Maan e klo Zoova i nzuɛn’n i kpa tra su
“Kɛ an ti Nyanmiɛn i anwlɛn su ba’n, an nian like ng’ɔ yo’n su, an yo.”—EFƐ. 5:1.
?AMÚN TƐ́ SU SƐ?
?Ngue yɛ é yó naan y’a klo Zoova i nzuɛn’n i kpa ekun ɔn?
?Sran nga be kwla fa be wun mɛntɛn i’n, ɔ ti sran wafa sɛ?
?Kɛ Zoova sa’n, wafa sɛ yɛ e kwla kle kɛ e kpaman sran nun ɔn?
1. (a) ?Sɛ amun waan amún kán Zoova i ndɛ’n, amún sé sɛ? (b) ?Sɛ amun suan Ɲanmiɛn i nzuɛn’m be su like’n, ye benin yɛ amún dí ɔ?
?SƐ BE se e kɛ e kan Zoova ndɛ’n, é sé sɛ? E nun kpanngban é sé kɛ ɔ ti sran klofuɛ, nin sa i nuan su sɛsɛ yofuɛ, nin ngwlɛlɛfuɛ, naan ɔ lɛ tinmin dan. Sanngɛ, nɛ́n i ngba ɔ. Zoova i nzuɛn kpa mun’n, be diman be yalɛ. Sɛ e waan é ká be sa’n, be kwla ju be liɛ 40 tra su. Be kwlaa sɔ’n, e fluwa’m b’a kan be ndɛ kunngunngun. Ɔ maan sɛ e ngunmin annzɛ e nin e awlobo’n, e suan Zoova i nzuɛn sɔ mun be su like’n, nanwlɛ, é sí Zoova i su like kpanngban. Kɛ ɔ yo sɔ’n, é kló e Si Ɲanmiɛn kpa ekun. Yɛ i agualiɛ su’n, é fá e wun mɛ́ntɛn i kpa, kpɛkun é fɛ́ i nzuɛn’n su kpa ekun.—Zoz. 23:8; Jue. 73:28.
2. (a) ?Sɛ e waan é kló Zoova kpa ekun’n, ngue yɛ ɔ fata kɛ e yo ɔ? (b) ?Like suanlɛ nga nun, ɔ nin i sin nɲɔn nga bé bá’n be nun’n, ngue yɛ é wá kɛ́n i ndɛ ɔ?
2 Be waan tro fɛ’n yɛ ɔ cuɛn janda’n niɔn. Sɛ é kwlá sé’n i kunngba’n yɛle klolɛ mɔ e fa klo Zoova’n. Kɛ é sí i nzuɛn’n é kɔ́’n nn é kló i kpa trá laa’n. Ɔ maan, e klo kɛ é fɛ́ i nzuɛn’n su. (Eph. 5:1) Like suanlɛ nga nun, ɔ nin i sin nɲɔn nga bé bá’n be nun’n, é wá kán Zoova i nzuɛn wie’m be ndɛ. Kɛ e fa nzuɛn kun’n, é dún mmua tú i bo. I sin, é klé wafa nga Zoova yi i nglo’n. Kpɛkun wafa nga e bɔbɔ e kwla fa nzuɛn sɔ’n su’n, é kɛ́n i ndɛ.
E KWLA FA E WUN MANTAN ZOOVA
3, 4. (a) ?Sran nga be kwla fa be wun mɛntɛn i’n, ɔ ti sran wafa sɛ? (b) ?Wafa sɛ yɛ Zoova kle kɛ e kwla fa e wun mɛntɛn i ɔ?
3 Sran nga be kwla fa be wun mɛntɛn i’n, i like yolɛ yoman ya. Blɛ kwlaa nga sran kun kunndɛ kɛ ɔ́ kán ndɛ klé i’n, ɔ sɔ i nun. Asa ekun’n, be nin i kwla koko yalɛ. Kɛ i sɔ sran’n kán ndɛ’n, wafa ng’ɔ ɲannjin i ɲrun’n, ɔ nin wafa ng’ɔ siesie i sa’n, ɔ yi i nglo kɛ ɔ klo kɛ be fa be wun be mɛntɛn i.
