Awlobofuɛ’m be ukalɛ like ɔ
1. ?Ngue ti yɛ wunmiɛn lolɛ cɛn’n i su mmla nga Zoova mannin Izraɛlifuɛ mun’n, ɔ yoli be awlobo nunfuɛ’m be ye dan ɔn?
1 Wunmiɛn lolɛ cɛn’n i su mmla nga Zoova mannin Izraɛlifuɛ mun’n, ɔ yoli be awlobo nunfuɛ’m be ye dan. Yɛle kɛ cɛn sɔ’n nun’n, be diman junman. Ɔ maan, ye nga Zoova yo be’n ɔ nin nantilɛ nga be nin i fa nanti’n, be ɲan be ti be bu i akunndan. Cɛn sɔ nun’n, siɛ nin niɛn’m be kan Moizi Mmla’n i nun ndɛ’n be kle be mma mun. (Mml. 6:6, 7) Ɔ maan, le mɔcuɛ kwlaa nun’n, Zoova i nvle’n nunfuɛ’m be fa wunmiɛn lolɛ cɛn’n be bu be Ɲanmiɛn sulɛ’n i akunndan kpa.
2. ?Zoova i su like benin yɛ wunmiɛn lolɛ cɛn’n i su mmla’n ɔ kle e ɔ?
2 Zoova seman awlobo nunfuɛ’m be kɛ be di wunmiɛn lolɛ cɛn’n i su mmla’n su ekun. Sanngɛ mmla sɔ’n kle e Ɲanmiɛn i su like kun. Ɔ kle e kɛ i sufuɛ’m be bɔbɔ be kpa yolɛ ti yɛ ɔ kunndɛ kɛ be nin i be afiɛn’n mantan kpa ɔ. (Eza. 48:17, 18) E ndɛ te lo Zoova kpa. I ti yɛ be siesieli kɛ e fa nnɔsua kun naan e nin e awlobofuɛ mun e su Ɲanmiɛn awlo lɔ’n niɔn.
3. ?Ngue ti yɛ be fali ajalɛ kɛ le mɔcuɛ kwlaa nun’n, e fa nnɔsua kun naan e nin e awlobofuɛ mun e su Ɲanmiɛn awlo lɔ ɔ?
3 ?Ngue ti yɛ e fa nnɔsua kun naan e nin e awlobofuɛ mun y’a su Ɲanmiɛn awlo lɔ ɔ? Kɛ ɔ fɛ i afuɛ 2009, Zanvie anglo nun’n, cɛn nga e yo Ɲanmiɛn junman dilɛ suklu ɔ nin Junman dilɛ aɲia’n, i nnɔsua kunngba sɔ’n nun yɛ e yo Asɔnun’n i fluwa nun ndɛ suanlɛ aɲia’n wie ɔ. Be siesieli aɲia sɔ’m be uflɛ naan le mɔcuɛ kwlaa nun’n, awlobofuɛ’m be fa cɛn kun, naan nnɔsua nun’n, be su Ɲanmiɛn awlo lɔ. I sɔ’n yó maan awlobofuɛ’m be nin Ɲanmiɛn be afiɛn’n mantan kpa. Be wlali awlobofuɛ’m be fanngan kɛ, sɛ be yo sɔ’n ɔ yo ye’n, cɛn nga be fa yo Asɔnun’n i fluwa nun ndɛ suanlɛ aɲia laa’n, yɛ be nin be awlobo nunfuɛ’m be fa koko Biblu’n nun ndɛ’n su yalɛ blɛblɛblɛ ɔ. Naan blɛ sɔ’n nun’n, maan be fa be ɲin be sie like ng’ɔ kwla uka be awlobofuɛ mun’n, i su.
4. ?Ɔ nin i fata kɛ saan fii e nin e awlobofuɛ mun e Ɲanmiɛn sulɛ’n di dɔ kun? Amun yiyi nun.
