Like nga Zezi i ajalɛ’n kle e’n

Awlobo tranlɛ’n su’n

?Aja’n i su akunndan benin yɛ sɛ awlobofuɛ’m be bu’n be di aklunjuɛ ɔ?

Ɲanmiɛn ɲrun’n aja’n ti like cinnjin. Kɛ be usali Zezi sɛ sran kun kwla rɛ i yi’n, ɔ tɛli su kɛ: “Kɛ Nyanmiɛn yí sran’n, ɔ yili yasua nin bla naan w’a se kɛ: ‘I sɔ’n ti yɛ maan yasua kpáci i si nin i nin yɛ ɔ́ fɛ́ i wun mɛ́ntɛn i yi yɛ be nnyɔn’n bé káci sran wunmuan nin-ɔn.’ ?An nian kɛnngɛn-mɛn i le? Kɛ ɔ ko yo sɔ’n, be ti-man sran nnyɔn kun, sanngɛ be ti sran wunmuan. Ɔ maan like nga Nyanmiɛn kan be bo nun’n, nán maan sran fi ti be nun. [...] Sran kwlaa ng’ɔ yrɛ i yi’n, sɛ nán kɛ w’a kunndɛ bian i bo ti’n, naan ɔ ja uflɛ’n, wuun w’a kunndɛ bla i yi bo.” (Matie 19:4-6, 9) Kɛ be nga be o aja’n nun’n, be fa Zezi i afɔtuɛ’n su mɔ be kunndɛman bian annzɛ bla be wiengu bo’n, awlobofuɛ’m be kwlaa be wla gua ase yɛ be di aklunjuɛ.

?Ngue ti yɛ Ɲanmiɛn i klolɛ’n ɔ man awlobofuɛ’m be aklunjuɛ ɔ?

Zezi seli kɛ: “Klo ɔ Min Nyanmiɛn’n kpa, fa ɔ wla’n kwlaa guɛ i su, maan wɔ akunndan’n kwlaa trɛn i su. I yɛ ɔ ti mmla klikli nin i nun dan nin-ɔn.” ?Yɛ i nɲɔn su m’ɔ fɛ i’n yɛle benin? Zezi waan: “Klo ɔ wiengu [be nga be mantan ɔ kpa’n mɔ be wie yɛle ɔ awlobofuɛ mun’n] kɛ a fa klo ɔ bɔbɔ wun’n sa.” (Matie 22:37-39) Ɔ maan like nga ti yɛ awlobo tranlɛ’n yo fɛ’n yɛle wafa nga e nin Ɲanmiɛn e afiɛn’n mantan’n. Afin Ɲanmiɛn i klolɛ’n maan e klo e wiengu.

?Ngue yɛ sran kun nin i yi beɔ tinuntinun be kwla yo naan be wiengu w’a di aklunjuɛ ɔ?

Kɛ yasua’m be fa Zezi i ajalɛ’n su’n, be yi’m be di aklunjuɛ. Asɔnun’n m’ɔ ti kɛ i yi sa’n i klolɛ’n ti’n, ɔ klɛnnin i wun mɛnnin i. (Efɛzfuɛ Mun 5:25) Zezi seli kɛ: “M bɔ n kacili Sran’n [...] m’an ba-man kɛ be su min, sanngɛ m bali kɛ ń sú sran.” (Matie 20:28) Zezi w’a yoman be ng’ɔ niannin be su’n be kpokokpoko le. Sanngɛ ɔ yoli maan be wla guali ase. (Matie 11:28) I sɔ’n ti’n, ɔ fata kɛ kɛ yasua’m bé síe be awlobo’n, be yo i klun ufue su naan be awlobofuɛ’m be kwlaa be di su aklunjuɛ.

Bla’m be kwla ɲan Zezi i ajalɛ’n su mmlusuɛ wie. Biblu’n waan: “Nyanmiɛn [...] sie Krist.” Ɔ kɛn i ekun kɛ: “Yasua kusu yɛ ɔ sie bla-a.” (1 Korɛntfuɛ Mun 11:3) Zezi w’a bumɛn i kɛ sɛ ɔ lo i wun man Ɲanmiɛn naan ɔ sie i’n, nn w’a sokpa. I ɲin yi i Si kpa liɛ su. Zezi seli kɛ: “N yo i klun sa cɛn kwlaa.” (Zan 8:29) Klolɛ mɔ bla kun klo Ɲanmiɛn’n, ɔ nin i ɲin m’ɔ yi i’n ti’n, sɛ ɔ lo i wun mɛn i wun naan ɔ sie i’n, nn w’a yo like kpa sakpa naan i awlobofuɛ’m be di aklunjuɛ.

?Ngue yɛ siɛ nin niɛn’m be kwla suɛn i wafa nga Zezi buli ba kanngan mun’n i su ɔ?

Zezi fali blɛ ɔ nin ba kanngan’m be trannin. Kpɛkun akunndan nga be bu’n nin wafa nga be wun fa yo be’n, ɔ fɛli i ɲin sieli su. Biblu’n waan: “Jésus flɛli ba kanngan mun kɛ be blɛ i wun lɛ, yɛ ɔ seli kɛ: ‘An yaci ba kanngan’m be nun maan be bla n sin.’” (Lik 18:15, 16) Cɛn kun’n, kɛ ba kanngan’m be kannin kɛ be lafi Zezi su’n, sran’m be ijɔli be. Sanngɛ Zezi yoli ba kanngan’m be mo. Yɛ ɔ seli be nga be ijɔli be’n be kɛ: “?Ndɛ nga be klɛli kɛ: ‘A fa ɔ manmanlɛ’n wlɛli ba kanngan nin be nga be tɛ nɔn’n be nuan’n,’ an nian kɛnngɛn-mɛn i le?”—Matie 21:15, 16.

?Ngue yɛ ba kanngan’m be kwla suɛn i Zezi su ɔ?

Zezi kleli ba kanngan’m be ajalɛ kpa kɛ ɔ fata kɛ be fa be ɲin sie i Ɲanmiɛn ninnge’m be su. I nun m’ɔ le afuɛ 12, be wunnin i “Nyanmiɛn i sua’n nun Zuif’m be ninnge klefuɛ’m be afiɛn, ɔ tie be ndɛ bɔ be kan’n yɛ ɔ usa be sa.” ?I sɔ’n i bo’n guali sɛ? “Be kwlaa nga be tili i ndɛ’n, i ngwlɛlɛ’n nin sa b’ɔ tɛ be su’n, ɔ boli be nuan.” (Lik 2:42, 46, 47) Sanngɛ like mɔ Zezi si i’n ti’n w’a yomɛn i wun dandan. I kpa’n i sɔ’n yoli maan i ɲin yili i si nin i nin. Biblu’n waan: “I nyin yi be.”—Lik 2:51.

Sɛ amun waan bé sí nun kpa’n, an nian fluwa ?Ngue like yɛ Biblu’n kle i sakpasakpa ɔ? i ndɛ tre 14 nun.a

[Ja ngua lɛ ndɛ’n, bue 31]