“?Wan li wun yɛ srɛ tɛ kun min-ɔn?”
“Kɛ bé fá alɛ wlá min sin’n, wuun blɛ li yɛ min wla’n ɔ su gua ase-ɔ.”—JUE. 27:3.
?WAFA SƐ YƐ NDƐ MMA NGA’M BE KWLA UKA E NAAN Y’A YO YAKPAFUƐ Ɔ?
1. ?Kosan benin mun yɛ Jue Mun ndɛ tre 27 wá úka e maan é tɛ́ su ɔ?
?NGUE ti yɛ e wla e wun ase e bo jasin’n fɛ’n i kpa kusu nn mɛn’n su yo tɛ kɔ i ɲrun ɔn? ?Ngue ti yɛ aklunjuɛ su, e fa e blɛ nin e wunmiɛn’n e bo jasin fɛ’n kusu nn sika ndɛ’n ti kekle mɛn’n nun ɔn? ?Kannzɛ e ɲrun lɔ sa’m be wun srɛ kun sran kpanngban’n, ngue yɛ e kwla yo naan y’a yo yakpafuɛ titi ɔ? Jue Mun ndɛ tre 27 mɔ Ɲanmiɛn maan Famiɛn Davidi klɛli’n, ɔ tɛ kosan sɔ’m be su.
2. ?Srɛ’n kwla yo maan sran kun i wun kwla yo i sɛ? ?Sanngɛ ngue yɛ e kwla lafi su ɔ?
2 Jue sɔ’n i bo bolɛ nun’n, Davidi seli kɛ: “Anannganman ti min kannin nin min defuɛ. ?Wan yɛ n tɛ sro i ekun-ɔn? Anannganman ti min nguan’n i nun trafuɛ. ?Wan li wun yɛ srɛ tɛ kun min-ɔn?” (Jue. 27:1) Srɛ’n kwla yo maan sran wun glɔglɔ i lele maan ɔ kwlaman like fi sa yo kun. Sanngɛ sran ng’ɔ fɛ i wla gua Zoova su’n ɔ yo yakpafuɛ yɛ srɛ kunmɛn i lele maan i wun glɔglɔmɛn i. (1 Piɛ. 3:14) Sɛ e fa Zoova e yo e fiawlɛ’n, é ‘trán fɔundi tranlɛ, sa tɛ kaan sa su nyan-man e.’ (Nya. 1:33; 3:25) ?Ngue ti ɔ?
“ANANNGANMAN TI MIN KANNIN NIN MIN DEFUƐ”
3. ?Ngue ti yɛ e kwla se kɛ Zoova ti e kannin ɔn? ?Sanngɛ ngue yɛ ɔ fata kɛ e bɔbɔ e yo ɔ?
3 Jue tofuɛ’n seli kɛ: “Anannganman ti min kannin.” I ndɛ sɔ’n kle kɛ Zoova kle e nanwlɛ’n. (Jue. 27:1) Kannin’n kpaja e ɲrun atin’n su maan sɛ like tɛ wie o e bo’n e wun i. Sanngɛ ɔ yiman like sɔ’n. E bɔbɔ yɛ ɔ fata kɛ e nian e wunsu like sɔ’n i lika ɔ. I wafa kunngba’n, sa nga be ju andɛ’n, Zoova tu be bo kle e. Ɔ kle e mɛn nun ninnge ng’ɔ fata kɛ e nian e wunsu be lika’n. Biblu’n nun’n, ɔ man e afɔtuɛ kpa mɔ blɛ kwlaa nun’n, be kwla yo e wun sa ye ɔ. Sanngɛ be su falɛ wo e sa nun. Jue tofuɛ’n waan Ɲanmiɛn i mmla’m be su falɛ maan ɔ yoli ngwlɛlɛfuɛ trali i kpɔfuɛ nin i ngwlɛlɛ klefuɛ mun. Sɛ e fa Ɲanmiɛn i mmla’m be su’n, e kwla yo ngwlɛlɛfuɛ kpa wie.—Jue. 119:98, 99, 130.
