Biblu’n maan sran’m be kaci

?NGUE yɛ ɔ ukali bla kun mɔ wunnin i ɲrun i kaan nun’n naan w’a wun i wun fɛ-ɔ? ?Ngue yɛ ɔ uka politiki yofuɛ kun mɔ i ɲin ti kekle kpa’n naan w’a kaci jasin fɛ bofuɛ-ɔ? Amun kanngan be su ndɛ nga nun naan amun wun kosan sɔ’m be su tɛlɛ’n.

“N kunndɛli kɛ be kle kɛ be klo min, sanngɛ ngbɛn-ɔn.”—INA LEZNINA

BE WULI I AFUƐ 1981 NUN

Ɔ FIN RISI

I SU NDƐ’N: I KAAN NUN Ɔ WUNNIN I ƝRUN

MIN LAA NUN: Min si nin min nin be timan sa, yɛ kɛ be wu min’n n kusu n timan sa wie. Kɛ be wuli min lele mɔ n fa ɲan afuɛ nsiɛn’n n dili aklunjɔɛ kpa. Kpɛkun min si nin min nin be wa yrali. Blɛ sɔ’n nun’n, n ti kaan sɔ sanngɛ n wunnin sa ng’ɔ juli’n i wlɛ, yɛ ɔ yoli min ya kpa. Kɛ be yralɛ’n, min si nin min ɲrun kpɛn yasua’n be kali Troiski lɛ. Kpɛkun e nin min manmin e ɔli Celiabinski. Kɛ ɔ́ kɔ́ i ɲrun’n min manmin jali bian uflɛ. Bian sɔ’n ti nzanbɔɛfuɛ, blɛ sunman’n, ɔ bo min manmin yɛ ɔ bo min wie.

Afuɛ 1993 nun’n, min ɲrun kpɛn yasua’n wuli nzue nun. Nanwlɛ, sa sɔ’n boli e wla dan. Ɔ maan min manmin wa boli nzan nɔnlɛ bo, yɛ ɔ nin i wun be bo yoli kun be yoli min tɛtɛ. N kunndɛli kɛ be kle kɛ be klo min, sanngɛ ngbɛn-ɔn. N ɔli asɔnun kpanngban nun naan n kunndɛ fɔnvɔlɛ, sanngɛ m’an ɲɛnmɛn i.

WAFA NGA BIBLU’N NUN NDƐ UKALI MIN’N: Kɛ n ɲannin afuɛ 13, suklu lɔ’n min janvuɛ kun m’ɔ ti Zoova i Lalofuɛ’n ɔ kannin Biblu’n nun ndɛ wie mun kleli min. N klo Nowe nin Zɔbu be su ndɛ kpa. Afin kannzɛ bɔbɔ sa sunman tɔli be su’n, sanngɛ be suli Ɲanmiɛn kpa titi. W’a cɛman n boli Biblu’n nun like suanlɛ bo, yɛ n trannin aɲia’m be bo.

N sili Biblu’n nun ndɛ kpanngban. I wie yɛle kɛ n wunnin kɛ Ɲanmiɛn le dunman. I sɔ’n yoli min fɛ kpa. (Jue Mun 83:18) Kɛ n wunnin kɛ sa nga bé wá jú “mɛn’n i awieliɛ blɛ nun’n,” mɔ Biblu’n kan be ndɛ’n be kpɛn su sakpa’n, i sɔ’n boli min nuan. (2 Timote 3:1-5) Asa ekun’n, kɛ n wunnin kɛ be nga be wuli’n bé wá sá be sin nguan nun ekun’n, ɔ yoli min fɛ kpa. Amun bɔbɔ be nian, ń má wún min nian bian ekun!—Zan 5:28, 29.

Sanngɛ ninnge sɔ mɔ n si be’n mɔ n di su aklunjɔɛ’n, ɔ yoman sran ngba fɛ. Min manmin nin i wun be kloman Zoova i Lalofuɛ’m be sa. Ɔ maan be kunndɛli kɛ be yo naan n jran Biblu’n nun like suanlɛ’n. Sanngɛ kɛ mɔ n klo like nga n suan ti’n, m’an yaciman Biblu’n nun like suanlɛ’n.