4 Laa, ka naan y’a ɔ Asɔnun’n i fluwa nun ndɛ suanlɛ aɲia’n i bo’n, ninnge kwlaa nga e yo naan y’a ju lɔ’n, ɔ fa e blɛ dan. Ɔ kwla yo e wun siesielɛ, annzɛ kusu loto falɛ annzɛ e ja nantilɛ, annzɛ ninnge uflɛ wie mun ekun be yolɛ. Ɔ maan, e nun sunman lika e liɛ’n, blɛ nga e fa siesie e wun’n, ɔ tra dɔ kun nga e fa yo aɲia’n bɔbɔ ba’n. Sanngɛ, kɛ mɔ siɛn’n b’a siesie aɲia sɔ’n i wafa uflɛ’n ti’n, e kwla fa cɛn sɔ’n naan e nin e awlobofuɛ mun y’a su Zoova. E su seman kɛ saan fii e nin e awlobofuɛ mun e Ɲanmiɛn sulɛ’n di dɔ kun kɛ Asɔnun’n i fluwa nun ndɛ suanlɛ aɲia’n sa. Sanngɛ, maan e bu like ng’ɔ fata kɛ e awlobofuɛ’m be fa be ɲin be sie su’n, i akunndan. I liɛ’n, é kwlá wún blɛ nga é fá sú Ɲanmiɛn awlo lɔ’n naan i sɔ’n w’a kwla uka e ngba’n.
5. ?Ɔ fata kɛ awlobofuɛ’m be ngba be tran likawlɛ lele naan dɔ wunmuan’n sɔ’n wíe? Amun yiyi nun.
5 ?Be ngba bé trán likawlɛ lele dɔ wunmuan’n sɔ’n wíe? Kɛ siɛ nin niɛn ɔ nin be mma mun, annzɛ be nga be o aja’n nun’n mɔ be leman ba’n be yia be koko Biblu’n su yalɛ likawlɛ’n, be wla be wiengu fanngan. (Rɔm. 1:12) Ɔ maan, awlobofuɛ’m be afiɛn’n mantan kpa tra laa’n. I sɔ’n ti’n, ɔ fata kɛ Ɲanmiɛn Ndɛ’n mɔ be ngba be koko su yalɛ’n, yɛ ɔ yo awlobofuɛ’m be Ɲanmiɛn sulɛ’n i nun like cinnjin’n niɔn. Sanngɛ, awlobofuɛ’m be tinuntinun be kwla fa blɛ be suan like. I wie yɛle kɛ, kɛ be ngba be ko wie Biblu’n su yalɛ’n koko’n, be kwla ka lɛ, kpɛkun be tinuntinun be suan like uflɛ. Ɔ kwla yo aɲia’m be siesielɛ’n i bo guagualɛ, annzɛ e periodiki’m be nun kannganlɛ. Awlobo wie’m be nun’n, be fali ajalɛ kɛ blɛ sɔ’n nun’n, be su sɔman televiziɔn’n.
6. ?Wafa sɛ yɛ e kwla siesie e awlo lɔ Ɲanmiɛn sulɛ’n niɔn?
6 ?Wafa sɛ yɛ e kwla siesie awlo lɔ Ɲanmiɛn sulɛ’n niɔn? Nán maan e awlo lɔ Ɲanmiɛn sulɛ’n yo kosan usalɛ nin i su tɛlɛ sa trilili. Kɛ ɔ ko yo naan be awlobofuɛ’m be Ɲanmiɛn sulɛ’n w’a yo fɛ’n, awlobofuɛ wie’m be siesieli i kɛ e asɔnun’n aɲia’m be sa. Yɛle kɛ be blɛ sɔ’n nun’n, be yo ninnge fanunfanun. Wie liɛ’n, be kanngan Biblu’n nun likawlɛ, kpɛkun be siesie aɲia wie mun. I sin’n, ajalɛ nga be kwla nian su jasin’n fɛ’n bolɛ nun’n, be yi be nglo. Fluwa nga i bue 5 su’n, be kle e ninnge wie mɔ e kwla yo’n.
7. ?Ngue yɛ ɔ fata kɛ siɛ nin niɛn’m be yo naan awlobofuɛ’m be wun w’a kpaja be blɛ sɔ’n nun ɔn?
