Maan e suan Ɲanmiɛn Ndɛ’n nun like
?Ngue ti yɛ Ɲanmiɛn sunmannin Zezi asiɛ’n su wa ɔ?
Ndɛ nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle amun bɔbɔ amun Biblu’n i lika nga amun kwla kanngan nun naan amun a wun be su tɛlɛ’n. Zoova i Lalofuɛ’m be klo kɛ be nin amun kókó ndɛ sɔ’m be su yalɛ.
1. ?Ka naan Ɲanmiɛn w’a sunman Zezi asiɛ’n su wa’n, nin yɛ Zezi wo ɔ?
Ka naan b’a wu Zezi Bɛtleɛmu lɔ’n, ɔ ti aolia nun sran ɲanmiɛn su lɔ. I yɛ ɔ ti ninnge nga Ɲanmiɛn yili be’n, be nun klikli’n niɔn. I kunngba cɛ yɛ Ɲanmiɛn bɔbɔ yili i trele sa ɔ. I sɔ’n ti yɛ be flɛ i Ɲanmiɛn i Wa kunngba cɛ’n niɔn. Ɲanmiɛn su lɔ’n, blɛ sunman nun ɔ ijɔli Ɲanmiɛn nuan. I ti yɛ be flɛ i Ndɛ’n niɔn. Asa kusu’n, i sa trannin ninnge onga’m be kwlaa be yilɛ’n nun. (Zan 1:2, 3, 14) Zezi nin Ɲanmiɛn be trannin ɲanmiɛn su lɔ afuɛ akpingbinngbin kpanngban kpa lele naan b’a yi klɔ sran.—An kanngan Mise 5:1 nin Zan 17:5 nun.
2. ?Wafa sɛ yɛ Ɲanmiɛn sunmɛnnin i Wa’n asiɛ’n su wa ɔ?
Zoova fali Zezi i nguan’n ɲanmiɛn su lɔ fa wlɛli Mali i ku sɛ’n nun i wawɛ’n i fanngan nun. Ɔ maan Zezi i si’n timan klɔ sran. Anzi’m be boli i awuliɛ’n i jɔ kleli nnɛn kankanfuɛ wie mɔ be la blo be nian be nnɛn’m be su kɔnguɛ’n. (Lik 2:8-12) I sɔ’n kle kɛ b’a wuman Zezi ayrɛ blɛ kpa’n nun. Kɛ e niɛn i sa’n, Ɔktɔblu anglo’n i bo bolɛ’n nun mɔ lika’n te lo’n, i nun yɛ be wuli i ɔ. Kɛ be wuli Zezi m’ɔ cɛli kan’n, Mali nin i wun Zozɛfu be fali Zezi ɔli be klɔ Nazarɛti. Lɔ yɛ be tɛli i ɔ. Zozɛfu fali Zezi yoli i wa, yɛ ɔ niɛnnin i lika.—An kanngan Matie 1:18-23 nun.
Kɛ Zezi ɲannin afuɛ kɔe 30, be yoli i batɛmu, kpɛkun Ɲanmiɛn kɛnnin i sran’m be ɲrun kɛ ɔ ti i Wa. Yɛ Zezi boli junman nga Ɲanmiɛn sunmɛnnin i kɛ ɔ wa di’n, i dilɛ bo ɔ.—An kanngan Matie 3:16, 17 nun.
3. ?Ngue ti Ɲanmiɛn sunmannin Zezi asiɛ’n su wa ɔ?
Ɲanmiɛn sunmannin Zezi asiɛ’n su wa naan ɔ wa fa nanwlɛ’n kle sran mun. Zezi kleli Ɲanmiɛn Sielɛ’n i su like. Ɲanmiɛn Sielɛ’n ti awa kun m’ɔ o ɲanmiɛn su lɔ ɔ. Ɔ́ wá yó maan fɔundi trán asiɛ wunmuan’n su. Zezi yoli maan sran’m be kwla lafi su kɛ cɛn kun’n, bé ɲán anannganman nguan. (Zan 4:14; 18:36, 37) Asa ekun’n, Zezi kleli sran mun ninnge kpanngban mɔ be kwla yo naan b’a di aklunjuɛ kpafuɛ’n. (Matie 5:3; 6:19-21) Like nga i waan sran’m be yo’n, ɔ yoli kleli be naan be nian su. I kun yɛle kɛ ɔ kleli wafa nga blɛ kekle nun bɔbɔ’n be kwla yo Ɲanmiɛn i klun sa’n. Kɛ be kleli i ɲrɛnnɛn’n, w’a yiman w’a manman.—An kanngan 1 Piɛr 2:21-24 nun.
Zezi kleli i sɔnnzɔnfuɛ mun wafa nga be kwla tu be klun be yi klolɛ’n i nglo’n. Kɛ ɔ nin i Si be o ɲanmiɛn su lɔ’n, ɔ le ɲrun kpa. Sanngɛ ɔ kɛnnin i wun ase yoli like nga i Si waan ɔ yo’n. Yɛle kɛ ɔ bali asiɛ’n su wa, ɔ wa trannin klɔ sran’m be afiɛn. Nanwlɛ, wafa nga Zezi fa yili klolɛ’n i nglo’n, sran fi tomɛn i.—An kanngan Zan 15:12, 13 nin Filipfuɛ Mun 2:5-8 nun.
4. ?Zezi i wie’n ti’n, ngue yɛ e kwla ɲɛn i ɔ?
Ɲanmiɛn sunmannin Zezi naan ɔ wa wu e sa tɛ’m be ti. (Zan 3:16) E kwlaa e ti sa tɛ yofuɛ, yɛle kɛ fɔ o e nun yɛ sa tɛ yolɛ’n wo e mmoja’n nun. I ti yɛ e tɔ tukpacɛ yɛ e wu’n niɔn. Adam m’ɔ ti klɔ sran klikli’n i liɛ’n, i klikli nun’n fɔ nunmɛn i nun. Ɔ yoman sa tɛ, yɛ sɛ ɔ ti kɛ ɔ kali sɔ’n nn w’a wuman yɛ w’a tɔman tukpacɛ le. Sanngɛ kɛ ɔ yoli ɲin kekle Ɲanmiɛn su’n, fɔ wa trɛnnin i nun. Sa tɛ’n mɔ Adam yoli’n, ɔ nin wie’n m’ɔ ti i akatua’n, be sali e.—An kanngan Rɔmfuɛ Mun 5:12 nin 6:23 nun.
Zezi mɔ fɔ nunmɛn i nun’n, w’a yoman sa tɛ. Ɔ maan w’a wuman i bɔbɔ i sa tɛ’m be ti. E bɔbɔ e sa tɛ’m be ti yɛ ɔ wuli ɔ. Zezi i wie’n ti’n, e kwla ɲan anannganman nguan yɛ Ɲanmiɛn kwla yra e su.—An kanngan 1 Piɛr 3:18 nun.
Sɛ amun kunndɛ kɛ amún sí nun ekun’n, an nian fluwa ?Ngue like yɛ Biblu’n kle i sakpasakpa ɔ? i ndɛ tre 4 nin 5 nun. Zoova i Lalofuɛ mun yɛ be yili ɔ.
[Foto, bue 28]
[Foto, bue 28]
[Foto, bue 29]
[Foto, bue 29]