Amun mo nin balɛ mɛn dilɛ kpafuɛ’n i atin’n su!
“Sɛ e wu o, sɛ e wu-man o, e ti e Min’n liɛ.”—RƆM. 14:8.
1. ?Ngue yɛ Zezi kleli i mɛn dilɛ kpafuɛ’n su ɔ?
ZOOVA kunndɛ kɛ e mɛn dilɛ’n yo kpa. Mɛn dilɛ’n ti wafawafa. Sanngɛ mɛn dilɛ kunngba yɛ ɔ ti i kpafuɛ’n niɔn. Sɛ e waan é dí mɛn’n i kpafuɛ’n, saan é nánti Ɲanmiɛn Ndɛ’n su, yɛ é súan Ɲanmiɛn i Wa Zezi Klist i su like. Zezi kleli i sɔnnzɔnfuɛ’m be kɛ be su Ɲanmiɛn akunndan nun nin nanwlɛ nun. Yɛ ɔ seli be kɛ be kle sran’m be like naan be kaci i sɔnnzɔnfuɛ. (Mat. 28:19, 20; Zan 4:24) Sɛ e di Zezi i ndɛ’m be su’n, Zoova klun jɔ́ e wun yɛ ɔ́ rá e su.
2. ?Klistfuɛ klikli’m be blɛ su’n, wafa sɛ yɛ sran kpanngban be sɔli Sielɛ’n i su jasin’n i nun ɔn? ?Yɛ kɛ be se kɛ be o “atin’n” su’n i bo’n yɛle benin?
2 Kɛ be nga be ti ‘sran kpa’n,’ be lafi Ɲanmiɛn su mɔ be yo be batɛmu’n, ɔ nin i fata kɛ e yo be “mo nin balɛ mɛn dilɛ kpafuɛ’n i atin’n su!” (Mat. 10:11) Klistfuɛ klikli’m be blɛ su’n, sran akpiakpi mɔ be fin lika fanunfanun’n, be sɔli nanwlɛ’n nun. I ti’n, be yili i nglo sran’m be ɲrun kɛ be fali be wun mannin Ɲanmiɛn yɛ be yoli be batɛmu. (Yol. 2:41) Klistfuɛ klikli sɔ’m be fa “ndɛ [“atin’n,” NW]” su. (Yol. 9:2; 19:23) Kɛ be kan kɛ Klist i sɔnnzɔnfuɛ’m be o atin’n su’n, ɔ nin i fata. Afin, be mɛn dilɛ wunmuan’n nun’n, be lafi Zezi Klist su, yɛ be fɛ i ajalɛ’n su.—1 Piɛ. 2:21.
3. ?Ngue ti yɛ Zoova i sufuɛ’m be yo be batɛmu ɔ? ?Yɛ sran yɛ nɲɛ yɛ be yoli be batɛmu afuɛ blu nga be sinnin koko yɛ’n be nun ɔn?
3 Blɛ kasiɛn nga nun’n, sran’m be like klelɛ mɔ maan be kaci Zezi i sɔnnzɔnfuɛ’n, ɔ trɛ ndɛndɛ kpa. Yɛ dɔ nga su’n, be di i sɔ junman’n nvlenvle 230 tra su nun. Afuɛ blu nga be sinnin lɛ nun’n, sran 2.700.000 tra su be fali be wun mannin Zoova kɛ bé sú i. I sɔ’n ti’n, be yoli be batɛmu. Ɔ ti kɛ nn le mɔcuɛ kwlaa nun’n, be yo sran 5.000 tra su be batɛmu sa! Sɛ be fali ajalɛ kɛ be yo be batɛmu’n, ɔ fin klolɛ mɔ be klo Ɲanmiɛn’n, ɔ nin Ɲanmiɛn Ndɛ’n nun like mɔ be si i’n. Yɛ ɔ fin like nga be kle’n, i su lafilɛ mɔ be lafi’n. E mɛn dilɛ’n nun’n, batɛmu’n ti like cinnjin kpa kun. Afin, i yɛ ɔ ti e nin Zoova e janvuɛ kpa tralɛ’n i bo bolɛ’n niɔn. I sɔ’n kle kusu kɛ e lafi i su kɛ ɔ́ úka e naan y’a su i titi kɛ nga ɔ fa ukali i sufuɛ mun laa naan b’a nanti i atin’n su’n sa.—Eza. 30:21.
