?Bla mun, ngue ti yɛ ɔ fata kɛ amun lo amun wun ɔn?
“Yasua [...] yɛ ɔ sie bla-a.”—1 KOR. 11:3.
1, 2. (a) Sran ng’ɔ fata kɛ ɔ sie sran’n, ɔ nin sran ng’ɔ fata kɛ ɔ lo i wun man sran naan ɔ sie i’n, Zoova mɛnnin i su mmla. ?Ngue ndɛ yɛ akoto Pɔlu klɛli i sɔ’n su ɔ? (b) ?Kosan benin yɛ é wá yíyí be nun like suanlɛ nga nun ɔn?
ZOOVA siesieli ninnge mun sɛsɛsɛ. Akoto Pɔlu boli i sɔ’n su ndɛ yɛ’n nun. Ɔ klɛli i kɛ: “Krist yɛ ɔ sie yasua-a [...] yɛ Nyanmiɛn kusu sie Krist.” (1 Kor. 11:3) Like suanlɛ ng’ɔ sinnin lɛ’n, ɔ kleli kɛ Zezi liɛ’n kɛ ɔ lo i wun man Ɲanmiɛn Zoova m’ɔ sie i’n, ɔ ti i cenjele like. Yɛ ɔ di su aklunjuɛ. Ɔ kleli ekun kɛ Klist yɛ ɔ sie Klistfuɛ yasua mun ɔn. Klist yoli sran’m be ye, ɔ sili be aunnvuɛ kpɛkun w’a bumɛn i bɔbɔ i wun akunndan. Ɔ fata kɛ yasua nga be o asɔnun’n nun’n, be yo sɔ be wiengu’m be lika wie. I li be yi mun yɛ ɔ fata kɛ be yo sɔ be lika kpa ɔ.
2 ?Yɛ bla’m be li? ?Wan yɛ ɔ sie be ɔ? Pɔlu klɛli i kɛ: “Yasua [...] yɛ ɔ sie bla-a.” ?Wafa sɛ yɛ ɔ fata kɛ bla’m be bu ndɛ sɔ m’ɔ fin Ɲanmiɛn’n niɔn? ?Sɛ be wun timan Zoova i sufuɛ’n be kwla fa ndɛ sɔ’n su? ?Kɛ be se kɛ be lo be wun be man be wun naan ɔ sie be’n, i bo’n yɛle kɛ be leman ndɛ fi be kanman? ?Ngue yɛ bla kun kwla yo naan b’a yi i ayɛ ɔ?
“Ń wá yó i ukafuɛ”
3, 4. ?Ngue ti yɛ sran ng’ɔ sie i wiengu aja nun i su mmla nga Ɲanmiɛn kpɛli’n, ɔ ti kpa ɔ?
3 Ɲanmiɛn yɛ ɔ siesieli sran ng’ɔ́ síe i wiengu’n niɔn. Kɛ Ɲanmiɛn Zoova boli Adam’n, ɔ seli kɛ: “Ɔ ti-man kpa kɛ sran [yasua] ngunmin tran. Ń wá yó i ukafuɛ kun b’ɔ nin i bé kwlá trán.” I sin, kɛ Ɲanmiɛn boli Ɛvu’n mɔ Adam ɲɛnnin i wiengu m’ɔ ti i ukafuɛ’n, ɔ yoli Adam i fɛ dan. Ɔ maan ɔ seli kɛ: “Ɛn-ɛɛn! Nga li ti kɛ m bɔbɔ min sa. Min nin i e wunnɛn’n ti kun.” (Bob. 2:18-24) Adam nin Ɛvu bé wá ɲán muae. Yɛle kɛ bé wá wú ba mɔ fɔ su tranman be nun’n. Yɛ ba sɔ’m bé trán asiɛ mɔ i wunmuan’n káci mɛn klanman’n su.
