“Jasin fɛ cɛn” nga nun’n, maan e ɲin kan ase
KOKOWEFUƐ nnan’m be wa buli ajalɛ nga be kwla fa’n i akunndan. Klɔ’n i anuan’n nun lɔ’n, sran fi w’a siman be aunnvuɛ w’a cɛman be like. Sirifuɛ’m be yoli maan aliɛ kwlá wluman Samali klɔ’n nun. I liɛ’n klɔ’n nunfuɛ’m bé fá be wun mán be annzɛ awe’n kún be. Sɛ kokowefuɛ’m be wlu klɔ’n nun lɔ’n, ɔ ti be wun yalɛ klelɛ ngbɛn. Afin be kwlaman like fi to kun. Sran dilɛ ndɛ w’a tɔ klɔ’n nun bɔbɔ.—2 Famiɛn Mun 6:24-29.
Kokowefuɛ’m be seli be wun kɛ: ‘?Y’a ɔman Sirifuɛ’m be nanmue’n nun lɔ li? Y’a wu w’a wie.’ Kɛ lika’n sannin mɔ sran fi kwlá wunman be’n, be ɔli. Kɛ be juli lɔ’n, nanmue’n ti koun. Gladi difuɛ fi nunman lɛ. Nnɛn kpanngɔ nin aflunmun’m be minnda lɛ sanngɛ sonja’m be nunman lɛ. Be nnan’m be niannin tannin sua kun nun. Sran fi nunman lɔ. Sanngɛ be diman aliɛ nin nzan yalɛ i nun. Ɔ maan be dili aliɛ’n yɛ be nɔnnin nzan’n. Asa ekun’n, be wunnin sika ɔkwlɛ nin jɛtɛ ufue nin tralɛ mun yɛ ninnge kpakpa uflɛ mun. Be fali nga be klo be’n be ko fiali. Kpɛkun be sali be sin be bali uflɛ falɛ. Sran fi nunman nanmue wunmuan’n nun ekun. Zoova yoli maan Sirifuɛ’m be tili alɛ kunfuɛ kpanngban kpa wie’m be nganniɛn. Be buli i kɛ be nin be su wa kun. Ɔ maan be wanndili. Kɛ bé kɔ́’n, be yacili be bo ninnge kwlaa lɛ naan sran nga i waan ɔ́ fá’n w’a fa!
Kokowefuɛ’m be fali ninnge kpakpa wie’m be fiali. Sanngɛ kɛ be buli Samali klɔ’n nunfuɛ mɔ awe su kun be’n be akunndan’n, ɔ yoli be kɛnsrɛn. Be seli be wiengu kɛ: “Nán sa kpa yɛ e su yo i yɛ’n! Y’a fite like kpa kun su ndɛkɛn [annzɛ “andɛ ti jasin fɛ cɛn,” NW], yɛ y’a muan e nuan yɛ.” Kokowefuɛ’m be sali be sin Samali klɔ’n nun lɔ ndɛndɛ, naan b’a ko bo like nga be wunnin i’n i su jasin fɛ’n.—2 Famiɛn Mun 7:1-11.
E kusu blɛ nga e o nun yɛ’n, be kwla flɛ i kɛ “jasin fɛ cɛn.” Kɛ Zezi kán like cinnjin kun m’ɔ ti “mɛn’n i awieliɛ’n i nzɔliɛ” ndɛ’n, ɔ seli kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.” (Matie 24:3, 14) ?Wafa sɛ yɛ ɔ fata kɛ i sɔ’n kan e ɔ?
E bɔbɔ e ninnge’m be kunndɛlɛ’n nin ngokɔɛ’n be kwla tanndan e ɲrun
Ninnge nga kokowefuɛ’m be wunnin be’n i fɛ m’ɔ yoli be’n ti’n, be wla fili Samali klɔ’n. Like nga be bɔbɔ be kwla ɲɛn i’n yɛ be buli i akunndan ɔn. ?I sɔ like liɛ’n wie kwla ju e su? Nzɔliɛ ng’ɔ́ klé kɛ e o mɛn’n i awieliɛ’n nun’n, ‘awe [m’ɔ́] wá kpɛ́n’n,’ ɔ o nun wie. (Lik 21:7, 11) Zezi wlɛli i sɔnnzɔnfuɛ’m be su nun kɛ: “An sasa amun wun, nán an yo aliɛ safuɛ mun nin nzanboɛfuɛ mun, nán an koko ninnge’m be ti.” (Lik 21:34) E mɔ e ti Klistfuɛ’n, ɔ fata kɛ e nian e wun naan e bɔbɔ e ninnge’m be kunndɛlɛ’n, ɔ nin ngokɔɛ’n b’a yoman naan e wla w’a fi su kɛ e o ‘jasin fɛ cɛn’n’ nun.
Klistfuɛ bla kun mɔ be flɛ i Blɛsingi’n w’a yaciman i bɔbɔ i ninnge’m be kunndɛlɛ’n i lɛ naan be tɛnndɛn i ɲrun. Ɔ ɔli suklu nga be nga bé káci like klefuɛ’n be kɔ nun’n. I blɛ sɔ’n nun’n, ɔ yoli atin bofuɛ. I sin ɔ jali Betɛli lɔ junman difuɛ kun kpɛkun ɔ kacili Benin lɔ Betɛli nunfuɛ. I waan: “N ti aniaan bla nga be yo Betɛli lɔ sua’m be nun yɛinyɛin’n, be nun kun. Nanwlɛ n klo min junman’n kpa.” Siɛn’n kɛ Blɛsingi bu afuɛ 12 nga w’a di i blɛ kwlaa nun Ɲanmiɛn junman dilɛ’n nun’n i akunndan’n, ɔ di aklunjuɛ. Afin ɔ fɛli i ɲin sieli “jasin fɛ cɛn” nga e o nun yɛ’n i su.
Ninnge nga be fa e blɛ’n be lika
Kɛ Zezi súnmɛn i sɔnnzɔnfuɛ 70 mun’n, ɔ seli be kɛ: “Awie’n w’a yo ye dan, sanngɛ junman difuɛ’m b’a sɔn-man. I sɔ’n ti’n, an se fie i fuɛ’n maan ɔ fa sran naan be wɔ i fie’n su.” (Lik 10:2) Sɛ e luali like naan i kpɛlɛ blɛ ju naan e cuɛncuɛn e ja ase’n, like nga e luali’n kwla saci. I kunngba’n niɔn, sɛ e fa jasin fɛ’n e kan ngowa’n, sran’m be kwla wu. I ti’n, Zezi kan guali su kɛ: “Nán an yo sran like atin’n nun.” (Lik 10:4) Aniɛn nga i klikli nun be klɛli ndɛ mma nga be kacili i wa kɛ ‘sran like yolɛ’n,’ nán “aɲin usalɛ” ndɛ ngunmin yɛ be fa kan ɔn. Kɛ sran nin i janvuɛ be yia nun’n mɔ be yo be wun like’n, i sin yalɛ nga be koko’n, be kwla fa kɛn i ndɛ wie. Ɔ maan Zezi seli i sɔnnzɔnfuɛ’m be kɛ nán be ɲin kpa be junman’n su, yɛ be yo be blɛ’n i cɛcɛ. Jasin ng’ɔ fata kɛ be bo kle sran mun’n, ɔ fata kɛ be bo i ndɛndɛ.