4. (a) ?Ngue ti yɛ Davidi kwla seli kɛ Zoova ti i defuɛ ɔ? (b) ?Blɛ benin nun yɛ Zoova wá yí i nglo kpa kɛ ɔ ti e defuɛ ɔ?
4 Ndɛ nga Davidi kɛnnin i Jue Mun 27:1 nun’n ɔ kle kɛ wafa nga Zoova deli i sa fanunfanun nun laa’n, i wla w’a fiman su. I wie yɛle kɛ Zoova deli i “asɔmɔli mun nin urs’m” be sa nun. Asa kusu’n, Zoova yoli maan ɔ kwlali Goliati m’ɔ ti sran jajraja kpa’n. I sin, blɛ kwlaa nga Famiɛn Saili kunndɛli kɛ ɔ́ fá cua kún i’n, Zoova deli i. (1 Sam. 17:37, 49, 50; 18:11, 12; 19:10) I sɔ’n ti’n, Davidi seli kɛ Zoova ti ‘i defuɛ.’ Kɛ nga Zoova fa yoli Davidi i defuɛ sa’n, ɔ́ wá yó i sufuɛ’m be defuɛ wie. ?Blɛ benin nun? “Afɛ dan’n” m’ɔ su wa ba’n nun yɛ ɔ́ yó i sɔ ɔ.—Ngl. 7:14; 2 Piɛ. 2:9.
MAAN E WLA KPƐN BLƐ KWLAA NGA ZOOVA UKALI E’N SU
5, 6. (a) ?Wafa sɛ yɛ e wla m’ɔ kpɛn laa sa’m be su’n, ɔ uka e naan y’a yo yakpafuɛ ɔ? (b) ?Ngue ti yɛ ɔ ti kpa man e kɛ e bu wafa nga laa’n Zoova ukali i sufuɛ mun’n i akunndan ɔn?
5 Jue Mun 27:2, 3 fa e ɲin sie i like cinnjin kpa kun mɔ e kwla yo naan y’a yo yakpafuɛ kpa ekun’n i su. (An kanngan nun.) Davidi i wla kpɛnnin blɛ kwlaa nga Zoova ukɛli i’n su. (1 Sam. 17:34-37) I sɔ’n ti’n, ɔ ɲannin wunmiɛn naan w’a kwla trɛ i awlɛn sa nga be kekle liɛ’n tra laa liɛ mun’n be nun. ?Kɛ amun wla kpɛn wafa nga laa’n Zoova ukali amun su’n, i sɔ’n wla amun yakpa wie? Kɔlɛ sa wie m’ɔ boli amun wla’n ti’n, amun srɛli Zoova tankaan kpa yɛ Zoova mannin amun akunndan annzɛ wunmiɛn naan amun wun i trawlɛ. ?Sa wie mɔ be ti’n ɔ yoli kekle mannin amun kɛ amun su Zoova aklunjuɛ nun’n, wafa nga Zoova yoli maan amun ɲannin amun ti sa sɔ’m be nun’n, amun wla kwla kpɛn su? ?Wafa ng’ɔ mannin amun atin naan amun a kwla di i junman wafa wie mun’n, amun wla kwla kpɛn su? (1 Kor. 16:9) ?Kɛ amun bu sa sɔ’m be akunndan’n, wafa sɛ yɛ amun wun yo amun ɔn? ?I sɔ’n ukaman amun naan amun a lafi su titi kɛ sɛ sa wie mɔ be kekle tra nga amun wunnin be laa’n be tɔ amun su’n, Zoova yó maan amún wún be trawlɛ?—Rɔm. 5:3-5.