?Ngue ti yɛ ɔ fata kɛ be yo e batɛmu ɔ?
4, 5. Mmlusuɛ wie mɔ kɛ be yo e batɛmu e kwla ɲan be’n, amun kan be ndɛ.
4 Atrɛkpa’n, amun si Ɲanmiɛn su like, amun a kaci amun nzuɛn yɛ kɛ é sé yɛ’n amun ti jasin bofuɛ nga be nin a yomɛn i batɛmu’n. I sɔ’n nin mo yolɛ fata. ?Sanngɛ amun srɛli Ɲanmiɛn kɛ amún fá amun wun mɛ́n i? ?Yɛ amun klo kɛ be yo amun batɛmu? Biblu’n nun like nga amun suannin’n ti’n, siɛn’n amun wun i kpa kɛ amun mɛn dilɛ’n nun’n, like ng’ɔ fata kɛ ɔ yo amun cinnjin’n, yɛle Zoova i manmanlɛ. Naan nɛ́n i yɛle amun bɔbɔ amun fɛ dilɛ nin aɲanbeun kunndɛlɛ ngboko’n. (An kanngan Jue Mun 148:11-13; Lik 12:15 nun.) ?I ti’n, kɛ be yo e batɛmu’n, mmlusuɛ benin wie mun yɛ e ɲan be ɔ?
5 Kɛ amun ko kaci Klistfuɛ kun m’ɔ ti Ɲanmiɛn liɛ mlɔnmlɔn’n, amun mɛn dilɛ’n yoman ngbɛn. Amún dí aklunjuɛ afin amun su yo Ɲanmiɛn klun sa’n. (Rɔm. 12:1, 2) Zoova wawɛ’n maan amún wá yí nzuɛn kpakpa mɔ be fin Ɲanmiɛn’n be nglo. I wie yɛle be wla m’ɔ gua ase’n ɔ nin Ɲanmiɛn sulafilɛ’n. (Gal. 5:22, 23) Ɲanmiɛn wá tɛ́ amun srɛlɛ’m be su yɛ ɔ́ rá amun ɲin mɔ amun mian naan amun a nanti i Ndɛ’n su’n, i su. Amun jasin fɛ’n i bolɛ’n mán amun aklunjuɛ. Kpɛkun amun wla ng’ɔ o su kɛ amún ɲán anannganman nguan’n, i bo’n wla ase kpa. Asa ekun’n, sɛ amun fa amun wun man Ɲanmiɛn naan be yo amun batɛmu’n, i sɔ’n kle kɛ amun waan amún káci Zoova i Lalofuɛ’m be nun kun sakpa.—Eza. 43:10-12.
6. ?Ngue yɛ e batɛmu yolɛ’n ɔ kle ɔ?
6 Kɛ e fa e wun e man Ɲanmiɛn mɔ be yo e batɛmu’n, e kle sran’m be kwlaa be ɲrun kɛ e ti Zoova liɛ. Akoto Pɔlu klɛli i kɛ: “Olɛ nga e o yɛ’n, e di-man e tiaun, ɔ maan sɛ é wú o, ɔ ti-man e ndɛ. Sɛ e wu o, sɛ e wu-man o, e ti e Min’n liɛ.” (Rɔm. 14:7, 8) Kɛ Ɲanmiɛn yí e’n, ɔ buli e sran. Ɔ maan e kwla fa e klunklo ajalɛ. Kɛ e fa ajalɛ kɛ é nánti i atin’n su afin e klo i’n, i sɔ’n jɔ i klun. (Nya. 27:11) E batɛmu mɔ be yo’n, ɔ kle like nɲɔn. Ɔ kle kɛ e fali e wun e mannin Ɲanmiɛn. Kpɛkun ɔ kle nzrafuɛ’m be kɛ Zoova ti e Siefuɛ. Ɔ kle wie kɛ e fali ajalɛ kɛ nglo nin asiɛ’n be sielɛ’n i su akplowa ng’ɔ tɔli’n nun’n, e jin i sin. (Yol. 5:29, 32) Kɛ ɔ yo sɔ’n, Zoova kusu nin e o nun. (An kanngan Jue Mun 118:6 nun.) Batɛmu mɔ be yo e’n kusu tike e ɲrun atin naan andɛ nin ainman’n, y’a ɲan Ɲanmiɛn sulɛ’n nun mmlusuɛ uflɛ mun.