7 ?Ngue yɛ ɔ fata kɛ siɛ nin niɛn’m be yo ɔ? Sɛ awlobofuɛ’m be wun kpaja be’n, bé kwlá súan like. I sɔ ti’n, blɛ wie nun’n, sɛ lika’n ti wauun’n, amun kwla ko suan like gua su lɔ. Asa ekun, amun kwla jaso be tinngɛtinngɛ be ja nun kan. Awlobo wie’m be nun’n, kɛ be ko wie be awlo lɔ Ɲanmiɛn sulɛ’n, be nɔn blɔfuɛ nzan ng’ɔ boman’n kan, annzɛ be di kpanndɔ kan. Blɛ nga awlofuɛ’m bé sú Ɲanmiɛn awlo lɔ’n, ɔ nin i fataman kɛ siɛ nin niɛn’m be kpankpan ba’m be su annzɛ be tɔ be su be bo be. Sanngɛ be kwla fa blɛ kan be koko ndɛ wie m’ɔ o ba’m be su’n i su yalɛ. Kusu, sɛ siɛ nin niɛn’m be nin be wa kun be koko ndɛ kun m’ɔ o i su’n i su yalɛ aamiɛn blɛ uflɛ nun’n, ɔ ti kpa. Afin, ndɛ’n sɔ’n i cinnjin liɛ’n ti’n, ɔ fataman kɛ be bo su nzra nun. Naan ba’n w’a wunman ɲannzuɛn i niaan’m be ɲrun. Ɔ nin i fataman kɛ awlobofuɛ’m be Ɲanmiɛn sulɛ’n yo be ɲrun kouun, annzɛ kusu ɔ yo kɛ blɛ sɔ’n nun’n, be kwlá sriman bɔ kaan sa. Afin Ɲanmiɛn nga e su i’n, ɔ di aklunjuɛ.—Jue. 104:31.
8, 9. ?Wafa sɛ yɛ ɔ fata kɛ awlobo kpɛn’n siesie i wun ɔn?
8 ?Wafa sɛ yɛ awlobo’n i su kpɛn’n kwla siesie i wun ɔn? Maan siɛ’n dun mmua siesie i wun naan awlobofuɛ’m be Ɲanmiɛn sulɛ’n w’a yo be kwlaa be ye. Yɛle kɛ ɔ fata kɛ ɔ dun mmua bu like nga bé kɛ́n i ndɛ’n, ɔ nin wafa nga bé yó i sɔ’n naan w’a yo be ye’n, i akunndan. (Nya. 21:5) I lɛ’n nun’n, ɔ kwla usɛ i yi’n i ngwlɛlɛ afɛ. (Nya. 15:22) Siɛ mun, ɔ ju wie’n, amun kwla se amun mma’m be kɛ be kan like nga be kunndɛ kɛ amun yo i blɛ sɔ’n nun’n, i ndɛ. Sɛ amun yo sɔ’n, amún sí like ng’ɔ lo be’n.
9 Nán kɛ le mɔcuɛ kwlaa nun’n, awlobo kpɛn’n ɔ́ fá blɛ kpanngban síesíe awlo lɔ Biblu’n nun like suanlɛ’n niɔn. Kusu’n, nán kɛ saan fii naan ɔ́ síesíe like uflɛ naan b’a yo ɔ. Afin atrɛkpa’n, ɔ le ninnge wie mɔ i awlobofuɛ’m be yo i titi mɔ kusu be klo i yolɛ blɛ sɔ nun ɔn. Ɔ kwla yo kɛ Biblu’n nun kannganlɛ likawlɛ’n sa. Ɔ maan, awlobo su kpɛn’n su kaciman awlobo’n i Ɲanmiɛn sulɛ’n i siesielɛ wunmuan’n blɛ kwlaa nun. Asa ekun’n, ɔ kwla fa ajalɛ kɛ, kɛ be wie be awlobo’n i Ɲanmiɛn sulɛ’n i yo’n, ɔ́ ká lɛ bú like nga bé yó i le mɔcuɛ ng’ɔ́ bá lɛ nun’n, i akunndan. Afin like ng’ɔ mian awlobofuɛ’m be sa’n te wo i klun. Siɛ wie’m be klɛ like nga awlobofuɛ’m bé wá yó’n fluwa kun su. Kpɛkun lika nga awlobofuɛ wunmuan’n be kwla wun i’n, lɛ yɛ be tɛ i ɔ. Wie’m be fa tɛ i be flizidɛli’n su. I sɔ’n yo maan awlobofuɛ’m be wun blibli be kɛ cɛn sɔ’n ju ndɛndɛ, kpɛkun be konvi o like nga bé wá súan’n i su. Asa kusu’n, sɛ be mannin be junman wie’n, be kwla bo be wun siesielɛ’n bo.
