Maan ‘e kan Nyanmiɛn ndɛ’n i yakpa su’
“Nyanmiɛn Wawɛ’n yili i wun nglo be [...] nun, naan b’a kan Nyanmiɛn ndɛ’n yakpa su.”—YOL. 4:31.
1, 2. ?Ngue ti yɛ ɔ fata kɛ e bo manndrɛn naan e si jasin fɛ’n i bo kpa ɔ?
CƐN ba nsan ka naan Zezi w’a wu’n, ɔ seli i sɔnnzɔnfuɛ’m be kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.” Kɛ be cɛnnin Zezi’n, ka naan w’a ɔ ɲanmiɛn su’n, ɔ seli i sɔnnzɔnfuɛ’m be kɛ be ‘kle nvle-nvle’n kwlaa be like maan be kaci i sɔnnzɔnfuɛ. Yɛ like kwlaa nga ɔ kleli be’n, be kusu be kle be maan be fa su.’ Ɔ tali be nda kɛ ɔ nin be o “cɛn kwlaa lele mɛn’n fá wíe.”—Mat. 24:14; 26:1, 2; 28:19, 20.
2 Junman kun mɔ be boli i bo Klistfuɛ klikli’m be blɛ su’n, e Zoova Lalofuɛ mun’n, e di wie juejue su. Junman wie fi i cinnjin traman Ɲanmiɛn Sielɛ’n i jasin fɛ’n i bolɛ’n, ɔ nin sran’m be like klelɛ naan b’a kaci Zezi i sɔnnzɔnfuɛ’n. Afin i sɔ junman’n man nguan. Nanwlɛ, ɔ ti cinnjin kpa kɛ e si jasin fɛ’n i bo kpa! Like suanlɛ nga nun’n, é wá wún wafa nga sɛ Ɲanmiɛn wawɛ’n kle e atin’n, ɔ kwla uka e naan y’a ijɔ yakpa su jasin fɛ’n i bolɛ’n nun’n. Like suanlɛ nɲɔn nga bé bɛ́ i sin lɔ’n, bé wá klé wafa nga Zoova i wawɛ’n kwla uka e naan y’a si sran’m be like kle kpa naan y’a bo jasin fɛ’n i titi’n.
Maan e yo yakpafuɛ
3. ?Ngue ti yɛ ɔ fata kɛ e yo yakpafuɛ naan y’a kwla bo Ɲanmiɛn Sielɛ’n i jasin fɛ’n wie ɔ?
3 Ɲanmiɛn Sielɛ’n i jɔ bolɛ mɔ Ɲanmiɛn waan e bo’n, ɔ ti e cenjele like dan kpa. Sanngɛ ɔ ju wie’n i bolɛ’n ti kekle. Afin sran wie’m be sɔ Ɲanmiɛn Sielɛ’n i jasin fɛ’n nun klanman sanngɛ sran kpanngban be ti kɛ Nowe i blɛ sufuɛ mun sa. Zezi seli kɛ: “B’a bu-man like fi akunndan lele nzue dan’n ɔ wa fa be kwlaa ɔli.” (Mat. 24:38, 39) Asa ekun’n wie’m be o lɛ’n be yo e finfin annzɛ be tanndan e ɲrun. (2 Piɛ. 3:3) Ɔ kwla yo mɛn siefuɛ mun annzɛ e wiengu suklu ba mun annzɛ e wiengu junman difuɛ mun annzɛ kusu e awlobo’n nunfuɛ mun. Ɔ nin i sɔ ngba’n, kɛ sran’m bé fúan e’n, e bɔbɔ e nzuɛn kɛ ɲannzuɛn’n nin srɛ m’ɔ kun e’n, ɔ fata kɛ e jran be ɲrun kekle. Ninnge kpanngban kpa be kwla yo naan y’a kanman Ɲanmiɛn i ndɛ’n i “yasua su.” (Efɛ. 6:19, 20) Sɛ e waan é kán Ɲanmiɛn Ndɛ’n i titi’n, ɔ fata kɛ e yo yakpafuɛ. ?Ngue yɛ ɔ kwla uka e naan y’a yo sɔ ɔ?
