?Ngue ti yɛ sran lufle dilɛ’n te tru te kɔ ɔ?

“Sran kun sie i wiengu kun kpɛkuun ɔ kle i nyrɛnnɛn.”​—AKUNNDANFUƐ’N 8:9.

KƐ NGA Ɲanmiɛn Ndɛ’n fa kɛnnin i lɛ’n sa’n, i sɔ yɛ lele nin andɛ klɔ sran’m be yo ɔ. Sanngɛ be nun wie’m be waan bé síe sran’m be kpa naan lika’n yo kpa. Sanngɛ kasiɛn su’n, aɲinkpli’n ɔ nin sran lufle dilɛ’n be wa sanngannin be ti nun. ?Ngue ti yɛ ɔ ti sɔ ɔ? ?Ngue ti yɛ sran lufle dilɛ’n te tru te kɔ ɔ? Sa nsan mɔ be saci sran’n be ti ɔ.

1. Sa tɛ m’ɔ o e nun’n ti ɔ.

Biblu’n waan “sa tɛ’n w’a ka sran’m be kwlaa be nun.” (Rɔmfuɛ Mun 3:9) Sa tɛ’n m’ɔ ti “e nzuɛn’n” ti kɛ tukpacɛ mɔ e nin i fin e nin klun mɔ be kwlá yomɛn i ayre’n sa. Akunndan tɛ m’ɔ o sran wie’m be ti’n nun’n ti’n, be buman sran uflɛ akunndan. Sika kunndɛlɛ’n w’a di be buɛ’n. Be kunndɛ kɛ bé síe be wiengu naan bé klé be ɲrɛnnɛn.​—Rɔmfuɛ Mun 5:21; 7:17, 20, 23, 25.

2. Mɛn tɛ nga e wo nun yɛ’n ti ɔ.

Aɲinkpli’n w’a saci andɛ sran mun. Be bɔbɔ be wun akunndan yɛ be bu ɔ. I sɔ ti’n, wie’m be waan be lemɛn i yowlɛ. Ɔ maan, be kusu be kunndɛ kɛ bé yó sran dan naan be wun w’a yo be fɛ. Be kunndɛ kɛ bé ɲán be wun trá su. Kannzɛ bɔɔ ɔ wie sa tɛ yɛ bé yó naan b’a ɲan be wun’n, be yo sɔ. Kɛ ɔ yo naan be kpalo sa tɛ’n, be ‘nian kɛ sran’m be ti kpanngban ti be se kɛ bé sú be su yó sa tɛ’n wie.’​—Ezipt Lɔ Tulɛ 23:2.

3. Mmusu’m be si Satan ti ɔ.

Satan m’ɔ ti aolia sran’n, ɔ jasoli Ɲanmiɛn wun. “Ɔ laka mɛn wunmuan nunfuɛ’m be kwlaa.” (Sa Nglo Yilɛ 12:9) Sran’m be wlawlalɛ’n yɛ maan ɔ di aklunjuɛ ɔ. Kɛ klɔ sran o lɛ’n, ɔ kunndɛ kɛ ɔ́ ɲɛ́n i sa ti like kan naan i wun w’a yo i fɛ. Sanngɛ Satan kwla wlɛwlɛ i kɛ ɔ di ndrunmun naan i sɔ’n w’a yo ye.

?Ɔ maan, Satan síe e sa lelele? Ndɛ ng’ɔ́ bá lɛ’n wá tɛ́ kosan sɔ’n su.