Sro Ɲanmiɛn naan yo ngwlɛlɛfuɛ!

‘Angunndan’n i bo bowlɛ’n, ɔ fin be ɲin m’ɔ yi Anannganman’n.’—NYANNDRA MUN 9:10.

1. ?Ngue ti yɛ sran sunman be wunman Ɲanmiɛn srolɛ’n, i wlɛ ɔ?

LAA’N, sran ng’ɔ sro Ɲanmiɛn’n, be yi i ayɛ. Sanngɛ siɛn’n, Ɲanmiɛn srolɛ’n timan sran’m be ndɛ. Be wunmɛn i wlɛ bɔbɔ. Be waan: “?Sɛ Ɲanmiɛn ti sran klofuɛ’n niɔn, i srolɛ ekun liɛ tre?” Afin be liɛ’n, be waan sɛ be sro sran’n, i sɔ’n yo maan be wun usuusu be, yɛ be kwlá faman be wun mɛntɛnmɛn i. Sanngɛ é wá wún kɛ Ɲanmiɛn i srolɛ liɛ’n timan sɔ.

2, 3. ?Be ɲin m’ɔ yi Ɲanmiɛn’n i bo’n yɛle mennin?

² Kɛ Biblu’n se kɛ sran sro Ɲanmiɛn’n, nán kɛ Ɲanmiɛn wlɛnwlɛn i ti ɔ. (Ebre Mun 12:28) Sran ng’ɔ sro Ɲanmiɛn’n, i ɲin yi Ɲanmiɛn kpa, ɔ bu i sran. Ɔ kunndɛman kɛ ɔ́ yó sa m’ɔ́ kún i ya’n mlɔnmlɔn. (Jue Mun 115:11) Ɔ fa Ɲanmiɛn mmla’n su, ɔ kpɛmɛn i wun. Like nga Ɲanmiɛn i ɲin ci i’n, i ɲin ci i wie. Like ng’ɔ ti kpa Ɲanmiɛn ɲrun’n, yɛ ɔ tu i klun yo ɔ. Fluwa kun waan Ɲanmiɛn i srolɛ sɔ’n, “ɔ fin wafa nga sran’n fa bu Ɲanmiɛn’n, kpɔkun m’ɔ yi i nglo i ayeliɛ’n nun’n. Yɛle kɛ, ɔ fa angunndan nanti. Kpɔkun ɔ kpalo sa tɛ’n kwlaa.” I sɔ’n ti yɛ Ɲanmiɛn Ndɛ’n waan ‘angunndan’n i bo bowlɛ’n, ɔ fin be ɲin m’ɔ yi Anannganman’n’ niɔn.—Nyanndra Mun 9:10.

³ Kɛ nga e fa wunnin i lɛ sa’n, be ɲin m’ɔ yi Ɲanmiɛn’n, i ɲin fite sran’n i mɛn dilɛ’n nun. Sran nga i ɲin yi Ɲanmiɛn’n, ɔ si ngwlɛlɛ, ɔ ɲɛn i wun, i klun jɔ, ɔ di alaje. I kunngba’n, ɔ le kisawlɛ cinnjin kpa, sa ng’ɔ sunnzun’n, ɔ ju kpɔkun ɔ cɛ mɛn’n nun. (Jue Mun 2:11; Nyanndra Mun 1:7; 10:27; 14:26; 22:4; 23:17, 18; Sa Nga Be Yoli’n 9:31) Sran nga i ɲin yi Ɲanmiɛn’n, ɔ lafi i su. Kpɔkun ɔ klo Ɲanmiɛn nin sran. E kpɛ i kpo e se kɛ, wafa nga e nin Ɲanmiɛn nin sran mun e nanti’n, ɔ fin Ɲanmiɛn mɔ e ɲin yi i’n. (Mmla’n 10:12; Zɔb 6:14; Ebre Mun 11:7) Sran nga i ɲin yi Ɲanmiɛn’n, ɔ lafi su kpa kɛ Ɲanmiɛn nian e lika naan kɛ e yo sa tɛ’n, ɔ yaci cɛ e. (Jue Mun 130:4) Sanngɛ sran ng’ɔ yo sa tɛ m’ɔ kaciman’n, i yɛ i klun titi i Ɲanmiɛn ɲrun ɔn.a—Ebre Mun 10:26-31.