4 Ɲin kekle nga e si nin e nin klikli’m be yoli’n ti’n, alaje nga be di i Edɛni fie’n nun lɔ’n, ɔ fili be sa. (An kanngan Rɔmfuɛ Mun 5:12 nun.) Sanngɛ Ɲanmiɛn ɲrun’n yasua’n yɛ ɔ te sie bla’n niɔn. Kɛ yasua’n sie i yi’n i kpa mɔ bla’n lo i wun mɛn i wun kɛ ɔ sie i’n, be ɲan su ye kpa. Yɛ be di aklunjuɛ be aja’n nun. Kɛ Zezi loli i wun mannin Zoova m’ɔ ti i siefuɛ’n aklunjuɛ ng’ɔ dili’n, i kunngba’n yɛ be di ɔ. I nun m’ɔ te o ɲanmiɛn su lɔ’n, m’ɔ o Zoova ɲrun lɛ’n, ‘ngowa’n yɛ ɔ kɛn i sa mlɔnmlɔn-ɔn [“i klun jɔ,” NW].’ (Nya. 8:30) Fɔ m’ɔ o klɔ sran’m be nun’n ti’n, yasua’m be kwlá sieman bla’m be kpa sa kun. Yɛ bla’m be kusu be kwlá loman be wun kpa sa kɛ be sie be. Sanngɛ kɛ yasua nin bla’m be mian be ɲin mɔ be nian ninnge siesielɛ sɔ’n su mɔ be yo nga be kwlɛ i yo’n, i bo’n gua klanman. Yɛle kɛ dɔ nga su’n, be di aklunjuɛ.
5. ?Ngue ti yɛ ɔ fata kɛ afɔtuɛ ng’ɔ o Rɔmfuɛ Mun 12:10 nun’n, ɔ yo be nga b’a ja be wun’n be cinnjin ɔn?
5 Like cinnjin kpa kun m’ɔ maan aja’n kwla yo kpa’n, yɛle Ɲanmiɛn Ndɛ’n nun afɔtuɛ yɛ m’ɔ ti Klistfuɛ’m be kwlaa be liɛ’n, i su falɛ. Afɔtuɛ sɔ’n yɛ: ‘An klo amun wun kpa kɛ sran nin i niaan sa, an [dun mmua] bu amun wiengu sran.’ (Rɔm. 12:10) Asa ekun’n, ɔ fata kɛ yasua’n nin i yi’n be mian be ɲin naan ‘be yo be wun ye, be si be wun aunnvuɛ, sa nga be wiengu yo be’n, be yaci cɛ i.’—Efɛ. 4:32.
Kɛ yasua’n annzɛ bla’n suman Zoova’n
6, 7. ?Sɛ Klistfuɛ bla kun lo i wun mɛn i wun m’ɔ timan Zoova i sufuɛ’n, i bo’n kwla gua sɛ?
6 ?Yɛ sɛ amun wun annzɛ amun yi timan Zoova i sufuɛ’n nin? Kpɛ sunman’n, yasua’n yɛ ɔ timan Zoova i sufuɛ ɔ. ?Sɛ ɔ ti sɔ’n, wafa sɛ yɛ ɔ fata kɛ bla’n nin i be tran ɔn? Biblu’n tɛ su kɛ: “Mmo mun, [...] an bu amun wun’m be sran, nán an fa amun nyin wlawla be. I liɛ’n sɛ be nun wie’m be fa-man Nyanmiɛn ndɛ’n su’n, kɛ be wun amun nzuɛn kpa’n nin sran bɔ an bu be’n, an su kan-man ndɛ fi naan b’a yaci.”—1 Piɛ. 3:1, 2.
7 Ɲanmiɛn Ndɛ’n se bla’n kɛ ɔ lo i wun mɛn i wun m’ɔ timan Zoova i sufuɛ’n. I aeliɛ kpa’n kwla yo maan i wun bu like nga ti yɛ ɔ yo sɔ’n i akunndan. I agualiɛ su’n, i wun’n kwla fɛ i ɲin sie i like nga i yi m’ɔ ti Klistfuɛ’n ɔ lafi su’n i su. Yɛ i bɔbɔ kwla sɔ ndɛ nanwlɛ’n nun wie.
8, 9. ?Sɛ Klistfuɛ bla kun i aeliɛ’n ti kpa sanngɛ i wun’n m’ɔ timan Zoova i sufuɛ’n ɔ sɔman ndɛ nanwlɛ’n nun’n, ngue yɛ ɔ kwla yo ɔ?
