Like nga é yó naan y’a wun e wun fɛ’n Zezi kle e

“Yo sa nga Jésus yoli be’n.”​—1 Zan 2:6.

E WUNNIN kɛ Zezi wunnin i wun fɛ. Ɔ maan sɛ e kunndɛ kɛ é wún e wun fɛ wie’n, ɔ fata kɛ e fa ndɛ ng’ɔ kannin’n su naan e niɛn i ajalɛ’n su.

Biblu’n nun ndɛ nga ɔ fiti ndɛ nga su’n, ɔ kle weiin kɛ i sɔ yɛ Zoova waan e yo ɔ. Kɛ be se kɛ e yo sa nga Zezi yoli’n wie’n, yɛle kɛ e niɛn i ajalɛ’n su kpɛkun ndɛ ng’ɔ kannin’n, e nanti su. Sɛ e yo sɔ’n, Ɲanmiɛn kló e kpɛkun é wún e wun fɛ.

Ndɛ nga Zezi kannin be’n, be kle e wafa nga e kwla niɛn i ajalɛ’n su’n. I nun nga ɔ́ kán Ɲanmiɛn ndɛ oka’n su lɔ’n, yɛ ɔ kannin ndɛ sɔ’m be dan lika ɔ. Maan e nian ndɛ sɔ’m be nun wie mun naan e wun wafa nga e kwla fa be su’n.

NDƐ NGA ZEZI KANNIN’N: “Be nga be si kɛ be di Nyanmiɛn ninnge’m be yalɛ’n, be liɛ su ti ye.”​—Matie 5:3.

LIKE NGA TI YƐ NDƐ SƆ’N TI CINNJIN’N: Zezi kleli kɛ, kɛ sran kun o sa’n, ɔ kunndɛ kɛ ɔ́ sí Ɲanmiɛn. E kwlaa e usa e wun kɛ: ?Ngue ti yɛ e o mɛn’n nun ɔn? ?Ngue ti yɛ sran’m be wun be ɲrun dan asiɛ’n su sɔ ɔ? ?E ndɛ lo Ɲanmiɛn sakpa? ?Be wu, be o lɔ? Sɛ e nin a wunman kosan sɔ’m be su tɛlɛ’n, e klun jɔman. Zezi liɛ’n, ɔ si kɛ Ɲanmiɛn Ndɛ’n kunngba cɛ yɛ ɔ tɛ kosan sɔ’m be su kpa ɔ. Le kun m’ɔ́ srɛ́ i Si’n, ɔ seli kɛ: “Ɔ ndɛ’n ti nanwlɛ.” (Zan 17:17) ?Sanngɛ Ɲanmiɛn Ndɛ’n kwla uka e sakpasakpa naan y’a si Ɲanmiɛn naan y’a di aklunjuɛ?

SRAN KUN I SU NDƐ’N KLE SƆ: Isa nin i wiengu’m be sro jue nga be flɛ i rɔki’n. Isa yɛ ɔ man jue’n su yɛ i wiengu’m be sɔ su ɔ. Nán jue’n i kpa’n wie kusu ɔ. Be dunman’n fuli kpa. Ɔ nin i sɔ ngba’n, Isa wunmɛn i wun fɛ. Ɔ seli kɛ: “Kannzɛ n klo jue tolɛ’n, sanngɛ n wunman min wun fɛ.” Cɛn kun’n, Zoova i Lalofuɛ kun nin Isa be kokoli yalɛ. Isa seli kɛ: “N usɛli i kosan kpanngban kpa. Sanngɛ ɔ fali Ɲanmiɛn Ndɛ’n tɛli be kwlaa be su klanman mannin min. Ɔ maan, n seli i kɛ ɔ kle min Ɲanmiɛn Ndɛ’n i nun like.” Like nga Isa suannin’n, ɔ wluwluli i wun. Ɔ maan, ɔ fɛli i wun mannin Zoova. Isa se kɛ: “Laa’n, n siman min wun su nian. Ɔ maan, i kan nn m’an kpɛ ndɛ ba. Sanngɛ siɛn’n, n si min wun su nian yɛ min wun yo min fɛ.”

NDƐ NGA ZEZI KANNIN’N: “Be nga be si aunnvuɛ’n, be liɛ su ti ye, afin Nyanmiɛn wá sí be aunnvuɛ!”​—Matie 5:7.

LIKE NGA TI YƐ NDƐ SƆ’N TI CINNJIN’N: Kɛ like yo sran’n, sran ng’ɔ si aunnvuɛ’n, ɔ yo kɛ i bɔbɔ yɛ like sɔ w’a yo i’n, sa. Aunnvuɛ sifuɛ’n, ɔ yo sran ye, ɔ bu i wiengu akunndan. Be nga afɛ o be su’n, Zezi sili be aunnvuɛ. Ɔ maan, ɔ yili be su afɛ’n. (Matie 14:14; 20:30-34) Kɛ e si aunnvuɛ kɛ Zezi sa’n, e wun e wun fɛ. Afin aunnvuɛ silɛ’n i su nvasuɛ yɛle aklunjuɛ’n. (Sa Nga Be Yoli’n 20:35) Kɛ e si aunnvuɛ’n, e yo sran’m be kpa. Kpɛkun, e kan ndɛ nga sran ti ɔ, ɔ yo sran’n. Asa ekun’n, e ti sran wun ɲanman nun. ?Kɛ sran si aunnvuɛ’n, ɔ wun i wun fɛ sakpa?