4. (a) ?Yakpa yolɛ’n i bo’n yɛle benin? (b) ?Ngue yɛ maan akoto Pɔlu kwla trɛli i awlɛn kannin ndɛ kleli Tɛsaloniki lɔfuɛ mun ɔn?
4 Glɛki nun ndɛ mma nga be kacili i kɛ “yakpa’n” i bo’n yɛle “ndɛ nga be faman wie fiaman’n, mɔ be di i nanwlɛ’n mɔ be tu i ɲin weinwein’n.” Akunndan ng’ɔ o ndɛ mma sɔ’n i sin’n yɛle “juejuefuɛ yolɛ nin be wun su lafilɛ [...] yɛ srɛ m’ɔ kunman be’n.” Sanngɛ nán yakpa yolɛ’n yɛle ndɛ nga be kɛnmɛn i amanniɛn su’n. (Kol. 4:6) Kannzɛ e ti yakpa’n, sanngɛ e kunndɛ kɛ é yó naan e nin sran y’a kanman ndɛ. (Rɔm. 12:18) Asa kusu’n, kɛ é bó Ɲanmiɛn Sielɛ’n i jasin’n fɛ’n, ɔ fata kɛ e ijɔ yakpa su sanngɛ e yo i amanniɛn su. Kɛ ɔ ko yo naan y’a wɔman sran nga e boli jasin fɛ’n e kleli i’n i safle ngbɛn’n ti. Sɛ e waan é yó yakpa kɛ ng’ɔ nin i fata’n sa’n, ɔ fata kɛ e sɔnnzɔn nzuɛn uflɛ wie m’ɔ fata kɛ e mian e ɲin kpa naan y’a yi be nglo’n. Sanngɛ sɛ e waan é yí i sɔ yakpa yolɛ’n i nglo’n e kwlá lafiman e ngunmin e wun su. ?Kɛ ‘be yoli [akoto Pɔlu nin i wiengu’m be] finfin Filip lɔ’n,’ ngue yɛ maan be kwla trali be awlɛn be kannin jasin fɛ’n kleli Tɛsaloniki lɔfuɛ mun ɔn? Pɔlu klɛli i kɛ: “Nyanmiɛn maan e tra e anwlɛn.” (An kanngan 1 Tɛsalonikfuɛ Mun 2:2 nun.) Ɲanmiɛn Zoova kwla yo naan srɛ w’a kunman e kun naan y’a yo yakpafuɛ kɛ be sa wie.
5. ?Wafa sɛ yɛ Zoova wlali Piɛli nin Zan yɛ Zezi i sɔnnzɔnfuɛ onga’m be fanngan ɔn?
5 Kɛ “Zuif’m be su kpɛn mun, nin kpɛnngbɛn mun, nin mmla klefuɛ mun” be wlanwlannin akoto Piɛli nin Zan’n, be tɛli be su kɛ: “?Sɛ Nyanmiɛn wun kɛ e nyin yi amun bɔ e nyin yi-mɛn i’n, ɔ ti kpa? An bu nian, nanwlɛ, e kwlá yaci-man like nga e wunnin i’n nin ndɛ nga e tili’n i kanlɛ.” B’a srɛman Ɲanmiɛn kɛ ɔ yo naan nán be kle be ɲrɛnnɛn kun, sanngɛ be nin be wiengu Klistfuɛ’m be srɛli kɛ: “Nannan Nyanmiɛn, nian e wlanwlanlɛ bɔ be wlanwlan ye-ɔ, i sɔ’n ti siɛn’n, yo maan ɔ sran’m be kan ɔ ndɛ’n yakpa su.” (Yol. 4:5, 19, 20, 29) ?Wafa sɛ yɛ Zoova tɛli be srɛlɛ’n su ɔ? (An kanngan Sa Nga Be Yoli’n 4:31 nun.) Zoova fɛli i wawɛ’n ukali be naan b’a yo yakpa. Ɲanmiɛn wawɛ’n kwla yo i kunngba’n wie man e. ?Sanngɛ wafa sɛ yɛ e kwla ɲan Ɲanmiɛn wawɛ’n naan w’a sie e jasin fɛ’n i bolɛ’n nun ɔn?