6 ?Sɛ awa kun m’ɔ le kwlalɛ kpa’n jaso kɛ ɔ́ núnnún Zoova i Lalofuɛ kwlaa nga be o asiɛ’n su’n, ngue yɛ amún yó ɔ? E blɛ liɛ nga nun’n, sran wie’m be jasoli kɛ bé yó sɔ, sanngɛ w’a yoman ye. Sɛ e wla kpɛn wafa nga laa’n Zoova ukali i sufuɛ mun’n i su’n, i sɔ’n wlá e yakpa naan y’a jran kekle e ɲrun lɔ sa’m be kwlaa be ɲrun.—Dan. 3:28.
ƝANMIƐN SULƐ KPAFUƐ’N I KLOLƐ
7, 8. (a) ?Kɛ nga Jue Mun 27:4 fa kan’n sa’n, ngue yɛ Davidi srɛli i Zoova sa nun ɔn? (b) ?Ngue yɛ be flɛ i Zoova i sua mɔ nán sran yɛ ɔ kplannin’n niɔn? ?Yɛ wafa sɛ yɛ be su Ɲanmiɛn sua sɔ’n nun ɔn?
7 Ɲanmiɛn sulɛ kpafuɛ’n i klolɛ’n kwla wla e yakpa wie. (An kanngan Jue Mun 27:4 nun.) Davidi blɛ su’n, tannin sua’n yɛ ɔ ti Zoova “i sua’n” niɔn. Davidi bɔbɔ yɛ ɔ fali ajalɛ naan i wa Salomɔn w’a kplan sua kpakpa kun w’a man Zoova ɔ. Kɛ ɔ dili afuɛ ya kpanngban’n, Zezi kleli kɛ blɛ kun wá jú’n, ɔ su yoman cinnjin kɛ sran’m be ko su Zoova i sua’n nun lɔ naan i klun w’a jɔ sulɛ nga be su i’n su. (Zan 4:21-23) Zoova fali ajalɛ naan y’a kwla su i kɛ ng’ɔ fa klo’n sa. Sɛ e lafi e ti kpɔlɛ tɛ nga Zezi yili’n su’n, yɛ ɔ́ sɔ́ sulɛ nga e su i’n nun ɔn. Ebre Mun ndɛ tre 8 m’ɔ́ fá jú 10 nun’n, akoto Pɔlu seli kɛ i sɔ ninnge mɔ Zoova siesieli’n yɛ be flɛ i Ɲanmiɛn sua mɔ “nán sran yɛ ɔ kplannin” mɔ e kwla su Ɲanmiɛn nun’n niɔn. Pɔlu yiyili nun kɛ kɛ be yoli Zezi i batɛmu afuɛ nga be flɛ i 29 nun’n mɔ Zezi fɛli i wun mannin kɛ ɔ́ yó Zoova i klun sa’n yɛ Ɲanmiɛn i sua sɔ’n takali ɔ. (Ebr. 10:10) ?Wafa sɛ yɛ e su Ɲanmiɛn sua sɔ’n nun ɔn? Yɛle kɛ e srɛ Ɲanmiɛn yɛ ‘kɛ é yó sɔ’n, akunndan tɛ nunman e klun, [yɛ] e lafi i su kpa.’ I wie ekun yɛle jasin fɛ mɔ e bo e kle sran mun yakpa su’n. Asa ekun’n, kɛ e nin wiengu Klistfuɛ mun e yo aɲia asɔnun sua’n nun lɔ’n mɔ kusu e su Ɲanmiɛn awlo lɔ’n, nn e su su Ɲanmiɛn i sua sɔ’n nun. (Ebr. 10:22-25) Sɛ e klo Ɲanmiɛn sulɛ kpafuɛ’n, i sɔ’n úka e naan blɛ kekle nga nun’n, y’a kwla yo i sɔ ninnge mun titi.
