛ su Zoova sie ninnge ng’ɔ yili be’n. Yɛ i kusu ɔ niannin su yoli wie. Nanwlɛ, sɛ ɔ ti kɛ Zezi w’a lomɛn i wun w’a mɛnmɛn i si’n, nn w’a kwlá yoman sɔ. Ɔ yoli i fɛ kɛ ɔ lo i wun mɛn i Si kɛ ɔ sie i. Yɛ Zoova kusu i sɔ Ba liɛ’n i klun jɔ i wun. Kɛ Zezi bali asiɛ’n su wa’n, ɔ niɛnnin i Si m’ɔ o ɲanmiɛn su lɔ’n i nzuɛn klanman’n su nantili sɛsɛsɛ. Nanwlɛ ɔ ti e cenjele kɛ Klist mɔ Ɲanmiɛn sieli i kɛ ɔ yo i Sielɛ’n i su Famiɛn’n, e lo e wun mɛn i kɛ ɔ sie e.

Maan e nian Klist i nzuɛn’n su e nanti

11. (a) ?Wan yɛ ɔ fata kɛ e mian e ɲin e fɛ i nzuɛn’n su ɔ? (b) ?Ngue ti yɛ ɔ fata kɛ yasua’m be mian be ɲin naan be fa Zezi i nzuɛn’n su ɔ?

¹¹ E kwlaa nga e o Klistfuɛ asɔnun nun’n, ɔ fata kɛ e nian Klist i nzuɛn’n su e nanti titi. I li yasua mun yɛ ɔ fata kɛ be yo i sɔ kpa ɔ. Kɛ nga e dun mmua kannin sa’n, Biblu’n se kɛ: “Krist yɛ ɔ sie yasua-a.” Klist niannin Ɲanmiɛn Kpli mɔ i yɛ ɔ sie i’n, i nzuɛn’n su. I sɔ kunngba’n, ɔ fata kɛ yasua’m be kusu be mian be ɲin be nian Klist m’ɔ sie be’n, i nzuɛn’n su. Kɛ akoto Pɔlu kacili Klistfuɛ’n, i sɔ yɛ ɔ yoli ɔ. Ɔ wlɛli i wiengu Klistfuɛ’m be fanngan kɛ: “Kɛ n nian like nga Krist yo’n su n yo’n, amun kusu an nian nga n yo’n su, an yo.” (1 Kor. 11:1) Akoto Piɛli kusu seli kɛ: “I sɔ yolɛ ti yɛ Nyanmiɛn flɛli amun-ɔn, afin amun ti, Krist bɔbɔ wunnin nyrɛnnɛn. Ɔ yoli sɔ kɛ an nian su naan an nanti i ajalɛ liɛ’n su.” (1 Piɛ. 2:21) Like kun ekun o lɛ mɔ i ti yɛ ɔ fata kɛ yasua’m be nian Klist i nzuɛn’n su ɔ. Yɛle kɛ be yɛ be sie be asɔnun kpɛnngbɛn nin asɔnunfuɛ’m be lika nianfuɛ ɔ. Ɔ yoli Zezi i fɛ kɛ ɔ nian Zoova i nzuɛn’n su. I kunngba’n, ɔ fata kɛ yasua’m be kusu Klist i nzuɛn’n i su falɛ’n yo be fɛ.

12, 13. ?Wafa sɛ yɛ ɔ fata kɛ asɔnun kpɛnngbɛn’m be yo be nga be fa be mannin be kɛ be nian be su’n niɔn?

¹² Kannzɛ ɔ yo sɛ’n, ɔ fata kɛ asɔnun kpɛnngbɛn’m be mian be ɲin naan b’a yo kɛ Klist sa. Piɛli seli asɔnun kpɛnngbɛn’m be kɛ: “An nian Nyanmiɛn i bua fa b’ɔ fa be mannin amun’n be lika. Nán an yo i mianlɛ su, an yo i kɛ Nyanmiɛn klo kɛ an yo’n sa. Nán an yo i kɛ amun wá nyán like ti, sanngɛ an tu amun klun yo. Nán an tin be nga be fa be mannin amun kɛ an nian be su’n be su, sanngɛ an yo sa ng’ɔ ti kpa’n maan be nian su.” (1 Piɛ. 5:1-3) Ɔ fataman kɛ asɔnun kpɛnngbɛn’m be tin be wiengu’m be su, annzɛ be mianmian be annzɛ be bu be lufle naan be yo be kpokokpoko. Be nian Klist i nzuɛn’n su. Ɔ maan kɛ bé nían be nga be fa be mannin be kɛ be nian be su’n be su’n, be mian be ɲin be klo be. Kpɛkun be bu be sran, be yo be cɛcɛ. Yɛ kɛ bé yó sɔ’n, be mian be ɲin be kan be wun ase.