Wafa nga e kwla yo yakpafuɛ’n
6, 7. ?Wafa trele kun benin yɛ e kwla ɲan Ɲanmiɛn wawɛ’n niɔn? An fa ndɛ wie mun yiyi nun.
6 Wafa trele kun mɔ e kwla ɲan Ɲanmiɛn wawɛ’n yɛle kɛ e srɛ i naan ɔ fa man e. Zezi seli i ndɛ tiefuɛ’m be kɛ: “Sɛ amun bɔ an ti sran tɛ’n, an fa like kpa cɛ amun mma mun’n, wuun e Si b’ɔ o nyanmiɛn su lɔ’n kusu, ɔ́ fɛ́ i Wawɛ’n mán be nga be srɛ i’n kpɛ blu.” (Lik 11:13) Ɔ fata kɛ e srɛ Ɲanmiɛn titi naan ɔ fɛ i wawɛ’n man e. Sɛ jasin fɛ’n i bolɛ’n i wafa wie yo e ɲannzuɛn’n, e kwla srɛ Zoova kɛ ɔ fɛ i wawɛ’n man e. Ɔ kwla yo akpɔ nuan jasin fɛ’n i bolɛ’n annzɛ jasin fɛ’n i bolɛ nga e ɲɛn i wun atin’n yɛ aata diwlɛ’m be nun jasin fɛ’n bolɛ’n. Yɛ e kwla srɛ i kɛ ɔ uka e naan e yo yakpafuɛ.—1 Tɛs. 5:17.
7 I sɔ yɛ Klistfuɛ bla kun mɔ be flɛ i Roza’n ɔ yoli ɔ.a Le kun mɔ Roza o i junman’n su lɔ’n, suklu klefuɛ kun m’ɔ nin i be di junman’n ɔ su kanngan ba kanngan’m be ɲrɛnnɛn klelɛ’n i su ndɛ wie mɔ be klɛli i suklu uflɛ nun’n i nun. Ndɛ sɔ’n sanngannin suklu klefuɛ sɔ’n i akunndan’n kpa. I ti’n ɔ kpannin kɛ: “?Naan ngue sa yɛ be yo i mɛn’n nun sa ɔ?” Roza w’a yacimɛn i sɔ blɛ liɛ m’ɔ le i bo jasin fɛ’n i nun. ?Wafa sɛ yɛ ɔ ɲannin fanngan naan ɔ nin sran’n b’a bo yalɛ kokolɛ bo ɔ? Roza waan: “N srɛli Zoova kɛ ɔ fɛ i wawɛ’n man min naan ɔ uka min.” Ɔ kwla boli jasin fɛ’n klanman kpa kpɛkun ɔ fali ajalɛ naan b’a kwla koko ndɛ sɔ’n i su yalɛ kpa ekun. Maan e nian ba bla kaan kun m’ɔ le afuɛ nnun’n i ndɛ liɛ’n wie. Be flɛ i Melani. Ɔ tran klɔ nga be flɛ i New York. Melani waan: “Ka naan m’an ɔ suklu’n, min nin min manmin e srɛ Zoova titi.” ?Ngue yɛ be srɛ ɔ? Be srɛ Ɲanmiɛn naan Melani yo yakpafuɛ naan ɔ jran Ɲanmiɛn sin naan ɔ kɛn i ndɛ! Melani i nin waan: “I sɔ’n ukali Melani naan awuliɛ cɛn nin cɛn uflɛ’m be dilɛ’n i su akunndan ng’ɔ bu’n w’a yiyi nun. Yɛ ɔ ukɛli i naan kɛ bé dí cɛn sɔ mun’n w’a fɛmɛn i wun w’a wlaman nun.” ?I sɔ ndɛ’m be kleman kɛ yakpa yolɛ’n nun’n, Ɲanmiɛn srɛlɛ’n kwla uka e?
8. ?Yakpa yolɛ’n su’n, ngue yɛ Zeremi i ndɛ’n kle e ɔ?