8 ?Yɛ sɛ bla’n lo i wun mɛn i wun sanngɛ bian’n sɔman ndɛ nanwlɛ’n nun nin? Ɲanmiɛn Ndɛ’n wla bla m’ɔ ti Zoova i sufuɛ’n i fanngan kɛ kannzɛ ɔ ti kekle mɛn i’n, sanngɛ ɔ yi Klistfuɛ nzuɛn’n i nglo blɛ kwlaa nun. I wie yɛle ndɛ ng’ɔ o 1 Korɛntfuɛ Mun 13:4 nun’n. Ɔ se kɛ: “Sran b’ɔ klo sran’n, ɔ trɛ i anwlɛn sran wun.” Ɔ maan ɔ ti kpa kɛ titi’n, nán maan Klistfuɛ bla’n ɔ ‘tu i wun mlɔnmlɔn, ɔ yo wɛtɛɛfuɛ, ɔ blu sa’m be su,’ naan i wiengu m’ɔ klo i’n ti’n, w’a jran sa ng’ɔ o i su’n i ɲrun kekle. (Efɛ. 4:2) Kannzɛ lika’n ti kekle sɛ’n, sanngɛ Ɲanmiɛn wawɛ’n i fanngan nun’n, e kwla yi Klistfuɛ nzuɛn’n i nglo titi.
9 Pɔlu klɛli i kɛ: “E kwlá yo-man like fi, sanngɛ Nyanmiɛn b’ɔ kwla like kwlaa yo’n yɛ ɔ yo sa-a.” (2 Kor. 4:7) Ɲanmiɛn wawɛ’n kwla uka Klistfuɛ nga i ngunmin su Zoova’n naan aja’n nun’n w’a kwla yo like nga i bɔbɔ i wunmiɛn’n juman nun’n. I wie yɛle kɛ yasua’n annzɛ bla’n kwla yo i wiengu’n i kpokokpoko. Ɔ maan ɔ kwla yo i wiengu kun’n i kɛ ɔ yi mɛn i. Sanngɛ Biblu’n se Klistfuɛ’m be kwlaa be kɛ: “Sɛ sran yo amun tɛ’n, nán an yo i wie. [...] Afin be klɛli i kɛ: ‘E Min’n se kɛ: “Min yɛ n tu klunngbɔ nin-ɔn, min yɛ ń túa be kalɛ-ɔ.”’” (Rɔm. 12:17-19) I kunngba’n 1 Tɛsalonikfuɛ Mun 5:15 man e afɔtuɛ kɛ: “An nian amun wun kpa, sɛ sran yo amun tɛ’n, nán an yo i wie, sanngɛ maan kpa nga an fa yo amun wiengu’n nin sran’m be kwlaa’n ɔ kaci amun nzuɛn.” Sɛ Zoova i wawɛ’n suan e bo’n, e kwla yo like nga e wunmiɛn’n juman nun’n bɔbɔ. Ɔ maan nanwlɛ, ɔ ti kpa kɛ e srɛ Ɲanmiɛn naan ɔ fɛ i wawɛ’n man e naan y’a ɲan like ng’ɔ nin e fata’n!
10. ?Kɛ be kannin Zezi i ndɛ tɛtɛ annzɛ be yoli i tɛtɛ’n, ngue yɛ ɔ yoli ɔ?
10 Wafa nga Zezi nin be nga be yoli i tɛtɛ annzɛ be kannin ndɛ tɛtɛ be kleli i’n be trannin’n, ɔ kle e ajalɛ kpa. Be klɛli i 1 Piɛr 2:23 nun kɛ: “Bɛ kpɛli i nzowa, w’a yi-man a man-man be, be kleli i nyrɛnnɛn, w’a fua-man be ti, sanngɛ ɔ fɛ i ndɛ liɛ’n wlali Nyanmiɛn b’ɔ di ndɛ nanwlɛ’n i sa nun.” Ɔ fata kɛ e kwlakwla e niɛn i ajalɛ klanman’n su. Nán e wiengu’m be aeliɛ tɛtɛ’n ɔ yo e ya. Be wla Klistfuɛ’m be kwlaa be su nun kɛ: “An si i [amun wiengu] aunnvuɛ, yɛ an yo amun wun aenvuɛ. Sɛ sran yo amun tɛ’n, nán an yo i wie, sɛ be kpɛ amun nzowa’n, nán an yi man be.”—1 Piɛ. 3:8, 9.
