Zoova i sielɛ’n yɛ ɔ ti kpafuɛ’n niɔn!
‘Nyanmiɛn b’ɔ o nglo-nglo lɔ’n ɔ sie sran’m be famiɛn diwlɛ mun.’—DAN. 4:14.
1, 2. ?Ninnge benin wie’m be ti yɛ klɔ sran’m be sielɛ’n kplili ase ɔ?
KLƆ sran’m be sielɛ’n kplili ase! I sɔ liɛ’n e simɛn i akplowa kaan sa. Like cinnjin kun mɔ i ti yɛ ɔ yoli sɔ’n, yɛle kɛ ngwlɛlɛ mɔ i yɛ maan sran kun i sielɛ’n kwla yo ye’n, sran’m be simɛn i. Andɛ’n, sran’m be sielɛ’n mɔ w’a yoman ye’n i ɲin fite weiin. Afin be siefuɛ kpanngban be ‘bu be bɔbɔ be wun akunndan, be ti sika klofuɛ, be di be nuan, be tu be wun, be si-man ye, be nyin yi-man Nyanmiɛn, be klo-man sran, be yo be sa-a be yaci cɛ-man, be di abla, be si-man be wun su nian, be ti wlɛ, be kpɔ sran kpa mun, be yi be janvuɛ mun man, be yo like-ɔ be bu-mɛn i akunndan, be di tutre.’—2 Tim. 3:2-4.
2 Laa kpa’n, e si nin e nin klikli’m be kpaloli Ɲanmiɛn i sielɛ’n. Be buli i kɛ bé yó sɔ naan bé ɲán be ti. Sanngɛ nn Satan i sielɛ’n yɛ b’a fa ɔ. Klɔ sran’m be sielɛ tɛ’n mɔ Satan m’ɔ “sie mɛn nga’n” i sa o nun kpa’n, i afuɛ akpi nsiɛn yɛ. Sielɛ sɔ’n maan lika’n w’a saci e su mlɔnmlɔn. (Zan 12:31) Fluwa kun kannin wafa nga klɔ sran’m b’a yo andɛ’n i ndɛ se kɛ, “mɛn nga fɔ kaan sa nunman nun’n i kunndɛlɛ’n” ti afɛ ngbɛn. Ɔ yiyi nun kɛ: “Be kwlá ɲɛnmɛn i sɔ mɛn liɛ’n. Kusu sɛ be waan bé síesíe lika’n naan ɔ yo kpa’n, i agualiɛ su’n, ɲrɛnnɛn yɛ ɔ ba ɔ. Annzɛ sran kunngba kle sran’m be ɲrɛnnɛn annzɛ kusu i tɛ kpa’n, alɛ tɔ.” (The Oxford History of the Twentieth Century) Nanwlɛ, fluwa sɔ’n di i nanwlɛ weiin kɛ klɔ sran’m be sielɛ’n kplili ase!
3. ?Sɛ ɔ ti kɛ Adam nin Ɛvu b’a yoman sa tɛ’n, nn kɛ e niɛn i sa’n Ɲanmiɛn i sielɛ’n yoli wafa sɛ?