Be ɲin m’ɔ yi Ɲanmiɛn’n i suanlɛ

4. ?Ngue yɛ ɔ kwla uka e naan ‘e ɲin w’a yi Ɲanmiɛn’ ɔn?

⁴ Y’a wun kɛ sran nga i ɲin yi Ɲanmiɛn’n, ɔ nanti ngwlɛlɛ su, kpɔkun Ɲanmiɛn yrɛ i su. ?Sɛ ɔ ti sɔ’n niɔn, wafa sɛ yɛ e kusu ‘e ɲin kwla yi Ɲanmiɛn’ wie ɔ? (Mmla’n 17:19) Biblu’n kan bla nin yasua kpanngban mɔ be ɲin yili Ɲanmiɛn’n, be ndɛ. Be klɛli be ndɛ sɔ’n kɛ bé “fá klé e ngwlɛlɛ.” (Rɔmfuɛ Mun 15:4) É wá kán Davidi m’ɔ yoli Izraɛli famiɛn’n i ndɛ. I sɔ’n úka e naan kɛ be se kɛ be ɲin yi Ɲanmiɛn’n, y’a wun i bo’n kpa.

5. ?Kɛ Davidi níɛn i bua’m be su’n, ɔ yoli sɛ yɛ ɔ wunnin kɛ Zoova yo sro ɔ?

⁵ Srongble’n ti’n, Saili m’ɔ yoli Izraɛli famiɛn klikli’n, i ɲin w’a yiman Zoova. Ɔ maan, Zoova yili i ase. (1 Samiɛl 15:24-26) Sanngɛ Davidi liɛ’n, w’a yoman sɔ. Ninnge kwlaa nga ɔ yoli’n, ɔ nin wafa ng’ɔ nin Ɲanmiɛn be nantili klanman’n, ɔ kle kɛ ɔ ti sran mɔ i ɲin yi Ɲanmiɛn ɔn. Kɛ ɔ fin i bakan nun’n, junman ng’ɔ dili’n yɛle i si’n i bua’m be su nianlɛ. (1 Samiɛl 16:11) Kɛ kɔnguɛ ɔ́ nían bua’m be su mɔ nzraama’m bé kpája’n, ɔ wunnin kɛ Ɲanmiɛn yo sro. Ɲanmiɛn su lɔ ninnge’m be bue kan nga Davidi wunnin i’n ti’n, i waan sɛ sran’m be koto Ɲanmiɛn bo be mɛnmɛn i’n, i su ɔ. Ɔ seli kɛ: ‘Kɛ n nian nglo lɔ ninnge mɔ a yili be’n, kɛ n nian anglo nin nzraama mɔ a sieli be lɔ’n, n usa min wun kɛ: ?Wan yɛle sran mɔ maan ɔ wla ko kpɛn i su ɔ? ?Wan yɛle klɔ sran mɔ maan i ndɛ ko lo wɔ sɔ ɔ?’—Jue Mun 8:4, 5.

6. ?Kɛ Davidi wunnin Zoova i kpli m’ɔ ti’n i wlɛ’n, i wun yoli i sɛ?