E niaan mɔ be klo e’n, be ti e suralɛ like
7-9. (a) ?Be nga be yacili like kwlaa be suli Zezi su’n, ngue ndɛ yɛ ɔ fa cicili be wla ɔ? (b) ?Wafa sɛ yɛ nda nga Zezi tɛli i Mark 10:29, 30 nun’n, ɔ su kpɛn su ɔ?
7 Akoto Piɛli seli Zezi kɛ: “Nian, y’a yaci e ninnge’n kwlaa y’a su ɔ su. ?Nguɛ yɛ é nyɛ́n i-ɔ?” (Mat. 19:27) Piɛli waan Zezi kan like nga i bɔbɔ nin Zezi i sɔnnzɔnfuɛ uflɛ’m bé ɲɛ́n i cɛn wie lele’n. Kɛ ɔ ko yo naan b’a kwla fa be wun b’a wlɛ i Sielɛ’n i jasin fɛ’n i bolɛ junman’n nun mlɔnmlɔn’n ti’n, be klɛnnin ninnge cinnjin kpa wie mun. (Mat. 4:18-22) ?Ngue ndɛ yɛ Zezi fa cicili i wla ɔ?
8 Marki i ndɛ liɛ m’ɔ kɛnnin i ndɛ sɔ’n su i nun’n, Zezi kleli kɛ i sɔnnzɔnfuɛ’m bé ɲán aniaan Ɲanmiɛn sulɛ nun. Zezi waan: “Sran kwlaa nga min nin jasin fɛ’n ti ɔ yaci i awlo, nin i niaan mun, ɔ nin i nin, nin i si, nin i mma mun ɔ nin i asiɛ’n, ɔ́ nyɛ́n i wunsu sɔ kpɛ ya, sua o, niaan o, niɛn o, ba o, asiɛ o, ɔ nin yalɛ klelɛ kɛ e o yɛ’n, yɛ ɔ́ nyán anannganman nguan blɛ ng’ɔ́ bá lɔ’n.” (Mar. 10:29, 30) Klistfuɛ klikli’m be blɛ su’n, Klistfuɛ kɛ Lidi nin Akilasi ɔ nin Prisiyi nin Gaiisi sa’n, be o be nga be yacili be “awlo” mun mannin aniaan mun’n, be nun wie. Kusu be kacili be wiengu Klistfuɛ’m be ‘niaan mun, ɔ nin be nin,’ kɛ nga Zezi fa kannin’n sa.—Yol. 16:14, 15; 18:2-4; 3 Zan 1, 5-8.
9 Andɛ’n, e wun ndɛ sɔ mɔ Zezi kannin’n i su kpɛnlɛ danfuɛ’n. Kɛ Zezi seli kɛ i sɔnnzɔnfuɛ’m be yacili be “asiɛ’n,” yɛle kɛ be yacili be junman ng’ɔ man be aliɛ’n, be klunklo su Ɲanmiɛn Sielɛ Blɛ jasin fɛ’n i bolɛ junman nvlenvle’m be nun’n ti. I sɔnnzɔnfuɛ sɔ wie mun yɛle ngaliɛ difuɛ mun, ɔ nin Betɛli lɔfuɛ mun, ɔ nin be nga be kɔ nvlenvle’m be nun be ko kplan aɲia sua nin Betɛli mun, ɔ nin be nga be di Ɲanmiɛn junman uflɛ wie mun’n. Kɛ ɔ ko yo naan aniaan wie’m be mɛn dilɛ’n w’a yo sɛsɛ’n, be yacili be awlo mun. Kɛ aniaan sɔ’m be kan wafa nga Zoova nian be lika’n, ɔ nin wafa nga be di aklunjuɛ be Ɲanmiɛn junman’n nun’n, ɔ yo e fɛ. (Yol. 20:35) Asa kusu’n, kɛ be se kɛ “an dun mmua fa amun wun man Nyanmiɛn maan ɔ sie amun,” aklunjuɛ ng’ɔ o nun’n, Zoova i sufuɛ’m be kwlaa nga b’a yo be batɛmu’n be nin be niaan Klistfuɛ nga be o mɛn wunmuan’n nun’n, be kwla di wie.—Mat. 6:33.
