E mɛn dilɛ’n kwla yo fɛ ikisa yɛ ɔ kwla yo sɔ tititi

DƆ NGA su bɔbɔ’n e mɛn dilɛ’n kwla yo fɛ. ?Wafa sɛ yɛ ɔ kwla yo sɔ ɔ? Sɛ e nanti ngwlɛlɛ ndɛ nga be klɛli i Ɲanmiɛn Ndɛ’n nun’n be su’n yɛ ɔ kwla yo sɔ ɔ. Maan e fa e ɲin e sie i be nun wie’m be su.

BIBLU’N NUN MMLA: Famiɛn Salomɔn klɛli i kɛ: “Like ng’ɔ ti kpa man sran’n, yɛlɛ aliɛ dilɛ nin nzan nɔnlɛ, ɔ nin junman bɔ be di’n i nuan like nyanlɛ.”—AKUNNDANFUƐ’N 2:24.

Ɲanmiɛn yili i e kɛ junman nga e di’n, ɔ man e aklunjuɛ. Ɔ maan, kannzɛ bɔbɔ lika’n ti kekle e su sɛ’n, sɛ e nian nun e di junman kekle naan e diman nun ndrunmun’n, e kwla di aklunjuɛ.

BIBLU’N NUN MMLA: “Sɛ a cɛ sran like’n, ɔ ti kpa tra kɛ be cɛ wɔ like’n.”—SA NGA BE YOLI’N 20:35.

Sran sunman be sieli i nzɔliɛ kɛ, kɛ be uka sran mun’n, be ɲan su ye. Kpɛkun ɔ yoman be kɛ be o nguan nun sa ngbɛn. Ukalɛ nga be uka sran mun’n i wie yɛle kɛ be suan be nga kekle o be su’n, be bo. I sɔ yɛ Salomɔn waan e yo ɔ. Ɔ klɛli i kɛ: “Sɛ a lɛ ninnge naan ɔ wiengu lɛ-man wie’n, nán yo i anwɛn.”—Nyanndra Mun 3:27.

I wie yɛle bian nga be flɛ i Ralf i liɛ’n. I yi’n di Ɲanmiɛn junman blɛ kwlaa nun. Kɛ ɔ wa ɔli antrɛti’n, ɔ fɛli i wun wlali junman sɔ’n nun wie. Anglo kwlaa nun’n, be nɲɔn’n be wla be wun ase be kle be wiengu’m be Biblu’n nun like. Ralf waan: “Kɛ é jú awlo lɔ nnɔsua’n, y’a wie bubu mlɔnmlɔn. Sanngɛ nán kpɛnngbɛn mɔ y’a yo’n i ngunmin ti yɛ e wun yo e sɔ ɔ. E Si m’ɔ o ɲanmiɛn su lɔ’n i junman mɔ e tu e klun e dili’n ɔ o nun wie. Ɔ maan, like kpa ti yɛ e fɛ ɔ.” Kɛ Ralf nin i yi be fa be wiengu ukalɛ’n be fa cici be ti’n ti’n, be di aklunjuɛ.

BIBLU’N NUN MMLA: “Janvuɛ kpa’n ɔ yi i klolɛ’n nglo blɛ kwlaa nun, ɔ ti kɛ aniaan kun mɔ ɲrɛnnɛn blɛ’n ti yɛ be wuli i’n sa.”—NYANNDRA MUN 17:17, NW.

Sɛ afɛ’n o e su naan e wiengu’m be fɔnvɔ e’n, afɛ’n sɔn e nun. I sɔ yɛ bian nga be flɛ i Fransis Bakɔn m’ɔ ti fluwa klɛfuɛ’n, ɔ klɛli ɔ. Ɔ klɛli i kɛ, be nga be leman janvuɛ’n, “b’a mlin mɛn nun kɛ sran kun m’ɔ w’a mlin aawlɛ nun’n sa.” Sɛ e yo e wun janvuɛ naan kusu e le janvuɛ kpa’n, kekle nga be tɔ e su’n be su tinman e su. Ɔ maan, e kwla di aklunjuɛ kpa mɛn nga nun.

BIBLU’N NUN MMLA: “Be nga be si kɛ be di Nyanmiɛn ninnge’m be yalɛ’n, be liɛ su ti ye.”—MATIE 5:3.