⁶ Kɛ Davidi niannin ɲanmiɛn m’ɔ la nglo lo plaii’n, ɔ wunnin kɛ, kannzu i bɔbɔ ba’n timan like fi. Sanngɛ i sɔ’n w’a kunmɛn i srɛ. I kpa bɔbɔ’n, ɔ manmannin Zoova. Ɔ seli kɛ: ‘Kɛ a nian ɲanmiɛn’n m’ɔ la nglo lɔ plaii’n, a wun Ɲanmiɛn Kpli’n i ɲrun m’ɔ le i’n. Kɛ a nian ɲanmiɛn’n m’ɔ la nglo lɔ plaii’n, a wun ninnge nga Ɲanmiɛn yili be’n.’ (Jue Mun 19:2) Davidi i aɲinyiɛ dan sɔ’n ti’n, ɔ fɛli i wun mantannin Zoova kpa ekun. Kpɔkun Ɲanmiɛn i atin m’ɔ ti weiin’n, ɔ kunndɛli kɛ ɔ́ sí i naan ɔ́ nánti su. Ɔ maan kɛ ɔ́ tó jue mánmán Zoova’n, i wun bliblili i dan. Ɔ seli kɛ: ‘A ti kpli, a yo abonuan sa mun. Wɔ kunngba wɔ yɛ a ti Ɲanmiɛn’n niɔn. Anannganman, kle min atin nga n ko fa su’n. Min ɲin yí wɔ tititi. Man min awlɛn m’ɔ ti wɛtɛɛ. Maan min ɲin yi wɔ.’—Jue Mun 86:10, 11.

7. ?Wafa sɛ yɛ Davidi i ɲin m’ɔ yili Ɲanmiɛn ti’n, ɔ kwlali Goliati ɔ?

⁷ Be flɛ Filistifuɛ kun kɛ Goliati. I tɛnndɛn’n fuanfuan mɛtri nsan. Ɔ ti safuɲrɛn. Kɛ Filistifuɛ’m be ɔli Izraɛli mɛn’n i utulɛ’n, Goliati sɔ’n yoli Izraɛlifuɛ’m be fiaan. Ɔ seli kɛ: ‘An yi sran kun maan ɔ nin min bo su. Sɛ ɔ kwla min’n, é yó amun kanga.’ (1 Samiɛl 17:4-10) Kɛ Saili nin i sonja’m be ti ndɛ sɔ’n, kɛ be usu sa. Sanngɛ Davidi w’a usuman wie. Afin, ɔ si kɛ kannzɛ klɔ sran kun le tinmin sɛ’n, ɔ fataman kɛ be sro i. Naan Zoova kunngba cɛ yɛ ɔ fata kɛ be sro i ɔ. Ɔ seli Goliati kɛ: ‘Anannganman m’ɔ sie mɛn wunmuan’n, i dunman yɛ n fa ba ɔ. Yɛ kusu, sran nga b’a yia kukuku yɛ’n bé sí kɛ nán tokofi, annzɛ kusu cua yɛ Anannganman fa de sran ɔn, afin Anannganman yɛ ɔ kwla ɔ.’ Ɔ maan Zoova fanngan nun’n, kpafloko nin yɔbuɛ kunngba cɛ, yɛ Davidi fa kunnin Goliati ɔ.—1 Samiɛl 17:45-47.

8. ?Be nga be ɲin yili Ɲanmiɛn mɔ Biblu’n kan be ndɛ’n, afɔtuɛ mennin yɛ be ndɛ’n man e ɔ?

⁸ ?Sɛ sa kekle annzɛ e kpɔfuɛ’m be tanndan e ɲrun kɛ Davidi liɛ’n sa’n, ngue yɛ é yó ɔ? Wafa kunngba nga Davidi nin sran uflɛ wie mɔ be nin Ɲanmiɛn be nantili klanman’n be yoli’n, e kwla yo sɔ wie. Yɛle kɛ, be ɲin yili Ɲanmiɛn. Sran nga i ɲin yi Ɲanmiɛn’n, ɔ yoman srongble. Kɛ Izraɛlifuɛ’m be kpɔfuɛ’m bé klé be yalɛ’n, Neemi m’ɔ ti Ɲanmiɛn i sufuɛ kpa’n seli be kɛ: “Nán maan amun sro be! Nán amun wla fi su kɛ Anannganman ti dan naan ɔ yo sro.” (Neemi 4:8) Zoova fanngan nun’n, Davidi nin Neemi, ɔ nin Ɲanmiɛn i sufuɛ kpa wie mun ekun be dili junman nga Ɲanmiɛn fa mannin be’n. Sɛ e kusu e ɲin yi Ɲanmiɛn’n, é yó sɔ wie.