10. ?Wafa sɛ yɛ be nga nin a jaman bian annzɛ bla’n, annzɛ be ngunmin yɛ be su Zoova’n, be kwla su Ɲanmiɛn awlo lɔ ɔ?
10 ?Yɛ sɛ n nin a jaman bian annzɛ bla’n, annzɛ sɛ min ngunmin yɛ n su Zoova min awlo lɔ’n nin? Be nga be ti i sɔfuɛ’n, be kwla fa i sɔ blɛ’n be suan be ngunmin be Biblu’n nun like. Blɛ sɔ nun’n, maan ninnge kɛ Biblu’n nun kannganlɛ nin aɲia’m be siesielɛ sa, ɔ nin Sasafuɛ Tranwlɛ’n nin Réveillez-vous ! be nun kannganlɛ’n sa, be tran be like suanlɛ’n nun. Aniaan wie mun’n, kɛ be wie i sɔ yo’n, be kunndɛkunndɛ ndɛ wie’m be bo, be fa nannan su. Ɔ ju wie’n, be yia aniaan uflɛ annzɛ awlobo kun naan be nin i koko Ɲanmiɛn Ndɛ’n su yalɛ naan be wla be wiengu fanngan.
11, 12. ?Kɛ e kpɛman e awlobo’n i Ɲanmiɛn sulɛ’n i nun cɛn’n, mmlusuɛ benin yɛ e ɲɛn i ɔ?
11 ?Kɛ e kpɛman nun cɛn’n i su ye benin yɛ e ɲɛn i ɔ? Be nga be tu be klun be su Ɲanmiɛn’n, be nin i be afiɛn’n mantan kpa tra laa’n. Awlobo nga i nunfuɛ’m be su Ɲanmiɛn likawlɛ awlo lɔ’n be kusu, be afiɛn’n mantan kpa wie. Aniaan kun nin i yi be kannin mmlusuɛ nga be ɲɛnnin i’n, i ndɛ. Be klɛli i kɛ: “E ti atin bofuɛ yɛ e leman ba. Ɔ maan, e ɲin m’ɔ o cɛn sɔ’n i sin’n ti’n, e kunndɛ kɛ ɔ ju ndɛndɛ. I sɔ’n yo maan e nɲɔn’n e afiɛn’n mantan kpa, kpɛkun, e nin e Si m’ɔ o ɲanmiɛn su lɔ’n e afiɛn’n mantan kpa wie. Kɛ cɛn nga e siesieli kɛ é sú Ɲanmiɛn likawlɛ ɔ ju’n, kɛ e tinnge nglɛmun’n, e se e wiengu kɛ: ‘?A si like nga é yó i nnɔsua’n? É sú Ɲanmiɛn likawlɛ!’”
12 Awlobofuɛ nga be ɲanman be ti’n, awlo lɔ Ɲanmiɛn sulɛ’n uka be kpa. Aniaan bla kun i ngunmin tɛ i wa yasua nɲɔn’n, kpɛkun ɔ ti titi atin bofuɛ. Ɔ klɛli i kɛ: “Laa’n, e awlobo’n i Biblu’n nun like suanlɛ’n yoli kekle mannin e. Afin afɛ m’ɔ o min su’n ti’n, e kpɛ nun cɛn. Kpɛkun nán like nga ɔ lo e’n, i su like yɛ e suan ɔn. Kɛ ɔ yo naan n siesie e awlo lɔ Ɲanmiɛn sulɛ’n naan ɔ yia’n, w’a yoman ye n sa nun. Ɔ maan nanwlɛ, ajalɛ nga amun fɛli i kɛ awlobofuɛ’m be fa nnɔsua kun naan be su Ɲanmiɛn be awlo lɔ’n ti’n, n klɛli fluwa sɔ’n blɛli amun naan ń yó amun mo. Siɛn’n, e su Ɲanmiɛn awlo lɔ titi, e kpɛman nun cɛn. Yɛ e ɲan su mmlusuɛ dan.”
