Like nga Zezi kleli i Ɲanmiɛn su’n

“Sran fi si-man Nyanmiɛn Wa’n i Si’n, saan Ba’n bɔbɔ ɔ nin sran ng’ɔ klo kɛ ɔ́ fɛ́ i Si klé i’n.”—LIK 10:22.

KWLAA naan Ɲanmiɛn i Wa kpɛnngbɛn’n w’a ba asiɛ’n su wa’n, ɔ nin i Si be trannin cɛli kpa. (Kolɔsfuɛ Mun 1:15) Ɔ maan Ɲanmiɛn i Wa’n ɔ sili i Si’n i akunndan’n ɔ nin wafa nga i wun fa yo i’n. Yɛ ɔ sili i atin mun. I sin Ɲanmiɛn i Wa’n bali asiɛ’n su wa. Be flɛli i Zezi. Kɛ ɔ bali sɔ’n , i wun blibli i kɛ ɔ kan i Si i su nanwlɛ’n kle sran mun. Sɛ e fa e su e sie i ndɛ nga Ɲanmiɛn i Wa’n kan’n i bo’n, e kwla si Ɲanmiɛn i su like kpa.

Ɲanmiɛn i dunman’n Ɲanmiɛn i dunman Zoova’n yoli cinnjin kpa mannin Zezi. Ɲanmiɛn i Wa sɔ m’ɔ klo i’n, ɔ kunndɛli kɛ sran’m be si i Si i dunman’n naan be bo dunman sɔ’n. Zezi bɔbɔ i dunman’n i bo’n yɛle kɛ “Zoova ti Defuɛ.” Kɔnguɛ kasiɛn ka naan Zezi w’a wu’n, ɔ kwla srɛli Zoova kɛ: “N yoli maan be sili wɔ [“n fali ɔ dunman’n n kleli be,” NW].” (Zan 17:26) Sɛ Zezi boli Ɲanmiɛn i dunman naan ɔ yoli naan sran’m be si dunman sɔ’n, ɔ boman e nuan. ?Kɛ e niɛn i sa’n, sɛ Zezi i ndɛ tiefuɛ’m be siman Zoova i dunman yɛ be siman dunman sɔ’n i bo’n, ɔ́ yó sɛ naan b’a kwla wun i su nanwlɛ ndɛ’n i wlɛ?a

Ɲanmiɛn i sran klolɛ dan’n Cɛn kun’n, Zezi srɛli Ɲanmiɛn kɛ: “Min Si [...] i sin naan w’a yi mɛn’n yɛ a sɔtɔ n klolɛ-ɔ.” (Zan 17:24) Kɛ Zezi o ɲanmiɛn su lɔ’n, Ɲanmiɛn kloli i kpa. Ɔ maan kɛ ɔ bali asiɛ’n su wa’n, ɔ kunndɛli kɛ ɔ́ yí klolɛ klanman sɔ’n i ngbɛsungbɛsu’n kwlaa i nglo.

Zezi kleli kɛ Zoova klo sran kpanngban. Zezi seli kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.” (Zan 3:16) Glɛki nun ndɛ mma nga be kacili i kɛ “mɛn’n,” nɛ́n i yɛle “asiɛ’n.” Mɛn nga be kɛn i ndɛ wa’n yɛle klɔ sran’m be kwlaa. Klɔ sran mɔ Ɲanmiɛn kloli be dan’n ti’n, ɔ fɛli i Wa ng’ɔ klo i kpafuɛ’n mannin. Ɔ yoli sɔ naan sran kpa’m b’a fin sa tɛ’n nin wie’n be sa nun b’a fite naan b’a kwla ɲan anannganman nguan. Klolɛ dan kɛ ngalɛ’n sa’n, e kwlá wunmɛn i bo kpa sa.—Rɔmfuɛ Mun 8:38, 39.

Zezi kannin nanwlɛ ndɛ kun m’ɔ cici sran wla kpa ɔ. Yɛle kɛ Zoova klo i sufuɛ’m be tinuntinun. Zezi seli kɛ Zoova ti kɛ bua tafuɛ kun mɔ i bua’m be tinuntinun be ti i cinnjin kpa’n sa. (Matie 18:12-14) Zezi seli kɛ sɛ Zoova w’a kplinman su’n, ndrofia ba kun sa tɔman asiɛ wun. Zezi kan guali su kɛ: “Amun ti ndrɛ’n bɔbɔ, ɔ si i nuan.” (Matie 10:29-31) ?Sɛ Zoova kwla wun kɛ ndrofia’m be sua kun nun’n ndrofia kun nunman lɛ’n, yɛ i sufuɛ’m be li? ?Ɔ su fɛmɛn i ɲin sieman be su yɛ ɔ su nianman be tinuntinun be lika? Zoova si e ti ndrɛ’n kwlaa nuan. ?Sɛ ɔ ti sɔ’n, e mɛn dilɛ nun’n, maan ɔ yo ninnge nga be mian e sa’n nin o, annzɛ kekle ng’ɔ o e su’n nin o, annzɛ kusu ninnge nga be kun e srɛ’n nin o, like kun sa o lɛ mɔ Zoova kwlá simɛn i ɔ?