3 I sɔ’n ti’n, kɛ e si nin i nin klikli’m be kpaloli sielɛ kunngba ng’ɔ kwla yo ye’n, mɔ yɛle Ɲanmiɛn i sielɛ’n, ɔ yoli tɛ dan! Ɔ ti su kɛ sɛ Adam nin Ɛvu b’a kpɔciman Zoova’n nn wafa nga ɔ́ síesíe i sielɛ’n e simɛn i. Sanngɛ e si jrɛiin kɛ sɛ klɔ sran’m be kwlaa be kplinnin Ɲanmiɛn i sielɛ’n su, nn klolɛ yɛ be ɲɛnnin i i bo ɔ. Kpɛkun nn sran kun i kpa su traman kun. (Yol. 10:34; 1 Zan 4:8) Ɲanmiɛn i ngwlɛlɛ’n leman wunsu. I sɔ’n ti’n, e si ekun kɛ sɛ ɔ ti kɛ klɔ sran’m be kali Zoova i sielɛ’n bo’n, nn klɔ sran nga be waan be su sie be wiengu’n be fɔ nga be dili’n w’a yoman sɔ. Sɛ ɔ ti kɛ b’a kpaloman Ɲanmiɛn sielɛ’n nn ɔ yoli ye. Yɛle kɛ nn ɔ mannin “ninnge nga nguan o be nun’n be kwlaa be like ng’ɔ ju be’n.” (Jue. 145:16) Sɛ e waan é kpɛ́ i kpo’n, é sé kɛ sɛ ɔ ti kɛ b’a kpaloman sielɛ sɔ’n, nn ɔ yoli sielɛ kun mɔ fɔ kaan sa nunmɛn i sin ɔn. (Mml. 32:4) Nanwlɛ kɛ sran’m be kpaloli i’n ɔ yoli tɛ dan!
4. ?Be kplinnin Satan su kɛ ɔ sie lele ju nin?
4 Kusu ɔ ti kpa kɛ nán e wla fi su kɛ kannzɛ Zoova yacili sran’m be nun naan be sie be bɔbɔ be wun’n, sanngɛ w’a yaciman atin ng’ɔ le i sie ninnge ng’ɔ yili be’n i akunndan bulɛ le. Babilɔni famiɛn’n m’ɔ le kwlalɛ kpa bɔbɔ’n, i agualiɛ su’n ɔ wunnin i wlɛ kɛ ‘Nyanmiɛn b’ɔ o nglo-nglo lɔ’n yɛ ɔ sie sran’m be famiɛn diwlɛ mun’ ɔn. (Dan. 4:14) Kpɛkun i agualiɛ su’n, Ɲanmiɛn i Sielɛ’n yó maan i klun sa’n yɛ bé yó ɔ. (Mat. 6:10) Ɔ ti su kɛ Zoova mannin Satan i atin kan kɛ ɔ yo kɛ ɔ ti “mɛn nga i min’n” sa. Ɔ yoli sɔ naan w’a kpɛ akplowa nga ɲrun tanndanfuɛ sɔ’n kpɛli i ba’n, i nun klanman. (2 Kor. 4:4; 1 Zan 5:19) Kannzɛ bɔbɔ ɔ yoli sɔ’n, sanngɛ like nga Zoova w’a mɛnmɛn i wun atin’n, Satan w’a kwlá yomɛn i le. (2 Nyo. 20:6; an nian Zɔb 1:11, 12; 2:3-6.) Kusu kannzɛ sran’m be o mɛn mɔ Ɲanmiɛn i kpɔfuɛ dan’n sie’n i nun’n, sanngɛ blɛ kwlaa nun’n be nun wie’m be loli be wun mannin Ɲanmiɛn.
Sielɛ mɔ Ɲanmiɛn sieli Izraɛli nvle’n
5. ?Nda benin yɛ Izraɛlifuɛ’m be tali Ɲanmiɛn ɔn?
5 Kɛ ɔ fɛ i Abɛli blɛ su lele mɔ bé fá táka Izraɛli nvle’n, sran kpa wie’m be suli Zoova yɛ be nantili i mmla’m be su. (Ebr. 11:4-22) Moizi blɛ su’n, Zoova nin Zakɔbu i osu’n nunfuɛ’m be trali aenguɛ. Yɛ be kacili Izraɛli nvle. Afuɛ nga be flɛ 1513 ka naan b’a wu Zezi’n i nun’n, Izraɛlifuɛ’m be fali be bɔbɔ nin be osu’n nunfuɛ mun wlali Zoova sa nun kɛ ɔ sie be. Be seli kɛ: “Like kwlaa nga Anannganman waan e yo’n, é yó.”—Tul. 19:8.