4 ?Wafa sɛ yɛ Zoova kle kɛ e kwla fa e wun mɛntɛn i ɔ? Zoova yɛ ɔ yili nglo nin asiɛ’n, ɔ nin be su ninnge kwlaa ɔ, yɛ like fi nunmɛn i sin. Ɔ nin i sɔ ngba’n, Zoova klo kpa kɛ e srɛ i. Kɛ e srɛ i kusu’n, ɔ sie i su e nuan bo kpa kpɛkun ɔ tɛ e su klanman. (An kanngan Jue Mun 145:18 ɔ nin Ezai 30:18, 19 nun.) Ɔ maan lika kwlaa nga e wo’n, ɔ nin dɔ kwlaa su’n, e kwla kan e klun ndɛ ngba e kle Ɲanmiɛn. Afin e si kɛ ɔ su kpaloman e nuan le. (Jue. 65:3; Zak 1:5) Wafa nga be kan Zoova ndɛ i nuan ndɛ nun’n, ɔ kle kɛ e kwla fa e wun mɛntɛn i. I wie yɛle kɛ, jue tofuɛ Davidi seli kɛ “Anannganman i nyin wo” e su naan i “sa fama’n yɛ ɔ suan” e bo ɔ. (Jue. 34:16; 63:9) Ɲanmiɛn nuan ijɔfuɛ Ezai liɛ’n, ɔ fali Zoova sunnzunnin bua tafuɛ. Ɔ seli kɛ: “Ɔ́ fɛ́ i sa’n flɛ́ i bua ba mun yɛ ɔ́ tían be nuan, ɔ́ fá be síe i wue’n nun.” (Eza. 40:11) An bu i akunndan kan be nian! Zoova kunndɛ kɛ e nin i e afiɛn’n mantan kpa kɛ bua ba m’ɔ o i tafuɛ’n i wue’n nun’n sa. ?Kɛ e bu i sɔ’n i akunndan’n, ɔ yoman e kɛ e klo i kpa ekun naan e sɔnnzɔn i? ?Sanngɛ wafa sɛ yɛ e kwla sɔnnzɔn Zoova ɔ?
NZUƐN CINNJIN KPA KUN
5. ?Ngue ti yɛ ɔ ti cinnjin kpa kɛ asɔnun kpɛnngbɛn’m be yo sran mɔ be kwla fa be wun mantan be ɔ?
5 Koko nun wa’n, nvle fanunfanun nun’n, be fali kosan nga usali Zoova i Lalofuɛ wie mun. Be usali be kɛ: “?Nzuɛn benin yɛ amun klo kpa kɛ asɔnun kpɛnngbɛn kun yi i nglo ɔ?” Be nun sunman be tɛli su kɛ: “E klo kɛ ɔ yo sran mɔ be kwla fa be wun mɛntɛn i’n.” I yo, ɔ fata kɛ e kwlaa e yo sran mɔ be kwla fa be wun mɛntɛn i ɔ. Sanngɛ be ng’ɔ ti cinnjin kɛ be yo i sɔfuɛ kpa’n, yɛle asɔnun kpɛnngbɛn mun. (Eza. 32:1, 2) ?Ngue ti yɛ ɔ? Aniaan bla kun seli kɛ sɛ be kwlá faman be wun mantanman asɔnun kpɛnngbɛn kun’n, be kwlá simɛn. ?Amun wunman kɛ ndɛ sɔ’n ti nanwlɛ? ?Sanngɛ, wafa sɛ yɛ sran kun kwla kle kɛ be kwla fa be wun mɛntɛn i ɔ?
6. ?Ngue yɛ sran kun kwla yo naan w’a kle kɛ be kwla fa be wun mɛntɛn i ɔ?
6 Sɛ sran kun kunndɛ kɛ sran’m be fa be wun mɛntɛn i’n, ɔ fataman kɛ sran ndɛ lo i i nuan bui su. Asɔnun kpɛnngbɛn nga i wiengu ndɛ lo i kpa’n, sran kpɛnngbɛn mun o, bakanngan mun o, be kwlaa bé kló kɛ be nin i bé kókó yalɛ. (Mar. 10:13-16) Karlosu m’ɔ le afuɛ 12 seli kɛ: “Asɔnun lɔ’n, kɛ n wun kɛ asɔnun kpɛnngbɛn’m be nin sran’m be sri, mɔ be like yolɛ yoman ya’n, be wun yo min fɛ.” Ɔ maan ɔ fataman kɛ asɔnun kpɛnngbɛn kun kɛn i nuan nun ngbɛn kɛ be kwla fa be wun mɛntɛn i. Ɔ fata kɛ be wun i sɔ liɛ’n, i nzuɛn’n nun. (1 Zan 3:18) ?Wafa sɛ yɛ ɔ kwla yo sɔ ɔ?