13. ?Sɛ awlo lɔ Biblu’n nun like suanlɛ’n yo awlobofuɛ’m be ye’n, ɔ fin ngue?
13 Awlobofuɛ’m be Ɲanmiɛn sulɛ’n, ɔ ti like kpa kun mɔ Ɲanmiɛn fa man e kɛ laa wunmiɛn lolɛ cɛn’n sa ɔ. Like sɔ’n kwla yo awlobofuɛ’m be ye kpa. (Zak 1:17) Wafa nga Izraɛlifuɛ’m be nin Zoova be afiɛn’n fa mantannin’n, ɔ fin like nga be yo i wunmiɛn lolɛ cɛn’n nun’n. I kunngba’n yɛle e liɛ’n. Wafa nga e nin e awlobofuɛ mun e nin Zoova e afiɛn’n fa mantan, ɔ fin like nga e yo i e awlo lɔ Ɲanmiɛn sulɛ blɛ nun’n. (2 Kor. 9:6; Gal. 6:7, 8; Kol. 3:23, 24) Sɛ e fa ajalɛ sɔ’n su kpa’n, e nin e awlobofuɛ mun’n é kwlá kán ndɛ nga jue tofuɛ’n kannin’n wie. Ɔ seli kɛ: “Sanngɛ Nyanmiɛn i tranlɛ bɔ e nin wɔ tran’n ɔ ti min anyanbeun like.”—Jue. 73:28.
[Ndɛ kwle, bue 5]
Ɔ nin i fataman kɛ awlobofuɛ’m be Ɲanmiɛn sulɛ’n yo be ɲrun kouun, annzɛ kusu ɔ yo kɛ blɛ sɔ’n nun’n, be kwlá sriman bɔɔ kaan sa. Afin Ɲanmiɛn nga e su i’n, ɔ di aklunjuɛ.
[Kuku, bue 6]
AN SIE I KPA
Ninnge nga e kwla fa wla awlo lɔ Ɲanmiɛn sulɛ nun’n
Biblu’n:
• Amun kanngan le mɔcuɛ’n nun Biblu’n i bue nga ɔ ti mɔ be kanngan nun’n. Sɛ i bue nga bé kánngan nun’n, ɔ ti sran nin sran be yalɛ kokolɛ’n, maan be cɛ i nun kannganlɛ’n i nun.
• Amun yi Biblu’n i bue sɔ mɔ amun kanngannin nun’n, i nglo.
• Maan amun se awlobofuɛ’m be kɛ be dun mmua kanngan Biblu’n i bue sɔ’n nun naan be klɛ i su kosan kun annzɛ nɲɔn mɔ be kunndɛ kɛ bé úsa’n. I sin’n, maan amun kunndɛ kosan’m be su tɛlɛ’n likawlɛ.
• Le mɔcuɛ kwlaa nun’n, maan amun klɛ Biblu’n nun ndɛ mma kun fluwa kaan kun su. Amun suan naan ɔ ka amun klun. Kpɛkun amun yiyi nun. An fa fluwa kanngan sɔ mun sie. Yɛ, le mɔcuɛ kwlaa nun’n amun nian fluwa kanngan sɔ’m be nun ekun, naan amun a si Biblu’n nun ndɛ mma nga be kali amun klun’n, be nuan.
• Maan amun tie Biblu’n nun kannganlɛ nga ɔ o CD annzɛ kasɛti su’n. Kɛ amún tíe’n, nn amún nían amun Biblu’n liɛ’n nun.
Aɲia’m be siesielɛ:
• Maan amun siesie aɲia wie mun likawlɛ.
• Maan amun suan jue nga é tó be le mɔcuɛ ng’ɔ́ bá lɛ’n nun aɲia’m be bo lɔ’n.