6, 7. ?Ngue yɛ ɔ trannin sielɛ nga Ɲanmiɛn sieli Izraɛli nvle’n nun ɔn?
6 Nán ngbɛn ti yɛ Zoova fali Izraɛlifuɛ mun yoli i nvle ɔ. (An kanngan Mmla’n 7:7, 8 nun.) Nán Izraɛlifuɛ’m be kpa yolɛ ngunmin ti yɛ ɔ fali be ɔ. Ɲanmiɛn i dunman’n nin i sielɛ m’ɔ le atin sie’n, be o nun wie. Kusu be ti cinnjin kpa. Izraɛlifuɛ’m bé wá káci i lalofuɛ. Yɛle kɛ bé wún i kɛ Zoova yɛ ɔ ti Ɲanmiɛn Kpli’n niɔn. (Eza. 43:10; 44:6-8) Ɔ maan Zoova sinnin Moizi lika seli nvle sɔ’n kɛ: “Amun ti Anannganman amun Nyanmiɛn i sran mun klonglo. Anannganman niannin mɛn’n nun nvle’m be kwlaa be nun ɔ kpali amun kɛ amun yo i liɛ mlɔnmlɔn.”—Mml. 14:2.
7 Kɛ Ɲanmiɛn síe Izraɛlifuɛ mun’n, i ɲin w’a kpaman su kɛ fɔ o be nun. Ɔ nin i sɔ ngba’n, fɔ kaan sa nunmɛn i mmla’m be sin yɛ be yi be Manfuɛ’n i nzuɛn’n i nglo. Zoova i mmla ng’ɔ sinnin Moizi ja nun fa mannin be’n, be kle weiin kɛ ɔ ti sanwun, ɔ klo sa sɛsɛ yolɛ, i klunklo su ɔ yaci sa cɛ kpɛkun ɔ trɛ i awlɛn. I sin Zozie nin i wiengu’m be blɛ su’n, nvle’n fali Zoova i mmla’m be su. Ɔ maan be dili fɔundi yɛ Ɲanmiɛn rali be su. (Zoz. 24:21, 22, 31) I sɔ blɛ liɛ’n yili Zoova i sielɛ’n i kpa m’ɔ ti’n i nglo.
Sa o klɔ sran’m be sielɛ’n i sin
8, 9. ?Ngue yɛ Izraɛlifuɛ’m be srɛli i sinnzin su ɔ? ?Yɛ i sɔ’n i bo’n guali sɛ?
8 Sanngɛ kɛ lika kɔ́ i ɲrun’n, Izraɛlifuɛ’m be kacili be sin sili Ɲanmiɛn i sielɛ’n kpɛ sunman. Ɔ maan w’a sasaman be kun. I agualiɛ su’n, Izraɛlifuɛ’m be sinnin Ɲanmiɛn nuan ijɔfuɛ Samiɛli i ja nun be seli Ɲanmiɛn kɛ ɔ man be famiɛn kun mɔ be ɲinma wun i ɔ. Yɛle kɛ ɔ sie klɔ sran kun kɛ famiɛn sa be su. Zoova seli Samiɛli kɛ ɔ fa like nga be srɛli’n man be. Sanngɛ Zoova kan guali su kɛ: “Nán wɔ yɛ be yi wɔ blo ɔ, min yɛ be yi min blo ɔ.” (1 Sam. 8:7) Kannzɛ Zoova kplinnin su kɛ Izraɛlifuɛ’m be ɲan famiɛn kun mɔ be ɲin tɛ i’n, sanngɛ ɔ wlali be su nun kɛ i sɔ klɔ sran sielɛ liɛ’n ndɛ trɛ́n i sin.—An kanngan 1 Samiɛl 8:9-18 nun.