7. ?Ɔ yo sɛ yɛ maan aɲia i nzɔliɛ fluwa m’ɔ ta be wue nun’n, ɔ kwla kpɛ yalɛ kokolɛ ba ɔ? ?Ngue yɛ i sɔ’n kle asɔnun kpɛnngbɛn mun ɔn?
7 Amun e fa sunnzun ase kun. Koko nun wa’n, aniaan kun ɔli nvle kun aɲia bo nvle uflɛ nun. Kɛ ɔ́ sɛ́ i sin i klɔ’n, ɔ fali alapla. Aɲia’n i nzɔliɛ fluwa’n tɛ i wue’n nun. Be klɛli su kɛ: “Maan Ɲanmiɛn Sielɛ Blɛ’n ju!” Be nga be nian sran’m be lika alapla nun’n, be nun kun wunnin ndɛ ng’ɔ klɛ aniaan’n i wue’n nun’n. Kpɛkun, ɔ seli aniaan’n kɛ: “Maan ɔ ju sakpa. Ndɛ sɔ’n, ɔ fata kɛ e koko i su yalɛ kan.” Be kokoli i su yalɛ kusu. Kpɛkun, bian’n sɔli periodiki mɔ aniaan’n fa mɛnnin i’n, be nun klanman. Sa kɛ ngalɛ sa’n, e nun sunman y’a wun wie le. ?Sanngɛ, ɔ yo sɛ yɛ maan aɲia’n i nzɔliɛ fluwa m’ɔ ta be wue nun’n, ɔ kwla kpɛ yalɛ kokolɛ ba ɔ? Afin nzɔliɛ fluwa sɔ’n, sɛ é kwlá sé’n, ɔ kle sran mun lika nga e su kɔ’n. Kpɛkun, ɔ kle be wie ekun kɛ e kunndɛ kɛ é kán Ɲanmiɛn i ndɛ é klé be. Ɔ fata kɛ asɔnun kpɛnngbɛn’m be yo sɔ wie. Yɛle kɛ, maan be ninnge yolɛ wafa’n kle aniaan mun kɛ nán srɛ kun be. Naan aniaan’m be fa be wun mantan be. ?Wafa nga asɔnun kpɛnngbɛn kun kwla yo sɔ’n, i wie yɛle benin?
8. ?Wafa sɛ yɛ asɔnun kpɛnngbɛn’m be kwla kle kɛ sran ndɛ lo be kpa ɔ? ?Wafa sɛ yɛ i sɔ’n yo aniaan mun ɔn?
8 Wafa nga sran’m be kle kɛ be wiengu ndɛ lo be’n, ɔ ti fanunfanun. Sanngɛ i kwlaa yoli o, kɛ e wun e niaan mun mɔ e yo be like aklunjuɛ su, mɔ srilɛ o e nuan, mɔ e ti be jasin’n, e kle kɛ be ndɛ lo e kpa. ?Sanngɛ e niaan mun yɛ ɔ fata kɛ be wunnge e wun, annzɛ e bɔbɔ yɛ ɔ fata kɛ e fa e wun mantan be ɔ? Maan e nian ajalɛ nga Zezi kle e’n. Biblu’n waan kɛ cɛn kun Zezi nin i sɔnnzɔnfuɛ’m be yiali’n, “Jésus wunngeli be wun lɛ” naan w’a kan ndɛ w’a kle be. (Mat. 28:18) Andɛ kusu’n, like kunngba’n yɛ asɔnun kpɛnngbɛn’m be yo ɔ. Yɛle kɛ be wunnge be niaan’m be wun be nin be koko yalɛ. ?Wafa sɛ yɛ i sɔ’n yo aniaan mun ɔn? Aniaan bla atin bofuɛ kun m’ɔ le afuɛ 88 seli kɛ: “Kɛ n ju asɔnun lɔ mɔ asɔnun kpɛnngbɛn’m be sri puɛɛ be sɔ min nun, mɔ be kan ndɛ wie mun wla min fanngan’n, be wun yo min fɛ.” Aniaan bla uflɛ seli kɛ: “Kɛ n kɔ aɲia bo mɔ asɔnun kpɛnngbɛn kun sri puɛɛ sɔ min nun’n, min liɛ’n, m bumɛn i like kaan. Afin i sɔ’n wla min fanngan dan.”