Kɛ sa’m be tɔ e su’n, maan e ɲin yi Ɲanmiɛn

9. ?Sa mennin nun yɛ Davidi kleli kɛ i ɲin yi Ɲanmiɛn ɔn?

⁹ Kɛ Davidi kunnin Goliati wieli’n, Zoova fanngan nun’n, ɔ kwlali sa uflɛ wie’m be nun ekun. Kɛ Saili tili i sɔ ndɛ’n, i tɛ m’ɔ yoli i’n ti’n, i waan ɔ́ ká lɛ kún Davidi. Sanngɛ w’a yoman ye. I sin’n, ɔ kpɛli Davidi i gblɛ naan ɔ́ ɲɛ́n i, sanngɛ w’a yoman ye ekun. I agualiɛ su’n, ɔ nin i sonja mun yɛ be ɔli Davidi sin ɔn. Sanngɛ b’a ɲɛnmɛn i. Blɛ sɔ nun’n, Davidi si kɛ i bɔbɔ yɛ ɔ́ wá yó famiɛn ɔn, afin Zoova kɛnnin i sɔ’n kleli i. Sanngɛ kɛ mɔ i blɛ’n nin a juman’n ti’n, ɔ fɛli i wla’n guali Zoova su. Ɔ tɔli blo cɛli kpa, yɛ ɔ kplili i ti. Sa kwlaa sɔ’m be nun’n, Davidi yili i nglo kɛ i ɲin yi Ɲanmiɛn.—1 Samiɛl 18:9, 11, 17; 24:2.

10. ?Wafa sɛ yɛ sa kekle nun’n, Davidi kleli kɛ i ɲin yi Ɲanmiɛn ɔn?

¹⁰ Cɛn kun’n, Davidi ɔli Akis m’ɔ ti Gati famiɛn’n i mɛn’n nun lɔ ko fiali. Lɔ kusu yɛ Goliati fin ɔn. (1 Samiɛl 21:10-15) Famiɛn Akis i sran’m be wunnin Davidi. Naan b’a ko se famiɛn’n kɛ b’a tra be kpɔfuɛ’n. Davidi yɛ i ɲin’n w’a blo yɛ. ?Ɔ́ yó i sɛ? Ɔ tuli i klun srɛli Zoova kpa. (Jue Mun 56:2-6, 13-15) Ɔ yoli i wun kɛ fiaunfuɛ wie sa naan w’a fite nun. Sanngɛ i kwlaa yoli o, Davidi si kɛ sɛ ɔ timan Zoova ti’n, nn w’a kwlá fiteman nun. Nanwlɛ, Ɲanmiɛn su mɔ Davidi lafi tankaan’n, ɔ kle kɛ i ɲin yi Ɲanmiɛn.—Jue Mun 34:5-7, 10-12.

11. ?Kɛ Davidi sa’n, wafa sɛ yɛ e kwla kle kɛ e ɲin yi Zoova ɔ?

¹¹ E kusu e kwla yo kɛ Davidi sa wie. Yɛle kɛ sɛ sa tɔ e su’n, e ɲin m’ɔ yi Ɲanmiɛn’n ti’n, wafa nga Ɲanmiɛn waan ɔ́ úka e’n, é láfi su. Davidi seli kɛ: ‘Fa ɔ wun sa’n kwlaa wla Anannganman sa nun. Fa ɔ wla’n guɛ i su, yɛ ɔ́ yó ng’ɔ nin wɔ fata’n ɔ́ mán wɔ.’ (Jue Mun 37:5) ?I sɔ mɔ Davidi kannin’n, i bo’n yɛle kɛ nn sɛ sa tɔ e su’n, é fá wlá Zoova sa nun kpɔkun é trán lɛ sa ngbɛn? Cɛcɛ. Davidi bɔbɔ w’a yoman sɔ. Ngwlɛlɛ mɔ Ɲanmiɛn mɛnnin i’n, ɔ fa tili i wun ɲanman nun. Sanngɛ Davidi si kɛ klɔ sran’n i ngunmin kwlá demɛn i ti. Sɛ e kusu sa tɔ e su’n, maan e yo e like liɛ nga e kwlɛ i yo’n. Kpɔkun, e fɛ i onga’n e wla Zoova sa nun. Sanngɛ e si kɛ sa nga be tɔ e su’n, be pɛ lika nun’n, e lemɛn i yowlɛ. Saan Zoova sa nun cɛ yɛ é fá wlá ɔ. Blɛ sɔ’n nun yɛ sɛ sran’n i ɲin yi Ɲanmiɛn annzɛ i ɲin yimɛn i’n, ɔ́ yí i nglo ɔ. Davidi i ndɛ ng’ɔ kɛnnin i yɛ’n, ɔ kwla uka e kpa. Ɔ seli kɛ: ‘Anannganman kɛn i klun ndɛ kle be mɔ be ɲin yi i’n, afin be ti i janvuɛ. Yɛ i aenguɛ’n ng’ɔ nin be tra’n ti, ɔ kle be ngwlɛlɛ be si i.’—Jue Mun 25:14.

12. ?Ngue ti yɛ ɔ fataman kɛ e fa Ɲanmiɛn srɛlɛ’n e yo kondro vaa like ɔ? ?Angunndan mennin yɛ sran’m be bu m’ɔ fataman kɛ e bu wie ɔ?

¹² I sɔ’n ti’n, wafa nga e srɛ Ɲanmiɛn’n, ɔ nin wafa nga e nin Ɲanmiɛn e afiɛn’n mantan’n, nán maan e fa yo kondro vaa like. Kɛ é srɛ́ Zoova’n, ɔ fata kɛ e ‘lafi su kɛ ɔ o lɛ, yɛ be nga be kunndɛ i’n, ɔ́ yí i wun klé be.’ (Ebre Mun 11:6; Zak 1:5-8) Kpɔkun, kɛ nga akoto Pɔlu fa kannin’n sa’n, sɛ Ɲanmiɛn uka e’n, ‘nán maan e wla fi.’ (Kolɔsfuɛ Mun 3:15, 17) E niaan kun i ɲin w’a ti Ɲanmiɛn ninnge’m be nun kpa. Ɔ o be nga bé wá kɔ́ ɲanmiɛn su lɔ’n be nun wie. Ɔ seli kɛ: “Be nga be di junman aliɛ diwlɛ’m be nun mɔ be fa aliɛ man sran mun’n, sran wie’m be bu i kɛ Ɲanmiɛn ti kɛ be sa. Kɛ sran ng’ɔ ba aliɛ dilɛ’n i sa mian like wun’n, kpɔkun w’a flɛ be. Yɛ kɛ be ko fa like sɔ’n ko mɛn i’n, kpɔkun ɔ kunndɛman kɛ sran’n, ɔ kɛ i wun lɛ kun.” Ɔ fataman kɛ e yo kɛ sran sɔ’m be sa. Afin be nga be ɲin yiman Ɲanmiɛn’n, be yɛ be bu i kɛ Ɲanmiɛn ti sɔ ɔ.

Be ɲin w’a yiman Ɲanmiɛn

13. ?Sa mennin nun yɛ Davidi w’a nantiman Ɲanmiɛn Mmla’n su ɔ?

¹³ Kɛ awlabɔɛ tɔli Davidi su m’ɔ wunnin kɛ Zoova w’a yimɛn i ase’n ti’n, i ɲin yili Ɲanmiɛn kpa. Kpɔkun ɔ fɛli i wla’n guali Ɲanmiɛn su kpa trali laa’n. (Jue Mun 31:23-25) Sanngɛ sa nsan nun’n, i ɲin w’a yiman Ɲanmiɛn. Ɔ maan, ɔ kpɛli saɛ ba. I klikli’n yɛle kɛ Ɲanmiɛn mmla’n waan Levifuɛ mun yɛ be sua Zoova i alaka’n niɔn. Sanngɛ Davidi w’a nianman mmla’n su. Kɛ bé fá Zoova i alaka’n kɔ́ Zerizalɛmu lɔ’n, ɔ fa sieli i kakaklolo kun nun. Kɛ ɔ́ yó sɔ’n, Iza nian kakaklolo’n su yɛ ɔ kɔ ɔ. Iza wunnin kɛ Ɲanmiɛn i alaka’n ciali naan ɔ su wa tɔ, naan w’a to i sa w’a tra nun. Be osu kunngba’n nun lɛ’n, Iza uli. Afin, “ɔ fataman kɛ ɔ kan Anannganman i alaka’n.” Nanwlɛ, Iza yoli sa tɛ. Sanngɛ, sɛ Davidi nantili Ɲanmiɛn mmla su’n, nn i sɔ sanvuɛsa’n w’a juman. Ɔ maan kɛ be se kɛ be ɲin yi Ɲanmiɛn’n, yɛle kɛ wafa nga Ɲanmiɛn waan e nanti’n yɛ e nanti ɔ.—2 Samiɛl 6:2-9; Kalɛ 4:15; 7:9.

