B’a diman ndɛ nga be kannin’n su

Zoova seli Moizi kɛ: ‘Fu min sin oka’n su wa. Ń má klɛ́ min mmla mun yɔbuɛ wie mun be su ń fá mán wɔ.’ Moizi fuli oka’n su lɔ. Ɔ kali lɔ cɛn ba ablanan (40). Zoova klɛli Mmla blu mun yɔbuɛ paplapa nɲɔn su, kpɛkun ɔ fa mannin Moizi.

Kɛ mɔ Moizi cɛli lɔ m’ɔ jraman’n ti’n, Izraɛlifuɛ mun be buli i kɛ w’a yaci be w’a ɔ. Be seli Aarɔn kɛ: ‘E kunndɛ kɛ sran kun dun e ɲrun mmua. Yo amuin kun man e.’ Aarɔn tɛli be su kɛ: ‘Amun fa amun sika ɔkwlɛ ninnge mun be man min.’ Ɔ kloli ninnge sɔ mun, yɛ ɔ fa yili sika ɔkwlɛ nannin ba kun. Izraɛlifuɛ’m be seli kɛ: ‘Nannin ba nga ti e Ɲanmiɛn. I yɛ ɔ deli e Eziptifuɛ mun be sa nun-ɔn.’ Be sɔli nannin ba’n, kpɛkun be dili fɛtri. ?I sɔ’n ti like tɛ? Ɛɛn, afin be seli kɛ Zoova kunngba cɛ yɛ bé sú i-ɔ, kpɛkun b’a diman ndɛ nga be kannin’n su.

Zoova wunnin like nga be yoli’n. Ɔ maan ɔ seli Moizi kɛ: ‘Jra ko nian like nga Izraɛlifuɛ’m be su yo’n. Be ɲin w’a yiman min, be su sɔ amuin.’ Moizi fali yɔbuɛ paplapa nɲɔn mun, kpɛkun ɔ jrali.

Kɛ Moizi mántan Izraɛlifuɛ’m be lɔ’n, ɔ tili be ngan. Be su to jue. Ɔ wunnin kɛ be su si able, yɛ be su koto nannin ba kun bo. Ɔ fali ya dan kpa. Ɔ tɛli yɔbuɛ nɲɔn mun be ase, be bubuli. Ɔ bubuli nannin ba’n nun wie. Ɔ usali Aarɔn kɛ: ‘?Ndɛ benin yɛ be kan kleli wɔ mɔ i ti yɛ a yoli sa tɛ dan nga-ɔ?’ Aarɔn tɛli i su kɛ: ‘Nán fa ya. Ɔ bɔbɔ a si ɔ sran mun. Be waan n yo amuin kun n man be. Yɛ n kusu n fali be sika ɔkwlɛ ninnge mun-ɔn, n kloli be, yɛ nnɛn ba nga fiteli-ɔ.’ Like nga Aarɔn yoli’n timan kpa. Kɛ Moizi sɛli i sin oka’n su lɔ ekun’n, ɔ ko seli Zoova kɛ ɔ yaci sa nga nvlefuɛ mun be yoli’n cɛ be.

Be nga be kunndɛ kɛ bé sú Zoova’n, Zoova yacili sa nga be yoli’n cɛli be. ?A wun like nga ti yɛ ɔ ti cinnjin kɛ Izraɛlifuɛ’m be ɲin yi Moizi’n?