MAAN E ƝAN E TI E NIN ANIAAN MUN E KOKO YALƐ
9, 10. (a) ?Ajalɛ kpa benin yɛ Zoova kle e ɔ? (b) ?Wafa sɛ yɛ asɔnun kpɛnngbɛn’m be kwla kle kɛ be ɲan be ti be man aniaan mun ɔn?
9 Sɛ e ɲanman e ti e manman aniaan mun’n, be su kwlá faman be wun mantanman e. Kɛ ɔ ko yo naan w’a yoman sɔ’n, Zoova kle e ajalɛ kpa. Biblu’n waan: “Ɔ nin ye nin e nun wie fi nun-man mmua.” (Yol. 17:27) Ka naan b’a bo aɲia’m be bo’n, yɛ kɛ aɲia’m be wie’n, asɔnun kpɛnngbɛn’m be fa blɛ naan be nin be niaan mun, i kpɛnngbɛn o, i bakan o, b’a koko yalɛ. Kɛ be yo sɔ’n, be kle kɛ be ɲan be ti be man be niaan mun. Aniaan bian atin bofuɛ kun seli kɛ: “Kɛ asɔnun kpɛnngbɛn kun usa min kɛ min wun ti sɛ, m’ɔ sie i su min nuan bo’n, ɔ yo min fɛ dan.” Aniaan bla kun liɛ’n, ɔ su Zoova w’a di afuɛ kɔe 50. Ɔ seli kɛ: “Kɛ aɲia’n wie mɔ asɔnun kpɛnngbɛn’m be nin min koko yalɛ’n, min wun kpaja min.”
10 I yo, asɔnun kpɛnngbɛn’m be su junman’n sɔnnin. Sanngɛ kɛ bé kɔ́ aɲia’m be bo’n, ɔ fata kɛ be se be wun kɛ be nin aniaan’m bé kókó yalɛ.
ZOOVA KPAMAN SRAN NUN
11, 12. (a) ?Sran ng’ɔ kpaman sran nun’n, ngue yɛ ɔ yoman ɔn? (b) ?Kɛ be se kɛ be kpaman sran nun’n, Zoova i su ndɛ benin yɛ i nuan ndɛ’n kan ɔn?
11 Zoova i nzuɛn kun ekun m’ɔ ti kpa dan’n, yɛle kɛ ɔ kpaman sran nun. (Yol. 10:34) Sran ng’ɔ kpaman sran nun’n, ɔ yoman sran wie kpa traman wie. Nga ti yɛ ɔ yo sɔ’n, yɛle kɛ ɔ wun i wlɛ kpa kɛ i sɔ yolɛ’n ti su. Sran ng’ɔ kpaman sran nun’n, ɔ nianman kɛ sran kun le sika annzɛ ɔ leman sika’n, yɛ ɔ nianman sran kun ɲrun naan w’a yo i kpa. Like ng’ɔ nin sran kun fata’n, yɛ ɔ yo mɛn i ɔ.
12 Zoova i nuan ndɛ’n se kɛ ɔ “kpa-man sran nun.” Kɛ be se kɛ be kpaman sran nun’n, Zoova yɛ ɔ yi i sɔ liɛ’n i nglo kpa ɔ. (An kanngan Sa Nga Be Yoli’n 10:34, 35 ɔ nin Mmla’n 10:17 nun.) Sa kun m’ɔ juli Moizi blɛ su’n, ɔ yi i nglo kpa.
13, 14. (a) ?Sa benin yɛ ɔ juli Zɛlɔfsadi i mma mmla’m be su ɔ? (b) ?Wafa sɛ yɛ Zoova kleli kɛ ɔ kpaman sran nun ɔn?