9 Sa nga be juli’n, be kleli kɛ ndɛ nga Zoova kannin’n ti nanwlɛ. Kɛ mɔ sran yɛ ɔ sieli Izraɛli nvle’n ti’n, ndɛ kpanngban tɔli be su. I li kɛ famiɛn’n lafiman Ɲanmiɛn su’n yɛ ɔ yoli sɔ dan’n niɔn. Kɛ e bu Izraɛlifuɛ’m be ndɛ sɔ’n i akunndan’n, sɛ lele nin andɛ’n awa nga klɔ sran mɔ be siman Zoova’n yɛ be ti be su kpɛnngbɛn’n b’a kwlá yoman like kpa fi’n, ɔ boman e nuan. Ɔ ti su kɛ politikifuɛ wie’m be srɛ Ɲanmiɛn kɛ be ɲin nga be mian naan alaje’n nin fɔundi’n b’a tran lɛ’n ɔ ra su. ?Sanngɛ ɔ́ yó sɛ naan Ɲanmiɛn w’a kwla ra be nga be yaciman be wun lɛ naan ɔ sie be’n be su?—Jue. 2:10-12.
Nvle uflɛ kun mɔ Ɲanmiɛn sie i’n
10. ?Ngue ti yɛ ti Izraɛli nvle’n w’a yoman nvle nga Ɲanmiɛn kpali sieli’n kun ɔn?
10 Izraɛli nvle’n kleli kɛ ɔ kloman kɛ ɔ́ sú Zoova ndɛnman su. I agualiɛ su’n, b’a sɔman Mɛsi mɔ Ɲanmiɛn sieli i’n i nun. Ɔ maan Zoova yili be blo yɛ ɔ seli kɛ ɔ́ fá sran akpasua uflɛ fá káci be. Sran sɔ’m be kacili nvle uflɛ kun. I sɔ’n ti’n, afuɛ nga be flɛ i 33 nun be takali Klistfuɛ asɔnun mɔ be nga be kpali be sieli be ngunmin’n, be su Zoova i nun’n. Asɔnun sɔ’n ti nvle kun mɔ Zoova sie i ɔ. Pɔlu kannin nvle sɔ’n i nunfuɛ’m be ndɛ kɛ be ti “Izraɛlfuɛ nga be ti [Nyanmiɛn] i liɛ sakpa’n.”—Gal. 6:16.
11, 12. ?Sran’m be su nianlɛ’n nun’n, ngue nun yɛ Izraɛli nvle’n ɔ nin “Izraɛlfuɛ nga be ti [Nyanmiɛn] i liɛ sakpa’n,” be fa be wun ɔn?
11 Ninnge wie’m be nun’n, Izraɛli nvle klikli’n ɔ nin “Izraɛlfuɛ nga be ti [Nyanmiɛn] i liɛ sakpa’n,” be fa be wun. Wie’m be nun kusu’n, be faman be wun. Nán klɔ sran yɛ ɔ sie Klistfuɛ asɔnun’n kɛ Izraɛli nvle klikli’n sa ɔ. Kusu nvle sɔ’n nun’n, ɔ nunman nun kɛ be yi sa tɛ yofuɛ’m be ti tɛ. Like kun mɔ i nun’n, Izraɛli nvle’n nin Klistfuɛ asɔnun’n be fa be wun’n, yɛle kpɛnngbɛn nga be sieli be’n. (Tul. 19:3-8) I sɔ Klistfuɛ asɔnun kpɛnngbɛn’m be sieman Ɲanmiɛn i bua fa’n. Sanngɛ be nian asɔnun’n su. Kpɛkun junman nga Klistfuɛ’m be di’n, be mian be ɲin be dun i ɲrun mmua. Be nin asɔnun’n nunfuɛ’m be tinuntinun be tran klolɛ su yɛ be bu be kwlaa be sran.—2 Kor. 1:24; 1 Piɛ. 5:2, 3.
