Ato’n Flɛ Ato

KLISTFUƐ nga be trannin afuɛ nga be flɛ i 50 lele m’ɔ́ fá jú afuɛ nga be flɛ i 100 nun’n, akoto Pɔlu klɛli be fluwa. Ɔ klɛli i kɛ: “An sasa amun wun, nán maan sran fi fɛ i sa ng’ɔ si i’n nin sa ngbɛn wie fa laka amun naan ɔ nyan amun. Sa sɔ’m be fin lalafuɛ’m be nzuɛn’n.”—Kolɔsfuɛ Mun 2:8.

Kannzɛ Pɔlu wlali Klistfuɛ’m be su nun kpa sɔ’n, sanngɛ kɛ ɔ fɛ i afuɛ nga be flɛ i 150 nun’n, be wa jrannin lalafuɛ nun fluwa sifuɛ dandan wie’n be ndɛ’m be su be yiyili ninnge nga be lafi su’n, be nun. ?Ngue ti ɔ? Be kunndɛli kɛ Rɔmu nvle nun fluwa sifuɛ’m be sɔ be nun klanman naan sran kpanngban su be su.

Justin le Martyr m’ɔ ti Klistfuɛ sɔ’m be nun cinnjin kun’n, i waan Ɲanmiɛn nuan ijɔfuɛ’n yili i wun nglo kleli Glɛki fluwa sifuɛ dandan mun lele kwlaa naan Zezi w’a ba asiɛ’n su wa. Justin nin be nga be kle like kunngba’n, be waan sa nga klɔ sran’m be si i’n, ɔ nin lalafuɛ ndɛ mɔ be fa sanngan Klistfuɛ’m be ninnge’m be nun’n, ɔ yoli maan Ɲanmiɛn sulɛ wafa sɔ’n w’a tru dan.

Ɲanmiɛn sulɛ wafa nga Justin le Martyr waan Klistfuɛ’m be su i’n, ɔ truli kpa. Ɔ maan sran sunman be fali su. Sanngɛ kɛ mɔ sran’m be fali ato ndɛ kun su’n, i sɔ’n kpɛli ato uflɛ ba. I sɔ ato ndɛ sɔ mun yɛ andɛ’n sran’m be bu i kɛ be ti Klistfuɛ’m be like m’ɔ fata kɛ be lafi su’n niɔn. Kɛ ɔ ko yo naan y’a yiyi ato ndɛ sɔ’m be bo’n, maan e fa ndɛ nga fluwa dandan wie’m be kan’n, e sunnzun nga Biblu’n kle’n.

[Foto cifuɛ mun, bue 3]

Devil: Barrators—Giampolo/The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence