Fluwa nun kannganfuɛ’m be kosan
?Sa tɛ nga e yo’n ti yɛ Ɲanmiɛn fa sa kɛ asiɛ m’ɔ keje’n annzɛ nzue m’ɔ tɔ di lika’n yi e su ɔ?
Ɲanmiɛn faman sa sɔ mun yiman sran mɔ b’a yoman like fi’n be su. Yɛ ɔ su yoman sɔ le. Afin 1 Zan 4:8 se kɛ Ɲanmiɛn ti “sran klofuɛ.”
Like kwlaa nga Ɲanmiɛn yo’n, ɔ taka sran klolɛ’n su. Ɲanmiɛn Ndɛ’n kusu waan: “Sran ng’ɔ klo i wiengu’n, ɔ yomɛn i tɛ.” (Rɔmfuɛ Mun 13:10) Ɔ maan, sran mɔ w’a yoman like fi mɔ be klo i’n, be kwlá yomɛn i tɛ. Zɔb 34:12 se kɛ: ‘Ɲanmiɛn yoman sa tɛ. Ɲanmiɛn m’ɔ kwla like kwlaa yo’n, ɔ buman ndɛ kwlɛ.’
Ɲanmiɛn Ndɛ’n seli kɛ e blɛ liɛ’n nun’n, “asiɛ’n wá kéje dan kpa.” (Lik 21:11) Ɔ ti sɔ, sanngɛ nán Zoova yɛ ɔ yo maan asiɛ’n keje m’ɔ kun sran mun ɔn. I wie yɛle be nga televiziɔn nun’n be kan wafa nga lika’n wá yó’n, i ndɛ’n. ?I sɔ mɔ be yo’n, é sé kɛ be yɛ be yo maan wie liɛ’n, aunmuan’n saci lika’n niɔn? Cɛcɛ! I kunngba yɛle Zoova liɛ’n. Nɛ́n i yɛ ɔ yo maan sa kekleekle sɔ’m be ju ɔ. ?Sɛ ɔ ti sɔ’n niɔn, wan yɛ ɔ o sa sɔ’m be sin ɔn?
Ɲanmiɛn Ndɛ’n waan: “Klunwifuɛ’n sie mɛn wunmuan’n.” Klunwifuɛ sɔ’n yɛle mmusu’m be si Satan. (1 Zan 5:19) Kɛ ɔ fin i bo bolɛ nun m’ɔ jasoli Ɲanmiɛn wun’n lele m’ɔ́ fá jú andɛ’n, ɔ ti sran kunfuɛ. (Zan 8:44) Ɔ buman sran’m be wie mlɔnmlɔn. I klun yo wi, kpɛkun i kunngba i wun akunndan yɛ ɔ bu ɔ. ?Nán kɛ sran m’ɔ sie be’n be ti sɔ wie ɔ? Andɛ sika ti sran’m be yo be wiengu kɛ nnɛn mun sa. Be nga be leman wie’n, kannzɛ lika nga be tran lɔ’n asiɛ’n kwla keje’n annzɛ sannvuɛsa uflɛ wie kwla tɔ lɔ’n, kɛ mɔ be lemɛn i yowlɛ’n ti’n, be tran lika sɔ’m be nun. (Efɛzfuɛ Mun 2:2; 1 Zan 2:16) Ɔ maan, sran’m be klunwi’n ti yɛ sa kekleekle wie’m be tɔ be wiengu’m be su ɔ. (Akunndanfuɛ’n 8:9) Maan e yiyi nun e nian.
Amlɛnkɛn’m be lɔ’n, aunmuan dan wie tuli sacili be lika nga be flɛ i Nouvelle-Orleans. Ɔ maan, be nga be tran lɔ’n be fɛli kpa. Nvle nga be flɛ i Venezuela lɔ kusu’n, nzue m’ɔ tɔli’n ti’n, nnɔtiɛ ng’ɔ o okaoka nga be o jenvie nuan lɔ’n be su’n, ɔ bu guali sua kpanngban su. I kwlaa sɔ nun’n, maan ɔ yo nzue m’ɔ tɔ nin aunmuan m’ɔ tu m’ɔ saci lika’n annzɛ sa uflɛ o, e kwla se kɛ sran mun mɔ be siman sa sɔ’m be nun be ti yɛ sa kekleekle sɔ’m be yo ɔ. Be mannzin nga be fa di junman kusu’n, be timan kpa. Like ng’ɔ fata kɛ awa sran’m be yo’n, be yoman. Sran’m be kusu kɛ be o lɛ’n, sɛ sa wie wá jú’n, be ng’ɔ fata kɛ be kan kle be wiengu’n, be kan kleman be. Sɛ kusu be kan kle sran mun’n, be bu be su nun waka.
Zezi blɛ su’n, sanvuɛsa kun juli. Yɛle kɛ akpa fleiin kun bu tɔli sran blu nin mɔcuɛ su kunnin be. (Lik 13:4) Sanngɛ nán Ɲanmiɛn yɛ ɔ kunnin be. Atrɛkpa’n, sran’m b’a nianman nun b’a kplanman akpa fleiin sɔ’n. Annzɛ kusu ‘kɛ blɛ’n fa ti mɔ sa’m be fa ju’n, i su like yɛ sran sɔ’m be wunnin i ɔ.’—Akunndanfuɛ’n 9:11.
?Ɔ maan, kɛ Ɲanmiɛn o lɛ’n, ɔ nin a faman sa kekleekle nin a yiman sran’m be su le? I yo, Ɲanmiɛn w’a yo sɔ le, sanngɛ ɔ tɛmɛn i yo. Kɛ ɔ yo i liɛ kusu’n, like kun trele ti yɛ ɔ yo sɔ ɔ, ɔ yomɛn i sa ngbɛn. Ɔ nunkunman sran’m be ngba. Ɔ timan kɛ sanvuɛsa mɔ sran’m be ti’n, ɔ tɔ be wiengu’m be su’n sa. I wie yɛle anannganman su nzue m’ɔ tɔli Noe blɛ su’n, ɔ nin Sodɔmu nin Gomɔru klɔ’n be nunnunlɛ m’ɔ nunnunnin be Lɔtu blɛ su’n. (Bo Bolɛ 6:7-10, 13; 18:20-32; 19:24) Kɛ ɔ yoli sɔ’n, be kwlaa nga be mantan Ɲanmiɛn’n, be fiteli nun. Sanngɛ klunwifuɛ mɔ be ɲin su ti kekle’n, be kali nun.
Jue Mun 72:12 kan Zezi mɔ Ɲanmiɛn sieli i famiɛn’n i ndɛ. Ɔ se kɛ: ‘Sɛ ɲrɛnnɛnfuɛ’n kpan flɛ i’n, ɔ́ dé i. Ɔ de yalɛfuɛ m’ɔ leman wie’n.’ I sɔ mɔ Ɲanmiɛn kan’n, ɔ kle kɛ, ɔ́ yó maan ɲrɛnnɛn kwlaa wíe, like fi kwlá tɛnndɛnmɛn i ɲrun. Ɔ maan sanvuɛsa kɛ asiɛ m’ɔ keje nin nzue m’ɔ tɔ di lika’n, e su wunman be kun.