Saan Satan i sielɛ’n sáci
“Klunwifuɛ’n ɔ nyan-man muae.”—AKU. 8:13.
1. ?Ngue ti yɛ klunwifuɛ’m be jɔlɛ mɔ bé wá dí’n, ɔ cici e wla ɔ?
KANNZƐ ɔ́ cɛ́ lele ɔ́ cɛ́ ngbɛn, saan cɛn kun bé fá klunwifuɛ’m bé kɔ́ jɔlɛ difuɛ’m be ja su. Sa nga be yoli’n bé kɛ́n i su ndɛ. (Nya. 5:22; Aku. 8:12, 13) I sɔ ndɛ liɛ’n cici e wla. I li be nga be klo sa sɛsɛ yolɛ’n ɔ nin be nga be dili be ndɛ kwlɛ annzɛ be kleli be ɲrɛnnɛn’n yɛ ɔ cici be wla dan’n niɔn. Klunwifuɛ’m be nun klikli nga bé fɛ́ i kɔ́ jɔlɛ difuɛ’m be ja su’n, yɛle klunwifuɛ’m be si’n mmusu’m be si Satan.—Zan 8:44.
2. ?Ngue ti yɛ ɔ fata kɛ blɛ kpanngban sin naan ndɛ ng’ɔ tɔli Edɛni fie’n nun lɔ’n i ti w’a kpɛ ɔ?
2 Laa Edɛni fie’n nun lɔ’n, Satan i wun dandan m’ɔ kunndɛli kɛ ɔ́ yó’n ti’n, ɔ yoli maan klɔ sran’m be kpaloli Zoova i sielɛ’n. I agualiɛ su’n, e si nin e nin klikli’m be nin Satan be bo yoli kun be sili Zoova i sielɛ’n i akplowa. Ɔ maan be kacili sa tɛ yofuɛ. (Rɔm. 5:12-14) Zoova si wafa nga be ɲin kekle aeliɛ m’ɔ kle kɛ be ɲin yimɛn i’n i bo’n gúa mán be’n. Sanngɛ ɔ fata kɛ i bo’n gua sɔ naan klɔ sran nin anzi nga Zoova yili be’n be wun i. Ɔ maan ɔ fata kɛ blɛ kpanngban sin naan ndɛ sɔ’n i ti w’a kpɛ naan b’a wun i wlɛ weiin kɛ ɲin keklefuɛ’m be ndɛ yoman fɛ mlɔnmlɔn.
3. ?Wafa sɛ yɛ e bu klɔ sran’m be sielɛ’n niɔn?
3 Klɔ sran’m b’a kplinman su kun kɛ Zoova sie be. Ɔ maan ɔ fatali kɛ be kpɛ be bɔbɔ be sielɛ liɛ ba. Kɛ akoto Pɔlu klɛ́ Ɲanmiɛn sufuɛ nga be o Rɔmu lɔ’n be fluwa’n, ɔ seli kɛ ɔ fata kɛ be lo be wun man “ngbɛn-ngbɛn mun.” Pɔlu blɛ su’n, ngbɛnngbɛn mun yɛle Rɔmu awa nin i janunfuɛ mun. Blɛ sɔ’n nun’n, Nerɔn m’ɔ sieli nvle’n afuɛ nga be flɛ i 54 nun lele 68 nun’n, yɛ ɔ ti famiɛn’n niɔn. Pɔlu seli kɛ sɛ i sɔ ngbɛnngbɛn’m be o lɛ’n, “Nyanmiɛn yɛ ɔ sieli be-ɔ [Ɲanmiɛn yɛ ɔ mannin be atin ɔn, NW].” (An kanngan Rɔmfuɛ Mun 13:1, 2 nun.) ?I sɔ’n i bo’n yɛle benin? ?Ɔ kle kɛ Pɔlu suan klɔ sran’m be sielɛ liɛ’n i bo kpa tra Ɲanmiɛn liɛ’n? Cɛcɛ. Ɔ su se kɛ sɛ Zoova nin a jranman klɔ sran’m be sielɛ’n, ɔ fata kɛ Klistfuɛ’m be ɲin yi kpɛnngbɛn sɔ mun. Afin “Ɲanmiɛn yɛ ɔ mannin be atin ɔn.”
