?An sieli blɛ kun naan b’a suan Biblu’n nun like?

AFUƐ sin’n, e Ɲrun dinfuɛ’m be anuannzɛ’n siesieli e asɔnun aɲia’m be uflɛ naan e ɲan blɛ e suan Biblu’n nun like naan e nin e awlobofuɛ mun e koko su yalɛ. Sɛ e ti awlobo kpɛn’n, ɔ fata kɛ e nian nun kpa naan e nin e yi nin e mma mun e suan Biblu’n nun like titi. Yɛ like nga e suan’n maan ɔ nin e awlobo’n fata. Be nga kusu be o aja’n nun mɔ be leman ba’n, ɔ fata kɛ be fɛ i sɔ blɛ’n be suan Biblu’n nun like likawlɛ. Be nga be leman bian nin bla mɔ be leman ba’n, ɔ fata kɛ be fɛ i sɔ blɛ’n be suan be bɔbɔ be Biblu’n nun like.

Awlobofuɛ’m be Ɲanmiɛn sulɛ kɔnguɛ’n i wun ajalɛ sɔ’n, sran kpanngban be waan ɔ ti kpa dan. Be wie yɛle Kevɛn m’ɔ ti asɔnun kpɛnngbɛn’n. Ɔ klɛli i kɛ: “‘Asenna’ ngbɛn’n kwlá yiman wafa nga e mɔ e o asɔnun’n nun’n e wun fa yo e’n i nglo. E mɔ e ti asɔnun kpɛnngbɛn’n, e kokoli wafa nga e fa kɔnguɛ blɛ sɔ’n e yo like nga e Ɲrun dinfuɛ’m be anuannzɛ’n seli e kɛ e fa yo’n i su yalɛ. Yɛle kɛ maan e nin e awlobofuɛ mun e suan Biblu’n nun like.”

Jodi mɔ i wun ti asɔnun kpɛnngbɛn’n, ɔ klɛli i kɛ: “E le ba bla nsan. Kun le afuɛ 15, kun le afuɛ 11 yɛ kun ekun le afuɛ 2. Koko nun wa’n, e ɔli asɔnun nga be yo i bobo aniɛn’n nun’n kun nun. Ɔ maan, e fa blɛ kpanngban yɛ e mian e ɲin kpa e siesie e wun aɲia’m be ti. Siɛn’n, ajalɛ uflɛ nga ti’n, y’a ɲan kɔnguɛ blɛ uflɛ. I sɔ blɛ liɛ’n yo maan e fa e ɲin e sie i e awlobofuɛ’m be Ɲanmiɛn sulɛ’n su!”

Zan nin JoAnn be ti sran kun nin i yi, yɛ be ti titi atin bofuɛ. Be klɛli i kɛ: “Laa’n, nán blɛ kwlaa nun yɛ e kwla suan Biblu’n nun like awlo lɔ ɔ. Afin, asɔnun’n nun’n e le ninnge e yo. I kwlaa sɔ’n nun’n, ɔ fata kɛ e fa e Biblu’n nun like suanlɛ’n e wla nun. Ajalɛ uflɛ nga b’a fɛ i yɛ’n, ɔ fin Zoova. Yɛ sɛ e fɛ i sɔ blɛ’n e fa yo like ng’ɔ fata kɛ e fa yo’n, e wla gua ase.”

Tony ti aniaan bian kun ɔ leman bla. Ɔ su wa ɲan afuɛ 25. Jɔlɛ cɛn kɔnguɛ yɛ ɔ sieli i kɛ ɔ́ fá súɛn i awlo lɔ Biblu’n nun like ɔ. Le mɔcuɛ’n nun’n, ɔ fa blɛ uflɛ fa siesie i wun asɔnun aɲia’m be ti. Sanngɛ Tony seli kɛ: “Jɔlɛ cɛnfuɛ’n, min wun blibli min kɛ ɔ ju ndɛndɛ.” ?Ngue ti ɔ? I waan: “Cɛn sɔ’n, ɔ ti min cɛn mɔ min nin Zoova e o nun ɔn.” Tony yiyi nun kɛ: “N fa dɔ lele kɔe nɲɔn n suan ninnge nga m’ɔ maan min nin Zoova e afiɛn’n mantan kpa’n. Kɛ mɔ blɛ nga n fa suan Biblu’n nun like’n sɔnnin’n ti’n, n kwla bu Biblu’n nun ndɛ mma nga n kanngan be nun’n, be su akunndan.” ?I sɔ’n i bo’n gua sɛ? I waan: “Zoova i afɔtuɛ’m be kan min awlɛn’n kpa tra laa liɛ’n.” ?Ɔ kwla fa sunnzun ase kun kle e? I waan: “E fluwa Étude perspicace nun’n, n kanngannin janvuɛ nga Davidi nin Zonatan be trali’n i su ndɛ’n nun. N wunnin i kɛ Zonatan i ninnge yolɛ’n nun’n w’a bumɛn i bɔbɔ i wun akunndan. I ajalɛ’n ukali min maan kɛ be kan janvuɛ kpa ndɛ’n, n wunnin i wlɛ kpa. Nanwlɛ, ninnge kpakpa sɔ mɔ n wunnin be Jɔlɛ cɛn kɔnguɛ’n, n kunndɛ kpa kɛ ń sí uflɛ wie mun ekun!”

E lafi su kɛ, sɛ Zoova i sufuɛ’m be fa blɛ nga be siesieli i lɛ’n be yo like ng’ɔ fata kɛ be fa yo’n, yɛle kɛ be fa suan Biblu’n nun like naan be nin be awlobofuɛ’m be fa su Ɲanmiɛn’n, be kwlaa bé ɲán su ye.