E ‘fia Nyanmiɛn i sin’
10, 11. ?Kɛ be se kɛ e “fia Nyanmiɛn bɔ like fi nun-mɛn i sin’n i sin’n,” i bo’n yɛle benin? ?Yɛ wafa sɛ yɛ e kwla fia lɔ ɔ?
10 Mmlusuɛ uflɛ o be wun Ɲanmiɛn fa manlɛ nin batɛmu yolɛ’n nun. Yɛle kɛ ɔ yo maan e ‘fia Nyanmiɛn mɔ like fi nun-mɛn i sin’n i sin.’ (An kanngan Jue Mun 91:1 nun.) I sɔ’n ti akunndan nun ndɛ. Yɛle kɛ Ɲanmiɛn ninnge’m be nun’n, Ɲanmiɛn sasa e. Ɔ ti kɛ y’a ‘fia Nyanmiɛn i sin’ sa. Afin be nga be lafiman Ɲanmiɛn su mɔ be ninnge yolɛ’n nin i liɛ’n timan kun’n, Ɲanmiɛn kwlá sasaman be. E wun nga e fa mannin Zoova’n, kɛ e yo i nuan su like mɔ e fa e wla’n e guɛ i su’n, e su se i kɛ: “A ti min fiawlɛ, a ti min fiawlɛ sua, a ti min Nyanmiɛn, ɔ su yɛ n fa n wla’n n gua-a!” (Jue. 91:2) Kɛ ɔ yo sɔ’n, Ɲanmiɛn Zoova kaci e fiawlɛ, ɔ sasa e. (Jue. 91:9) ?Ngue yɛ e kwla kunndɛ i ekun ɔn?
11 Kɛ be se kɛ e kwla ‘fia Nyanmiɛn i sin’n,’ i wie yɛle kɛ e nin Zoova e afiɛn’n mantan kpa. I sɔ’n ti e cenjele like kun. Yɛ i sɔ’n kusu’n, e wun Ɲanmiɛn fa manlɛ nin batɛmu’n yɛ be fa bo i bo ɔ. Ɔ maan, e nin Ɲanmiɛn e afiɛn m’ɔ sɛ’n, ɔ taka e wun mɔ e fa mɛntɛn i’n i su. Yɛ Biblu’n nun like suanlɛ’n nin e klun mɔ e tu e srɛ Ɲanmiɛn’n, ɔ nin i ndɛ mɔ e nanti su kpa’n yɛ maan i sɔ’n kwla yo ye ɔ. (Zak 4:8) Sran uflɛ fi w’a mantanman Zoova kɛ Zezi sa, yɛ w’a kpɔnzɔman i Yifuɛ’n i sulafilɛ’n nun le. (Zan 8:29) I ti’n, nda nga e tali Zoova kɛ é fá e wun é mɛ́n i’n, nán e bu i le kɛ ɔ su kwlá ukaman e naan y’a yo i nuan su sa. (Aku. 5:4) Ɲanmiɛn ninnge’m be nun aliɛ ng’ɔ fa mɛn i sufuɛ mun’n, ɔ kle weiin kɛ ɔ klo e sakpa naan ɔ klo kɛ e yo kpa i sulɛ’n nun.
Maan Ɲanmiɛn i anuannzɛ’n i nun tranlɛ’n yo e nnana
12, 13. (a) ?Ngue yɛle Ɲanmiɛn ninnge’m be nun mɛn klanman’n? (b) ?Wafa sɛ yɛ e kwla uka be nga b’a ba uflɛuflɛ’n niɔn?