?Be o be liɛ lɛ sa ngbɛn, be leman ndɛ fi kanman?
11. ?Cenjele like dan benin yɛ Klistfuɛ bla wie’m bé wá ɲɛ́n i ɔ?
11 ?Kɛ bla’m be lo be wun be man be wun mun’n, ɔ kle kɛ be o be liɛ lɛ sa ngbɛn naan be leman ndɛ fi kanman? Nɛ́n i sɔ mlɔnmlɔn ɔn. I bla mun o, i yasua mun o, Zoova man be kwlaa be kɔmin su. Kɛ Klist wá síe asiɛ’n, sran 144.000 bé dí famiɛn yɛ bé káci Ɲanmiɛn ɲrun jranfuɛ ɲanmiɛn su lɔ. ?Nán cenjele like yɛle i sɔ’n? Sanngɛ ɔ timan yasua’m be ngunmin be liɛ. Bla’m be o nun wie. (Gal. 3:26-29) Ɔ ti weiin kɛ Zoova i ninnge’m be yolɛ nun’n, w’a siesieman kɛ bla’m be tran be liɛ lɛ sa ngbɛn naan be ka lɛ kouun.
12, 13. Amun bo sa kun m’ɔ kle kɛ bla’m be ijɔli Ɲanmiɛn nuan’n, i su.
12 Laa kpa’n, bla wie’m be ijɔli Ɲanmiɛn nuan. Zoɛl 3:1, 2 seli kɛ: “Ń fá min Wawɛ’n ḿ mán sran’m be kwlaa. Amun mma yasua mun, nin amun mma mmla’m bé íjɔ min nuan. [...] Yɛ cɛn sɔ’m be nun’n, ń fá n Wawɛ’n ḿ mán afanniɛn yasua mun nin afanniɛn mmla mun.”
13 Afuɛ nga be flɛ i 33 i pantekɔtu nun’n, Zezi i sɔnnzɔnfuɛ 120 be yiali nglo sua ba kun nun Zerizalɛmu lɔ. Bla’m be o be nun wie. Ɲanmiɛn fɛli i wawɛ’n mannin be kwlaa. Ɔ maan Piɛli kwla boli ndɛ nga Ɲanmiɛn nuan ijɔfuɛ Zoɛli kannin’n su. Yɛ ɔ kwla fa kannin yasua nin bla’m be kwlaa be ndɛ. Piɛli seli kɛ: “Sa nga Nyanmiɛn nuan ijɔfuɛ Zoɛl kannin’n yɛ w’a yo yɛ’n, ɔ seli kɛ: ‘Nyanmiɛn waan: An nian, sa nga cɛn wie lele kɛ mɛn’n ɔ́ kɔ́ i bue nuan’n, ḿ má yó’n yɛ: Ń fá n Wawɛ’n mán sran kwlaa. Amun mma yasua nin amun mma mmla’m bé íjɔ min nuan, [...] Yɛ cɛn sɔ’m be nun, ń fá n Wawɛ’n mán n sran mma mun, yasua o, bla o, bé íjɔ min nuan.’”—Yol. 2:16-18.
14. ?Klistfuɛ’m be Ɲanmiɛn sulɛ wafa’n i trulɛ’n nun’n, junman benin yɛ bla’m be dili ɔ?
14 Klistfuɛ klikli’m be blɛ su’n, bla’m be dili junman kpa Klistfuɛ’m be Ɲanmiɛn sulɛ wafa’n i trulɛ’n nun. Be boli Ɲanmiɛn Sielɛ’n i jasin fɛ’n kleli sran mun yɛ be yoli ninnge wie’m be fa suannin jasin fɛ’n bolɛ junman’n i bo. (Lik 8:1-3) Akoto Pɔlu seli kɛ Febe ti “Sankre lɔ asɔnunfuɛ’m be lika nianfuɛ.” Kpɛkun kɛ ɔ́ yó i wiengu Ɲanmiɛn junman difuɛ’m be like’n, ɔ boli bla wie mɔ be su Ɲanmiɛn kpa’n be dunman. Be wie yɛle “Mmo Trifɛni nin Mmo Trifɔz bɔ be di junman man e Min’n.” Ɔ kannin “Mmo Pɛrsid b’ɔ ti e sran kpa’n, b’ɔ di junman kpa man e min’n,” i ndɛ wie.—Rɔm. 16:1, 12.