¹³ Fɔ o be nga be dun asɔnun’n i ɲrun mma’n be nun. Ɔ fata kɛ i sɔ’n tran be akunndan’n nun titi. (Rɔm. 3:23) Ɔ maan ɔ ti mɔ be wun blibli be kɛ be sɔnnzɔn Zezi naan be niɛn i sran klolɛ’n su ɔ. Ɔ fata kɛ be bu wafa nga Ɲanmiɛn nin Klist be yoli sran mun’n i akunndan naan be mian be ɲin be sɔnnzɔn be. Piɛli wla e fanngan kɛ: “Amun kwlaa an yo amun wun kɛ kanga sa, yɛ an uka amun wun, afin be klɛli i Nyanmiɛn Ndɛ’n nun kɛ: ‘Nyanmiɛn nin be nga be tu be wun mun be lɛ i, sanngɛ ɔ yo aenvuɛfuɛ’m be ye.’”—1 Piɛ. 5:5.

14. ?Wafa sɛ yɛ ɔ fata kɛ asɔnun kpɛnngbɛn’m be kle kɛ be bu be wiengu’m be sran ɔn?

¹⁴ Yasua nga be sieli be asɔnun’n su’n be nin Ɲanmiɛn i bua fa’n be tranlɛ’n nun’n, ɔ fata kɛ be yi nzuɛn kpa’m be nglo. Rɔmfuɛ Mun 12:10 se kɛ: “An klo amun wun kpa kɛ sran nin i niaan sa, an dun mmua bu amun wiengu sran.” Asɔnun kpɛnngbɛn nin asɔnunfuɛ’m be lika nianfuɛ’m be bu be wiengu’m be sran. Kɛ Klistfuɛ’m be kwlaa be sa’n, ɔ fataman kɛ be ‘bu be bɔbɔ be wun akunndan yo like fi, nán be kunndɛ be dunman, nán be tu be wun, sanngɛ be bu sran wie’m be sran tra be bɔbɔ.’ (Fil. 2:3) Maan be nga be dun aniaan’m be ɲrun mmua’n, be bu be niaan’m be sran tra be bɔbɔ. Sɛ be yo i sɔ’n, ɔ kle kɛ sran sɔ mɔ be mannin be junman’n, be nian Pɔlu i ndɛ yɛ’n su. I waan: “E bɔ e wun sa sɔ’n i wlɛ kpa’n, maan e uka be nga be wun-mɛn i wlɛ kpa’n, nán maan e yo like ng’ɔ jɔ e bɔbɔ e klun’n. Maan e kwlaa e yo like ng’ɔ jɔ e wiengu klun’n, i sɔ’n nun e ukɛ i maan ɔ yo kpa. Afin Krist w’a yo-man like ng’ɔ jɔ i bɔbɔ i klun’n.”—Rɔm. 15:1-3.

‘An bu bla’m be sran’

15. ?Wafa sɛ yɛ ɔ fata kɛ yasua’m be nin be yi’m be tran ɔn?

¹⁵ Siɛn’n, maan e bu afɔtuɛ yɛ mɔ Piɛli mannin be nga be le bla mun’n, i akunndan. Ɔ klɛli i kɛ: “Nja mun, kɛ bɔ an si kɛ amun yi’m be wunmiɛn’n ju-man amun liɛ nun’n, amun nin be tran kpa. An bu be sran, afin ye nga Nyanmiɛn yoli amun b’ɔ maan amún nyán nguan’n, ɔ yoli be wie.” (1 Piɛ. 3:7) Sɛ e bu sran kun i sran’n, ndɛ ng’ɔ kan’n ti e cinnjin. Sɛ like wie miɛn i sa’n, e fa e ɲin sie su. Ɔ maan sɛ nán ndɛ cinnjin wie ti yɛ e kwla kpalo sran sɔ’n i ndɛ’n, e kwla fa su. I sɔ yɛ ɔ fata kɛ yasua kun nin i yi’n be tran ɔn.

16. ?Yasua kun nin i yi’n be tranlɛ’n i su ndɛ benin yɛ Ɲanmiɛn Ndɛ’n kan kle yasua’m be kpongbongbo ɔ?