8 Asiɛ’n i bue kwlaa su’n, Zoova i sufuɛ kpa’m be uka blɛ nga be fa bo jasin fɛ’n su. Be suan aniɛn uflɛ. Asa kusu’n, be ko bo jasin fɛ’n lika nga jasin bofuɛ’m b’a sɔnman lɔ’n nun. Kɛ jue tofuɛ’n sa’n, be aeliɛ’n kle kɛ like kunngba cɛ yɛ be srɛ i Zoova sa nun ɔn. Yɛle kɛ Zoova i ɲɛnmɛn m’ɔ yo’n ti’n, be klo kɛ bé kánnvu i, naan kusu’n kannzɛ lika’n yó sɛ ɔ́ yó sɛ’n bé sú i titi.—An kanngan Jue Mun 27:6 nun.
MAAN E LAFI SU KƐ ƝANMIƐN ÚKA E
9, 10. ?Nda benin yɛ Jue Mun 27:10 ta e ɔ?
9 Ndɛ nga Davidi kannin’n, ɔ yi i nglo kɛ ɔ lafi su kpa kɛ Zoova úkɛ i. Ɔ seli kɛ: “Sɛ bɔ min si nin min nin be yi min blo’n Anannganman ɔ́ fá min síe.” (Jue. 27:10) Ndɛ ng’ɔ o 1 Samiɛl ndɛ tre 22 nun’n maan e kwla se kɛ Davidi i si nin i nin b’a yimɛn i blo. Sanngɛ andɛ’n, sran kaka kpa be osufuɛ’m be yi be blo. Be nun sunman kpa be ɲannin ukalɛ asɔnun’n mɔ i nunfuɛ’m be klo sran kpa’n i nun. Ɔ maan be wla guali ase.
10 Zoova suan i sufuɛ nga be fuɛ’m be yi be blo’n be bo. Ɔ maan e kwla lafi su kɛ sɛ sa kekle wafa uflɛ tɔ be su’n, ɔ́ súan be bo wie. Sɛ wie nun ɔn, e wunman wafa nga e ko yo naan y’a nian e awlobofuɛ’m be lika’n, maan e lafi su kɛ Zoova úka e. (Ebr. 13:5, 6) Ɔ wun sa ng’ɔ o e su’n i wlɛ yɛ ɔ si ninnge nga e mian be wun’n.
11. ?Kɛ sran’m be wun wafa nga e lafi Zoova su’n, ɔ yo be sɛ? An fa sa kun yiyi nun.
11 Maan e nian Biblu’n nun like suanfuɛ kun m’ɔ suan Viktoria i su sa’n. Ɔ tran Liberia lɔ. Kɛ i batɛmu yolɛ’n wá mántan’n, bian ng’ɔ nin i be o nun’n, ɔ kpɔcili i. Kusu nn ba nsan wo i sa nun. Kannzɛ bɔbɔ ɔ leman sua yɛ ɔ leman junman’n, ɔ suannin Biblu’n nun like ɔli i ɲrun titi. Kɛ be yoli Viktoria i batɛmu’n, i wa bla m’ɔ le afuɛ 13 ɔ fali pɔtɔmannin kun ase. I nun sika’n timan blɛblɛ. Kɛ ɔ ko yo naan be konvi w’a sɔman sika sɔ’n, b’a seman kɛ bé ká naan bé sí i nuan bɔbɔ. Ndɛndɛ kpa’n, be kunndɛli sonja nga i liɛ yɛle pɔtɔmannin’n. Sonja’n seli be kɛ sɛ ɔ ti kɛ sran’m be ngba be ti seiinfuɛ kɛ Zoova i Lalofuɛ’m be sa’n nn asiɛ wunmuan’n su’n, lika’n yó kpa yɛ sran’m bé trán fɔundi nun. Kɛ ɔ yoli sɔ’n, Viktoria fali Biblu’n kleli sonja’n kɛ Zoova w’a ta ndɛ kɛ ɔ́ mán e mɛn uflɛ kun. Viktoria i seiin m’ɔ nanti’n, ɔ nin Ɲanmiɛn su m’ɔ lafi’n ɔ boli bian’n i nuan dan. I ti’n, ɔ fali sika sɔ’n i wie lɔun kpa cɛli i. Asiɛ wunmuan’n su’n, sran’m be si kɛ Zoova i Lalofuɛ’m be ti ndɛnmanfuɛ. Be seiin mɔ be nanti’n, ɔ fin Zoova i su mɔ be lafi kpa kɛ ɔ́ nían be lika’n.
