Amun kle amun mma’m be like

Zeremi w’a yacimɛn i junman’n i dilɛ le

?AMUN sa sin nin a bubuman amun le? ?Annzɛ ɔ nin a yoman amun le kɛ amun yaci amun junman’n i dilɛ?—a Ɔ yo sran sunman sɔ. I nun mɔ Zeremi te yo gbanflɛn’n, ɔ yoli i sɔ. Sanngɛ w’a nianman ndɛ nga sran’m be kan’n annzɛ like nga be yo i’n ti naan w’a jrɛn i junman’n i dilɛ. Zeremi yoli sran ngunmin kun Ɲanmiɛn ɲrun. Ɔ nin i sɔ ngba’n ɔ yoli i kɛ ɔ jrɛn i junman’n. Maan e kan wafa ng’ɔ yoli sɔ’n i ndɛ.

Ka naan b’a wu Zeremi’n, Ɲanmiɛn Kpli Zoova kpɛli i kɛ ɔ́ yó i nuan ijɔfuɛ naan ɔ́ sé nvlefuɛ’m be kɛ Ɲanmiɛn klun jɔman be wun. ?Kɛ be wuli Zeremi m’ɔ i sin cɛli’n, amun si ndɛ ng’ɔ kan kleli Zoova’n?— I waan: “Ee min Min Anannganman, n ti bakan n si-man ijɔ.”

?Amun bu i kɛ Zoova tɛli Zeremi su sɛ?— Ɔ tɛli i su amanniɛn su, sanngɛ ɔ jrannin su kpa. I waan: ‘“Nán se kɛ a ti bakan,” sran nga n sunman wɔ be sin’n, kɔ be kwlaa be sin. Ndɛ kwlaa nga n waan a kan’n, kan. Nán yo srongble sran fi nyrun.’ ?Ngue ti yɛ ɔ fataman kɛ ɔ yo srongble sɔ ɔ? Afin Zoova waan: “Afin n jin ɔ sin, ń dé wɔ.”—Zeremi 1:4-8.

Sanngɛ kɛ nga e dun mmua fa boli su’n sa’n, kɛ ɔ́ kɔ́ i ɲrun’n, Zeremi i sa sin wa bubuli. Afin, Ɲanmiɛn m’ɔ su i’n ti’n, sran’m be yo i finfin. I waan: “Ɔ lɛ-man cɛn kun bɔ be srisri-man min-ɔn. Sran’m be kwlaa be srisri min.” I sɔ’n ti’n, i waan ɔ́ yáci i junman’n i dilɛ. Ɔ seli kɛ: ‘M bu-man [Zoova] i akunndan kun, yɛ n kɛn-mɛn i nuan ndɛ kun.’ ?Sanngɛ ɔ yacili i junman’n sakpa?

Zeremi seli kɛ: “[Zoova] i ndɛ’n yra min klun lɔ sa fiaan kɛ sin sa. N kplin min nyin kɛ ń yó naan ɔ kan ase, sanngɛ ngbɛn-ɔn.” (Zeremi 20:7-9) Kannzɛ ɔ juli wie’n, srɛ kunnin Zeremi’n, sanngɛ i Zoova klolɛ’n ti’n w’a yacimɛn i junman’n i dilɛ. Kɛ mɔ Zeremi w’a yacimɛn i junman’n ti’n, i sɔ’n sɛsɛli i. Maan e fa e ɲin sie i sɔ liɛ’n su.

Zoova kan kleli Zeremi kɛ ɔ se Zerizalɛmufuɛ’m be kɛ sɛ b’a kaciman be aeliɛ tɛ’n, bé wá núnnún Zerizalɛmu klɔ’n. Kɛ Zeremi kannin ndɛ sɔ’n kleli be’n, be fali ya yɛ be seli kɛ: “Be kun i.” Ɔ kpatali be kɛ be ‘tie Anannganman i aniɛn’n.’ I sin’n i waan: ‘Maan amun wun i wlɛ kɛ sɛ amun kun min’n, wuun amu’an kun min ngbɛn, m’an yo-man sa. Afin Anannganman yɛ ɔ sunmannin min kɛ n kan ndɛ n kle amun ɔn.’ ?Kɛ ɔ yoli sɔ’n, amun si sa ng’ɔ juli’n?—

Biblu’n se kɛ: “Kpɛkun famiɛn i awlo lɔ sran dandan mun nin sran nga be o lɛ’m be kwlaa be seli Nyanmiɛn nyrun jranfuɛ mun nin Nyanmiɛn nuan ijɔfuɛ’m be kɛ: ‘Bian nga nin wulɛ fata-man. Anannganman e Nyanmiɛn’n yɛ ɔ fali ndɛ ng’ɔ kannin’n wlɛli i nuan kɛ ɔ kan-an.’” Ɔ maan, kɛ mɔ Zeremi w’a faman srɛ w’a jrɛnmɛn i junman’n ti’n, Zoova sɛsɛli i. Sanngɛ Iri m’ɔ ti Zoova i nuan ijɔfuɛ wie’n w’a faman ajalɛ kunngba nga Zeremi fali’n. Sa ng’ɔ tɔli i su’n, siɛn’n maan e nian.

Biblu’n waan: ‘Klɔ’n nin mɛn’n i wun ndɛ nga Zeremi kannin’n, ɔ kannin wie.’ ?Sanngɛ kɛ famiɛn Zozakimu fali Iri wun ya’n, amun si like nga Iri yoli’n?— Srɛ kunnin i. Ɔ maan ɔ yacili Ɲanmiɛn i klun sa’n i yolɛ, kpɛkun ɔ wanndi ɔli Ezipti. I ti’n, famiɛn’n sunmannin sran lɔ kɛ be ko trɛ i bla. ?Kɛ be ko trɛli i’n, amun si like nga famiɛn klunwifuɛ sɔ’n yoli’n?— Ɔ seli kɛ be kun i nin tokofi!—Zeremi 26:8-24.

?Ngue ti yɛ amun kwla se kɛ Zoova sasali Zeremi naan w’a sasaman Iri ɔ?— Srɛ kunnin Zeremi wie kɛ srɛ kunnin Iri’n sa. Sanngɛ Zeremi liɛ’n w’a yaciman Zoova i junman’n i dilɛ w’a wanndiman. W’a yacimɛn i junman’n i dilɛ le. ?Kɛ amun niɛn i sa’n, ngwlɛlɛ benin yɛ Zeremi i ajalɛ’n kle e ɔ?— Yɛle kɛ ɔ ju wie’n, ɔ kwla yo e kɛ like nga Ɲanmiɛn waan e yo’n, ɔ ti kekle. Sanngɛ ɔ fata kɛ e lafi i su titi naan e nanti i ndɛ’n su.

[Ja ngua lɛ ndɛ’n]

Kosan mun:

○ ?Junman benin yɛ Ɲanmiɛn fa mannin Zeremi ɔn?

○ ?Ngue ti yɛ ɔ yoli Zeremi kɛ ɔ yaci i junman’n i dilɛ ɔ?

○ ?Ngue ti yɛ Zoova sasali Zeremi mɔ w’a sasaman Iri ɔ?

○ ?Ngwlɛlɛ benin yɛ Zeremi i ajalɛ’n kleli amun ɔn?