NDƐ NG’Ɔ KLƐ FLUWA’N SU’N

?Wan yɛle Moizi?

?Kɛ amun ti Ɲanmiɛn i sran nga be flɛ i Moizi’n i dunman’n, i su ndɛ benin yɛ ɔ kpɛn amun klun ɔn?

◼ ?Ba nɔnman mɔ i nin’n fɛ i lali gbogbo nun m’ɔ ko fɛ i sieli Nili nzue’n su’n niɔn?

◼ ?Annzɛ bakan mɔ Ezipti famiɛn’n i wa bla’n tɛli i pɔɔ nun’n, sanngɛ i wla w’a fiman su le kɛ ɔ ti Izraɛlifuɛ’n niɔn?

◼ ?Annzɛ kusu sran m’ɔ yoli Madian lɔ nnɛn kankanfuɛ lele afuɛ 40 niɔn?

◼ Sɛ kusu sran m’ɔ nin Zoovaa be kokoli yalɛ susrɛ mɔ sin’n o nun’n, i ɲrun lɛ’n nin o.

◼ Annzɛ sran m’ɔ ko seli Ezipti famiɛn’n i kpongbongbo kɛ ɔ yaci Izraɛlifuɛ mɔ be su di kanga’n be nun’n nin o.

◼ ?Annzɛ sran mɔ kɛ Ezipti famiɛn’n kpɛli Ɲanmiɛn i nzowa’n, Ɲanmiɛn maan ɔ fali ɲrɛnnɛn blu yili Ezipti mɛn’n su’n niɔn?

◼ Sɛ kusu sran m’ɔ fali Izraɛlifuɛ mun fiteli Ezipti mɛn’n nun’n nin o.

◼ ?Sran mɔ Ɲanmiɛn maan ɔ kpacili ndɛma jenvie’n i nun nɲɔn’n niɔn?

◼ ?Annzɛ sran mɔ Ɲanmiɛn sinnin i lika mannin Izraɛlifuɛ’m be mmla blu’n niɔn?

MOIZI yoli sa kwlaa nga e boli be su lɛ’n, ɔ nin sa uflɛ wie mun ekun. Ɔ maan sɛ Klistfuɛ mun nin Zuifu mun, yɛ Ɲanmiɛn flɛfuɛ mun be ɲin yi sran ndɛnmanfuɛ sɔ’n kpa’n, ɔ boman e nuan.

Nanwlɛ, Moizi yoli Ɲanmiɛn nuan ijɔfuɛ kun m’ɔ “yili i tinmin” i nglo ɔ. (Mmla’n 34:10-12) Ɔ loli i wun mannin Ɲanmiɛn, ɔ maan Ɲanmiɛn fɛli i dili junman dan. Sanngɛ Moizi ti kɛ sran kwlaa sa. I nun nga Zezi dí i junman asiɛ’n su wa’n, i wunnɛn’n i kacilɛ’n nun’n, Ɲanmiɛn nuan ijɔfuɛ Eli nin Moizi be fiteli i wun lɛ. Wafa nga Eli ti ‘sran kɛ e sa’n,’ Moizi kusu ti sran sɔ wie. (Zak 5:17; Matie 17:1-9) Sa nga be tɔ e su andɛ’n, be nun sunman be tɔli Moizi su sanngɛ ɔ jrannin be ɲrun klanman.

?Amun kunndɛ kɛ amún sí wafa ng’ɔ yoli’n? Sɛ amun waan bé wún i wlɛ’n, amun fa amun ɲin sie Moizi i aeliɛ klanman nsan su naan amun wun wafa nga amun kwla nian su’n.

[Ja ngua lɛ ndɛ’n]

[Foto, bue 3]