8 Maan e bu like ng’ɔ ukali Ɲanmiɛn nuan ijɔfuɛ Zeremi m’ɔ yoli yakpa’n i akunndan wie. Kɛ Zoova sieli i kɛ ɔ ijɔ i nuan kle nvlenvle mun’n, ɔ tɛli i su kɛ: “N ti bakan n si-man ijɔ.” (Zer. 1:4-6) Sanngɛ kɛ lika’n ɔli i ɲrun’n, Zeremi jrannin su boli jasin fɛ’n lele. Ɔ maan sran kpanngban be waan sa tɛ’n i ndɛ ngunmin sa yɛ ɔ kan ɔn. (Zer. 38:4) Ɔ boli jɔlɛ nga Zoova wá dí be’n be jɔ lele afuɛ 65 tra su. Sran’m be sili i Izraɛli lɔ kpa, jasin m’ɔ boli i juejue su’n ti. Ɔ maan kɛ afuɛ 600 sinnin mɔ Zezi ijɔli juejue su wie’n, sran wie’m be buli i kɛ Zeremi yɛ w’a sɛ i sin nguan nun ɔn. (Mat. 16:13, 14) ?Wafa sɛ yɛ Ɲanmiɛn nuan ijɔfuɛ Zeremi mɔ i klikli nun’n ɔ sisi i bo’n, w’a saman ɲan kun ɔn? Ɔ seli kɛ: “[Ɲanmiɛn ndɛ’n] yra min klun lɔ sa fiaan kɛ sin sa. N kplin min nyin kɛ ń yó naan ɔ kan ase.” (Zer. 20:9) Nanwlɛ Zoova i ndɛ’n ɲannin ta Zeremi su yɛ ɔ suli i bo kɛ ɔ ijɔ.
9. ?Ngue ti yɛ Ɲanmiɛn i ndɛ’n kwla kan e kɛ ng’ɔ fa kannin Zeremi’n sa ɔ?
9 Fluwa nga akoto Pɔlu klɛli ko mannin Ebre mun’n i nun’n, i waan: “Nyanmiɛn i ndɛ nga ɔ ko kan’n, wuun w’a kan ɔ kaci-mɛn i, ɔ maan sran’m be kaci. Sɛ é kwlá sé’n, wuun é sé kɛ ɔ la tra tokofi. Ɔ wɔ ɔ wlu lele ɔ ju be wawɛ’n, nin be anwlɛn’n, nin be akpɔlɛ’n, ɔ nin be owie i klun lui’m be nun, ɔ si be klun akunndan’n, ɔ nin be klun sa’n.” (Ebr. 4:12) Ɲanmiɛn i ndɛ’n kwla ɲan ta e su kɛ ng’ɔ fa ɲannin ta Zeremi su’n sa. Nán maan e wla fi su kɛ kannzɛ sran mun yɛ Ɲanmiɛn fali be klɛli Biblu’n, sanngɛ ɔ timan fluwa kun mɔ sran’m be ngwlɛlɛ’n yɛ ɔ o nun ɔn. Afin Ɲanmiɛn yɛ ɔ fa mannin be yɛ be klɛli ɔ. E kɛnngɛn i 2 Piɛr 1:21 nun kɛ: “Nyanmiɛn ndɛ nga sran’m be kannin’n, b’a kpɛ-man wie fi be ti nun yɛ be kannin-ɔn, i Wawɛ’n yɛ ɔ fa wla be nuan yɛ be kannin-ɔn.” Kɛ e fa blɛ mɔ e suan Biblu’n nun like ngwlɛlɛ su’n, ndɛ m’ɔ fin Ɲanmiɛn wawɛ’n ɔ sie e akunndan’n. (An kanngan 1 Korɛntfuɛ Mun 2:10 nun.) I sɔ ndɛ liɛ’n kwla “ra e klun lɔ sa fiaan kɛ sin sa.” Ɔ maan e kwlá muanman e nuan.
10, 11. (a) ?Sɛ e kunndɛ kɛ é íjɔ yakpa su’n, wafa sɛ yɛ ɔ fata kɛ e suan Biblu’n nun like ɔ? (b) Ajalɛ nga an fali naan amun like suanlɛ wafa’n w’a yo kpa’n, an kan wie’m be ndɛ.
