Maan e suan Ɲanmiɛn Ndɛ’n nun like

?Biblu’n kle sa nga bé wá jú e ɲrun lɔ’n?

Ndɛ akpasua nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle e Biblu’n i bue nga e kwla kanngan nun naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.

1. ?Kɛ Biblu’n kán e ɲrun lɔ sa’m be ndɛ’n ɔ yiyi nun weinwein?

Ɲanmiɛn m’ɔ kwla like kwlaa yo’n, i kunngba cɛ yɛ ɔ kwla si e ɲrun lɔ sa’m be ngbɛsungbɛsu’n kwlaa ɔ. (Amɔs 3:7) I wie yɛle kɛ laa kpa lele’n, ɔ seli kɛ sran kun mɔ be flɛ i Mɛsi’n, annzɛ Klist’n ɔ́ bá. Abraamu m’ɔ ti Ɲanmiɛn sufuɛ kpa’n i osu’n nun yɛ Mɛsi’n fín bá ɔ. Ɔ́ dí famiɛn, yɛ ɔ́ yó maan klɔ sran nga be ɲin yi Ɲanmiɛn’n, bé yó kpa kɛ i nun mɔ Ɲanmiɛn yí klɔ sran’n sa. Fɔ su tranman be nun yɛ be su tɔman tukpacɛ. (Bo Bolɛ 22:18; Ezai 53:4, 5) I sɔ sran mɔ Ɲanmiɛn waan ɔ́ bá’n, Bɛtleɛmu lɔ yɛ bé wú i ɔ.​—An kanngan Mise 5:1 nun.

Mɛsi sɔ’n yɛle Zezi. Afuɛ ya nso tra su ka naan b’a wu i’n, Biblu’n kannin kɛ bla kun m’ɔ nin a siman bian’n yɛ ɔ́ wú i ɔ. Naan sran’m bé yó Mɛsi’n i finfin. Biblu’n kannin ekun kɛ ɔ́ fɛ́ i nguan’n tó sran sunman ti, naan ɔ nin aɲanbeunfuɛ’m be ndia’n yó kun. (Ezai 7:14; 53:3, 9, 12) Biblu’n se ekun kɛ aflunmun kun su yɛ Mɛsi’n fú wlú Zerizalɛmu klɔ’n nun ɔn, naan bé kpɛ́ i bo waka, bé yó i atɛ jɛtɛ 30. Ndɛ sɔ’n kwlaa kpɛnnin su sɛsɛsɛ.​—An kanngan Zakari 9:9 nin Zkr 11:12 nun.

2. ?Ɲanmiɛn kle blɛ trele nga sa wie’m bé jú’n?

Afuɛ ya nnun tra su ka naan Mɛsi’n w’a ba’n, Biblu’n kleli afuɛ trele ng’ɔ́ bá’n. Ɔ seli kɛ: “Like ng’ɔ fata kɛ a si i naan a wun i wlɛ’n yɛ ɔ o yɛ. Kɛ ɔ fɛ i cɛn mɔ be kannin Zerizalɛmufuɛ’m be sin salɛ ndɛ’n, ɔ nin Zerizalɛmu klɔ’n i uflɛ kpanlɛ ndɛ’n lele m’ɔ́ fá jú blɛ nga Mɛsi m’ɔ kle atin’n bá’n, ɔ ti blɛ nso ɔ nin blɛ ablesiɛn nin nɲɔn.” (Daniɛl 9:25, NW) Blɛ 7 nin blɛ 62 w’a yo blɛ 69. Blɛ kun ti afuɛ nso, ɔ maan blɛ sɔ’n i ngba’n w’a yo afuɛ 483. ?Afuɛ benin nun yɛ be boli afuɛ 483 i kalɛ bo ɔ? Biblu’n waan i nun nga Ɲanmiɛn i sufuɛ Neemi juli Zerizalɛmu m’ɔ boli klɔ’n i kplanlɛ bo’n, yɛ be boli i kalɛ bo ɔ. Laa Pɛrsifuɛ’m be su ndɛ’n kle kɛ afuɛ 455 ka naan b’a wu Zezi’n, yɛ i sɔ sa liɛ’n juli ɔ. (Neemi 2:1-5) Kɛ e fɛ i afuɛ sɔ’n nun mɔ e ka afuɛ 483, e ju e blɛ liɛ’n nun afuɛ 29 nun. Afuɛ sɔ’n nun yɛ be yoli Zezi i batɛmu ɔ, yɛ ɔ kacili Mɛsi’n niɔn. Ɔ maan ndɛ sɔ’n kpɛnnin su sɛsɛsɛ.