14. ?Kɛ Davidi kali Izraɛli sonja mun’n, i bo’n guali sɛ?

¹⁴ Cɛn kun’n, Satan suli Davidi bo naan w’a ka Izraɛli sonja mun. (1 Be Nyoliɛ 21:1) Davidi i ɲin mɔ w’a yiman Ɲanmiɛn’n, i ti yɛ ɔ yoli sɔ ɔ. Ɔ maan, Izraɛlifuɛ 70.000 be wuli. Sa sɔ nun’n, Davidi utuli i ɲin ase kpatali Ɲanmiɛn. Sanngɛ nɛ́n i sɔ’n ti yɛ b’a wunman sa ng’ɔ yoli’n i su afɛ ɔ.—2 Samiɛl 24:1-16.

15. ?Ngue ti yɛ Davidi kunndɛli sran yi’n niɔn?

¹⁵ Cɛn kun ekun’n, Davidi i ɲin w’a yiman Ɲanmiɛn. Yɛle kɛ ɔ kunndɛli Iri i yi Bat-Seba. Sanngɛ nn ɔ si kɛ sran yi annzɛ i wun kunndɛlɛ’n, annzɛ be ɲin m’ɔ blo be wiengu i yi annzɛ i wun su’n, ɔ ti tɛ. (Ezipt Lɔ Tulɛ 20:14, 17) Kɛ Davidi wunnin Bat-Seba m’ɔ su wunnzin’n, sɛ ɔ ti kɛ i ɲin yi Ɲanmiɛn’n, nn ɔ toli i ɲin blo. Sanngɛ w’a yoman sɔ. Ɔ ‘wunnin bla’n kpɔkun ɔ buli i kunndɛlɛ angunndan’ lele. Ɔ maan, kɛ ɔ yo naan i ɲin yi Ɲanmiɛn’n, ɔ nin bla’n be lali. (Matie 5:28; 2 Samiɛl 11:1-4) Nanwlɛ, i lɛ’n nun Davidi w’a buman Zoova i angunndan mlɔnmlɔn.—Jue Mun 139:1-7.

16. ?Sa tɛ nga Davidi yoli’n i su afɛ mennin yɛ ɔ wunnin i ɔ?

¹⁶ Kɛ Davidi nin Bat-Seba be lali’n, be wuli ba yasua kun. Kɛ ɔ yoli sɔ’n w’a cɛman, Zoova sunmɛnnin i nuan ijɔfuɛ Natan kɛ ɔ ko yi sa tɛ nga Davidi yoli’n i nglo. I sɔ mɔ Natan yoli’n ti’n, Davidi buli angunndan. Wafa nga laa i ɲin yili Ɲanmiɛn’n, i ɲin wa yili i sɔ ekun. Ɔ maan, ɔ srɛli Zoova kɛ ɔ yaci i sa tɛ’n cɛ i. Ɔ srɛli Zoova kɛ nán maan ɔ fuɛn i, yɛ nán maan ɔ yi i wawɛ’n m’ɔ o i nun’n. (Jue Mun 51:9, 13) Zoova yacili Davidi i sa tɛ’n cɛli i. Ɔ maan fɔnlɛ ng’ɔ fɔnnin’n, nɛ́n i nuan like yɛ Ɲanmiɛn fa yili i su ɔ. Sanngɛ kusu sa ng’ɔ yoli’n i sin sa’n, w’a sɛnmɛn i wun. Afin be wa yasua’n wuli, awlabɔɛ nin sa sukusuku’m be tɔli i awlo’n nun. Nanwlɛ, Davidi i ɲin mɔ w’a yiman Ɲanmiɛn ti’n, ɔ wunnin i su afɛ’n dan!—2 Samiɛl 12:10-14; 13:10-14; 15:14.