Kɛ ɔ ko yo naan m’an jran min awlofuɛ’m be ɲrun kekle’n, w’a yoman pɔpɔ. Sa kun m’ɔ boli min wla dan ekun’n, yɛle kɛ min sinma yasua mɔ e nin i e kɔ aɲia’m be bo’n i kusu ɔ wa wuli nzue nun wie. Sa kwlaa sɔ’m be nun’n aniaan’m be suannin min bo titi. I lɛ nun’n, n ɲannin like nga n kunndɛ’n, yɛ kɛ be kleli kɛ be klo min. Ɔ maan n wunnin i wlɛ kɛ be yɛ be ti Ɲanmiɛn i sufuɛ kpa mun-ɔn. I sɔ’n ti’n, afuɛ 1996 nun’n be yoli min batɛmun.

I SU YE NGA N ƝƐNNIN I’N: N ɲannin bian kpa kun, be flɛ i kɛ Dimitri. E nin i e jali i afuɛ nsiɛn yɛ. Yɛ e di junman Petɛɛsbu lɔ Betɛli’n nun. Kɛ ɔ́ kɔ́ i ɲrun’n, min awlofuɛ’m b’a tanndanman min ɲrun kun.

Kɛ n si Zoova’n, i sɔ’n yo min fɛ kpa! I sulɛ’n ukali min maan n ma wunnin min wun fɛ.

“N usali min wun kosan kpanngban.”—RODƐLI RODRIGUE RODRIGUE

BE WULI I AFUƐ 1959 NUN

Ɔ FIN KIBA

I SU NDƐ’N: Ɔ TI POLITIKI YOFUƐ YƐ I ƝIN TI KEKLE

MIN LAA NUN: Be wuli min Kiba klɔ nga be flɛ i kɛ Avanin’n su lɔ. E tran yalɛfuɛ’m be lika kun nun. Lɔ yɛ n ɲinnin-ɔn. Lika sɔ’n nun lɔ’n, sran’m be ta utre di akpɔ’m be nuan. Ɔ maan kɛ ń ɲín kɔ́’n, n ma kloli ngondin tulɛ nga be si nun akplowa’n ɔ nin i wunsu ninnge wie mun ekun.

N si fluwa kpa. I sɔ’n ti’n, min si nin min nin be wlali min fanngan kɛ n wɔ inivɛsite. Kɛ n juli lɔ’n, n wunnin kɛ like nga e nvle’n i siefuɛ’m be yo’n ɔ timan su naan ɔ fata kɛ ninnge wie’m be kaci. Ɔ maan n boli ɲin kekle yolɛ bo. Cɛn kun’n, e nin min wiengu suklu ba kun e tɔli polisie kun su naan e de i tui’n. Like yaya kpa yoli i ti’n. Sa sɔ’n ti’n, be wlali e bisua. Jɔlɛ difuɛ’m be seli kɛ e su fiteman kun le naan be kun e lɔ. Blɛ sɔ’n nun’n, nn n le afuɛ 20 cɛ, kpɛkun n su wa wu.

Kɛ min ngunmin o bisua lɔ min sua ba nun’n, n buli blɛ mɔ bé wá kún min’n like nga ń yó’n i akunndan. N kunndɛman kɛ n kle kɛ srɛ kun min. Blɛ sɔ’n nun’n, n usali min wun kosan kpanngban. N usali min kɛ: ‘?Ngue ti yɛ sran lufle bulɛ’n w’a tru mɛn’n nun sɔ-ɔ? ?Mɛn ng’ɔ fata kɛ e di’n yɛle nga?’

WAFA NGA BIBLU’N NUN NDƐ UKALI MIN’N: Kasiɛn su’n, be wa seli e kɛ be su kunman e bisua lɔ kun, sanngɛ é dí afuɛ 30 lɔ naan b’a yaci e nun. Blɛ sɔ’n nun yɛ n wunnin Zoova i Lalofuɛ wie mun-ɔn. Ɲanmiɛn su mɔ be lafi’n i ti yɛ be wlali be bisua-ɔ. N wunnin kɛ be ti yakpafuɛ, sanngɛ be ti wɛtɛɛfuɛ, i sɔ’n boli min nuan dan. Kannzɛ bɔbɔ b’a yoman sa tɛ fi yɛ be wlali be bisua’n, sanngɛ be faman ya yɛ be yoman be ɲin wiwi.

