Fluwa’n nun kannganfuɛ’m be kosan mun

Zoova waan nán e sɔ amuin. ?Sanngɛ ngue ti yɛ kɛ Aarɔn yoli sika ɔkwlɛ nannin ba’n w’a tumɛn i fɔ ɔ?

Ezipt Lɔ Tulɛ ndɛ tre 32 nun’n, be kannin sika ɔkwlɛ nannin ba mɔ Aarɔn yoli’n, i ndɛ. I sɔ m’ɔ yoli ti’n, ɔ fɔnnin Ɲanmiɛn i mmla nga i waan nán e sɔ amuin’n. (Tul. 20:3-5) I sɔ’n ti’n, ‘Anannganman fali ya dan kpa Aarɔn wun, i waan ɔ́ kún i, naan [Moizi] w’a srɛ w’a mɛn i wie le kun sɔ’n nun.’ (Mml. 9:19, 20) ?Srɛlɛ sɔ mɔ Moizi m’ɔ ti sran kpa’n ɔ srɛli’n, ɔ ‘yoli sa ye’ Aarɔn lika? (Zak 5:16) I yo. Afin i sɔ’n ɔ nin like nɲɔn uflɛ ti’n, Zoova tɛli Moizi i srɛlɛ’n su. Ɔ maan w’a tuman Aarɔn i fɔ.

Atrɛkpa’n Zoova i sulɛ mɔ Aarɔn sɔli i sulɛ w’a cɛ kpa’n i ti yɛ ɔ yoli sɔ ɔ. I nun mɔ Ɲanmiɛn seli Moizi kɛ ɔ to Faraɔn lɔ naan ɔ ko fa Izraɛlifuɛ mun fite’n, Zoova seli Aarɔn kɛ ɔ ko sunman Moizi naan ɔ ijɔ Moizi nuan. (Tul. 4:10-16) Be sran nɲɔn sɔ’n be fali Ɲanmiɛn i ndɛ’n su. Be ɔli Ezipti famiɛn’n i ɲrun kpɛ sunman. Ɔ maan be su yɛ Faraɔn fɛli i awlɛn ba tɛ’n guali ɔ. Ɔ maan Ezipti lɔ’n, Aarɔn nin Ɲanmiɛn be nantili klanman titi. Ɔ tuli i klun suli Zoova.—Tul. 4:21.

Asa kusu’n, maan e nian like nga ti yɛ Aarɔn yoli sika ɔkwlɛ nannin ba’n. Moizi dili cɛn ba 40 Sinai oka’n su lɔ. Kɛ “nvlefuɛ’m be wunnin kɛ Moizi su cɛ oka’n su lɔ ngboko’n,” be seli Aarɔn kɛ ɔ yo amuin man be. Aarɔn kplinnin su. Yɛ ɔ yoli sika ɔkwlɛ nannin ba’n mannin be ɔ. (Tul. 32:1-6) Sanngɛ ninnge nga Aarɔn yoli be kasiɛn’n be kle kɛ be amuin sɔlɛ sɔ’n w’a yomɛn i klun su. Ɔ ti weiin kɛ mianmianlɛ mɔ be miɛnmiɛnnin i’n ti yɛ ɔ kplinnin su ɔ. Kɛ Moizi kannin amuin sɔlɛ’n i ndɛ m’ɔ fatali kɛ be fa ajalɛ kun’n, Levi i mma’m be kwlaa be jrannin Zoova sin. Aarɔn o be nun wie. Sran akpi nsan nga ti yɛ nvlefuɛ’m be sɔli amuin’n, be kunnin be.—Tul. 32:25-29.

I sin’n, Moizi seli nvlefuɛ’m be kɛ: “Amu’an yo sa tɛ dan kpa.” (Tul. 32:30) Aarɔn nin nvlefuɛ’m be kwlaa yɛ be yoli sa tɛ’n niɔn. Ɔ maan Zoova sili be kwlaa be aunnvuɛ.

Kɛ sika ɔkwlɛ nannin ba’n i su ndɛ’n wieli’n, Zoova seli kɛ maan be fa Aarɔn be sie i, i ɲrun jranlɛ junman’n i su kpɛn. Ɲanmiɛn seli Moizi kɛ: “Aarɔn i tralɛ ng’ɔ wla fa jran min ɲrun’n, fa wlɛ i wun naan guɛ i ti su ngo. Fɛ i wlɛ min sa nun naan ɔ yo min ɲrun jranfuɛ naan ɔ di min junman’n.” (Tul. 40:12, 13) I sɔ’n kle weiin kɛ Zoova yacili like tɛ nga Aarɔn yoli’n cɛli i. Nanwlɛ, Aarɔn timan amuin sɔfuɛ m’ɔ kacili i sin sili Zoova mlɔnmlɔn ɔn. Sanngɛ ɔ tuli i klun suli Zoova tankaan kpa, w’a kpɔcimɛn i le.