?Ndɛ sɔ’n ti cinnjin?

“Kɛ n ɲannin afuɛ blu’n yɛ e nin yasua mun e sannin nun ɔn. I klikli nun’n, e tratra e sa nun ngbɛn. Asa kusu’n, e fa e nuan e wɔ e wiengu liɛ’n su. Sanngɛ kɛ ɔ wa juli i ɲrun’n, e nvialiɛ nun lika mun yɛ e wa kankannin be ɔ. Yɛ e fali e wun e wlali bian nin bla nna wafawafa sunman nun. Kɛ n ɲannin afuɛ 15, m boli junman dilɛ bo. Min junman’n su lɔ yasua’m be waan be nin min lá. N kunndɛli kɛ ń klé kɛ n sroman sa. I ti’n like kwlaa nga bé yó’n, e nin be ɔ. Kɛ mɔ n kunndɛli kɛ be klun jɔ min wun ti’n, n fali min wun wlali bian nin bla nna’n i wafa kaka nun.”​—SARA,a Ɔ FIN ƆSTRALI.

?SƐ BE se amun kɛ Sara i awlofuɛ’m be faman Ɲanmiɛn sulɛ’n be kanman ngowa’n, amún fá su? Sara i si nin i nin be miannin be ɲin be jrannin Biblu’n nun ndɛ’n su be tɛli i. Sanngɛ w’a faman su.

Sran sunman be kwla se kɛ Sara i aeliɛ’n yoli kpa. Afin be bu i kɛ bian nin bla nna’n i su ndɛ nga Biblu’n kan’n, ɔ ti lalafuɛ ndɛ. Wie’m be waan a kwla yo sran m’ɔ faman Ɲanmiɛn sulɛ’n kanman ngowa, kpɛkun a kwla kunndɛ bian annzɛ bla kɛ a fa klo’n sa.

?Ɔ ti cinnjin kɛ amun si bian nin bla nna’n i su ndɛ nga Biblu’n kan’n, naan amun fa su? Biblu’n bɔbɔ waan i nun ndɛ nga be klɛli’n, Ɲanmiɛn “bɔbɔ yɛ ɔ fɛ i kwlaa mannin sran mun yɛ be klɛli-ɔ. Be fa kle like.” (2 Timote 3:16) Ɔ maan, sɛ amun lafi su kɛ Ɲanmiɛn yɛ ɔ yili klɔ sran mun naan Biblu’n ti i nuan ndɛ’n, nn ɔ fata kɛ amun si bian nin bla nna’n i su ndɛ nga ɔ kan’n.

Sanngɛ sran wie’m be wunman bian nin bla nna’n i su ndɛ trele kun nga Biblu’n kan’n. Afin i su ndɛ nga Ɲanmiɛn sulɛ wafawafa’m be su kpɛnngbɛn’m be kan’n, mɔ be waan be taka Biblu’n su’n, be sansan be wun. I li bɔɔ ndɛ sɔ’n ti’n, asɔnun wie mɔ sran’m be kɔ be nun kpa’n, i nun sran’m be nuan sɛman.

Maan amun li amun yaci ndɛ nga sran’m be kan’n naan amun bɔbɔ amun kunndɛ aeliɛ sɔ’n, i su ndɛ nga Biblu’n kan’n. Sran’m be usa bian nin bla nna’n i su ndɛ nga Biblu’n kan’n, i su kosan. Kosan blu mɔ be ta be usa’n, bé wá tɛ́ be su ndɛ ng’ɔ́ bá lɛ’n nun. Bé jrán like nga Biblu’n kle i sakpasakpa’n su bé tɛ́ be su weinwein. Bian nin bla nna’n i su ndɛ kasiɛn nun’n, amún wá wún like nga ti yɛ ndɛ sɔ’m be su ajalɛ nga amun fa’n, be ti cinnjin’n.

[Ja ngua lɛ ndɛ’n]