Ato Ndɛ 5: Mali ti Ɲanmiɛn i nin

?Ato ndɛ sɔ’n fin nin? “Kɛ [...] be nga be suman Ɲanmiɛn’n be bali asɔnun’n nun kpanngban’n, yɛ Ɲanmiɛn i nin’n i sulɛ’n truli kpa ɔ. [...] I sɔ sran mun’n, wafa nga be fa sɔli be amuin nga be flɛ i ‘bla dan’n’ nin ‘amuin bla m’ɔ siman bian’n,’ yɛ ɔ sie be akunndan’n niɔn.”—The New Encyclopædia Britannica (1988), Volume 16, bue 326 nin 327.

?Ngue ndɛ yɛ Biblu’n kan ɔn? ‘Á wá wúnnzɛ, á wú ba yasua, yɛ á tɔ́n i dunman Jésus. Ɔ́ yó sran dan, bé flɛ́ i kɛ Nyanmiɛn bɔ like fi nun-mɛn i sin’n i Wa [...]. I sɔ’n ti’n, ba’n bɔ á wú i b’ɔ ti Nyanmiɛn liɛ klonglo’n, bé flɛ́ i Nyanmiɛn Wa.’—Lik 1:31-35.

Biblu’n nun ndɛ mma sɔ’n kle weiin kɛ Mali yoli ‘Nyanmiɛn Wa’n,’ i nin. W’a seman kɛ ɔ yoli Ɲanmiɛn bɔbɔ nin. ?‘Ɲanmiɛn su lɔ dan ng’ɔ o lɔ lɛ’n, Ɲanmiɛn sɔnman lɔ,’ yɛ Mali klun yɛ ɔ́ wá sɔ́n ɔn? (1 Famiɛn Mun 8:27) Mali bɔbɔ w’a seman sɔ le. Atre nsan’n i su like klelɛ’n yɛ maan b’a wunman sran wafa nga Mali ti’n i wlɛ kpa ɔ. Afuɛ nga be flɛ i 431 nun’n, be yoli aɲia kun Efɛzi lɔ. Aɲia sɔ’n i bo yɛ be fali Glɛki nun ndɛ mma Theotokos (mɔ i bo yɛle “m’ɔ wunnzɛli Ɲanmiɛn’n”) annzɛ “Ɲanmiɛn i nin’n,” be flɛli Mali ɔ. Kɛ ɔ fin i lɛ’n yɛ be wlali Mali i sulɛ’n i bo ase ɔ. Efɛzi klɔ’n mɔ lɔ yɛ be yiali’n, lɔ yɛ amuin bla dan nga be flɛ i Artemisi m’ɔ yo like ye’n, i sulɛ’n i bo’n o ɔ.

Ɔ maan, be fali Artemisi mɔ be waan ɔ “fin nyanmiɛn su tɔli’n,” i sulɛ wafa wie mun wlɛli i Mali sulɛ’n nun. I wie yɛle be wunsu nga be lɔngɔ tɛɛn be su Mali’n. (Sa Nga Be Yoli’n 19:35) Like uflɛ nga ɔ wa wluli Klistfuɛ’m be ninnge klelɛ’n nun’n, yɛle Mali nin sran uflɛ wie’m be waka sran nin be foto nga be fa su be’n.

An nian Biblu’n nun ndɛ mma nga’m be nun: Matie 13:53-56; Mark 3:31-35; Lik 11:27, 28.

NG’Ɔ TI NANWLƐ’N:

Mali yoli Ɲanmiɛn i Wa’n i nin, w’a yoman Ɲanmiɛn bɔbɔ i nin. Atre nsan like klelɛ’n ti yɛ maan sran’m be su Mali kɛ Ɲanmiɛn i nin sa ɔ.