¹⁶ Kɛ Piɛli seli yasua’m be kɛ be bu be yi’m be sran’n, ɔ kan guali su kɛ: “Sɛ an yo-man sɔ’n, amun nin Nyanmiɛn su kwla koko-man yalɛ wafa ng’ɔ ti su’n.” (1 Piɛ. 3:7) Ndɛ sɔ’n kle weiin kɛ wafa nga yasua kun nin i yi’n be tran’n, ɔ timan aɔwi ndɛ Zoova ɲrun. Sɛ ɔ bumɛn i yi’n i sran’n, ɔ nin Ɲanmiɛn su kwlá kokoman yalɛ. Asa ekun’n, e wun i kɛ, kɛ yasua’m be bu be yi’m be sran’n, ndɛ fi nunman lɛ kun. Yɛle kɛ be lo be wun man yasua mun aklunjuɛ su wie.

17. ?Ngue yɛ ɔ fata kɛ klolɛ mɔ yasua kun klo i yi’n, ɔ su i bo kɛ ɔ yo ɔ?

¹⁷ Bla’m be klolɛ su’n, Ɲanmiɛn Ndɛ’n se kɛ: “I sɔ’n ti’n, yasua mun, an klo amun yi mun kɛ an fa klo amun bɔbɔ amun wun’n sa. [...] Sran fi kpɔ-mɛn i bɔbɔ wun, sanngɛ ɔ tɛ i wun, ɔ niɛn i wun su kɛ Krist kusu nian Asɔnun’n i lika’n sa [...]. Maan yasua kun klo i yi kɛ ɔ fa klo i bɔbɔ wun’n sa.” (Efɛ. 5:28, 29, 33) ?Ngue yɛ klolɛ mɔ yasua’m be klo be yi mun’n, ɔ su be bo kɛ be yo ɔ? Pɔlu klɛli i kɛ: “Yasua mun, kɛ Krist kloli Asɔnun’n, amun kusu an klo amun yi mun sɔ. Afin asɔnun’n ti, ɔ fɛ i wun mannin.” (Efɛ. 5:25, 26) Klist i wiengu’m be ti’n, ɔ fɛli i wun mannin. I sɔ kunngba’n, yasua’n i yi’n i ti’n, maan ɔ fɛ i wun man. Sɛ yasua’n yomɛn i yi’n i kpokokpoko naan ɔ bu i sran naan ɔ yo i cɛcɛ naan ɔ bu i akunndan’n, ɔ su yoman kekle manman bla’n kɛ ɔ lo i wun mɛn i kɛ ɔ sie i.

18. ?Ngue yɛ ɔ kwla uka yasua mun aja’n nun ɔn?

¹⁸ ?Bla’m be sran bulɛ kɛ ngalɛ sa’n, ɔ tra yasua’m be wunmiɛn’n su? Cɛcɛ. Afin sɛ be kwlá yoman like kun’n, Zoova su seman be kɛ be yo i kekle nun. Asa ekun’n, Zoova i sufuɛ’m be kwla ɲan like cinnjin kpa kun m’ɔ kwla uka be ɔ. Yɛle Ɲanmiɛn i wawɛ’n. Zezi seli kɛ: “Sɛ amun bɔ an ti sran tɛ’n, an fa like kpa cɛ amun mma mun’n, wuun e Si b’ɔ o Nyanmiɛn su lɔ’n kusu, ɔ́ fɛ́ i Wawɛ’n mán be nga be srɛ i’n kpɛ blu.” (Lik 11:13) Kɛ yasua’m be nin Ɲanmiɛn bé kókó yalɛ’n, be kwla se Zoova kɛ ɔ fɛ i wawɛ’n man be naan be nin be wiengu’m b’a si tran. Be wiengu sɔ mun’n, be yi’m be o nun wie.—An kanngan Sa Nga Be Yoli’n 5:32 nun.

19. ?Like suanlɛ ng’ɔ́ bá lɛ nun’n, ndɛ benin yɛ é yíyí nun ɔn?

¹⁹ E wun i kɛ, kɛ ɔ yo naan yasua’m b’a kwla lo be wun b’a man Klist kɛ ɔ sie be naan be kusu b’a sie be wiengu kɛ i sa wie’n, ɔ timan aɔwi ndɛ. ?Yɛ bla’m be li? ?I li bla nga be o bian bo’n, be liɛ’n ti sɛ? Like suanlɛ ng’ɔ́ bá lɛ nun’n, é wá wún wafa nga ɔ fata kɛ be bu junman nga Zoova mannin be’n.

[Ja ngua lɛ ndɛ’n]

?Amun wla kwla kpɛn su?

• ?Zezi i nzuɛn benin yɛ ɔ fata kɛ e nian su ɔ?

• ?Wafa sɛ yɛ ɔ fata kɛ asɔnun kpɛnngbɛn’m be bu aniaan onga mun ɔn?

• ?Wafa sɛ yɛ ɔ fata kɛ yasua kun nin i yi’n be tran ɔn?

[Foto mun, bue 16]

Maan e bu e wiengu’m be sran kɛ Zezi sa.