Sran lufle dilɛ’n w’a tru kpokpaa
“Susute nga n wo nun’n, ɔ di junman man awa’n. Kɛ e wie junman’n di’n, saan anglo nɲɔn annzɛ nsan bé sín naan b’a tua e kalɛ. Sanngɛ koko nun wa’n, awa’n i janunfuɛ kun flɛli min telefɔnu nun seli min kɛ e mɛn i adi like kan naan b’a tua e kalɛ ndɛndɛ.”—ZAN.a
?B’A BU ɔ lufle le? Kɔlɛ w’a yoman kɛ bian nga i ndɛ’n wo nglo lɛ’n sa. Sanngɛ adi ninnge mɔ sran’m be klo i’n ti’n, afɛ nga sran’m be wun i’n, w’a wun wie le.
Afuɛ nga be flɛ i 2011 nun’n, anuannzɛ nga m’ɔ sie ndrunmun nga be di i nvle’m be nun i nzɔliɛ’n, ɔ wunnin i kɛ “nvlenvle 183 be dan lika nun’n, adi ninnge klolɛ’n ti’n lika’n w’a saci.” Afuɛ nga be flɛ i 2009 nun’n, anuannzɛ kunngba’n kannin adi ninnge klolɛ’n i trulɛ mɔ w’a tru’n i ndɛ seli kɛ: “Asiɛ wunmuan’n su’n, ɔ leman lika kun sa mɔ adi ninnge klolɛ’n nin a sacimɛn i ɔ.”
Wie liɛ’n, adi ninnge’m be klolɛ’n i bo’n kwla gua tɛ kpa. Zronali kun seli kɛ “adi ninnge mɔ sran’m be klo i’n, ɔ nin sua mɔ b’a nianman nun b’a kplanman be kpa’n” be ti yɛ afuɛ nga be flɛ i 2010 nun’n, nvle nga be flɛ i Haïti’n, kɛ asiɛ’n kejeli lɔ’n, sran kpanngban kpa be wuli ɲrɛnnɛn wie’n niɔn. Ɔ kan guali su kɛ: “Kɛ sran’m bé kplán etazi sua mun’n, be usaman be nga be si nun junman di’n. Kɛ awa’n i sran’m be ko nian be junman’n kusu’n, kɛ ɔ ko yo naan b’a muan be nuan su’n ti’n, sua kplanfuɛ sɔ’m be man be ninnge lɔuun kpa.”
?Adi ninnge’m be klolɛ’n, ɔ kwla wie mlɔnmlɔn? Kɛ ɔ ko yo naan y’a wun i wlɛ’n, ɔ fata kɛ e wun ninnge ng’ɔ nin adi ninnge’m be klolɛ’n ba’n. I sɔ’n yɛ é wá yíyí nun siɛn’n niɔn.
[Ja ngua lɛ ndɛ’n]
a Be kacili sran’n i dunman’n.
[Ndɛ kwle, bue 3]
“Adi ninnge nga awa i janunfuɛ’m be fa ɲan be wun’n, ɔ ti sran’m be lufle bulɛ. Afin sran’m be lafi be su naan b’a ɲan be sa ti like kan naan be liɛ w’a yo ye. Sanngɛ be ayeliɛ tɛ sɔ’n ti’n, be wunman be wun fɛ.”—TRANSPARENCY INTERNATIONAL