10 Kɛ ɔ ko yo naan e Biblu’n nun like suanlɛ’n w’a kan e kpa’n, ɔ fata kɛ e like suanlɛ wafa’n yo naan Biblu’n nun ndɛ’n kan e awlɛn’n. Yɛ ɔ ɲan ta e klun akunndan’n su. Ɲanmiɛn nuan ijɔfuɛ Ezekiɛli i ndɛ’n yi i sɔ liɛ’n i nglo. Aolia nun like kun mɔ Ɲanmiɛn maan ɔ wunnin i’n nun’n, be seli i kɛ ɔ di fluwa ɲɔnɲɔnwa kun mɔ ɲrɛnnɛn ndɛ kun wo nun’n. Ɔ fata kɛ ɔ kan ndɛ sɔ’n kle ɲin keklefuɛ mun. Ɔ fata kɛ Ezekiɛli di fluwa sɔ’n i wunmuan’n naan i nun ndɛ’n wluwlu i wun. Sɛ ɔ yo sɔ’n, ndɛ sɔ’n i kanlɛ’n ɔ́ yó i fɛ kɛ awɛma nzue sa.—An kanngan Ezekiɛl 2:8–3:4, 7-9 nun.
11 E ti kɛ Ezekiɛli sa wie. Andɛ’n, sran kpanngban be kunndɛman kɛ bé tí ndɛ nga Biblu’n kan’n bɔɔ kaan sa. Sɛ e waan é kán Ɲanmiɛn i ndɛ’n titi’n, ɔ ti cinnjin kɛ e suan Ɲanmiɛn Ndɛ’n nun like. Yɛ maan wafa nga e suan’n, ɔ yo naan e wun i nun ndɛ’n i wlɛ yɛ e fa su. Maan e suan nun like titi, nán e kpɛ nun cɛn. Ɔ fata kɛ e kunndɛ like kunngba nga jue tofuɛ’n kunndɛli’n wie. I waan: “Anannganman, wɔ bɔ a ti kɛ yɔbuɛ sa bɔ n talo wɔ’n, wɔ bɔ a ti min defuɛ’n, ndɛ ng’ɔ fin min nuan fite’n, ɔ nin akunndan nga m bu be min klun lɔ’n, maan be jɔ ɔ klun.” (Jue. 19:15) Nanwlɛ ɔ ti cinnjin kpa kɛ e fa blɛ e bu like nga e kanngan’n i su akunndan, naan Biblu’n nun ndɛ nanwlɛ’n w’a wluwlu e wun lele w’a ju e awlɛn’n nun! Ɔ fata kɛ e mian e ɲin naan e like suanlɛ wafa’n yo kpa sakpa.b
12. ?Ngue ti yɛ asɔnun aɲia’m be uka e naan Ɲanmiɛn wawɛ’n w’a sie e ɔ?
12 Wafa uflɛ nga e kwla ɲan Zoova i wawɛ’n i su ye’n, yɛle kɛ “maan e bu e wiengu’m be akunndan e wla be fanngan naan be klo be wun yɛ be yo sran ye. Nán maan e yaci yialɛ’n kɛ sran wie’m be yo’n sa.” (Ebr. 10:24, 25) Klistfuɛ aɲia’m be bo kɔlɛ titi’n yɛ ndɛ tielɛ kpa’n ɔ nin like nga e suan’n i su nantilɛ’n, be kwla uka e kpa naan Ɲanmiɛn wawɛ’n w’a sie e. Afin i kwlaa yoli o, Zoova i wawɛ’n yɛ ɔ kle e ajalɛ asɔnun’n nun ɔn.—An kanngan Sa Nglo Yilɛ 3:6 nun.
Yakpa yolɛ’n i su mmlusuɛ’n
13. ?Ngue yɛ junman nga Klistfuɛ klikli’m be dili i jasin fɛ’n i bolɛ’n nun’n ɔ kle e ɔ?