Sran ng’ɔ kunndɛ kɛ ɔ́ dí ninnge kpakpa nga Ɲanmiɛn wá yó’n i su ye’n, ɔ fata kɛ ɔ yo like nga Zezi kɛnnin i ndɛ’n. Yɛle kɛ maan ɔ wun i wlɛ kɛ ɔ di “Ɲanmiɛn ninnge’m” be yalɛ naan ɔ fɛ i wun ajalɛ. E klɔ sran mun’n e timan kɛ nnɛn’m be sa, e kunndɛ kɛ é sí sa nga ti yɛ e o mɛn’n nun’n. Ɲanmiɛn Zoova kunngba yɛ ɔ kwla uka e naan y’a si i sɔ liɛ’n niɔn. Yɛ ɔ fɛ i Ndɛ’n mɔ yɛle Biblu’n ɔ yo i sɔ. Ndɛ akpasua ng’ɔ sinnin lɛ nun’n, e wunnin i kɛ Biblu’n kle e like nga Ɲanmiɛn waan ɔ́ yó i asiɛ’n su’n. Asa ekun’n, ɔ kle e like nga ti yɛ klɔ sran’m be o asiɛ’n su nin sa nga ti yɛ afɛ’n o mɛn’n nun’n, ɔ nin like nga Ɲanmiɛn waan e yo’n. Wafa nga Biblu’n yiyi ndɛ sɔ’m be nun’n, i wlɛ wunlɛ’n kwla uka e naan y’a di aklunjuɛ. ?Ngue ti yɛ be nga be suan Biblu’n nun like mɔ be nian like nga be suan’n su nanti’n, be wun jɔ be ɔ? Afin be nin e Yifuɛ Zoova, m’ɔ ti sran m’ɔ di ‘aklunjuɛ’n,’ be afiɛn’n sɛ.—Jue Mun 104:31.

BIBLU’N NUN MMLA: “Maan ɔ wla kpɛn ɔ yifuɛ’n i su kwlaa naan nyrɛnnɛn blɛ’n w’a ju. Maan ɔ wla kpɛn i su naan w’a yo kpɛnngbɛn, afin ɔ kpɛnngbɛn blɛ sɔ’n nun’n, ɔ nyin wá tú nguan’n su.”—AKUNNDANFUƐ’N 12:1.

Ndɛ nga Famiɛn Salomɔn kɛnnin i lɛ’n, ɔ wɔ gbanflɛn nin talua mun. Afin be wunmɛn i wlɛ kɛ ainman’n sa kwla ɲan be. Sanngɛ e kwlaa e kwla fa tu e wun fɔ wie. I ndɛ sɔ’n kle e kɛ e nantilɛ nun’n, maan e fa e Yifuɛ’n i sulɛ’n e sie i like kwlaa ɲrun. Sɛ e yo i sɔ’n ɔ su yoman e kɛ e o mɛn’n nun sa ngbɛn. Sran wie’m be se kɛ: “Maan e di like e nɔn nzan, ainman é wú, wuun e liɛ a wie.” Nán maan e yo kɛ be liɛ’n sa mlɔnmlɔn. (1 Korɛntfuɛ Mun 15:32) Kɛ nga Akunndanfuɛ’n 8:12 fa kan’n sa’n, sɛ Ɲanmiɛn i ninnge liɛ mun yɛ e fa cici e ti’n, ‘é ɲán muae.’

Bla kun mɔ be flɛ i Wendi wunnin i kɛ ndɛ sɔ’n ti nanwlɛ. Yɛle kɛ i nun nga ɔ te yo talua’n, ɔ nin i niaan bla be suannin aniɛn nga be flɛ i Ɛspaɲɔlu naan b’a kwla ɔ nvle nga be flɛ i République Dominicaine nun lɔ. Afin be mian Ɲanmiɛn Ndɛ kanfuɛ’m be wun lɔ kpa. Ɔ se kɛ: “Kɛ ɔ ko yo naan y’a kwla bo jasin fɛ’n lika nga jasin bofuɛ’m b’a sɔnman lɔ’n nun’n, e klɛnnin e wun. Sanngɛ fɛ nga e dili i lɔ’n, nanwlɛ ɔ ti dan. Sɛ ɔ ti kɛ n fali anglo nsiɛn nga e dili i lɔ’n, n yoli like uflɛ’n nn n sacili min blɛ’n ngbɛn. Ye nga e dili i lɔ’n, ɔ tra e wun nga e klɛnnin naan y’a kwla ɔ lɔ’n lelele.”