15. ?E blɛ liɛ nga nun’n, kɛ ɔ ko yo naan Klistfuɛ’m be Ɲanmiɛn sulɛ’n w’a trɛ’n, junman benin yɛ bla’m be di ɔ?
15 E blɛ liɛ nga nun’n, sran miliɔn nso tra su nga be bo Ɲanmiɛn Sielɛ’n i jasin fɛ’n asiɛ’n wunmuan’n su’n, be nun kpanngban kpa be ti bla. (Mat. 24:14) Be nun sunman be di blɛ kwlaa nun Ɲanmiɛn junman annzɛ be ti ngaliɛ difuɛ annzɛ be di junman Betɛli. Jue tofuɛ Davidi seli kɛ: “Kɛ e Min’n kan ndɛ kunngba sa cɛ’n, kpɛkuun bla nga be bo jasin kpa be sin’n b’a ba kpanngban kɛ sonja mun sa.” (Jue. 68:12) Nanwlɛ i sɔ ndɛ liɛ’n kpɛnnin su sakpa! Junman nga bla’m be di i jasin fɛ’n i bolɛ’n nun’n, ɔ nin Ɲanmiɛn i klun sa’n i su kpɛnlɛ nun’n, ɔ ti Zoova i cinnjin. Ɔ seli kɛ bla’m be lo be wun be man be wun mun sɔ. Sanngɛ w’a seman kɛ be tran be liɛ lɛ sa ngbɛn naan be muan be nuan’n su.
Bla nɲɔn mɔ b’a tranman lɛ sa ngbɛn’n
16, 17. ?Wafa sɛ yɛ Sara i ajalɛ’n kle kɛ aja’n nun’n, ɔ fataman kɛ bla’m be tran lɛ sa ngbɛn ɔn?
16 ?Sɛ Zoova mannin bla’m be sasu’n, ɔ fataman kɛ ka naan yasua’m b’a fa ajalɛ’n be usa be yi mun ka? Sɛ be yo sɔ’n, ɔ ti ngwlɛlɛ aeliɛ. Ɲanmiɛn Ndɛ’n kan sa kpanngban mɔ be nun’n bla wie’m b’a muanman be nuan annzɛ kusu kannzɛ b’a usaman be sa’n be fali ajalɛ’n, be ndɛ. Maan e nian be nun nɲɔn.
17 Abraamu m’ɔ ti awlobo kpɛn’n i yi Sara seli i kɛ ɔ kɛn i yi nɲɔn su’n nin i wa’n be bo. Afin be ɲin yiman sran. “Ndɛ sɔ’n w’a yo-man Abraam fɛ mlɔnmlɔn.” Sanngɛ Ɲanmiɛn liɛ’n w’a yomɛn i sɔ wie. Zoova seli Abraamu kɛ: “Wɔ afanniɛn bla’n nin i wa yasua’n be ti nán koko. Ndɛ nga Sara kɛnnin i lɛ’n yɛ yo-ɔ.” (Bob. 21:8-12) Abraamu yoli like nga Zoova waan ɔ yo’n. Ɔ fali Sara i ndɛ’n su yɛ ɔ yoli like nga i waan ɔ yo’n.
18. ?Ajalɛ benin yɛ Abigaili fali ɔ?