13 Ɲanmiɛn wawɛ’n i ta’n leman wunsu. Ɔ kwla man klɔ sran’m be wunmiɛn naan b’a yo Zoova i klun sa’n. Ɔ yoli maan Klistfuɛ klikli’m be dili junman dan kpa jasin fɛ’n i bolɛ’n nun. Be boli jasin fɛ’n kleli “asiɛ’n sufuɛ’m be kwlaa.” (Kol. 1:23) Kusu be nun sunman lika “b’a di-man suklu, yɛ be ti-man sran dan.” Kɛ e bu i sɔ liɛ’n i akunndan’n, e wun i wlɛ weiin kɛ like kun m’ɔ le ta kpa’n yɛ ɔ wlali be fanngan ɔn.—Yol. 4:13.
14. ?Ngue yɛ ɔ kwla uka e naan ‘Ɲanmiɛn wawɛ’n [w’a yo naan] y’a yo sran wakawakafuɛ’ ɔ?
14 Kɛ e fa atin nga Ɲanmiɛn wawɛ’n kle e’n su’n, i sɔ’n wla e fanngan naan y’a di e junman’n juejue su. Kɛ e srɛ Ɲanmiɛn titi kɛ ɔ fɛ i wawɛ’n man e mɔ e suan Biblu’n nun like kpɛkun e bu like nga e suan’n i su akunndan srɛlɛ’n nun yɛ e kɔ Klistfuɛ aɲia’m be bo titi’n, e ɲan su ye. Ye kwlaa nga e ɲɛn i sɔ’n, ɔ uka e naan y’a “yo sran waka-wakafuɛ.” (Rɔm. 12:11) Biblu’n kan “Zuif bian kun b’ɔ fin Alɛksandri klɔ’n su’n, bɔ be flɛ i kɛ Apolɔs’n,” i ndɛ kɛ: ‘[“Ɲanmiɛn wawɛ’n maan,” NW] ɔ ti waka-waka, ɔ kan Zezi ndɛ’n yɛ ɔ kle sran’m be like weiin.’ (Yol. 18:24, 25) Sɛ Ɲanmiɛn wawɛ’n maan ‘e yo sran waka-wakafuɛ’n,’ awloawlo’m be nun jasin fɛ’n i bolɛ’n nun’n, ɔ nin kɛ é bó jasin nga asɔnun’n w’a siesieman’n, e kwla yo yakpa e tra laa’n.—Rɔm. 12:11.
15. ?Wafa sɛ yɛ ijɔlɛ yakpa su’n yo e ye ɔ?
15 Yakpa yolɛ jasin fɛ’n i bolɛ’n nun’n, ɔ yo e ye. E aeliɛ’n yo kpa afin e wun junman nga e di’n i cinnjin m’ɔ ti’n ɔ nin i su mmlusuɛ’n i wlɛ. Kɛ e tu e klun e bo jasin fɛ’n m’ɔ ba nvlɛ’n, e klun jɔ kpa ekun. Kpɛkun e bo jasin fɛ’n i juejue su afin e wun i wlɛ kpa kɛ ɔ fata kɛ e di junman sɔ’n i ndɛndɛ.
16. ?Sɛ y’a kpɔnzɔ jasin fɛ’n i bolɛ’n junman’n nun’n, ngue yɛ ɔ fata kɛ e yo ɔ?
16 ?Yɛ sɛ y’a kpɔnzɔ jasin fɛ’n i bolɛ’n nun’n annzɛ sɛ e boman jasin fɛ’n i juejue su kɛ laa’n sa nin? Sɛ ɔ ti sɔ’n, ɔ fata kɛ e bu e bɔbɔ e wun akunndan nanwlɛ su. Pɔlu klɛli i kɛ: “Amun bɔbɔ an bu amun klun lɔ nian sɛ an lafi Krist su sakpa o.” (2 Kor. 13:5) Maan e usa e wun kɛ: ‘?Ɲanmiɛn wawɛ’n maan n te yo sran wakawakafuɛ? ?N srɛ Zoova kɛ ɔ fɛ i wawɛ’n man min? ?Ɲanmiɛn nga n srɛ’n, ɔ kle kɛ n lafi i su naan m’an kwla yo i klun sa’n? ?Min srɛlɛ’n nun’n, ndɛ nga n kan’n, ɔ kle kɛ n si junman nga be fa wlali e sa nun’n i su ye? ?Wafa sɛ yɛ n suan Biblu’n nun like titi ɔ? ?Blɛ nga n fa bu ndɛ nga n kanngan’n i su akunndan’n ɔ ti kaan annzɛ ɔ sɔnnin? ?Wafa sɛ yɛ n fa min wun n wlɛ i asɔnun aɲia’m be nun ɔn?’ Kosan kɛ ngalɛ sa’m be su akunndan bulɛ’n kwla uka e naan y’a wun like ng’ɔ fata kɛ i nun’n e yo kpa e tra laa’n, naan y’a yo sɔ.