Sran ng’ɔ kpɔciman Ɲanmiɛn’n, i mɛn dilɛ’n yo fɛ

Sɛ e nin Zoova e afiɛn’n sɛ’n, e mɛn dilɛ’n yó fɛ. ?Yɛle kɛ benin sa? Satan yoli maan Adam nin Ɛvu b’a kplinman su kɛ Ɲanmiɛn sie be. Ɔ kɛnnin i ekun kɛ sɛ be kle sran kun i ɲrɛnnɛn’n, ɔ su kwlá suman Ɲanmiɛn guɛmɛn i ti nin i bo. (Zɔb 1:9-11; 2:4) Sanngɛ Satan ti ato buafuɛ. ?Wafa sɛ yɛ e kwla kle sɔ ɔ? Yɛle kɛ nán e kpɔci Ɲanmiɛn le yɛ e fɛ i mmla’m be su tititi. Asa ekun’n, e kplin su naan Zoova sie e naan ɔ kle e atin ng’ɔ ti kpa.—Sa Nglo Yilɛ 4:11.

Kɛ mɔ e nanti seiin’n ti’n, be kwla kle e yalɛ. ?Sanngɛ yalɛ nga bé klé e’n ti yɛ maan e mɛn dilɛ’n su yoman fɛ kun ɔn? Cɛcɛ. Maan e fa sunnzun ase kun e yiyi nun. Maan e se kɛ wie nun ɔn, abɔlɛfuɛ wie tɔnnin e janvuɛ kpa annzɛ e awlobofuɛ kun suɛn. Sɛ sran ng’ɔ yoli abɔlɛ sɔ’n wun i kɛ e jran e sran kpa’n i sin, ɔ su yaciman e ndɛnngan. ?Sanngɛ yalɛ nga abɔlɛfuɛ sɔ’n kle e’n ti’n, e kwla se kɛ e mɛn dilɛ’n w’a saci mlɔnmlɔn? Cɛcɛ. Ɔ maan, é trá e awlɛn é jrán e sran kpa’n i sin. I kunngba’n yɛle Ɲanmiɛn i sin jranlɛ’n. Asa kusu’n, dɔ nga su’n mɛn kekle yɛ’n nun’n, kɛ e kpɔciman Ɲanmiɛn’n, ɔ yo i fɛ dan.—Nyanndra Mun 27:11.

Ɔ cɛ kaan’n, é wá dí aklunjuɛ kpafuɛ’n

Maan amun kunndɛ kɛ amún súan Ɲanmiɛn bɔbɔ ɔ nin ninnge nga i waan ɔ́ yó be’n be su like kpa. Zezi Klist bɔbɔ seli kɛ: “Kɛ be se kɛ bé nyán anannganman nguan’n, i bo’n yɛlɛ kɛ bé sí wɔ bɔ ɔ kunngba cɛ yɛ a ti Nyanmiɛn’n nin Jésus-Krist bɔ a sunmɛnnin i’n.” (Zan 17:3) Kɛ Zoova ko wie like nga i klikli nun’n, i waan ɔ́ yó i asiɛ’n su’n i yo’n, sran nga b’a kpɔcimɛn i’n, bé ɲán like nga ɔ kunndɛli kɛ be ɲɛn i’n. Yɛle kɛ “bé nyán anannganman nguan” asiɛ’n su. Blɛ sɔ nun’n, nanwlɛ asiɛ’n su tranlɛ’n wá yó fɛ.—Jue Mun 145:16.

?Fluwa benin yɛ ɔ kwla uka amun naan amun a si Ɲanmiɛn kɛ nga Zezi fa kannin’n sa ɔ? Biblu’n mɔ ti Ɲanmiɛn Ndɛ’n yɛ ɔ kwla uka amun ɔn. Sɛ amun kunndɛ kɛ sran kun uka amun i sɔ nun’n, amun kwla klɛ be nga be yi fluwa nga’n be fluwa. Bé wá fɛ́ i wun ajalɛ naan sran kun w’a kle amun like nga Biblu’n kle i sakpasakpa’n.