17. Wafa nga kɛ be yo sa tɛ’n i sɔ’n kpɔtɔ sran awlɛn’n, amun fa sa kun be yiyi nun.

¹⁷ Andɛ kusu sɛ e ɲin w’a yiman Ɲanmiɛn naan e yo sa tɛ’n, ɔ su yoman e wun sa ye mlɔnmlɔn. E kwla wun i su afɛ’n sa lelee. I wie yɛle sa ng’ɔ juli bla kun ɔ nin i wun’n be su’n. Yasua’n ti e niaan Klistfuɛ. Kɛ ɔ ɔli junman dilɛ nvle uflɛ nun’n, kannzu ɔ nin bla uflɛ be lali. Kɛ i yi’n tili i sɔ ndɛ liɛ’n, i wla’n boli i wun dan. Ɔ tran ɔn, ɔ tranman. Ɔ sunnin lelee. ?Kɛ nga e fa wun i lɛ’n sa’n, bla’n ɔ́ bú i wun’n i sran yɛ ɔ́ láfi i su ekun yɛ ɔ o lɛ? Nanwlɛ, sɛ e ɲin yi Ɲanmiɛn’n, ɲrɛnnɛn kɛ ngalɛ sa’n, ɔ́ tó fúan e.—1 Korɛntfuɛ Mun 6:18.

Ɲanmiɛn mɔ e sro i’n ti’n, e yoman sa tɛ

18. ?Ngue yɛ Satan kunndɛ ɔ? ?Yɛ ajalɛ mennin yɛ ɔ fa naan w’a laka sran mun ɔn?

¹⁸ Andɛ’n, sran’m be nzuɛn’n yɛ Satan su saci i ɔ. I lɛ nun’n, sran nga i ɲin ci be kpa’n, yɛle Klistfuɛ kpa mun. Satan si kɛ klɔ sran’n klo ninnge kɛ be nuan nun fɛ nin be ɲinma nun fɛ’n, ɔ nin be su nun fɛ’n sa. Ɔ maan, ɔ kunndɛ kɛ ɔ́ fɛ́ i sɔ ninnge mun fá ɲán e. Sanngɛ ninnge ng’ɔ fa laka e kpa’n, yɛle be ɲinma nun fɛ’n nin be su nun fɛ’n. (Efɛzfuɛ Mun 4:17-19) ?Sɛ e siman nun naan e ɲin tɔ foto sukusuku wie su, annzɛ e tie ndɛ fiɛn wie, annzɛ kusu sran kun mɔ i nzuɛn’n ti tɛ’n ɔ kunndɛ kɛ ɔ nin é sán nun’n, ngue yɛ é yó ɔ?

19. ?Wafa sɛ yɛ Ɲanmiɛn mɔ e niaan kun sro i’n ti’n, w’a tɔman sa tɛ’n nun ɔn?

¹⁹ Be flɛ e niaan kun kɛ Andre.b Ɔ le bla nin ba. Ɔ ti asɔnun kpɛnngbɛn yɛ ɔ ti dɔɔtrɔ. Cɛn kwlaa nga e niaan’n lɛ i junman’n su lɔ’n, i wiengu junman difuɛ bla’m be yi awlɛn ba’n i desɛn fluwa su. Kpɔkun, be fa sie e niaan’n i sumun’n su. I sɔ’n kle kɛ be klo i. Be klɛ fluwa’n su kɛ be kunndɛ kɛ be nin i bé lá. Sanngɛ Andre nianman be lɔ. I agualiɛ su’n, kɛ ɔ ko yo naan w’a tɔman sa tɛ’n nun ti’n, ɔ kunndɛli junman lika uflɛ. Nanwlɛ, Ɲanmiɛn mɔ Andre sro i’n ti’n, ɔ yoli ngwlɛlɛfuɛ yɛ Ɲanmiɛn yrɛli i su. Kɛ é sé yɛ’n, blɛ wie nun’n ɔ ko di junman be klɔ lɔ Betɛli’n nun.