12 Kɛ “Izraɛlfuɛ nga be ti [Nyanmiɛn] i liɛ sakpa’n,” ɔ nin be wiengu nga be flɛ be “bua’m be wie” mun’n be bu wafa nga Ɲanmiɛn yoli Izraɛli’n i akunndan’n, be si Zoova nin i sielɛ’n be su ye kpa ekun. (Zan 10:16) I wie yɛle kɛ, sa nga be juli’n be kle kɛ klɔ sran nga be sieli Izraɛli nvle’n be aeliɛ’n, sɛ ɔ ti tɛ o, sɛ ɔ ti kpa o, ɔ ɲannin ta be nga be sie be’n be su. I sɔ liɛ’n kan be nga be dun Klistfuɛ’m be ɲrun mmua’n be aeliɛ’n. Ɔ maan, kannzɛ be sieman be wiengu mun kɛ laa famiɛn sɔ mun sa’n, sanngɛ ɔ fata kɛ be Ɲanmiɛn sulafilɛ nun’n be kle ajalɛ kpa.—Ebr. 13:7.
Wafa nga Zoova sie sran mun andɛ’n
13. ?Sa cinnjin benin yɛ ɔ juli afuɛ nga be flɛ i 1914 nun ɔn?
13 Andɛ’n, Klistfuɛ’m be kɛn i mɛn wunmuan’n nun kɛ klɔ sran’m be wiengu sielɛ’n i awieliɛ’n w’a mantan koko. Afuɛ nga be flɛ i 1914 nun’n, Zoova tɛkɛli i Famiɛn diwlɛ’n ɲanmiɛn su lɔ. Kpɛkun ɔ fali Zezi Klist m’ɔ ti i Famiɛn m’ɔ kpɛli i sieli’n kɛ famiɛn sa. I sɔ blɛ’n nun’n, ɔ mannin Zezi i kwlalɛ naan ɔ wɔ ‘yasua su kɛ ɔ nin i kpɔfuɛ mun bé kó kún naan ɔ́ kwlá be.’ (Ngl. 6:2) Ɔ seli Famiɛn sɔ mɔ b’a sie i uflɛuflɛ’n i kɛ: “Maan ɔ fanngan’n ɔ kwla ɔ kpɔfuɛ mun.” (Jue. 110:2) Sanngɛ ng’ɔ yo ɲrɛnnɛn’n yɛle kɛ nvlenvle’m be kpaloli Zoova i sielɛ’n titi. Be yoli kɛ “Nyanmiɛn nun-man lɛ” sa titi.—Jue. 14:1.
14, 15. (a) ?Wafa sɛ yɛ Ɲanmiɛn i Famiɛn diwlɛ’n sie e andɛ ɔ? ?Yɛ kɛ m’ɔ ti sɔ’n niɔn, kosan benin yɛ ɔ fata kɛ e fa usa e wun ɔn? (b) ?Wafa sɛ yɛ andɛ’n e wun kɛ Ɲanmiɛn i sielɛ’n i kpa tra sielɛ’n kwlaa ɔ?
14 Be nga be kpali be sieli be ngunmin’n mɔ be ti “Izraɛlfuɛ nga be ti [Nyanmiɛn] i liɛ sakpa’n” be nunfuɛ’n, be nun kaan sa yɛ be te o asiɛ’n su wa ɔ. Yɛ i sɔfuɛ mɔ be ti Zezi i niaan mun’n, be te di “Krist i ja nun jranfuɛ” junman’n. (2 Kor. 5:20) Be sieli be kɛ be ti sran kpa nanwlɛfuɛ m’ɔ si ngwlɛlɛ’n naan be nian be nga be kpali be sieli be ngunmin’n be lika. Kpɛkun be nian Klistfuɛ onga mɔ be te sɔn te kɔ mɔ dɔ nga su be ti miliɔn kpanngban mɔ be lafi su kɛ bé trán asiɛ’n su tititi’n, be lika wie. Yɛ be man be aliɛ Ɲanmiɛn ninnge’m be nun. (Mat. 24:45-47; Ngl. 7:9-15) Wafa nga Zoova rɛ i sufuɛ kpa’m be su andɛ’n, ɔ kle kɛ i klun jɔ ninnge siesielɛ sɔ’n su.