SRAN KUN NIN I YI BE SU NDƐ’N KLE SƆ: Maria nin i wun Karlosu be si aunnvuɛ. Maria i si’n ti angbeti, yɛ ɔ ti tukpacifuɛ. Koko nun wa’n, tukpacɛ’n wa tinnin i su ti’n, w’a kwlá tumɛn i wun bo kun. Maria nin i wun be fɛ i bali be awlo lɔ naan bé níɛn i lika. Kɔnguɛ be lafiman. Kɛ i diabɛti’n miɛn i nun’n, be fɛ i kɔ dɔɔtrɔ ndɛndɛ. Be waan ɔ ju wie’n, be fɛ fɛlɛ kpa. Sanngɛ be di aklunjuɛ kɛ nga Zezi fa kannin’n sa. Afin be si jrɛiin kɛ wafa ng’ɔ fata kɛ be uka be si kpɛnngbɛn’n, yɛ be yo ɔ.

NDƐ NGA ZEZI KANNIN’N: “Be nga be ti ndɛ siesiefuɛ’n, be liɛ su ti ye.”​—Matie 5:9.

LIKE NGA TI YƐ NDƐ SƆ’N TI CINNJIN’N: ?Ngue ti yɛ ndɛ siesiefuɛ’n, ɔ wun i wun fɛ ɔ? I kun yɛle kɛ ɔ nin i wiengu’m be tran klanman. I sɔ’n ti’n, ɔ ti kpa kɛ e fa Ɲanmiɛn Ndɛ’n i nun afɔtuɛ nga su. I waan: “Like kwlaa nga amun kwla yo bɔ amun nin sran su kan-man ndɛ’n, amun yo.” (Rɔmfuɛ Mun 12:18) E osufuɛ nin be nga e nin be e suman Ɲanmiɛn likawlɛ’n, be o “sran” sɔ’m be nun wie. ?Kɛ e nin “sran” kwlaa e tran mɔ e ti ndɛ siesiefuɛ’n, e wun e wun fɛ sakpa?

SRAN KUN I SU NDƐ’N KLE SƆ: Be flɛ bla kun kɛ Nɛr. Sa kekleekle fanunfanun be tɔli i awlo’n nun. Ɔ maan i awlo’n nun w’a jɔman. I wun’n yacili ba mun i sa nun, ɔ tu kpɛnnin i afuɛ 15 nun yɛ. Siɛn’n, i kunngba yɛ ɔ ta ba mun ɔn. I wa yasua’m be nun kun wa kacili drɔgi nɔnfuɛ. Blɛ sunman’n, ɔ yo ninnge mun kɛ w’a jinmin sa. Ɔ wla i nin’n ɔ nin i niaan bla’n, be ɲin nglonglo. Nɛr seli kɛ kannzɛ lika’n yoli kekle i su’n, sanngɛ like ng’ɔ suɛnnin i Ɲanmiɛn ndɛ’n nun’n, yɛ ɔ ukɛli i naan ɔ nin i mma’m b’a tran klanman. Ɔ trɛli i awlɛn yoli sran ye, yɛ ɔ kleli kɛ sran ndɛ lo i. (Efɛzfuɛ Mun 4:31, 32) Ɔ di i nanwlɛ kɛ, kɛ m’ɔ yoli wɛtɛɛfuɛ’n ti’n, ɔ nin i mma mun nin i wiengu trannin klanman.

MAAN E SI E ƝRUN LƆ SA MUN WIE

Sɛ e kunndɛ kɛ é wún e wun fɛ’n, ɔ fata kɛ ngwlɛlɛ ndɛ nga Zezi kannin’n, e fa be su. Sanngɛ nɛ́n i ngba ɔ. Ɔ fata kɛ e si e ɲrun lɔ sa mun wie. E ngba e si kɛ e yo kpɛnngbɛn, e tɔ tukpaciɛ naan e wu. ?Sɛ i sɔ ngalɛ’n ngunmin yɛ e si i’n, e kwla se kɛ e wun e wun fɛ sakpa?

Ndɛ fɛ kun yɛ. Sran kwlaa ng’ɔ ‘yo sa nga Jésus yoli be’n wie’n,’ Zoova yrɛ́ i su ɔ maan i liɛ yó ye. Zoova tali nda kɛ ɔ́ síesíe mɛn nga i ye naan be nga be yo sa kpa’n, be ngunmin be tran nun tititi. Fɔ’n su tranman be nun kun. Like nga Zoova sunnzunnin kɛ ɔ́ yó mán sran mun’n, yɛ ɔ o lɛ ɔ. Ɲanmiɛn Ndɛ’n se kɛ: “Siɛn’n Nyanmiɛn i tranwlɛ’n wo sran’m be afiɛn! Ɔ nin bé trán, bé yó i sran, yɛ i bɔbɔ yó be Nyanmiɛn. Ɔ́ núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.”​—Sa Nglo Yilɛ 21:3, 4.

Fluwa nga i su fitilɛ ndɛ’n nun’n, e kannin bla kpɛnngbɛn kun m’ɔ le afuɛ 84 i ndɛ. Kɛ ɔ tili Ɲanmiɛn ndɛ nga e boli su icra’n, i klun jɔli dan. Afin kɛ ndɛ sɔ’n wá kpɛ́n su’n, mɛn nun tranlɛ’n yó fɛ kpa. Kɛ Ɲanmiɛn wá síe mɛn’n, sran’m “bé nyán nguan sakpa.” ?Wafa nga mɛn’n i nun tranlɛ’n wá yó fɛ’n, amun kunndɛ kɛ amún sí i su ndɛ? (1 Timote 6:19) Sɛ ɔ ti sɔ’n, amun wun Zoova i Lalofuɛ kun wun annzɛ amun klɛ Zoova i Lalofuɛ nga be yili fluwa nga’n, be fluwa.a

[Ja ngua lɛ ndɛ’n]

[Foto, bue 7]

Maria nin Karlosu

[Foto, bue 7]

Nɛr