Atin m’ɔ fa e yi i ɲrɛnnɛn’n nun’n
4. Like nga ti yɛ klɔ sran’m be sran sielɛ’n dun mmua sacili i bo bolɛ’n nun’n, an yiyi nun.
4 Klɔ sran’m be sielɛ mɔ Satan i sa o nun’n, ɔ su yoman ye le. ?Ngue ti ɔ? Afin ɔ takaman ngwlɛlɛ m’ɔ fin Ɲanmiɛn’n i su. Saan Zoova kunngba yɛ i ngwlɛlɛ liɛ’n fɔ nunman nun ɔn. Ɔ maan, sran sielɛ nun’n, i kunngba yɛ ɔ kwla kle atin kpafuɛ’n niɔn. (Zer. 8:9; Rɔm. 16:27) Klɔ sran’m be liɛ’n kɛ bé súan like’n, be kpɛn fɔ lele naan b’a si i yo. Zoova liɛ’n ɔ timan sɔ. Wafa ng’ɔ fata kɛ be yo like kun’n, ɔ si i kpafuɛ’n. Sran sielɛ wafa kwlaa ng’ɔ takaman atin nga Ɲanmiɛn kle’n su’n, ɔ su yoman ye le. I sɔ liɛ’n, ɔ nin Satan i bɔbɔ i wun akunndan m’ɔ bu’n ti’n, i sielɛ nga i waan ɔ́ sín sran’m be lika síe’n, ɔ dun mmua sacili i bo bolɛ’n nun.
5, 6. ?Ngue yɛ ɔ suli Satan i bo m’ɔ kacili Zoova i kpɔfuɛ ɔ?
5 Sran ng’ɔ si ngwlɛlɛ’n, sɛ ɔ si kɛ ajalɛ kun i bo’n su guaman kpa’n, ɔ faman. Sɛ i waan san fii ɔ́ yó i sɔ like liɛ’n, ɔ́ wún i weiin kɛ w’a fɔn. Sa nga be juli’n, be kleli kpɛ sunman kɛ sɛ sran kun yo like ng’ɔ nin Like Yifuɛ mɔ like fi nunmɛn i sin’n i liɛ’n be kɔman likawlɛ’n, ɔ ti ngbɛn. (An kanngan Nyanndra Mun 21:30 nun.) Ɔ nin i sɔ ngba’n, kɛ mɔ Satan bu i kɛ ɔ ti dan ngboko m’ɔ di tutre’n ti’n, ɔ kacili i sin sili Zoova. Ɔ maan mmusu’m be si Satan ɲinfu fali atin nga saan i bo’n gúa tɛ’n i su.
6 Satan i wun tulɛ sɔ’n i ɲin fiteli Babilɔni famiɛn kun mɔ be klɛli i su fluwa’n i aeliɛ’n nun. Ɔ dili i nuan seli kɛ: “Ń fú lele ń jú ɲanmiɛn su lɔ. Ń fá min famiɛn bia’n ń síe i Nyanmiɛn i nzraama’n be su nglo. Ń kó trán be oka bɔ ninnge nga be su be’n be kwlakwla be yia su’n i su. Ń kó trán be oka su’n wie. Ń fú nyanmiɛn ble’n i su lɔ, e nin Nyanmiɛn bɔ like fi nun-mɛn i sin’n é sɛ́.” (Eza. 14:13-15) Famiɛn sɔ’n i sinnzin like sɔ mɔ i waan ɔ́ yó’n, w’a yoman ye. Yɛ Babilɔni famiɛn dilɛ’n, ɔ nunnunnin kain kpa. I kunngba’n, ɔ cɛ kan Satan nin i mɛn’n be sielɛ’n ɔ́ wíe mlɔnmlɔn.
?Ngue ti yɛ Ɲanmiɛn kplinnin i sɔ’n su ɔ?
7, 8. ?Klunwi yolɛ mɔ Zoova yacili nun kan’n, i su mmlusuɛ wie mun yɛle benin?