3. ?Ndɛ nga Biblu’n kannin be’n be su kpɛn su andɛ?

Zezi kannin kɛ e blɛ liɛ nga nun’n, sa cinnjin wie’m bé jú. Ɔ kannin Ɲanmiɛn Sielɛ’n i jasin fɛ’n mɔ bé bó’n, i ndɛ. Jasin fɛ sɔ’n yó maan asiɛ wunmuan’n su’n, sran nga be klo Ɲanmiɛn’n be wun fá be feke. Ɲanmiɛn Sielɛ’n núnnún mɛn tɛ nga e o nun yɛ’n.​—An kanngan Matie 24:14, 21, 22 nun.

Sa nga bé wá jú mɛn nga i awieliɛ blɛ’n nun’n, Biblu’n yiyili nun kunngunngun. Dɔ nga su’n, sran’m b’a si ninnge kpanngban yo. Ɔ maan e kwla se kɛ lika’n yó kpa. Sanngɛ Biblu’n waan sran’m bé sáci asiɛ’n. Alɛ nin awe nin asiɛ m’ɔ keje’n yɛ tukpacɛ m’ɔ sa ndɛndɛ’n be ti’n, ɲrɛnnɛn wá yó dan trá laa’n. (Lik 21:11; Sa Nglo Yilɛ 11:18) Sa kpa yolɛ’n su yoman sran’m be cinnjin kun. Blɛ kekle sɔ’n nun’n, Zezi i sɔnnzɔnfuɛ’m bé bó Ɲanmiɛn Sielɛ’n i jasin fɛ’n nvle kwlaa nun.​—An kanngan Matie 24:3, 7, 8 nin 2 Timote 3:1-5 nun.

4. ?Klɔ sran’m be liɛ’n yó sɛ ainman?

Ɲanmiɛn m’ɔ kwla like kwlaa yo’n w’a siesie ninnge kpakpa kpanngban kɛ ɔ́ fá mán sran kpa mun. Zezi Klist mɔ i yɛle Mɛsi’n, ɔ nin be nga Ɲanmiɛn kpali be’n, bé trán ɲanmiɛn su lɔ bé síe asiɛ’n. Be yɛ be ti Ɲanmiɛn Sielɛ’n i nun sran mɔ bé dí famiɛn afuɛ akpi’n niɔn. Blɛ sɔ’n nun’n, bé cɛ́n be nga be wuli’n. Kpɛkun sɛ be nanti seiin’n bé kwlá ɲán anannganman nguan. Asa ekun’n, Ɲanmiɛn Sielɛ’n yó maan blɛ sɔ’n nun sran’m be ngba bé yó juejue. Tukpacɛ’n nin wie’n be su tranman lɛ kun.​—An kanngan Sa Nglo Yilɛ 5:10 nin Ng 20:6, 12 ɔ nin Ng 21:4, 5 nun.

Sɛ amun kunndɛ kɛ amún sí nun ekun’n, an nian fluwa ?Ngue like yɛ Biblu’n kle i sakpasakpa ɔ? i bue 23-25 ɔ nin 197-201 nun. Zoova i Lalofuɛ mun yɛ be yili ɔ.