12 E wun mɔ e fa man Ɲanmiɛn nin batɛmu mɔ be yo e’n, ɔ yo maan e kwla tran Ɲanmiɛn ninnge’m be nun mɛn klanman’n nun. I sɔ lika’n nun’n, e nin e niaan Klistfuɛ mun ngunmin yɛ e kwla tran ɔn. Aniaan sɔ mun’n, be nin Ɲanmiɛn Zoova be tran klanman yɛ alaje’n o be nin be wiengu Klistfuɛ’m be afiɛn. (Jue. 29:11; Eza. 54:13) E Ɲanmiɛn ninnge’m be nun mɛn klanman’n, e kwlá faman mɛn’n nun like fi e sunnzunmɛn i. E aɲia dandan nga nvlenvle’m be yia’n, be bo yɛ e wun i sɔ liɛ’n i kpa ɔ. Afin aɲia sɔ’m be bo’n, kɛ e niaan nga be fin nvlenvle fanunfanun’m be nun mɔ be kan aniɛn wafawafa’n be ko ba’n, alaje’n nin bo kun yolɛ nin aniaan tranlɛ’n yɛ be tran ɔn.
13 Ɲanmiɛn ninnge’m be nun mɛn klanman nga e o nun’n, ɔ nin mɛn nga w’a yo sukusuku yɛ’n be sansan be wun dan. (An kanngan Ezai 65:13, 14 nun.) Kɛ e bo Sielɛ’n i jasin fɛ’n, e flɛ sran uflɛ mun naan be wlu Ɲanmiɛn ninnge’m be nun mɛn klanman sɔ’n nun. I sɔ’n ti e cenjele like. Asa kusu’n, like ng’ɔ ti e cenjele nun ekun’n yɛle kɛ e nian be nga b’a ba uflɛuflɛ asɔnun’n nun’n, be lika. Yɛ e kle be Ɲanmiɛn junman’n i dilɛ. Akilasi nin Prisiyi “be kleli [Apolɔsu] i Nyanmiɛn ndɛ’n weinwein kpa.” Kɛ be sa’n, asɔnun kpɛnngbɛn’m be kwla se e kɛ e uka be nga b’a ba uflɛuflɛ’n be nun wie mun. I sɔ’n ti mmlusuɛ mɔ e ɲɛn i wie ɔ.—Yol. 18:24-26.
Maan e nian Zezi i ajalɛ’n su titi
14, 15. ?Like cinnjin benin ti yɛ ɔ fata kɛ e suan Zezi su like titi ɔ?
14 Like cinnjin wie’m be ti yɛ ɔ fata kɛ e nian Zezi i ajalɛ’n su ɔ. I nun mɔ Zezi o ɲanmiɛn su lɔ’n, ɔ nin i Si be dili junman afuɛ akpiakpi leleele tratra su. (Nya. 8:22, 30) Ɔ wunnin i wlɛ kɛ mɛn dilɛ’n i kpafuɛ’n, yɛle ng’ɔ taka Ɲanmiɛn i sulɛ nin i ndɛ nanwlɛ’n i kanlɛ’n be su’n. (Zan 18:37) Ɔ yoli weiin Zezi i akunndan nun kɛ sran kwlaa ng’ɔ fa atin uflɛ’n, nn i sɔfuɛ’n, ɔ bu i ngunmin i wun akunndan, yɛ ɔ wunman sa wlɛ kpa. Ɔ sili kɛ ɔ́ wá wún i ɲrun kpa yɛ bé kún i. (Mat. 20:18, 19; Ebr. 4:15) Kɛ m’ɔ ti e Ajalɛ Manfuɛ’n ti’n, ɔ kleli e wafa nga e kwla nanti seiin tititi’n.