20, 21. (a) ?Wafa sɛ yɛ Ɲanmiɛn i srolɛ’n kwla uka e naan y’a yoman sa tɛ ɔ? (b) ?Ngue ndɛ yɛ like suanlɛ ng’ɔ́ bá lɔ’n wá yíyí nun ɔn?

²⁰ Sɛ e konvi sɔ sa tɛ’n naan y’a kpalomɛn i’n, kɛ ɔ́ cɛ́ kɔ́’n, e kwla yo sa tɛ. Afin, Ɲanmiɛn mmla’n i su nantilɛ’n su loman e kun. (Zak 1:14, 15) Sanngɛ sɛ e sro Zoova’n, é kpálo i sɔ akonvisɔɛ liɛ’n. I kpa bɔbɔ’n, e su faman e wun mantanman sran tɛfuɛ mun. E su yoman ninnge nga be kwla fa e wla sa tɛ yolɛ’n nun’n. E su kɔman lika nga be yo sa sukusuku lɛ’n, yɛ é kpálo be ɲin su yiyilɛ ng’ɔ ti tɛ’n. Afin, ninnge kwlaa sɔ’m be kwla saci e angunndan’n. (Nyanndra Mun 22:3) Ninnge sɔ’m be ase wlalɛ’n kwla yo kekle man e. Sanngɛ sɛ e nin Ɲanmiɛn e afiɛn’n saci’n, i kekle liɛ’n yó dan trá ninnge sɔ’m be ase wlalɛ’n. (Matie 5:29, 30) Sɛ e sro Ɲanmiɛn’n, e bɔbɔ e su faman e wun yiman bla nin bian kunndɛlɛ sukusuku’n nun. Ɔ maan, “ninnge ngbɛnngbɛn” kɛ bla nin bian kunndɛlɛ mɔ be yi i foto sa’n, e su nianman be. Sɛ e yo sɔ’n, e kwla lafi su kɛ Zoova yó maan é ‘ɲán nguan.’ Kpɔkun ninnge kwlaa ng’ɔ ju e’n, ɔ́ fá mán e.—Jue Mun 84:11; 119:25, 37.

²¹ Nanwlɛ, sran ng’ɔ sro Ɲanmiɛn sakpa’n, ɔ yo ngwlɛlɛfuɛ. (Jue Mun 34:10) Kpɔkun ɔ di aklunjuɛ’n i kpafuɛ’n. I sɔ ndɛ liɛ’n, like suanlɛ ng’ɔ́ bá lɔ’n wá yíyí nun.

[Ja ngua lɛ ndɛ mun]

?Amún yíyí nun sɛ?

• ?Sran ng’ɔ sro Ɲanmiɛn’n, wafa sɛ yɛ ɔ yi i sɔ liɛ’n i nglo ɔ?

• ?Sran nga i ɲin yi Ɲanmiɛn’n, ngue ti yɛ ɔ yoman srongble ɔ?

• ?Wafa sɛ yɛ e kwla kle kɛ e bu Ɲanmiɛn srɛlɛ’n i like cinnjin ɔn?

• ?Wafa sɛ yɛ Ɲanmiɛn i srolɛ’n, ɔ kwla uka e naan y’a yoman sa tɛ ɔ?

[Foto, bue 25]

Kɛ Davidi niannin ninnge nga Zoova yoli be’n, ɔ wunnin kɛ Ɲanmiɛn yo sro.

[Foto, bue 26]

?Sɛ e ɲin tɔ sa wie m’ɔ kwla saci e angunndan’n i su’n, ngue yɛ é yó ɔ?