7 Sran wie’m be kwla usa be wun kɛ, kɛ mɔ Zoova si kɛ like nga sran’m be su yo i lɛ’n ɔ su yoman ye’n, ngue ti yɛ ɔ yacili be nun maan be suli Satan su mɔ be fali ajalɛ kɛ bé síe be bɔbɔ be wun ɔn. I m’ɔ ti Ɲanmiɛn m’ɔ kwla like kwlaa yo’n sɛ i waan ɔ manman be atin’n, nn w’a manman be. (Tul. 6:3) Sanngɛ w’a yoman sɔ. I ngwlɛlɛ’n kleli i kɛ sɛ ɔ yaci klɔ sran’m be ɲin kekle yolɛ sɔ’n nun kan’n, cɛn wie lele i bo’n gúa kpa. Yɛle kɛ sran kwlaa wún kɛ Zoova ti sɛsɛfuɛ naan ɔ sie sran mun klolɛ su. Kpɛkun sran nga be nin i nanti klanman’n be ɲan Ɲanmiɛn i ajalɛ sɔ’n i su ye.
8 Sɛ ɔ ti kɛ sran’m b’a faman Satan i ndɛ’n su yɛ b’a kunndɛman kɛ bé jáso Ɲanmiɛn i sielɛ’n bo’n, nn nanwlɛ ɲrɛnnɛn’n w’a tɔman be su! Sanngɛ ajalɛ nga Zoova fɛli i kɛ ɔ́ yáci klɔ sran’m be nun kan naan be sie be wun’n, ɔ le i su mmlusuɛ. I sɔ’n yo maan be nga be awlɛn ti kpa’n, be fa ngwlɛlɛ be tie Ɲanmiɛn i ndɛ’n yɛ be lafi i su. Kɛ ɔ́ kɔ́ i ɲrun’n, sran’m be boli sielɛ wafawafa kpanngban be ta be niannin. Sanngɛ be wie fi w’a yoman kpa. I sɔ’n liɛ’n yo maan Ɲanmiɛn i sufuɛ’m be lafi su kpa ekun kɛ Zoova i sielɛ liɛ’n yɛ ɔ ti kpafuɛ’n niɔn. Ɔ ti su kɛ, kɛ mɔ Zoova yacili Satan nun m’ɔ sieli sran mun’n ti’n, kekle’n tɔli be su kpa. Ɔ tɔli be nga be su Ɲanmiɛn kpa’n be su wie. Sanngɛ kɛ Ɲanmiɛn yacili klunwi yolɛ’n nun kan’n, be nga be su Ɲanmiɛn kpa sɔ’n be ɲannin su ye.
Zoova i wun jasolɛ’n mɛnnin i kɔmin su
9, 10. Wafa nga Satan i sielɛ’n man Zoova kɔmin su’n, an yiyi nun.
9 Zoova yacili Satan nun maan ɔ ɲannin ta klɔ sran’m be su naan sran’m be bɔbɔ be sie be wun. I sɔ’n w’a saciman Zoova i sielɛ’n i dunman kaan sa. Sanngɛ ɔ mɛnnin i kɔmin su! Afin sa’m be kle kɛ Zeremi i ndɛ nga Ɲanmiɛn maan ɔ kɛnnin i kɛ klɔ sran’m be kwlá sieman be wun’n, ɔ ti nanwlɛ. (An kanngan Zeremi 10:23 nun.) Asa kusu’n, jasolɛ mɔ Satan jasoli Zoova wun’n, ɔ mannin Zoova i atin maan ɔ yili i nzuɛn kpa’m be nglo kpa liɛ su. ?Wafa sɛ?
10 Kɛ mɔ e bɔbɔ e wun ɲrɛnnɛn ng’ɔ o Satan i sielɛ’n i sin’n ti’n, Zoova i nzuɛn kpa mɔ fɔ kaan sa nunmɛn i sin’n w’a fite nglo weiin. I sɔ liɛ’n yi i ayɛ be nga be klo i’n, be ɲrun. Ɔ maan, kannzɛ bɔbɔ e bumɛn i kɛ ɔ kwla yo sɔ’n, sanngɛ Satan i sielɛ wafa liɛ’n, ɔ mannin Ɲanmiɛn i kɔmin su. I sɔ’n yi wafa klanman kpa nga Zoova siesieli akplowa nga be sili i i sielɛ liɛ’n su’n, i nglo. Kɛ ɔ ko yo naan ndɛ nanwlɛ sɔ’n i ɲin w’a fite klanman’n, maan e fa e ɲin e sie i Zoova i nzuɛn klanman wie’m be su kpe kan. Yɛ e nian wafa nga Satan i sielɛ tɛ’n ɔ yoli maan Zoova yili i nzuɛn klanman sɔ’m be nglo ninnge uflɛ wie’m be nun’n.