18 Maan e bu Nabali i yi Abigaili i akunndan e nian. Kɛ Famiɛn Saili ɲin bloli Davidi wun mɔ Davidi wánndi’n, lika ng’ɔ kpɛli i ngblaliɛ’n, ɔ nin lika nga be ta Nabali i nnɛn’m be lɔ’n w’a waman. Davidi w’a faman bian sɔ m’ɔ ti aɲanbeunfuɛ’n i like fi. Sanngɛ ɔ nin i sran’m be sasali be. Kusu Nabali “ti tɛ, i like yolɛ yo ya.” Kpɛkun ɔ “yoli [Davidi i sran’m] be finfin.” Ɔ ti “sinnglinfuɛ.” Kɛ Davidi i sran’m be srɛli Nabali aɲinyiɛ su kɛ ɔ man be like diwa kan’n, w’a kplinman su. ?Kɛ Abigaili tili i sɔ liɛ’n, ngue yɛ ɔ yoli ɔ? W’a kanman ndɛ fi w’a kleman Nabali. “Yɛ ndɛndɛ kpa’n Abigail fali kpaun ya nnyɔn, nin nzan sɛ nnyɔn, nin bua bɔ b’a tɔn’n sɔ nnun, nin ɔrz mma kɛɛnwa kɔe kilo ablanan, nin vinyi mma kee otre ya, ɔ nin figie mma gato ya nnyɔn.” Ɔ fa be ko mannin Davidi nin i sran mun. ?Like nga Abigaili yoli’n, ɔ ti kpa? Ɛɛn. Sa nga be juli i sin’n, be kle kɛ like ng’ɔ yoli’n ti kpa. Biblu’n waan: “Anannganman maan ɔ [Nabali] wuli.” I sin’n Davidi wa jali Abigaili.—1 Sam. 25:2-3, 14-19, 23-25, 38-42.
‘Bla m’ɔ nin manmanlɛ fata’n’
19, 20. ?Ngue ti yɛ maan be kwla yi bla kun i ayɛ ɔ?
19 Bla ng’ɔ yo ninnge mun kɛ nga Zoova fa klo’n sa’n, Ɲanmiɛn Ndɛ’n yi i ayɛ. Biblu’n nun fluwa nga be flɛ i Nyanndra Mun’n, ɔ yi “bla kpa’n” i ayɛ se kɛ: “I sɔ bla liɛ’n i kpa tra nɛnnglɛnman’n lelele. I wun fɛ i wla’n guɛ i su. Like kwlaa nga bian sɔ’n ɔ kunndɛ’n ɔ nyɛn i. Sa kpa yɛ ɔ yo bian’n cɛn kwlaa-a. Ɔ lɛ-man kɛ ndɛ w’a yo i tɛ.” Asa ekun’n, “ndɛ kun nga b’ɔ uke i nuan kɛn i sa’n, ɔ ti akunndan ndɛ. Kpɛkuun ngwlɛlɛ ndɛ nga bɔ sran ti-ɔ ɔ yo i fɛ’n, yɛ ɔ wo i nuan-an. Like kwlaa nga be yo i awlo nun’n ɔ fɛ i nyin sie su. Ɔ kplin i nyin tɔn aliɛ kpa yɛ ɔ fa mɛn i awlofuɛ mun-ɔn. I mma’m be jaso-ɔ, be yo i mo! I wun kusu jaso-ɔ, ɔ yi i ayɛ.”—Nya. 31:10-12, 26-28.
20 ?Ngue ti yɛ maan be kwla yi bla kun i ayɛ ɔ? Nyanndra Mun 31:30 se kɛ: “Be wunnɛn su saun yolɛ’n, nɛ́n i-ɔ, ɔ laka sran. Klanman’n ti ngbɛn, ɔ yro. Bla nga i nyin yi Anannganman’n, i yɛ ɔ nin manmanlɛ’n fata-a.” Kɛ be se kɛ bla kun i ɲin yi Zoova’n, yɛle kɛ ɔ lo i wun man be nga Zoova sieli be kpɛnngbɛn’n wie. “Yasua [...] yɛ ɔ sie bla-a,” yɛ “Krist yɛ ɔ sie yasua-a,” yɛ “Nyanmiɛn kusu sie Krist.”—1 Kor. 11:3.
Like nga Ɲanmiɛn mannin amun’n ti’n, amun lɛ i ase
21, 22. (a) ?Ngue ti yɛ ɔ fata kɛ Klistfuɛ nga be o aja’n nun’n, be la Ɲanmiɛn m’ɔ mannin aja’n i ase ɔ? (b) ?Ngue ti yɛ ɔ fata kɛ e ɲin yi sran sielɛ’n i su mmla nga Zoova kpɛli’n niɔn? (An nian kuku ng’ɔ o i bue 17 su’n, i nun.)
