Ɲrɛnnɛn sa sroesroe nga be ju’n: ?Be kle kɛ Ɲanmiɛn siman aunnvuɛ?

NDƐ NGA SRAN WIE’M BE KAN’N: “Ɲanmiɛn yɛ ɔ sie mɛn’n niɔn, i yɛ ɔ yo maan sa sroesroe kɛ asiɛ m’ɔ keje’n sa’n be ju ɔ. Ɔ maan ɔ siman aunnvuɛ.”

NDƐ NGA BIBLU’N KAN’N: “Klunwifuɛ’n sie mɛn wunmuan’n.” (1 Zan 5:19) ?Wan yɛle “Klunwifuɛ’n?” Biblu’n waan Satan ɔn. (Matie 13:19; Mark 4:15) An bu sa nga i akunndan nian. Sɛ Satan yɛ ɔ sie mɛn’n, nn i yɛ ɔ wlawla sran mun mɔ be bu be ngunmin be wun akunndan, mɔ be ɲin yiman like yɛ be wunman sa wlɛ’n niɔn. ?Nɛ́n i sɔ’n ti yɛ sran’m be saci asiɛ’n m’ɔ ti be tranwlɛ’n i su ninnge mun’n niɔn? Fluwa sifuɛ dandan’m be waan asiɛ’n i su ninnge’m be sacilɛ’n ti yɛ maan sa sroesroe kɛ nzue m’ɔ di lika’n sa’n be ju ɔ, annzɛ i ti yɛ maan be yo tɛ kpa ɔ, annzɛ kusu i ti yɛ kɛ sa sɔ’n be ju’n sran’m be su afɛ’n ɔ yo dan ɔn.

?Sɛ ɔ ti sɔ’n niɔn, ngue ti yɛ Ɲanmiɛn man Satan i atin m’ɔ sie asiɛ’n sɔ ɔ? Ɔ fin sa ng’ɔ juli mɛn’n i bo bolɛ nun’n. Yɛle kɛ e si nin e nin klikli’n, b’a kplinman su kɛ Ɲanmiɛn yo be Siefuɛ. Kɛ ɔ fɛ i lɛ’n, sran’m be sunman lika be fa ajalɛ kunngba sɔ’n wie. I sɔ’n ti’n, be kwlaa be tɔ Ɲanmiɛn i kpɔfuɛ Satan i sa nun. I ti’n Zezi flɛli Satan kɛ “sran ng’ɔ sie mɛn nga’n.” (Zan 14:30) ?Sanngɛ Satan síe mɛn’n sa trilili? Cɛcɛ!

Ɲrɛnnɛn nga Satan fa yi i sran’m be su’n, nán kɛ Zoovaa i ndɛ nunman nun ti ɔ. I kpa bɔbɔ’n, kɛ Ɲanmiɛn wun afɛ ng’ɔ o e su’n ɔ yo i ya kpa. I nun nga kekle dan kpa tɔli Izraɛli nvle’n su’n, Biblu’n kan Ɲanmiɛn i ndɛ se kɛ: “Be nyrɛnnɛn sɔ’n, ɔ kacili i bɔbɔ liɛ wie.” (Ezai 63:9) Ɲanmiɛn i aunnvuɛ silɛ’n ti’n ɔ ka kan’n, ɔ́ wá fá ajalɛ naan w’a nunnun Satan m’ɔ ti klunwifuɛ’n i sielɛ’n. Ɔ sieli i Wa Zezi Klist kɛ ɔ yo Famiɛn sɛsɛfuɛ tititi.

SA NGA TI YƐ NDƐ SƆ’N TI AMUN LIƐ WIE’N: Satan w’a sasaman sran mun sa sroesroe’m be lika. Sanngɛ Zezi liɛ’n, ɔ́ wá sásá sran mun. Blɛ kun nun mɔ seke dan kpa kpɛ́ nzue kun su’n, Zezi fali ajalɛ naan w’a sɛsɛ i sɔnnzɔnfuɛ mun. Biblu’n kan kɛ: “Ɔ tinngeli naan w’a ijɔ aunngban’n, yɛ ɔ seli nzue’n kɛ: ‘Yaci bolɛ’n, jran diin!’ Kpɛkuun kpe yɛ aunngban’n kpɛli-ɔ, naan lika’n w’a tɔ bliin.” Kɛ ɔ yoli sɔ’n, i sɔnnzɔnfuɛ’m be seli kɛ: “?Nguɛ sran yɛlɛ nga bɔ aunngban’n nin nzue’n bɔbɔ be sro i sɔ-ɔ?” (Mark 4:37-41) Sa sɔ’n yo maan e lafi su kɛ blɛ mɔ Zezi wá dí famiɛn’n, ɔ́ sásá klɔ sran kwlaa nga be ɲin yi Ɲanmiɛn’n.​—Daniɛl 7:13, 14.

[Ja ngua lɛ ndɛ’n]