11. ?Wafa sɛ yɛ Zoova yili i sran’m be klolɛ’n i nglo ɔ?
11 Sran klolɛ. Ɲanmiɛn Ndɛ’n se e kɛ “Nyanmiɛn’n yɛ ɔ ti sran klofuɛ nin-ɔn.” (1 Zan 4:8) Like klikli nga ti yɛ Ɲanmiɛn yili klɔ sran’n yɛle klolɛ m’ɔ klo i’n. Asa kusu’n, abonuan yilɛ klanman nga Ɲanmiɛn fa yili klɔ sran’n, ɔ kle weiin kɛ ɔ klo i. Zoova kusu mannin klɔ sran’m be tranwlɛ klanman kpa kun mɔ i nun’n, be kwla ɲan like kwlaa ng’ɔ kwla man be aklunjuɛ’n. (Bob. 1:29-31; 2:8, 9; Jue. 139:14-16) Sanngɛ kɛ sa tɛ’n wa wluli klɔ sran’m be nzuɛn’n nun’n, Zoova yili i sran klolɛ’n i nglo wafa uflɛ. ?Wafa sɛ? Akoto Zan waan Zezi seli kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.” (Zan 3:16) Kɛ Ɲanmiɛn sunmɛnnin i Wa kunngba cɛ’n asiɛ’n su wa kɛ ɔ wa kpɔ klɔ sran’m be ti’n, ɔ yili i nglo kɛ ɔ klo e dan kpa. ?Ɔ le like uflɛ m’ɔ kwla fa yi i klolɛ’n i nglo mɔ i dan trá ngalɛ’n niɔn? (Zan 15:13) Sran klolɛ wafa sɔ’n ti ajalɛ man klɔ sran mun. I sɔ’n maan be kwla yi klolɛ nga Ɲanmiɛn tuli i klun kloli sran mun’n i nglo cɛn kwlakwla kɛ nga Zezi fa yoli’n sa.—Zan 17:25, 26.
12. ?Wafa sɛ yɛ Zoova i kwlalɛ’n i ɲin fiteli ɔ?
12 Kwlalɛ. Saan ‘Nyanmiɛn m’ɔ kwla like kwlaa yo’n,’ yɛ ɔ kwla man nguan ɔn. (Ngl. 11:17; Jue. 36:10) Kɛ be ko wu sran’n, m’ɔ nin a yoman like fi’n, ɔ ti kɛ fluwa mɔ be nin a klɛman su like’n sa. Kɛ ɔ ko wu’n, i ajalɛ ng’ɔ fali be’n, ɔ nin ninnge ng’ɔ yoli be’n, ɔ nin sa ng’ɔ wunnin be i mɛn dilɛ’n nun mɔ be yɛ be fa sie i nzɔliɛ’n, sɛ é kwlá sé’n, i kwlaa sɔ’n klɛ fluwa sɔ’n su. Ninnge sɔ mun’n, Zoova kwla fa be sie i akunndan’n nun. Kɛ i blɛ ko ju’n, Zoova kwla yo naan sran sɔ’n ba nguan nun ekun ɔ nin i ngunmin i wun ninnge nga be fa sie i nzɔliɛ’n. (Zan 5:28, 29) Ɔ maan kannzɛ kɛ Ɲanmiɛn yí klɔ sran mun’n w’a seman kɛ cɛn wie lele be wu’n, sanngɛ wie’n yo maan Zoova yi i nglo kɛ ɔ le tinmin naan ɔ kwla cɛn be nga be wuli’n. Nanwlɛ, Zoova ti ‘Nyanmiɛn m’ɔ kwla like kwlaa yo’n’ sakpa.
13. ?Wafa sɛ yɛ tɛ mɔ Zezi yili’n yi i nglo kɛ fɔ kaan sa nunman Zoova i sa nuan su yolɛ’n i sin ɔn?