13 Be flɛ bian kun kɛ Zɛlɔfsadi. Ɔ fin Manase osu’n nun. Cɛn kun’n, sa kun juli i mma mmla nnun’m be su. Kɛ ɔ́ yó sɔ nn Izraɛlifuɛ mun be o mɛn nga Ɲanmiɛn seli kɛ ɔ́ fá mán be’n i tiwa. ?Ngue sa yɛle sɔ’n? Yɛle kɛ be si w’a wuman ba yasua naan w’a wu. Moizi Mmla’n kusu se kɛ ba yasua yɛ ɔ di aja ɔ. Ɔ maan asiɛ ng’ɔ fata kɛ be fa man be si’n, kɛ mɔ be ti bla’n ti’n, b’a fa manman be. (Kal. 26:33, 52-55) ?Bé fá be si i asiɛ’n liɛ’n mán i osufuɛ mun? ?Ngue yɛ Zɛlɔfsadi i mma mmla’m bé yó ɔ?
14 Zɛlɔfsadi i mma mmla nnun’n be ko toli Moizi. Be seli i kɛ: “?Ɔ yo sɛ ti yɛ e si liɛ’n i dunman’n w’a nunnun i osu liɛ’n nun sa-a? ?Ba yasua b’ɔ lɛ-mɛn i’n ti-ɔ? Man e tranwlɛ liɛ e si i niaan’m be wun lɛ.” Kɛ be seli sɔ’n, Moizi “kannin ndɛ sɔ’n kleli Anannganman.” (Kal. 27:2-5) W’a tɛman be su kɛ: ‘Ndɛ kɛ nga sa’n, ɔ lemɛn i kanwlɛ. Afin Mmla’n boman su diman jɔlɛ.’ ?Wafa sɛ yɛ Zoova dili ndɛ’n niɔn? Ɔ seli Moizi kɛ: “Zɛlɔfsad i mma mmla’m be ndɛ yo fɛ. Man be asiɛ liɛ be si niaan bian’m be afiɛn. Maan be si i asiɛ liɛ’n ɔ yo be liɛ.” Sanngɛ Zoova w’a kaman ngalɛ’n su. Ɔ jrannin ndɛ sɔ’n su kpɛli mmla uflɛ. Ɔ seli Moizi kɛ: “Sɛ sran kun wú kɔ́’n naan w’a yaci-man ba yasua lɛ’n, amun fɛ i aja’n be mɛn i wa bla’n.” (Kal. 27:6-8; Zoz. 17:1-6) Kɛ ɔ fɛli i lɛ’n, Izraɛlifuɛ bla kwlaa nga i sɔ sa ɲɛnnin i’n, be jrannin mmla sɔ’n su be mɛnnin i asiɛ liɛ.
15. (a) ?Wafa sɛ yɛ Zoova nin i sufuɛ nga be le wie’n, ɔ nin nga be leman wie’n, be tran ɔn? (b) Sa nga Biblu’n kan be ndɛ mɔ be kle kɛ Zoova kpaman sran nun’n, an bo wie su.
15 Nanwlɛ, kɛ be se kɛ be kpaman sran nun’n, yɛle nga! Ba bla nnun mɔ be leman wie’n, Zoova buli be sran kɛ nga ɔ fa buli Izraɛlifuɛ onga’m be sran’n sa. (Jue. 68:6) Sa nga Biblu’n kan be ndɛ mɔ be kle kɛ Zoova buman i sufuɛ wie kpa traman wie’n, be sɔnnin. Be nun kun yɛ y’a kɛn i ndɛ lɛ.—1 Sam. 16:1-13; Yol. 10:30-35, 44-48.
E KWLA NIAN ZOOVA I NZUƐN SU
16. ?Kɛ Zoova sa’n, wafa sɛ yɛ e kwla kle kɛ e kpaman sran nun ɔn?