15 Ɔ fata kɛ e tinuntinun e fa kosan yɛ mun e usa e wun: ‘?Junman ng’ɔ fata kɛ n di i asɔnun’n nun’n, n wun i wlɛ kpa? ?N suan Zoova i sielɛ’n i bo kɛ ɔ nin i fata’n sa? ?Zoova i Famiɛn diwlɛ m’ɔ sie min dɔ nga su’n, ɔ ti min cenjele like? ?N tali nda kɛ ń kán Ɲanmiɛn Sielɛ’n i ndɛ ń klé sran mun titi ń jú kan min sa kwla ju lɛ’n?’ E ngba’n, e klunklo su e fa atin nga e Ɲrun dinfuɛ’m be anuannzɛ’n kle e’n su. Yɛ e nin asɔnun kpɛnngbɛn nga be sieli be asɔnun’m be nun’n, e di junman klanman likawlɛ. Kɛ e yo sɔ’n, e kle kɛ e kplinnin Ɲanmiɛn i sielɛ’n su. (An kanngan Ebre Mun 13:17 nun.) Kɛ mɔ e klunklo su e lo e wun’n, ɔ yo maan mɛn ng’ɔ o yɛ mɔ sran’m b’a bubu be wun nun i nun’n, e bo kun yolɛ’n ti i liɛ ngunmin. I sɔ’n yo kusu maan fɔundi nin sa sɛsɛ yolɛ’n be tran lɛ, kpɛkun i sɔ’n manman Zoova. Yɛle kɛ ɔ kle kɛ i sielɛ liɛ’n i kpa tra sielɛ’n kwlaa lele.
Zoova i sielɛ’n kwlali sakpa
16. ?Ajalɛ benin yɛ ɔ fata kɛ sran kwlaa fɛ i andɛ ɔ?
16 Akplowa ng’ɔ tɔli Edɛni fie’n nun lɔ’n, i nun kpɛlɛ blɛ’n su mantan ndɛndɛ kpa. I sɔ’n ti’n, dɔ nga su yɛ ɔ fata kɛ sran’m be fa ajalɛ kun ɔn. Ɔ fata kɛ sran kun bɔbɔ fa ajalɛ sɛ ɔ́ fá Zoova i sielɛ liɛ’n nin o, annzɛ kusu sɛ klɔ sran’m be liɛ’n yɛ ɔ́ jrán su cinnjin o. Ɔ ti e cenjele like kɛ e uka wun ase kanfuɛ mun naan be fa ajalɛ kpafuɛ’n. Ɔ cɛ kaan’n, Armagedɔn alɛ’n nun’n, Zoova i sielɛ’n wá káci klɔ sran’m be awa mɔ Satan o be sin’n mlɔnmlɔnmlɔn. (Dan. 2:44; Ngl. 16:16) Klɔ sran’m be sielɛ’n wíe kpɛkun Ɲanmiɛn Sielɛ’n ɔ́ síe asiɛ wunmuan’n. Zoova i sielɛ’n ɔ́ kwlá mlɔnmlɔnmlɔn.—An kanngan Sa Nglo Yilɛ 21:3-5 nun.
17. ?Ninnge benin mun yɛ be uka wun ase kanfuɛ mun naan b’a fa sran sielɛ’n i su ajalɛ kpafuɛ’n niɔn?