15 Kɛ be yoli Zezi i batɛmu’n, w’a cɛman Satan wa lɛkɛli i naan ɔ yaci atin kpafuɛ’n. Sanngɛ w’a yoman ye. (Mat. 4:1-11) I sɔ’n kle e kɛ kannzɛ maan Satan yo like kwlaa nga i waan ɔ́ yó’n, sanngɛ e kwla nanti seiin titi. Be nga be waan be yo be batɛmu’n, ɔ nin be nga be yoli be batɛmu ɔ nin a cɛman’n, be su yɛ Satan fɛ i ɲin sie ɔ. (1 Piɛ. 5:8) Wie liɛ’n, Zoova i Lalofuɛ’m be su ndɛ mɔ e osufuɛ’m be simɛn i kpa’n ti’n, be kwla kle e yalɛ. I sɔ liɛ’n yo maan e kwla yi Klistfuɛ nzuɛn’m be nglo. I wie yɛle sran’m be kosan’m be su tɛlɛ’n nin jasin fɛ’n i bolɛ’n nun’n, aɲinyiɛ mɔ e yi i nglo’n ɔ nin ndɛ mɔ e kɛn i amanniɛn su’n. (1 Piɛ. 3:15, 16) Ɔ maan i sɔ sa’m be kwla yo maan be nga be tie e ndɛ’n, be fa ajalɛ kpa.—1 Tim. 4:16.
Maan e ka mɛn dilɛ kpafuɛ’n i atin su titi!
16, 17. (a) ?Like nsan benin mɔ be man nguan’n, yɛ Mmla’n 30:19, 20 kan be ndɛ ɔ? (b) ?Wafa sɛ yɛ Zezi nin Zan nin Pɔlu be suannin Moizi i ndɛ’n i bo ɔ?
16 Afuɛ 1.500 ka naan b’a wu Zezi’n, Moizi wlali Izraɛlifuɛ’m be fanngan kɛ blɛ mɔ be fa mɛn dilɛ kpafuɛ’n i atin’n su ɔ te yo ye’n, maan be fa su. I waan: “Ndɛ nga ń wá kán klé amun ndɛkɛn yɛ’n, nguan’n nin wie’n yɛ m’án fá síe amun nyrun lɛ-ɔ. Muae nin sa yalɛ’n yɛ m’án fá síe amun nyrun lɛ-ɔ. N bua-man ato. N kan nyanmiɛn nin asiɛ’n. Amun nin amun osu nunfuɛ mun, amun fa nguan’n naan amun tran nguan nun. Amun klo Anannganman amun Nyanmiɛn’n, amun fɛ i nuan ndɛ’n su, amun fa amun wun mɛntɛn i.” (Mml. 30:19, 20) Izraɛlifuɛ’m be nin Ɲanmiɛn b’a nantiman klanman. Sanngɛ like nsan nga be man nguan mɔ Moizi kannin be ndɛ’n, b’a kaciman. I sɔ ndɛ liɛ’n, Zezi nin sran uflɛ’m be kan tinnin su ekun.
17 I klikli’n, ‘ɔ fata kɛ e klo Anannganman e Nyanmiɛn’n.’ Kɛ e nanti Ɲanmiɛn i atin mɔ be ti kpa’m be su yɛ e kle kɛ e klo i ɔ. (Mat. 22:37) I nɲɔn su’n, ‘ɔ fata kɛ e fa [Zoova] i nuan ndɛ’n su.’ I ti’n, ɔ fata kɛ e suan Ɲanmiɛn Ndɛ’n naan e nanti i mmla’m be su. (1 Zan 5:3) Kɛ ɔ ko yo naan y’a kwla yo sɔ’n, ɔ fata kɛ e wɔ asɔnun aɲia mɔ be kan Biblu’n nun ndɛ lɔ’n be bo titi. (Ebr. 10:23-25) I nsan su’n, ‘ɔ fata kɛ e fa e wun mantan’ Zoova. Kannzɛ sa nga be o e su’n, be ti sɛ ti sɛ’n, ɔ fata kɛ e lafi Ɲanmiɛn su titi, yɛ e su i Wa’n su titi.—2 Kor. 4:16-18.
18. (a) ?Wafa sɛ yɛ Sasafuɛ Tranwlɛ’n kannin ndɛ nanwlɛ’n i ndɛ afuɛ 1914 nun ɔn? (b) ?Yɛ wafa sɛ yɛ andɛ ndɛ nanwlɛ’n mɔ e si i’n ti’n, e wun yo e ɔ?
