Moizi lafili Ɲanmiɛn su

?ƝANMIƐN SULAFILƐ’N I BO YƐLE BENIN? Biblu’n kle kɛ “Nyanmiɛn su bɔ e lafi’n ti, e si weiin kpa kɛ y’a nyan like nga e wla o su’n, ɔ maan e si kpa kɛ like nga e wun-mɛn i’n wo lɛ.” (Ebre Mun 11:1) Sran ng’ɔ lafi Ɲanmiɛn su’n, kasiɛ kwlaa nga Ɲanmiɛn bo’n, ɔ si kɛ ɔ kwla yiɛ i nuan.

?WAFA SƐ YƐ MOIZI YILI I ƝANMIƐN SULAFILƐ’N NGLO Ɔ? Ajalɛ kwlaa nga Moizi fá be’n, ɔ yi i nglo kɛ ɔ lafi kasiɛ nga Ɲanmiɛn boli be’n be su. (Bo Bolɛ 22:15-18) Sɛ ɔ ti kɛ i waan ɔ́ trán pɔɔ nun Ezipti lɔ’n nn ɔ kwla yoli sɔ. Sanngɛ ɔ kloli “kɛ be kle i nin Nyanmiɛn sran’m be nyrɛnnɛn tra kɛ ɔ di mɛn’n b’ɔ ti le nnyɔn kun like’n.” (Ebre Mun 11:25) ?Ajalɛ mɔ be tɔ su be fa mɔ i sin’n, ɔ yo be nsisɔ’n wie yɛ ɔ fali ɔ? Cɛcɛ, afin Biblu’n se kɛ Moizi ‘trɛ i anwlɛn, ɔ ti kɛ w’a wun Nyanmiɛn bɔ be wun-mɛn i’n sa.’ (Ebre Mun 11:27) Ajalɛ kwlaa nga Moizi i Ɲanmiɛn su m’ɔ lafili’n ti’n ɔ fali be’n, be nun wie fi w’a yomɛn i nsisɔ le.

Moizi yoli like kwlaa ng’ɔ ko yo naan w’a ukɛ i wiengu naan w’a lafi Ɲanmiɛn su wie’n. Maan e nian like kun m’ɔ yoli’n. Kɛ Faraɔn fúan Izraɛlifuɛ mun’n, be wa kali Faraɔn i sonja mun nin Jenvie ɔkwlɛ’n be afiɛn. Kɛ Izraɛlifuɛ’m be wunnin i sɔ’n, srɛ m’ɔ́ kún be’n ti’n be kpan flɛli Zoova nin Moizi. ?Ngue yɛ Moizi yoli ɔ?

Moizi siman kɛ Zoova wá kpáci jenvie’n i nun nɲɔn naan Izraɛlifuɛ’m be sin i afiɛn nun. Nga Moizi si i’n, yɛle kɛ saan Zoova yó like kun ɔ́ fá dé i nvle’n. Yɛ Moizi kunndɛli kɛ Izraɛlifuɛ’m be lafi su sɔ wie. Biblu’n waan: “Moizi tɛli be su kɛ: ‘Nán srɛ kun amun. Amun jran kan amun o lɛ’n, án wá wún wafa nga Anannganman wá fá dé amun ndɛ’n.’” (Ezipt Lɔ Tulɛ 14:13) ?Moizi kwla ukali Izraɛlifuɛ mun naan b’a lafi Ɲanmiɛn su kpa ekun? Ɛɛn. Afin Biblu’n w’a kanman Moizi i ngunmin i ndɛ, sanngɛ ɔ kannin Izraɛlifuɛ’m be ndɛ wie seli kɛ: ‘Nyanmiɛn su bɔ Izraɛlfuɛ’m be lafi’n ti yɛ Jenvie ɔkwlɛ’n kpacili naan b’a sin nun nin-ɔn.’ (Ebre Mun 11:29) Moizi i Ɲanmiɛn sulafilɛ’n yoli i wun sa ye. Sanngɛ nɛ́n i ngunmin ɔn. Sran kwlaa ng’ɔ lafili Zoova su’n, i wun sa yoli ye.

WAFA NGA E KWLA NIƐN I AELIƐ’N SU’N: E kwla yo kɛ Moizi sa wie naan e fa ajalɛ ng’ɔ kle kɛ e lafi kasiɛ nga Ɲanmiɛn boli be’n be su. Ɲanmiɛn seli kɛ sɛ i sulɛ’n yo e cinnjin tra like kwlaa’n, ɔ́ nían e lika. (Matie 6:33) Kɛ ɔ yo naan aɲanbeun ninnge’m be kunndɛlɛ’n w’a yoman e cinnjin w’a traman like uflɛ’n, ɔ timan pɔpɔ. Afin i sɔ yɛ sran sunman be yo i andɛ ɔ. Sanngɛ e kwla lafi su kɛ sɛ e manman like fi atin naan w’a tanndan e ɲrun e Ɲanmiɛn sulɛ nun’n, Zoova nían e lika. Ɔ tali nda seli kɛ: “N su yaci-man wɔ, n su kpɔci-man wɔ mlɔnmlɔn.”​—Ebre Mun 13:5.

E kusu e mian e ɲin e uka e wiengu mun naan be Ɲanmiɛn sulafilɛ’n yo dan. I wie yɛle kɛ siɛ nin niɛn kpa mun be wun i wlɛ kɛ be kwla uka be mma’m be kpa naan b’a lafi Ɲanmiɛn su. Kɛ ba’m bé ɲín kɔ́’n, ɔ nin i fata kɛ siɛ nin niɛn’m be kle be kɛ Ɲanmiɛn o lɛ, naan i yɛ ɔ kle e like ng’ɔ ti kpa’n nin ng’ɔ ti tɛ’n niɔn. Asa ekun’n, ɔ nin i fata kɛ siɛ nin niɛn’m be wun i wlɛ kpa sɛ ba’m be wun i wlɛ kɛ Ɲanmiɛn i mmla’m be su falɛ’n yɛ ɔ ti like kpafuɛ’n nin o. (Ezai 48:17, 18) Kɛ siɛ nin niɛn’m be uka be mma mun mɔ be lafi su kɛ Ɲanmiɛn ‘o lɛ, yɛ be nga be kunndɛ i’n, ɔ́ yí i wun klé bé’n, [ɔ ti be like cɛfuɛ’n]’ like kpa yɛ be man be lɛ ɔ.​—Ebre Mun 11:6

[Foto, bue 4]

[Foto, bue 4]