• Sɛ awlobo nunfuɛ kun le junman di i Ɲanmiɛn junman dilɛ suklu’n nun’n, annzɛ ɔ fata kɛ ɔ yi like kun nglo Junman dilɛ aɲia’n i bo’n, maan amun koko wafa nga ɔ kwla di i junman’n i su yalɛ, annzɛ kusu maan ɔ yi i nglo awlobofuɛ’m be ɲrun.
Sa ng’ɔ mian awlobofuɛ mun’n:
• Amun koko fluwa kɛ Les jeunes s’interrogent annzɛ Écoute le grand Enseignant sa’n, be nun ndɛ’n i su yalɛ.
• Maan amun yi sa wie mɔ be kwla tɔ ba’m be su suklu lɔ’n, ɔ nin wafa nga be kwla jran be ɲrun kekle’n, be nglo.
• Maan sa kun i nglo yilɛ nun’n, ba’m be yo kɛ be yɛ be ti siɛ’n nin niɛn’n sa. Yɛle kɛ be man ndɛ kun su, kpɛkun be nian Biblu’n i akua’m be nun, yɛ be yiyi nun kle be si nin be nin.
Jasin fɛ’n i bolɛ:
• Maan amun yi Biblu’n i akua nga é fá bó jasin fɛ’n Fue annzɛ Mɔnnɛn cɛn’n, be nglo.
• E Wla Kpɛnlɛ Cɛn aɲia’n i blɛ nun’n, annzɛ siɛ nin niɛn nin be mma’m be wunmiɛn lolɛ blɛ nun’n, wafa nga amun kwla uka dɔ nga amun fa bo jasin’n fɛ’n su’n, amun kɛn i ndɛ.
• Maan amun man awlobofuɛ’m be blɛ kan, naan jasin fɛ’n bolɛ nun’n, kosan nga be kwla fa usa be’n, be kunndɛ be su tɛlɛ’n. I sin’n, maan amun yi i nglo.
Ajalɛ uflɛ wie mun ekun yɛ:
• Maan amun kanngan e periodiki wie’m be nun likawlɛ.
• Maan awlobofuɛ’m be tinuntinun be dun mmua kanngan periodiki’m be nun. I liɛ’n, kɛ amún sú Ɲanmiɛn awlo lɔ’n, i nun ndɛ ng’ɔ yoli be fɛ’n, be kwla bo su.
• Ɔ ju wie’n, maan amun yia jasin’n bofuɛ kun annzɛ aniaan kun nin i yi amun awlo lɔ Ɲanmiɛn sulɛ’n, i bo. Naan be kan jasin fɛ’n bolɛ’n i su ndɛ fɛ wie annzɛ be kan wafa nga ɔ yoli mɔ be wa kacili Zoova i Lalofuɛ’n, i ndɛ.
• Maan amun nian anuannzɛ’n i flimu kun, yɛ amun koko su yalɛ.
• Maan amun koko Réveillez-vous ! nun ndɛ akpasua kɛ “ Les jeunes s’interrogent ” annzɛ “ Apprenons en famille ” be su yalɛ.
• Maan amun koko Sasafuɛ Tranwlɛ’n nun ndɛ akpasua nga be flɛ i kɛ “Maan e kle e mma’m be like” annzɛ “ Pour nos jeunes lecteurs ” be su yalɛ.
• Maan amun kanngan Annuaire annzɛ fluwa uflɛuflɛ’n be nun kun nga e ɲannin be e nvle kun aɲia kasiɛn’n i bo’n, be bue wie’m be nun. Yɛ amun koko be su yalɛ.
• Kɛ e aɲia dan kun ko wie’n, maan amun koko i nun ndɛ cinnjin’m be su yalɛ.
• Maan amun fa amun ɲin sie ninnge wie mɔ Zoova yili be’n, be su. Kpɛkun Zoova i su like nga i sɔ’n kle e’n, amun kɛn i ndɛ.
• Maan amun jaja klɔ annzɛ ninnge uflɛ wie mun ekun fluwa su, annzɛ amun kwla bobo ninnge kɛ mmeli sa annzɛ like uflɛ wie.