Maan e bu blɛ nga e fa wlɛ i e ɲin su yiyilɛ’n nun’n i akunndan. Afuɛ ko ju wie yɛ, kɛ sran’m be le blɛ kan’n, televiziɔn yɛ be nian ɔn. ?Yɛ selilɛli nin sran kun i bɔbɔ ɔrdinatɛli’n be li? Be fali be ɲin be sieli i Angle’m be lɔ sran kaklaakla 1.000 be su. Be wunnin kɛ “be nga be tran Angle lɔ’n, mɔ be timan aɲanbeunfuɛ annzɛ yalɛfuɛ’n, cɛn ba kun nun’n, be fa miniti 88 be ijɔ telefɔnu nun. Kpɛkun be fa miniti 62 be ijɔ selilɛli nun yɛ be fa miniti 53 be klɛ lɛtri ɛntɛnɛti su. Asa ekun’n, be fa miniti 22 be klɛ lɛtri be selilɛli’m be su.” Kɛ be kan blɛ wunmuan sɔ’n be bo nun’n, ɔ tra blɛ nga cɛn kunngun atin bofuɛ kun fa bo jasin’n cɛn kunngba nun’n, i kpɛ nɲɔn tra su! ?Blɛ nɲɛ yɛ amun fa flɛ telefɔnu su annzɛ amun fa klɛ lɛtri ɛntɛnɛti nin selilɛli su ɔ?
Ɛrnɛsi Seliger nin i yi Hidegard be yoli be blɛ’n i cɛcɛ. Be nɲɔn’m be dili afuɛ 40 Itilɛli i bisua nin be nga be flɛ be Kominisi’n, be bisua’m be nun. Kɛ be yacili be nun’n, be yoli atin bofuɛ lele be fa wuli. Be o be nga be kpali be sieli be ngunmin’n be nun wie.
Sran kpanngban be kunndɛ kɛ bé yó kɛ Seliger’m be sa wie. Blɛ nga be lafiman’n be kwla fa kanngan fluwa annzɛ be fa klɛ lɛtri. Sanngɛ like nga be fa sieli i like kwlaa ɲrun’n, yɛle Zoova i sulɛ’n.
Ɔ ti su kɛ e kwlakwla e klo kɛ e awlɛn su sran’m be klɛ e lɛtri annzɛ be flɛ e telefɔnu su. I sɔ’n timan like tɛ. Cɛn ba kun nun ninnge nga e yo be’n sɛ e siesie be kpa’n, e ɲan su ye. Sanngɛ ɔ fata kɛ jasin fɛ’n cɛn nga nun’n, e nian e wun, ninnge nga be kwla fa e blɛ’n be lika.
Maan e bo jasin fɛ’n e guɛ i ti nin i bo
Kɛ e o “jasin fɛ cɛn” nun’n, nanwlɛ ɔ ti suralɛ dan. Nán e fa e ɲin e sie i like uflɛ su kɛ kokowefuɛ nnan’m be fa yoli i klikli nun’n sa. Maan e wla kpɛn su kɛ i sin’n be seli kɛ: “Nán sa kpa yɛ e su yo i yɛ’n!” I kunngba’n sɛ e bɔbɔ e ninnge’m be kunndɛlɛ’n annzɛ e ɲin su yiyilɛ ninnge’m be fa e blɛ’n naan y’a kwlá boman jasin fɛ’n kpa’n, ɔ timan kpa.
I sɔ’n nun’n, sran kun kleli e ajalɛ kpa. Kɛ akoto Pɔlu bú afuɛ 20 ng’ɔ fa dili Ɲanmiɛn junman’n i akunndan’n, ɔ klɛli i kɛ: “M boli Krist i jasin fɛ’n kwlakwlakwla.” (Rɔmfuɛ Mun 15:19) Pɔlu w’a yaciman like fi lɛ naan ɔ kɛn i jasin fɛ’n bolɛ’n i ase. Kɛ é kán klé sran mun kɛ e o “jasin fɛ cɛn” nun’n, maan e yo juejuefuɛ kɛ Pɔlu sa.
[Foto, bue 31]
Blɛsingi w’a yaciman i bɔbɔ i ninnge’m be lɛ naan be tɛnndɛn i blɛ kwlaa nun Ɲanmiɛn junman dilɛ’n ɲrun.
[Foto, bue 32]
Seliger’m be yoli be blɛ’n i cɛcɛ.