Moizi yoli wun ase kanfuɛ
?WUN ASE KANFUƐ’N YƐLE WAN? Wun ase kanfuɛ’n diman tutre, ɔ yomɛn i wun dandan i wiengu’m be su. Wun ase kanfuɛ’n, ɔ wun i wlɛ kɛ ɔ yo sa tɛ. Ɔ maan, sa kwlaa nun’n, ɔ si i jranwlɛ.
?WAFA SƐ YƐ MOIZI KLELI KƐ Ɔ TI WUN ASE KANFUƐ Ɔ? Kannzɛ Moizi ɲannin sasu’n, sanngɛ w’a diman tutre le. Blɛ sunman’n, kɛ sran’m be ko ɲan sasu kan’n, ɔ cɛman nn be su di tutre. Robert Ingersoll m’ɔ ti laa fluwa sifuɛ kun’n, ɔ kɛnnin i sɔ liɛ’n i ndɛ. Ɔ seli kɛ: “Sran’m be sunman lika be tra be awlɛn ɲrɛnnɛn sa’m be nun. Sanngɛ sɛ ɔ waan á sí sran kun i sran wafa ng’ɔ ti’n, mɛn i sasu kan naan nian.” Be wun ase kanlɛ nun’n, be kwlá saciman Moizi wun kaan sa. ?Ngue ti ɔ?
Zoova mannin Moizi i sasu dan. Yɛle kɛ ɔ fɛli i sieli Izraɛlifuɛ’m be su kɛ ɔ sie be. Ɔ nin si sɔ ngba’n, Moizi w’a yomɛn i wun dandan le. Amun e nian wafa nga ɔ kɛnnin i wun ase siesieli aja nun cɛlɛ’n i su ndɛ kun m’ɔ tɔli’n. (Kalɛ 27:1-11) Ndɛ sɔ’n timan ndɛ kaan. Afin wafa nga ɔ́ kpɛ́ ndɛ sɔ nun’n, i su yɛ sɛ cɛn uflɛ i sɔ ndɛ tɔ’n, Izraɛlifuɛ’m bé nían bé síesíe ɔ.
?Ngue yɛ Moizi yoli ɔ? ?Ɔ seli i wun kɛ i yɛ ɔ sie Izraɛlifuɛ mun ti’n, ɔ si wafa trele kun ng’ɔ́ síesíe ndɛ sɔ’n? ?Annzɛ kusu’n, ɔ seli i wun kɛ w’a wun sa sunman, annzɛ ɔ siesie ndɛ titi, annzɛ ɔ si Zoova ti naan ajalɛ ng’ɔ́ fá’n, ɔ́ yó Zoova liɛ’n su?
Sran ng’ɔ ti tutrefuɛ’n, atrɛkpa’n, i sɔ yɛ ɔ́ yó ɔ. Moizi timɛn i sɔfuɛ. Biblu’n waan: “Moiz kannin ndɛ sɔ’n kleli Anannganman.” (Kalɛ 27:5) Amun bɔbɔ amun nian. Kannzɛ Moizi sieli Izraɛlifuɛ mun w’a di afuɛ kɔe 40, sanngɛ w’a lafimɛn i wun su, ɔ lafili Zoova su. I lɛ nun’n, Moizi kleli kɛ ɔ ti wun ase kanfuɛ dan.
Moizi w’a semɛn i wun kɛ i kunngba yɛ ɔ fata kɛ ɔ sie Izraɛlifuɛ mun ɔn. Kɛ Zoova fali Izraɛlifuɛ wie mun naan be ijɔ i nuan wie’n, ɔ yoli i fɛ dan. (Kalɛ 11:24-29) Asa ekun’n, kɛ i sia yasua’n seli i kɛ ɔ kpa sran wie mun naan be ukɛ i’n, ɔ fɛli i sia’n i ndɛ’n su klanman. (Ezipt Lɔ Tulɛ 18:13-24) Kpɛkun kɛ ɔ yoli oke m’ɔ te le wunmiɛn bɔbɔ’n, ɔ srɛli Zoova kɛ ɔ mɛn i janunfuɛ kun. Naan Zoova w’a mɛn i Zozie. Kɛ ɔ yoli sɔ kusu’n, Moizi suannin gbanflɛn kan’n i bo. Kpɛkun, ɔ wlali Izraɛlifuɛ’m be su nun kpa kɛ be su Zozie su lele be ju Mɛn nga Ɲanmiɛn seli kɛ ɔ́ fá mán be’n i nun lɔ. (Kalɛ 27:15-18; Mmla’n 31:3-6; 34:7) Izraɛlifuɛ’m be sielɛ’n yoli Moizi fɛ. Sanngɛ, w’a nianman kɛ Ɲanmiɛn mɛnnin i kwlalɛ ti’n, ɔ́ míɛnmíɛn i wiengu.
WAFA NGA E KWLA NIƐN I AELIƐ’N SU’N: Nán e se kɛ y’a ɲan kwlalɛ, annzɛ e si ninnge wie’m be yo dan naan i ti’n, é tú e wun. Nán e wla fi ndɛ nga su le. Yɛle kɛ sɛ e waan é dí Zoova junman’n i kpa’n, wun ase kanlɛ’n ti cinnjin tra e bɔbɔ e like liɛ nga e si i yo’n. (1 Samiɛl 15:17) Sɛ e ti wun ase kanfuɛ sakpa’n, é mían e ɲin fá Biblu’n nun afɔtuɛ kpa nga su. Ɔ se kɛ: “Nán lafi ɔ bɔbɔ wɔ akunndan liɛ’n su. Anannganman i su yɛ lafi-ɔ.”—Nyanndra Mun 3:5, 6.
Moizi i aeliɛ’n kle e wie ekun kɛ, nán e fa e kwlalɛ’n sie like’n kwlaa ɲrun.
?Sɛ e nian Moizi i aeliɛ’n su’n, e liɛ yó ye? E kɛnmɛn i lele. Sɛ e ti wun ase kanfuɛ’n, e tranlɛ su yoman ya. E wun yó e wiengu’m be fɛ. Sanngɛ like ng’ɔ ti kpa dan’n, yɛle kɛ Ɲanmiɛn Zoova m’ɔ kɛn i wun ase yo maan i sufuɛ’m be ɲan ɲrun’n, e wun yó i fɛ wie. (Jue Mun 18:36) “Nyanmiɛn nin be nga be tu be wun mun be lɛ i, sanngɛ ɔ yo aenvuɛfuɛ’m be ye.” (1 Piɛr 5:5). Ɔ maan sɛ e nian Moizi wun ase kanlɛ aeliɛ’n su’n, ɔ ti kpa man e dan!
[Foto, bue 5]