17 Be nga be nin a faman ajalɛ trele kun kɛ bé fá be wun mán Zoova’n, ɔ fata kɛ be bu ninnge kpakpa nga Ɲanmiɛn i sielɛ’n wá fá mán klɔ sran mun’n, i akunndan srɛlɛ’n nun. Klɔ sran’m be sielɛ’n w’a kwlá yoman naan sa tɛ yolɛ’n mɔ i wie yɛle kakawlonga sa mun’n, b’a wie. Ɲanmiɛn i sielɛ’n wá kán klunwifuɛ’m be bo asiɛ’n su. (Jue. 37:1, 2, 9) Sran’m be sielɛ liɛ’n ti alɛ kunlɛ sa cɔcɔcɔ. Sanngɛ Ɲanmiɛn i sielɛ’n wá yó maan ‘kɛ ɔ fɛ i lele b’ɔ́ fá jú mɛn’n i awieliɛ lɔ’n, alɛ kunlɛ’n wíe.’ (Jue. 46:10) I kpa’n, Ɲanmiɛn i sielɛ’n yó maan klɔ sran nin nnɛn’m bé trán fɔundi nun bɔbɔ! (Eza. 11:6-9) Yalɛ’n nin awe’n be trannin klɔ sran’m be sielɛ’n i bo titi. Sanngɛ Ɲanmiɛn i sielɛ’n núnnún i kwlaa sɔ’n. (Eza. 65:21) Klɔ sran’m be siefuɛ nga be klo kɛ bé yó like kpa bɔbɔ’n, b’a kwlá nunnunman tukpacɛ’n nin wie’n. Sanngɛ Ɲanmiɛn i sielɛ’n i bo’n, kpɛnngbɛn nin tukpacifuɛ’m bé sá be sin bé yó gbanflɛn ekun aklunjuɛ’n nun. (Zɔb 33:25; Eza. 35:5, 6) Asiɛ’n káci mɛn klanman, yɛ i nun’n bé cɛ́n be nga be wuli mun sakpa.—Lik 23:43; Yol. 24:15.
18. ?Wafa sɛ yɛ e kwla kle kɛ e lafi su kɛ Ɲanmiɛn i sielɛ’n yɛ ɔ ti sielɛ’m be nun kpafuɛ’n niɔn?
18 Kɛ Satan yoli maan e si nin e nin klikli’m be kacili be sin be sili be Yifuɛ’n, i sin ɲrɛnnɛn ng’ɔ tɔli sran’m be su’n, Ɲanmiɛn i sielɛ’n wá núnnún i sakpa. Asa ekun’n, maan e bu sa nga i akunndan. I afuɛ 6.000 yɛ Satan kle sran’m be ɲrɛnnɛn. Sanngɛ Ɲanmiɛn i dunman nun’n, Klist wá fá afuɛ 1.000 fá núnnún ɲrɛnnɛn sɔ’n kwlaa! ?I sɔ liɛ’n yimɛn i nglo weiin kɛ Ɲanmiɛn i sielɛ liɛ’n ti kpa tra Satan i liɛ’n lele? E mɔ e ti e Ɲanmiɛn’n i Lalofuɛ’n, e kplin su kɛ ɔ ti e Siefuɛ. I sɔ’n ti’n, maan cɛn kwlaa e yi i nglo kɛ e ti Zoova i sufuɛ naan i yɛ ɔ sie e ɔ, naan kɛ e ti i Lalofuɛ’n ɔ ti e cenjele like. I kpa’n maan e yo i sɔ dɔ kwlaa su. Kpɛkun blɛ kwlaa nga e ɲɛn i wun atin’n, e se sran kwlaa ng’ɔ kunndɛ kɛ ɔ́ fɛ́ i su síe i e nuan bo’n i kɛ Zoova i sielɛ’n ɔ ti sielɛ’m be nun kpafuɛ’n lelele.
?Ɲanmiɛn i sielɛ’n su’n, ngue yɛ e suɛnnin i [...]
• Mmla’n 7:7, 8 nun ɔn?
• 1 Samiɛl 8:9-18 nun ɔn?
• Ebre Mun 13:17 nun ɔn?
• Sa Nglo Yilɛ 21:3-5 nun ɔn?
[Foto mun, bue 29]
Zoova w’a yacimɛn i sielɛ’n i akunndan bulɛ le.
[Foto, bue 31]
Kɛ e klunklo su e lo e wun e man Zoova i sielɛ’n, mɛn wunmuan’n nun’n e bo sɛ.