21 Ninnge nga ti yɛ Klistfuɛ nga be o aja’n nun’n, be kwla la Ɲanmiɛn i ase’n be sɔnnin! I wie yɛle kɛ be wun aniɛn mɔ be ti’n ti’n, kɛ a wun kun ja’n, a wun kun liɛ’n. Ndɛ cinnjin kpa o lɛ ekun mɔ i ti yɛ ɔ fata kɛ be la Ɲanmiɛn m’ɔ mannin aja m’ɔ ti suralɛ like’n, i ase kpa bɔbɔ ɔ. Yɛle kɛ yasua’n nin bla’n, be nɲɔn’n be bo yo kun be nin Zoova be nanti. (Rit 1:9; Mis. 6:8) Kɛ mɔ i yɛ ɔ kpɛli aja’n i ba’n ti’n, ɔ si like ng’ɔ fata kɛ yasua’n nin bla’n be yo naan aklunjuɛ w’a tran aja’n nun’n. Amun yo ninnge mun kɛ nga ɔ fa klo’n sa. I liɛ’n mɛn tɛ nga nun bɔbɔ’n, “aklunjuɛ ng’ɔ fin Anannganman’n, ɔ́ mán amun fanngan.”—Nee. 8:10.
22 Klistfuɛ yasua ng’ɔ klo i yi kɛ ng’ɔ fa klo i bɔbɔ i wun’n sa’n, ɔ sie i yi klolɛ su yɛ ɔ bu i sran. I yi mɔ i ɲin yi Ɲanmiɛn’n kusu ɔ́ yó bla kpa. Afin ɔ́ súɛn i wun bo yɛ i ɲin yí i kpa. I ng’ɔ ti cinnjin trɛ i ngba’n yɛle kɛ be aja klanman sɔ’n, ɔ́ mán Ɲanmiɛn Zoova i kɔmin su.
?Amun wla kwla kpɛn su?
• ?Zoova i ninnge siesielɛ nun’n, wan yɛ ɔ fata kɛ ɔ sie i wiengu ɔ? ?Yɛ wan yɛ ɔ fata kɛ ɔ lo i wun naan be sie i ɔ?
• ?Ngue ti yɛ ɔ fata kɛ be nga be o aja’n nun’n, be bu be wiengu sran ɔn?
• ?Wafa sɛ yɛ ɔ fata kɛ bla kun m’ɔ su Zoova’n, ɔ nin i wun m’ɔ suman Zoova’n be tran ɔn?
• ?Ngue ti yɛ ɔ fata kɛ yasua’m be usa be yi’m be sa ka naan b’a fa ajalɛ cinnjin kpa mun ɔn?
[Kuku, bue 22]
?Ngue ti yɛ ɔ fata kɛ e ɲin yi be nga be sie e’n niɔn?
Zoova kpɛli sran sielɛ’n i su mmla mannin anzi nin klɔ sran. Ɔ yoli sɔ naan i aolia nun sran o, i klɔ sran o, be kwlaa b’a ɲan ye. I sɔ’n yo maan be kwla fa be klunklo ajalɛ klanman naan be bo w’a yo kun b’a su Ɲanmiɛn. Kpɛkun i sɔ’n man Ɲanmiɛn i kɔmin su.—Jue. 133:1.
Klistfuɛ nga be kpali be sieli be ngunmin’n, be kplin su kɛ Zezi Klist sie be. (Efɛ. 1:22, 23) Zezi kusu kplin su kɛ Zoova sie i. I ti’n i agualiɛ su’n, “Krist bɔbɔ b’ɔ ti i Wa’n, ɔ́ fɛ́ i wun mɛ́n i kɛ ɔ sie i naan Nyanmiɛn sie like’n kwlakwlakwla.” (1 Kor. 15:27, 28) Ɔ maan sɛ sran nga be fali be wun be mannin Ɲanmiɛn’n, be ɲin yi be nga Ɲanmiɛn sieli be kɛ be nian be su’n, ɔ ti kpa dan! (1 Kor. 11:3; Ebr. 13:17) I sɔ’n yo maan Zoova klun jɔ e wun yɛ ɔ ra e su.—Eza. 48:17.
[Foto, bue 19]
Ɲanmiɛn srɛlɛ’n kwla uka Klistfuɛ bla kun naan w’a yi nzuɛn ng’ɔ fin Ɲanmiɛn’n i nglo.