Be seli min kɛ sa kun ti yɛ Ɲanmiɛn yili klɔ sran mun-ɔn. Be fali Biblu’n be kleli min kɛ Ɲanmiɛn w’a yo maan asiɛ’n kaci lika klanman kpa kun, naan sran’m be su yoman nzaje sa’m be kun yɛ be su buman be wiengu’m be lufle kun. Kpɛkun be seli min kɛ sran kpa’m be ngunmin yɛ bé wá trán asiɛ’n su-ɔ. Yɛ be su wuman kun, be tran nguan nun tititi, fɔ’n su tranman be nun kun.—Jue Mun 37:29.

Ndɛ nga Zoova i Lalofuɛ sɔ’m be kannin’n, ɔ yoli min fɛ. Sanngɛ n lafiman su kɛ min nzuɛn’n kwla yo kɛ be liɛ’n sa. N seli min wun kɛ n su kwlá yaciman politiki yolɛ, annzɛ n su kwlá kaciman. Ɔ maan n fali ajalɛ kɛ min ngunmin n kanngan Biblu’n nun. Kɛ n wieli nun kanngan’n, n wunnin i wlɛ kɛ Zoova i Lalofuɛ be ngunmin yɛ be yo kɛ Klisifuɛ klikli’m be sa-ɔ.

Biblu’n nun like suanlɛ’n ukali min maan n wunnin i wlɛ kɛ ɔ fata kɛ n kaci mlɔnmlɔn. I wie yɛle kɛ ɔ fata kɛ n kaci wafa nga n kan ndɛ kle min wiengu mun’n. Afin n kanman ndɛ amanniɛn su. Asa’n, ɔ fata kɛ n yaci siklɛti nɔn. Yɛ n yaci politiki yolɛ. I sɔ yolɛ’n w’a yoman pɔpɔ, sanngɛ Zoova fanngan nun’n, blɛblɛblɛ n kwla kacili.

Like nga i yolɛ’n yoli kekle kpa min sa nun’n yɛle wɛtɛɛ yolɛ’n. N te srɛ Zoova kɛ ɔ uka min naan n kwla nian min wun su titi. Ɲanndra Mun 16:32 i nun ndɛ’n ukali min kpa. Ɔ se kɛ: “Sran ng’ɔ faman ya ndɛndɛ’n i kpa tra safuɲrɛn, yɛ sran nga kɛ be klɔklɔ i’n ɔ trɛ i awlɛn’n, i kpa tra sran ng’ɔ utu klɔ kun’n.”

Afuɛ 1991 nun be yoli min batɛmun. Be yoli min batɛmun’n bisua lɔ nzue guawlɛ kun nun. Afuɛ ng‘ɔ suli i su nun’n be yacili e nun wie mun e nun yɛ be fali e ɔli Ɛpaɲi, afin e osufuɛ wie’m be o lɔ. Kɛ n juli Ɛpaɲi lɔ cɛ‘n, n boli Zoova i Lalofuɛ’m be aɲia’m be bo tranlɛ. Aniaan nga be o lɔ’n be sɔli min nun kɛ e nin be o lɔ w’a di afuɛ kpanngban sa. Be ukali min naan m’an kwla wun min wun fɛ lika sɔ’n nun lɔ.

I SU YE NGA N ƝƐNNIN I’N: Andɛ’n n di aklunjɔɛ, e nin min yi nin e wa bla mun e su Zoova. Kɛ n wun kɛ n fa min blɛ’n i dan lika n uka sran mun naan be si Biblu’n nun ndɛ’n, i sɔ’n yo min fɛ kpa. Ɔ ju wie’n, n bu blɛ mɔ be seli kɛ be kun min’n i akunndan, kpɛkun kɛ wu like nga n yo i andɛ’n, min klun jɔ dan. Andɛ’n, n o nguan nun yɛ n le like n fa min wla gua su. Min ɲin o blɛ mɔ é trán min klanman’n nun’n i sin kpa. Blɛ sɔ’n nun’n, be su buman sran’m be lufle kun yɛ “wie’n su tranman lɛ kun.”—Sa Nglo Yilɛ 21:3, 4.

[Ndɛ klɛ]

“N wunnin kɛ Ɲanmiɛn le dunman. I sɔ’n yoli min fɛ kpa.”

[Foto]

E nin min wun e fa sutrefuɛ’m be fluwa mun e kle sutrefuɛ’m be like. E klo i sɔ yolɛ kpa.