Siɛ m’ɔ o ɲanmiɛn su’n Kɛ nga e fa wunnin i ndɛ ng’ɔ sinnin lɛ nun’n sa’n, Zezi ti Ɲanmiɛn i Wa kunngba cɛ’n. I sɔ’n ti’n, Ɲanmiɛn i Wa sɔ m’ɔ klo i’n, kpɛ sunman kɛ ɔ́ kán Zoova ndɛ annzɛ kɛ ɔ́ flɛ́ i’n, ɔ flɛ i kɛ min “Si.” I kpa’n, kɛ Zezi bó ndɛ ng’ɔ kannin be mɔ be klɛli’n be kanlɛ bo’n, nn ɔ le afuɛ 12. Ndɛ sɔ’m be nun’n, ɔ flɛli Zoova kɛ “min Si.” (Lik 2:49) Jasin fɛ nga Zezi boli’n i su fluwa nga be klɛli’n be nun’n, ndɛ mma “Si’n” ɔ o nun kpɛ 190. Zezi flɛli Zoova kɛ “amun Si” annzɛ “E Si” annzɛ kusu “min Si.” (Matie 5:16; 6:9; 7:21) Kɛ mɔ Zezi i klunklo su ɔ flɛli i Si sɔ’n, ɔ kleli kɛ klɔ sran mɔ fɔ o be nun mɔ be ti sa tɛ yofuɛ’n be nin Zoova be kwla tran klanman.

Ɔ si aunnvuɛ yɛ ɔ yaci sa cɛ Zezi si kɛ ɔ fata kɛ Zoova yaci klɔ sran mɔ fɔ o be nun’n, be sa tɛ mun cɛ be. Ba wanzofuɛ’n i su ɲanndra nga Zezi buli’n nun’n, i waan Zoova ti kɛ siɛ kun m’ɔ si aunnvuɛ yɛ ɔ yaci i wa mɔ i aeliɛ’n yo i nsisɔ’n i sa tɛ’n cɛ i’n sa. Ɔ sɔ ba sɔ’n nun klanman ekun. (Lik 15:11-32) Zezi i ndɛ’n kle kɛ, kɛ sran kun yo sa tɛ’n, Zoova nian naan sɛ sran sɔ’n káci i nzuɛn’n naan w’a yaci i sa tɛ’n w’a cɛ i o. Sa tɛ yofuɛ kun mɔ i sa tɛ’n yo i nsisɔ’n, Zoova i wun blibli i kɛ ɔ yaci cɛ i. Zezi yiyili nun kɛ: “Ń sé amun kɛ, sɛ sa tɛ yofuɛ kun kusu kaci i nzuɛn’n, be klun ng’ɔ jɔ nyanmiɛn su lɔ sa tɛ yofuɛ sɔ’n ti’n, i dan tra be klun ng’ɔ jɔ sran nanwlɛfuɛ ablangwlan-nin-ngwlan bɔ be klo-man kɛ be kaci be nzuɛn’n be ti’n.” (Lik 15:7) ?Wan yɛ ɔ kunndɛman kɛ ɔ́ fɛ́ i wun mántan Ɲanmiɛn kun m’ɔ si aunnvuɛ kɛ ngalɛ sa’n niɔn?

Be srɛ i ɔ, ɔ ti Ka naan Zezi w’a ba asiɛ’n su wa’n, ɔ wunnin kɛ Zoova liɛ’n ‘be srɛ i ɔ, ɔ ti.’ Kpɛkun ɔ wunnin kɛ srɛlɛ nga Ɲanmiɛn sufuɛ kpa’m be srɛ i’n ɔ yo i fɛ. (Jue Mun 65:3) I sɔ’n ti’n, kɛ Zezi dí i junman’n asiɛ’n su wa’n, wafa ng’ɔ fata kɛ i ndɛ tiefuɛ’m be srɛ Ɲanmiɛn’n, ɔ nin like ng’ɔ fata kɛ be srɛ i’n, ɔ kleli be. Ɔ mannin be afɔtuɛ kɛ: “Nán an kan ndɛ kunngba’n flan nun.” Ɔ wlɛli i ndɛ tiefuɛ’m be su nun kɛ be srɛ Ɲanmiɛn naan ‘be bɔ be wo asiɛ’n su wa’n be yo i klun sa kɛ be bɔ be o nyanmiɛn su lɔ’n be yo’n sa.’ E kwla srɛ i naan ɔ man e nuan su aliɛ, naan ɔ yaci e sa tɛ mun cɛ e. Yɛ ɔ uka e naan e jran sa tɛ’n i ɲrun kekle. (Matie 6:5-13) Zezi kleli sran’m be kɛ Zoova tɛ i sufuɛ’m be srɛlɛ’n su kɛ siɛ kun fa tɛ i mma’m be srɛlɛ’n su sa. Ɔ tɛ srɛlɛ nga bé srɛ́ i ɔ be lafi su’n i su.—Matie 7:7-11.

Nanwlɛ Zezi kunndɛli Zoova i su nanwlɛ’n, ɔ nin wafa nga Ɲanmiɛn ti’n, be su like klelɛ’n, i wun atin. Sanngɛ like kun ekun o lɛ mɔ Zezi wun bliblili i kɛ ɔ kle sran mun ɔn. Like sɔ’n yɛle like nga Zoova wá fá káci ninnge mun asiɛ wunmuan’n su naan like ng’ɔ buli i akunndan asiɛ’n nin klɔ sran’m be lika’n w’a kpɛn su’n. I kpa’n, Zezi i ndɛ sɔ’n su yɛ ɔ jrannin boli jasin fɛ’n niɔn.

[Ja ngua lɛ ndɛ’n]