16 ?Kɛ Zoova sa’n, wafa sɛ yɛ e kwla kle kɛ e kpaman sran nun ɔn? Maan ɔ kpɛn e klun kɛ sran ng’ɔ kpaman sran nun’n, ɔ wun i wlɛ kɛ i sɔ yolɛ ti su. Atrɛkpa’n, e se e klun lɔ kɛ e liɛ’n, e kpaman sran nun. I yo, sɛ e kpa sran nun annzɛ e kpaman sran nun’n, i wlɛ wunlɛ timan pɔpɔ. ?I sɔ’n ti’n, ngue yɛ e kwla yo ɔ? Zezi kle e ajalɛ. Kɛ i waan ɔ́ tí i wun ndɛ’n, ɔ usɛli i janvuɛ mun kɛ: “?Sran’m be waan wan yɛlɛ m bɔ n kacili Sran’n?” (Mat. 16:13, 14) E kwla nian Zezi i ajalɛ’n su. Yɛle kɛ e kwla usa e janvuɛ kpa kun kɛ: ‘?N jran sran sin annzɛ ndɛ sin yɛ n jran ɔn? ?Sran’m be bu i kɛ m bu sran wie kpa tra wie? ?A bu i sɛ?’ Wienun ɔn, ɔ́ sé e kɛ, cɛn wie’n, e nin nvle wie nun sran e tran kpa e tra wie mun. Annzɛ be nga be le sika’n, annzɛ kusu be si fluwa’n, yɛ e yɛyɛ be ɔ. ?Sɛ e janvuɛ’n se e sɔ’n, ngue yɛ é yó ɔ? Maan e srɛ Zoova tankaan kpa kɛ ɔ uka e naan e kaci e sa naan e fɛ i nzuɛn liɛ’n. Yɛle kɛ, nán e kpa sran nun.—Mat. 7:7; Kol. 3:10, 11.
17. ?Wafa sɛ yɛ e kwla kle kɛ e kpaman sran nun ɔn?
17 Asɔnun nun’n, e kwla nian Zoova i ajalɛ’n su. Yɛle kɛ maan e bu sran’m be kwlakwla be sran yɛ e yo ye. I wie yɛle kɛ sɛ e waan é yía aniaan mun e awlo lɔ’n, maan e yia aniaan wafawafa kwlaa. Be nga be finwlɛ’n nin e liɛ’n timan kun mun o, yalɛfuɛ mun o, aika mma mun o, angbeti mun o, gbanflɛn nin talua nga be osufuɛ’m be suman Zoova mun o. Maan e yia be. (An kanngan Galasifuɛ Mun 2:10 nin Zak 1:27 nun.) Asa ekun’n, kɛ é bó jasin fɛ’n, maan e kan ndɛ’n e kle sran wafawafa kwlaa. Be nga be fin nvle uflɛ nun bɔbɔ’n, maan e kan kle be. Kɛ e si kɛ be yi e fluwa mun aniɛn kɔe 600 nun’n, ɔ yo e fɛ dan! Maan e fa fluwa sɔ mun e bo jasin fɛ’n e kle sran wafawafa kwlaa. I liɛ’n, é klé kɛ e kpaman sran nun.
18. ?Kɛ amun bu Zoova i akunndan mɔ amun wun kɛ be kwla be wun mɛntɛn i naan ɔ kpaman sran nun’n, ngue yɛ amun klo kɛ amún yó ɔ?
18 Nanwlɛ, kɛ bu Zoova i akunndan mɔ e wun i wlɛ kɛ be kwla fa be wun mɛntɛn i naan ɔ kpaman sran nun’n, e klo i kpa ekun. Kɛ ɔ ko yo sɔ’n, maan ɔ yo e nin e niaan mun e tranlɛ nun o, maan ɔ yo jasin fɛ’n i bolɛ nun o, e klo kɛ é sɔ́nnzɔn Zoova.
[Foto, bue 8]
[Foto, bue 9]
“Be kwlaa nga be kpan flɛ Anannganman’n, ɔ mantan be.”—Jue. 145:18 (An nian ndɛ kpɔlɛ 9 nun.)
“Anannganman amun Nyanmiɛn’n [...] ɔ kpa-man sran nun.”—Mml. 10:17 (An nian ndɛ kpɔlɛ 17 nun.)
[Foto, bue 11]
Kɛ Zɛlɔfsadi i mma mmla’m be wunnin kɛ Ɲanmiɛn w’a yoman Izraɛlifuɛ wie’m be kpa w’a traman be’n, ɔ yoli be fɛ. (An nian ndɛ kpɔlɛ 13 nin 14 nun.)