12. ?Kannzɛ bɔbɔ ninnge wie’m be kwla fi e sa’n, kɛ e kpɔciman Zoova’n, ngue yɛ e yi i nglo ɔ? An fa sa kun yiyi nun.
12 Wafa nga Toma m’ɔ ti jasin bofuɛ kun mɔ be nin a yomɛn i batɛmu’n i wun fa yoli i’n, maan e kɛn i ndɛ wie e nian. Ɔ tran Siera Leɔni lɔ. Ɔ boli like klelɛ bo kolɛzi kun nun. Sanngɛ lele m’ɔ́ fá di afuɛ kun’n, be nin a tanninmɛn i kalɛ. Ɔ nin i fata kɛ Toma nin suklu’n su kpɛn’n be wun be wun be koko yalɛ kwlaa naan b’a fɛ i akatua’n b’a mɛn i. Suklu’n su kpɛn sɔ’n ti Plɛti. Ɔ seli Toma kɛ mmla nga be suklu’n nun lɔ be di be su’n be nin ninnge nga Zoova i Lalofuɛ’m be lafi su’n be kɔman likawlɛ. Ɔ seli Toma kɛ sɛ i waan nán i junman’n fi i sa’n, maan ɔ kpɔci Zoova i Lalofuɛ mun. Kannzɛ bɔbɔ b’a faman Toma i afuɛ ko yo kun akatua’n b’a mɛnmɛn i’n, sanngɛ ɔ yacili i junman’n, ɔ ko kunndɛli junman uflɛ. Yɛle kɛ ɔ siesieli aladio nin selilɛli nga b’a saci’n be ye. Sa kɛ ngalɛ sa’n be sɔnnin. Be kle kɛ sɛ e lafi Zoova su’n, ɔ fataman kɛ srɛ kun e kɛ e su ɲanman ninnge nga be mian e sa’n. Kɛ mɔ Zoova ti like kwlaa yifuɛ’n mɔ kusu’n ɔ niɛn i sufuɛ’m be su’n ti’n, e si kɛ ɔ́ nían e lika.
13. ?Wafa sɛ yɛ nvle nga i nunfuɛ’m be sa nun yoman fɛ’n nun’n, jasin fɛ’n bolɛ junman’n, ɔ kɔ i ɲrun ɔn?
13 Nvle nga i nunfuɛ’m be sa nun yoman fɛ’n, be nun sunman nun’n, aniaan’m be wla be wun ase be bo jasin fɛ’n. ?Ngue ti ɔ? Betɛli kun klɛli i kɛ: “Be nga be kplin su kɛ be kle be Biblu’n nun like’n, be nun kaka be leman junman. I sɔ’n ti’n, aliɛ ba kun nun sa’n, be le blɛ kpanngban be fa suan like. Aniaan’m be kusu be le jasin fɛ’n bolɛ i wun blɛ kpanngban. Kɛ e se sran’m be kɛ e wo mɛn i bue nuan’n, be fa su ndɛndɛ afin be bɔbɔ be wun afɛ ng’ɔ o be lika’n nun lɔfuɛ’m be su’n.” Nvle kun nun’n, jasin bofuɛ’m be tinuntinun be kle sran 3 tra su be Biblu’n nun like. Ngaliɛ difuɛ kun mɔ w’a di afuɛ 12 tra su nvle sɔ’n nun lɔ’n, ɔ klɛli i kɛ: “Kɛ mɔ jasin bofuɛ kaka be sa nun ninnge’m b’a sɔnman’n mɔ ninnge nga be kwla fa be ɲin sie i like uflɛ su’n b’a sɔnman’n ti’n, be le blɛ kpanngban be fa bo jasin fɛ’n yɛ be fa kle sran’m be Biblu’n nun like.”