Maan Ɲanmiɛn wawɛ’n wla e yakpa
17, 18. (a) ?Wafa sɛ yɛ be di jasin fɛ’n i bolɛ junman’n andɛ ɔ? (b) ?Kɛ é bó Ɲanmiɛn Sielɛ’n i jasin fɛ’n, wafa sɛ yɛ e kwla kan “ndɛ’n yakpa su” ɔ?
17 Kɛ be cɛnnin Zezi’n, ɔ seli i sɔnnzɔnfuɛ’m be kɛ: “Kɛ Nyanmiɛn Wawɛ’n ko ba amun wun’n, ɔ́ tín amun, án wá kán min ndɛ Zerizalɛm wa, nin Zide mɛn wunmuan’n nun, ɔ nin Samari lɔ lele fá jú asiɛ’n i awieliɛ.” (Yol. 1:8) Junman sɔ mɔ be boli i bo blɛ sɔ’n nun’n, andɛ’n be su di i kpa liɛ su. Afuɛ nuan kwlaa’n, Zoova i Lalofuɛ ko ju miliɔn nso be fa dɔ miliar 1 nin sin be fa kan Ɲanmiɛn Sielɛ’n i ndɛ nvlenvle 230 tra su nun. Junman sɔ mɔ be su ɲɛnmɛn i wunsu kun’n, kɛ e di wie’n, nanwlɛ ɔ yo e fɛ dan!
18 Kɛ Klistfuɛ klikli’m be blɛ su’n sa’n, Ɲanmiɛn wawɛ’n nian jasin fɛ’n i bolɛ junman nga be di i mɛn’n wunmuan’n nun’n i su. Sɛ e fa atin nga Ɲanmiɛn wawɛ’n kle e’n su’n, é kwlá kán “ndɛ’n yakpa su” e jasin fɛ’n i bolɛ’n nun. (Yol. 28:31) I sɔ’n ti’n, kannzɛ ɔ́ yó sɛ ɔ́ yó sɛ’n, kɛ é bó Ɲanmiɛn Sielɛ’n i jasin fɛ’n maan Ɲanmiɛn wawɛ’n sie e!
[Ja ngua lɛ ndɛ mun]
a Be kacili be dunman mun.
b Sɛ amun waan amún ɲán amun Biblu’n nun kannganlɛ’n i su ye’n, amun nian fluwa Tirez profit de l’École du ministère théocratique i ndɛ kpɔlɛ nga be flɛ i “ Appliquez-vous à la lecture ” ɔ nin “ Les bienfaits de l’étude ”, m’ɔ o i bue 21-32 nun.
?Ngue yɛ amun suannin ɔn?
• ?Ngue ti yɛ kɛ é kán Ɲanmiɛn i ndɛ’n ɔ fata kɛ e yo yakpafuɛ ɔ?
• ?Ngue yɛ ɔ ukali Zezi i sɔnnzɔnfuɛ klikli mun naan b’a ijɔ yakpa su ɔ?
• ?Wafa sɛ yɛ e kwla yo yakpafuɛ ɔ?
• ?Wafa sɛ yɛ yakpa yolɛ’n yo e ye ɔ?
[Foto, bue 16]
?Wafa sɛ yɛ siɛ nin niɛn’m be kwla uka be mma mun naan b’a yo yakpafuɛ ɔ?
[Foto mun, bue 17]
Ɲanmiɛn srɛlɛ kpe kan’n kwla uka e naan y’a yo yakpa jasin fɛ’n i bolɛ’n nun.