Sa nga ti yɛ ɔ ti kpa kɛ e fa Biblu’n nun mmla’m be su’n

?BIAN nin bla nna’n i su ndɛ nga Biblu’n kan’n, be di su dɔ nga su ɔ, ɔ yoman ye kun? ?Ɔ ti sran mianmianlɛ? Cɛcɛ. I kpa’n, wafa nga Biblu’n bu i sɔ liɛ’n, ɔ kwla uka e naan:

▪ Bla nin bian kunndɛlɛ’n nun tukpacɛ wie w’a saman e.

▪ Yasua wie mɔ w’a jaman bla kun awa ja su’n, w’a wunnzɛman bla sɔ’n.

▪ Aja m’ɔ saci’n i sin sa wiwi’n w’a tɔman e su.

▪ E akunndan’n w’a buman e fɔ.

▪ Y’a yoman e wun wanzo.

Ɲanmiɛn Zoovaa m’ɔ ti e Yifuɛ’n, ɔ kunndɛ kɛ e ɲan ninnge ng’ɔ man e’n be su ye. Ɲanmiɛn ‘kle e like, e bɔbɔ e kpa yolɛ ti.’ (Ezai 48:17) Sran ng’ɔ fa bian nin bla nna’n i su ndɛ nga Biblu’n kan’n i su’n:

▪ Ɲanmiɛn klun jɔ i wun.

▪ I akunndan’n bumɛn i fɔ.

▪ Ɔ nin i awlofuɛ’m be afiɛn mantan kpa.

▪ Be kɛn i wun ndɛ kpa.

▪ Ɔ timan finfinfuɛ i bɔbɔ i ɲrun.

?Yɛ sɛ dɔ nga su’n amun faman Biblu’n nun mmla’m be su be nantiman’n nin? ?Amun kwla kaci amun mɛn dilɛ wafa’n? ?Ɲanmiɛn jrán sa nga amun yoli be laa’n su bú amun fɔ?

Amun bu sa nga i akunndan. Laa Klistfuɛ klikli’m be nun wie’m be fa be yasua lika annzɛ be bla lika’n be yo sa ng’ɔ timan su’n. Wie’m be kunndɛ bla annzɛ bian be yi annzɛ be wun bo. Yɛ wie’m be kunndɛ be wiengu yasua annzɛ be wiengu bla. Sanngɛ be kacili be mɛn dilɛ wafa’n. Ɔ maan Ɲanmiɛn yacili sa tɛ nga be dun mmua yoli’n cɛli be. (1 Korɛntfuɛ Mun 6:9-11) Andɛ’n, asiɛ wunmuan’n su’n sran akpiakpi kpanngban be yoli kɛ be sa wie. Be wlali bian nin bla kunndɛlɛ sukusuku’n i ase. Yɛ ye nga kɛ be di Biblu’n nun mmla’n su’n be ɲɛn i’n, be ɲannin wie. Be nun kun yɛle Sara mɔ ndɛ akpasua klikli’n nun’n, e kɛnnin i ndɛ’n.

“Min wla’n guali ase ndɛ kpa”

Sara wunnin i wlɛ kɛ i klunklo like yolɛ’n w’a mɛnmɛn i alaje nin aklunjuɛ ng’ɔ kunndɛ’n. I waan: “Ɔ yoli min kɛ min klun akunndan’n w’a kete sa. N wunnin ɲannzuɛn kpɛkun n klun titili min, afin m buli i kɛ ḿ má wúnnzɛ annzɛ tukpacɛ tɛ wie wá sá min. N lafili su titi kɛ Ɲanmiɛn o lɛ, yɛ n si kɛ sa nga n yo’n ɔ bo i wla. N wunnin i kɛ m’an yo fiɛn, yɛ min akunndan’n yaciman min fɔ bulɛ.”

I agualiɛ su’n, Sara ɲannin fanngan naan w’a kaci i mɛn dilɛ wafa’n. Ɔ seli i si nin i nin mɔ be ti Zoova i Lalofuɛ’n kɛ be ukɛ i. Asa ekun’n, ɔ seli be lɔ Zoova i Lalofuɛ’m be asɔnun kpɛnngbɛn’m be kɛ be ukɛ i wie. Sara se kɛ: “Wafa nga min si nin min nin ɔ nin asɔnun kpɛnngbɛn’m be ukali min klolɛ su nin klun ufue su’n, ɔ boli min nuan. Yɛ i sɔ’n yoli min fɛ. Min wla’n guali ase ndɛ kpa.”

Dɔ nga su’n, Sara le i bɔbɔ i klun ba nɲɔn. Ɔ se kɛ: “Ajalɛ nga n fali be laa’n, n yiyi nun weinwein n kle min mma mun. Ɲanmiɛn mmla mɔ m’an faman su’n i sin ɲrɛnnɛn nga n wunnin i’n, n klo kɛ be wun i wlɛ. Bian nin bla nna’n i su mmla nga Ɲanmiɛn man’n, i su ye fanunfanun nga be mɔ be fa su’n be ɲɛn i’n, min waan ń úka be naan be si be yɛ be ɲan wie. N lafi su kpa kɛ, kɛ mɔ Ɲanmiɛn kunndɛman kɛ sa wie ɲan e’n, i ti yɛ ɔ kpɛ mmla man e ɔ.”

Atin nga Ɲanmiɛn kle e klolɛ su’n, kɛ be fa su’n i su ye nga be ɲɛn i’n, amun kusu amun kwla ɲan wie. Biblu’n waan: “Sa nga Anannganman jran su kekle kɛ be yo be’n, be ti i su. Aklunjuɛ cɛ yɛ ɔ o sa sɔ’m be sin-ɔn. Nyanmiɛn i mmla’m be ti weiin, be yo maan sran wun sa wlɛ. [...] Sran ng’ɔ fa be su’n, ɔ nyan be su mmlusuɛ.”​—Jue Mun 19:9, 12.b

[Ja ngua lɛ ndɛ mun]

[Ndɛ kwle, bue 8]

Be nga be faman Biblu’n nun mmla’m be su’n, kpɛ sunman’n be fa awlabɔɛ’n yi sran su.

[Ndɛ kwle, bue 9]

Be nga be fa Biblu’n nun mmla’m be su’n be akunndan’n buman be fɔ, yɛ be nin be awlofuɛ’m be afiɛn mantan kpa.