14. ?Wafa sɛ yɛ Ɲanmiɛn wá sásá sran kpanngban kpa mun ɔn?
14 Zoova tali nda kɛ ɔ́ úkɛ i nvle’n, naan kusu ɔ́ sɛ́sɛ́ i, yɛ ɔ́ dé i. E lafi su kɛ ɔ́ yó i sɔ kusu. (Jue. 37:28; 91:1-3) Be nga bé wá ɲán be ti “afɛ dan’n” nun’n, be sɔnnin kpa. (Ngl. 7:9, 14) I sɔ’n kle kɛ Ɲanmiɛn sásá sran kpanngban kpa sɔ mun. Yɛle kɛ Ɲanmiɛn su kplinman su kɛ sran kun sa, ɔ nunnun i nvle nunfuɛ’m be kwlaa mɛn’n i awieliɛ blɛ’n nun. Zoova mán be ninnge kwlaa ng’ɔ ti mɔ be ɲɛn i naan b’a kwla tra be awlɛn sa kekle’m be nun naan be nin i be afiɛn w’a saciman’n. Yɛ Armagedɔn alɛ nun’n, Zoova dé be.
“ANANNGANMAN, KLE MIN WƆ ATIN’N”
15, 16. ?Kɛ e fa ndɛ nga Zoova kan kle e’n su’n, suyralɛ benin yɛ e ɲɛn i ɔ? An fa sa kun yiyi nun.
15 Sɛ e waan é yó yakpafuɛ titi’n, ɔ fata kɛ e lo e wun naan Ɲanmiɛn kle e like titi. I sɔ liɛ’n i ɲin fite Davidi i srɛlɛ nga nun. Ɔ seli kɛ: “Be bɔ be klo-man min sa’n be ti, Anannganman, kle min wɔ atin’n, yɛ fa min sin atin kpa’n su.” (Jue. 27:11) Sɛ e waan é yó srɛlɛ sɔ’n i nuan su sa’n, ɔ fata kɛ e fa e ɲin e sie ndɛ nga Biblu’n nin Zoova i anuannzɛ’n be kan’n, be su kpa. Yɛ ndɛndɛ kpa’n, e yo be nuan su sa. Aniaan kpanngban be yoli sɔ. Yɛle kɛ ngwlɛlɛ ndɛ nga be kan kleli be kɛ be kpɔci be sa nun ninnge wie mun’n, be fali su. Be tuatuali be wun kalɛ mun. Yɛ be yoli be bo ninnge nga be timan cinnjin’n be atɛ. I sɔ’n ti’n, kɛ koko nun wa’n sika ndɛ’n jrannin kpa’n, b’a kokoman dan. Siɛn’n, b’a mianman kɛ be di junman lele be fa tuatua ninnge nga be timan cinnjin’m be kalɛ. Ɔ maan be kwla uka be jasin bolɛ junman’n su. Ɔ fata kɛ e tinuntinun e usa e wun kɛ: ‘?Biblu’n ɔ nin fluwa nga sran kpa nanwlɛfuɛ m’ɔ si ngwlɛlɛ’n yi be’n, be nun ndɛ nga n kanngan’n, kannzɛ be su falɛ’n ti kekle man min’n, n ka lɛ n fa be su?’—Mat. 24:45.