13 Sa nuan su yolɛ. Zoova kwlá buaman ato naan se kɛ sa m’ɔ timɛn i nuan su’n yɛ ɔ kwla yo ɔ. (Mml. 32:4; Tit 1:2) Ɔ bu nanwlɛ nin sa nuan su yolɛ’n be like dan kpa liɛ su. Kannzɛ bɔbɔ nán blɛ ngba nun yɛ ninnge sɔ’m be yolɛ ti pɔpɔ mɛn i’n, sanngɛ ɔ yo be titi. (Rɔm. 8:32) Kɛ Zoova wunnin kɛ i Wa Zezi m’ɔ klo i’n, be wa kunnin i kɛ Ɲanmiɛn dunman sacifuɛ wie sa’n, ɔ yoli i ya kpa! Sanngɛ klolɛ mɔ Zoova klo klɔ sran mɔ fɔ’n o be nun’n ti’n, ɔ kplinnin su kɛ sa sɔ’n ju. Kɛ ɔ ko yo naan w’a nanti i bɔbɔ i mmla mɔ be ti sɛsɛ’n be su’n ti. (An kanngan Rɔmfuɛ Mun 5:18-21 nun.) Sa nuan su mɔ be yomɛn i mɛn’n nun’n ti’n, Zoova kwla yili i nglo kɛ i sa nun yɛ sa’n i nuan su yolɛ’n o ɔ.
14, 15. ?Ninnge benin wie nun yɛ Zoova yili i ngwlɛlɛ dan’n nin i awlɛn tralɛ’n be nglo ɔ?
14 Ngwlɛlɛ. Kɛ Adam nin Ɛvu be yoli sa tɛ cɛ’n, Zoova kleli wafa nga ɔ́ wá yó naan ɲrɛnnɛn ng’ɔ o i sin jasolɛ’n i sin’n, ɔ wie’n. (Bob. 3:15) Ajalɛ sɔ mɔ Zoova fɛli i ndɛndɛ’n, ɔ nin i klun sa’n i nun yiyilɛ blɛblɛblɛ ng’ɔ yiyili nun kleli i sufuɛ mun’n, be kle weiin kɛ Zoova i ngwlɛlɛ’n i bo’n ti kploun kpa. (Rɔm. 11:33) Like kwlaa nga Ɲanmiɛn waan ɔ́ yó naan ɔ yo ye’n, ɔ leman like kun sa m’ɔ kwla jrɛn i ɔ. Mɛn nga nun’n, sran’m be yo sa sukusuku, be di alɛ, be yo sinnzin ninnge, be ɲin yiman sran, be yaciman sa cɛman, be kpa sran nun, be klo dunman. I sɔ mɛn’n nun’n, Zoova kwla yili like nga ngwlɛlɛ’n ti’n, i nglo kpa kleli ninnge ng’ɔ yili be mun. Zezi i sɔnnzɔnfuɛ Zaki seli kɛ: “Ngwlɛlɛ b’ɔ fin nyanmiɛn su’n, sɛ ɔ ti sran’n, wuun é sé kɛ sa tɛ kaan sa nun-mɛn i wun. Ɔ klo-man ndɛnngan, ɔ ti wɛtɛfuɛ, be nin i kwla koko yalɛ, ɔ si aunnvuɛ dan, ɔ yo sa kpa, ɔ bu-man sran’n wie kpa tra-man wie, yɛ ɔ klo-man dunman.”—Zak 3:17.
15 Awlɛn tralɛ. Kɛ sran’m be yoli sa tɛ’n m’ɔ fatali kɛ Zoova nin be tran kɛ ngalɛ’n sa’n yɛ i awlɛn tralɛ’n i ɲin fiteli dan kpa ɔ. Zoova bɔbɔ klun su ɔ trɛli i awlɛn sɔ i afuɛ kpanngban kpa yɛ. I sɔ’n kle kɛ Zoova le i sɔ nzuɛn klanman’n naan fiɛn kaan sa nunmɛn i sin. I sɔ’n ti’n, maan e si i su ye. Akoto Piɛli klɛli i nanwlɛ su kɛ: “An nian e Min’n i anwlɛn b’ɔ trɛ amun wun’n, amun ti nyanlɛ ti-ɔ.”—2 Piɛ. 3:9, 15.
16. ?Ngue ti yɛ kɛ Zoova i klun su ɔ yaci e wun sa’n cɛ e’n, ɔ man e aklunjuɛ dan ɔn?