18 Nanwlɛ, sɛ e nanti Biblu’n nun nanwlɛ ndɛ’n su’n, e ɲan su mmlusuɛ! Afuɛ nga be flɛ i 1914 nun’n, be usali kosan cinnjin kpa kun Sasafuɛ Tranwlɛ’n i nun. Be usali kɛ: “?B’a raman e su, yɛ e diman aklunjuɛ? ?E Ɲanmiɛn’n, ɔ diman nanwlɛ sakpa? Sɛ sran kun wun aklunjuɛ kpafuɛ’n lika uflɛ’n, maan ɔ ko di. Sɛ amun nun kun w’a wun like kpafuɛ’n, maan ɔ kan kle e. Y’a wunman like fi mɔ i kpa tra like nga e wunnin i Ɲanmiɛn Ndɛ’n nun annzɛ m’ɔ ju Ɲanmiɛn Ndɛ’n nun kaan sa ɔ. [...] Alaje nin aklunjuɛ nga Ɲanmiɛn i silɛ kpa’n ti’n e di i mɛn’n nun ɔ nin e awlɛn’n nun’n, e kwlɛmɛn i kan. Ɲanmiɛn i ngwlɛlɛ’n, ɔ nin i sa nuan su yolɛ’n, ɔ nin i tinmin’n, ɔ nin i sran klolɛ’n be su ndɛ’n ti’n, e wun sa wlɛ yɛ e wla gua ase kpa. E kunndɛman like uflɛ fi. Nga e kunndɛ’n yɛle kɛ é sí Ɲanmiɛn i kpa kɔ́ e ɲrun, e kunndɛman like uflɛ.” (Sasafuɛ Tranwlɛ’n, afuɛ 1914, Desamblu 15, bue 377-378, Angle nun) Ɲanmiɛn Ndɛ’n mɔ e wun i wlɛ’n ɔ nin nanwlɛ’n ti’n, andɛ nin ndɛ e te si ye kunngba’n. Nanwlɛ, andɛ like nga ti yɛ kɛ “e nanti Anannganman i lika m’ɔ kpaja weiin’n nun” e di aklunjuɛ’n, i dan’n tra laa liɛ’n.—Eza. 2:5; Jue. 43:3; Nya. 4:18.
19. ?Ngue ti yɛ be nga b’a yia ninnge’m be nuan mɔ be kwla yo be batɛmu’n, ɔ fataman kɛ be cuɛncuɛn be ja ase ɔ?
19 Sɛ amun waan amún ‘nánti Anannganman i lika m’ɔ kpaja weiin’n nun,’ naan sanngɛ amun nin a faman amun wun nin a manman Ɲanmiɛn yɛ be nin a yoman amun batɛmu’n, nán amun cuɛncuɛn amun ja ase. Biblu’n nun ninnge ng’ɔ fata kɛ amun yia be nuan naan b’a yo amun batɛmu’n, amun yo be. Afin i sɔ ajalɛ’n kunngba yɛ maan amun kwla kle kɛ amun si like nga Ɲanmiɛn nin Klist be yoli mannin e’n, i su ye ɔ. Maan like ng’ɔ ti amun cinnjin kpa’n, yɛ amun fa man Zoova ɔ. Like sɔ’n yɛle amun nguan’n. Amun su Ɲanmiɛn i Wa’n i su be fa kle kɛ amun kunndɛ kɛ amún yó Ɲanmiɛn i klun sa. (2 Kor. 5:14, 15) Nanwlɛ, ɔ lemɛn i sin ndɛ uflɛ fi, i sɔ’n yɛ ɔ ti mɛn dilɛ kpafuɛ’n niɔn!
?Wafa sɛ yɛ amún tɛ́ kosan’m be su ɔ?
• ?E batɛmu yolɛ’n i bo’n yɛle benin?
• ?Mmlusuɛ benin yɛ e ɲɛn i e wun Ɲanmiɛn fa manlɛ’n nin e batɛmu yolɛ’n nun ɔn?
• ?Ngue ti yɛ Zezi i su like suanlɛ’n ti cinnjin ɔn?
• ?Ngue yɛ ɔ uka e naan y’a ka mɛn dilɛ kpafuɛ’n i atin’n su titi ɔ?
[Foto, bue 29]
Amun batɛmu yolɛ’n kle kɛ amun a fa mɛn dilɛ kpafuɛ’n i atin’n.
[Foto mun, bue 31]
?Amun a ‘fia Nyanmiɛn i sin’?