16 Sɛ e kplin su kɛ Zoova kle e like naan ɔ kle e wafa ng’ɔ fata kɛ e yo ninnge mun’n, srɛ su kunman e like fi wun. Amlɛnkɛn’m be mɛn’n nun lɔ’n, aniaan kun m’ɔ ti titi atin bofuɛ’n, ɔ kunndɛli kɛ be mɛn i sa su i junman su lɔ naan w’a kwla niɛn i awlobofuɛ’m be lika naan be kwlakwla b’a kwla ka atin bofuɛ. Sanngɛ i junman su kpɛn’n seli i kɛ, kɛ mɔ w’a diman suklu lele w’a juman inivɛsite’n ti’n ɔ su ɲɛnmɛn i sɔ junman le. ?Sɛ be se amun sɔ’n, suklu mɔ amun a diman b’a juman mmua mɔ amun kacili atin bofuɛ’n, i sɔ’n yó amun nsisɔ? Kɛ sa sɔ’n dili le mɔcuɛ nɲɔn’n, be tuli junman su kpɛn sɔ’n kpɛkun sran uflɛ wa kacili i. Yɛ ɔ usali aniaan i kɛ ngue yɛ ɔ kunndɛ kɛ ɔ́ yó ɔ. E niaan’n seli bian’n kɛ ɔ nin i yi be ti Zoova i Lalofuɛ naan be ti blɛ kwlaa nun Ɲanmiɛn junman difuɛ. Yɛ ɔ kan guali su kɛ be kunndɛ kɛ bé dí junman sɔ’n titi. Aniaan i nuan w’a tɔman kpɛkun bian’n seli i kɛ: “N si kɛ amun timan kɛ sran nga’m be sa! I nun nga min si o wie bɛ su’n, cɛn kwlaa’n, amun niaan’m be nun nɲɔn be ba be w’a kanngan Biblu’n nun kle i. N tali min wun nda kɛ sɛ n ɲan Zoova i Lalofuɛ’m be nun kun i ukalɛ i wun atin’n, saan ń úkɛ i.” I aliɛ m’ɔ́ cɛ́n’n, aniaan’n ɲannin junman nga mɔ i junman su kpɛn laa liɛ’n waan ɔ mɛnmɛn i’n. Sɛ e fa Zoova i junman’n e sie i like kwlaa ɲrun’n, nda nga ɔ tɛli i kɛ ɔ́ mán e like kwlaa nga e miɛn i wun’n, ɔ́ yíɛ i nuan kusu.—Mat. 6:33.
Ɔ FATA KƐ E LAFI ƝANMIƐN SU
17. ?Ngue yɛ ɔ́ úka e naan e ɲrun lɔ sa’m be ti’n, srɛ w’a kunman e ɔ?
17 Like nga ti yɛ ɔ ti cinnjin kpa kɛ e lafi Ɲanmiɛn su’n, Davidi tinnin su kpa kleli e. Ɔ seli kɛ sɛ ɔ ti kɛ ɔ “lafi-man su kɛ Anannganman yi i klun-ufue’n nglo’n” nn ɔ leman like kpa kun sa m’ɔ́ fɛ́ i wla gúa su ɔ. (Jue. 27:13) ?Nanwlɛ, sɛ ɔ ti kɛ Ɲanmiɛn w’a yoman naan y’a kwla lafi like kpa kun su’n, yɛ sɛ ɔ ti kɛ y’a siman ndɛ nga be o Jue Mun 27 nun’n, nn é yó e liɛ sɛ? Ɔ maan, mɛn’n i awieliɛ blɛ nga nun’n, maan e srɛ Zoova titi naan ɔ man e wunmiɛn yɛ maan e srɛ i kɛ ɔ de e Armagedɔn alɛ’n nun.—An kanngan Jue Mun 27:14 nun.
[Foto, bue 23]
Kɛ Davidi i wla kpɛnnin wafa nga Zoova deli i su’n, i sɔ’n wlɛli i yakpa.
[Foto, bue 25]
?Kɛ sika ndɛ’n jran kekle’n, e wun i wlɛ kɛ e kwla fa e blɛ’n e bo jasin fɛ’n?