16 Sa yaci cɛlɛ. E kwlaa e ti sa tɛ yofuɛ, yɛ e fɔn sa sunman nun. (Zak 3:2; 1 Zan 1:8, 9) Zoova klun su ɔ yaci sran’m be wun sa’n cɛ be ‘weiin.’ Ɔ fata kɛ e si i sɔ liɛ’n su ye! (Eza. 55:7) Maan e fa e ɲin e sie i like nga su: Kɛ mɔ kɛ bé wú e’n e ti sa tɛ yofuɛ’n ti’n, kɛ Ɲanmiɛn yaci e wun sa’n cɛ e’n, e wun aklunjuɛ ng’ɔ o nun’n i wlɛ. (Jue. 51:7, 11, 19) Kɛ e bɔbɔ e wun Zoova i nzuɛn klanman sɔ mɔ be ti i nzɔliɛ like’n i nuan’n, ɔ yo maan e klo i kpa yɛ ɔ wla e fanngan naan y’a nanti i ajalɛ’n su e nin e wiengu mun e tranlɛ’n nun.—Kol. 3:13.
Like nga ti yɛ mɛn’n wo afɛ nun’n
17, 18. ?Ninnge benin wie’m be nun yɛ Satan i sielɛ liɛ’n kpili ase ɔ?
17 Satan i mɛn wunmuan’n, yɛle kɛ i sielɛ’n i nzɔliɛ like’n kwlaa saci kpan. Kɛ afuɛ’m bé sín’n nn bé sáci bé kɔ́. Afuɛ nga be flɛ i 1991 nun’n, zronali kun sieli nzɔliɛ kɛ: “?Mɛn’n wo afɛ nun? Ɛɛn kɛ ɔ ti sɔ sakpa ɔ. Sanngɛ nán Ɲanmiɛn ti yɛ ɔ o afɛ’n nun ɔn. Afɛ’n m’ɔ o mɛn’n su’n, ɔ fin i nun sran’m be bɔbɔ.” (The European) Ndɛ sɔ’n ti nanwlɛ! Afin, Satan ti’n, e si nin e nin klikli’m be fali klɔ sran’m be sielɛ liɛ’n yɛ be yacili Zoova liɛ’n lɛ. Kɛ ɔ yoli sɔ’n be fali sielɛ wafa kun mɔ saan i bo’n gúa tɛ’n i su. Ɲrɛnnɛn nin yalɛ ng’ɔ o mɛn nunfuɛ’m be kwlaa be su’n, be kle kɛ klɔ sran i sielɛ liɛ’n afɛ’n wo i sin.
18 Satan i sielɛ wafa liɛ’n yo maan sran’m be bu be bɔbɔ be wun akunndan. Sanngɛ be bɔbɔ be wun akunndan bulɛ’n su kwlaman sran klolɛ’n mɔ i su yɛ Zoova i sielɛ liɛ’n taka’n. Satan i sielɛ liɛ’n w’a manman sran’m be alaje nin aklunjuɛ. Sran’m be kwlaa b’a wun kɛ Zoova i liɛ’n yɛ ɔ ti kpa dan ɔn! ?Andɛ ninnge wie’m be yi i sɔ liɛ’n i nglo? Ɛɛn. I sɔ’n yɛ é wá wún i like suanlɛ ng’ɔ́ bá lɛ’n nun ɔn.
?Ngue yɛ e suɛnnin i sielɛ’n su [...]
• Rɔmfuɛ Mun 13:1, 2 nun ɔn?
• Nyanndra Mun 21:30 nun ɔn?
• Zeremi 10:23 nun ɔn?
• Kolɔsfuɛ Mun 3:13 nun ɔn?
[Foto, bue 25]
Klɔ sran’m b’a ɲanman Satan i sielɛ’n su le.
[Foto cifuɛ mun, bue 25]
U.S. Army photo
WHO photo by P. Almasy
[Foto, bue 26]
Zoova i kwlalɛ’n ti’n be nga be wuli’n bé cɛ́n.
[Foto, bue 27]
Zoova i sran klolɛ nin i sa nuan su yolɛ’n be ɲin fite tɛ ng’ɔ fɛ i Wa’n yili’n nun.