Zezi fali sran kan mannin sran kpanngban aliɛ

“I sin Zezi bubuli kpaun’n nun, ɔ fa mɛnnin i sɔnnzɔnfuɛ’m be kɛ be fa cɛ sran mun, naan b’a fa cɛ be.”​—MAT. 14:19.

?WAFA SƐ YƐ AMÚN TƐ́ SU Ɔ?

?Kɛ Zezi mán sran kpanngban be aliɛ’n, wan yɛ ɔ fɛli i ɔ?

?Junman benin yɛ Zezi fa wlali akoto nin kpɛnngbɛn nga be o Zerizalɛmu lɔ’n, be sa nun ɔn?

?Blɛ benin yɛ Klist fali sran akpasua kun kɛ ɔ kle sran’m be Ɲanmiɛn ndɛ’n niɔn?

1-3. ?Wafa nga Zezi kwla niannin sran kpanngban kpa lika Bɛtsaida klɔ’n i wun lɛ’n, amun kɛn i ndɛ kan. (An nian desɛn klikli’n.)

E O AFUƐ nga be flɛ 32 nun, Zezi blɛ su. Ɔ ka kan Delɛ-cɛn dilɛ’n jú. (An kanngan Matie 14:14-21 nun.) Sran kpanngban kpa be ju bɔ akpi nnun kun (5.000), b’a ka-man bla nin ba kanngan mun b’a wla-man nun, be suli Zezi su. Be ko toli Zezi nin i sɔnnzɔnfuɛ mun Bɛtsaida klɔ’n i lika kpɛtɛkplɛɛ’n su, Galile fɛtɛ’n i nuan lɛ. Maan ɔ yo kɛ cɛn sɔ nun’n, amun o lɛ wie sa.

² Kɛ Zezi wunnin be’n, be yoli i annvɔ. Ɔ yoli be nun tukpacifuɛ’m be juejue. Kpɛkun, ɔ kannin Ɲanmiɛn Sielɛ’n i su ndɛ kpanngban kleli be. Kɛ lika’n jɔli’n, i sɔnnzɔnfuɛ’m be seli i kɛ ɔ man sran sɔ’m be atin naan be wɔ klɔ’m be su be ko to aliɛ be di. Kɛ be kannin sɔ’n, Zezi seli be kɛ: “Amun bɔbɔ an man be like.” ?Nin yɛ bé ɲán aliɛ naan b’a fa man sran kpanngban sɔ mun ɔn? Afin kpaun nnun nin kpatra kanngan nɲɔn cɛ, yɛ ɔ o be sa nun ɔn.

³ Sran’m be yoli Zezi i annvɔ. I ti’n, ɔ yoli abonuan sa kun be ɲrun lɛ. Sa sɔ mɔ Zezi yoli’n, i sɔnnzɔnfuɛ nnan nga be klɛli i jasin fɛ’n i wun ndɛ’n, be kwlaa be klɛ wlali be fluwa’m be nun. (Mar. 6:35-44; Lik 9:10-17; Zan 6:1-13) Zezi seli i sɔnnzɔnfuɛ mun kɛ be se sran mun naan be gua ase akpasuaakpasua ijre nɔnman’n su. Yɛ sran’m be trannin ase ɲanmanɲanman yaya ɔ nin ablenunablenun ɔn. Ɔ fali kpaun nin kpatra mun, ɔ srɛli Ɲanmiɛn kpɛkun, ɔ bubuli nun. Kɛ ɔ yo naan i bɔbɔ fa man sran mun’n, ɔ seli i sɔnnzɔnfuɛ mun “kɛ be fa cɛ sran mun, naan b’a fa cɛ be.” Be kwlaa be dili be ku yili. Maan e sie i nzɔliɛ kɛ Zezi yoli maan i sɔnnzɔnfuɛ mɔ be ti akpasua kan’n, be niannin sran kpanngban kpa lika.a

4. (a) ?Kannzɛ Zezi mannin sran’m be like be dili’n, sanngɛ ngue yɛ ɔ yoli i cinnjin kpa trali su ɔ? ?Ngue ti yɛ i sɔ aliɛ’n yɛ Zezi kunndɛli kɛ i sɔnnzɔnfuɛ’m be di ɔ? (b) ?Ngue yɛ like suanlɛ nga wá yíyí nun ɔn? ?Ngue yɛ like suanlɛ ng’ɔ́ bá lɛ’n wá yíyí nun ɔn?

⁴ Like ng’ɔ yoli Zezi i cinnjin kpa’n, yɛle Ɲanmiɛn ndɛ’n m’ɔ ti kɛ aliɛ sa’n. Ɔ kunndɛli kɛ i sɔnnzɔnfuɛ’m be ɲɛn i lifuɛ’n be di. Afin sran ng’ɔ di aliɛ sɔ’n, yɛle kɛ sran ng’ɔ tie Ɲanmiɛn ndɛ’n m’ɔ fa su’n, ɔ́ ɲán anannganman nguan. (Zan 6:26, 27; 17:3) Kɛ sran’m be yoli i annvɔ’n, e wunnin kɛ ɔ mannin be kpaun nin kpatra be dili. I sɔnnzɔnfuɛ mun kusu be yoli i annvɔ. Ɔ maan, ɔ fali blɛ kleli be like kpa. (Mar. 6:34) Sanngɛ, ɔ si kɛ ɔ ka kan bé kún i naan i sin’n, ɔ́ sɛ́ i sin ɲanmiɛn su lɔ. (Mat. 16:21; Zan 14:12) ?Sɛ ɔ sɛ i sin ɲanmiɛn su lɔ’n, ɔ́ yó sɛ naan i sɔnnzɔnfuɛ’m b’a tie Ɲanmiɛn ndɛ’n? Wafa nga i nun m’ɔ o asiɛ’n su wa’n, ɔ mannin sran kpanngban be like be dili’n, i kunngba’n yɛ ɔ́ yó ɔ. Yɛle kɛ, ɔ́ fá sran akpasua kaan kun kɛ ɔ niɛn i sɔnnzɔnfuɛ’m be lika. ?Wan yɛle sran akpasua kan sɔ mɔ Zezi wá fá’n? Maan e dun mmua e si sran akpasua kan nga Zezi fɛli i naan w’a nian i sɔnnzɔnfuɛ klikli kpanngban nga Ɲanmiɛn kpali be sieli be ngunmin’n be lika’n. Kpɛkun like suanlɛ ng’ɔ́ bá lɛ’n nun’n, é tɛ́ kosan kun m’ɔ ti e kwlaa e cinnjin kpa’n su. Kosan sɔ’n yɛle kɛ: ?Sran akpasua kan benin yɛ e blɛ liɛ nun’n, Zezi fɛli i naan w’a niɛn i sɔnnzɔnfuɛ’m be lika ɔ?

ZEZI FALI SRAN AKPASUA KAN KUN

5, 6. (a) ?Ajalɛ cinnjin kpa benin yɛ Zezi fali naan sɛ ɔ nunman nun kun’n, b’a kwla niɛn i sɔnnzɔnfuɛ’m be lika ɔ? (b) ?Wafa sɛ yɛ Zezi yoli naan sɛ ɔ nunman nun kun’n, i akoto’m b’a kwla di junman’n niɔn?

⁵ Siɛ kpa kwlaa fa ajalɛ wie mun naan sɛ ɔ nunman nun kun’n, b’a kwla niɛn i awlobo’n i lika. Zezi kusu mɔ Ɲanmiɛn wá fɛ́ i síe Asɔnun’n su kpɛn’n, ɔ yoli sɔ wie. Ɔ fali ajalɛ wie mun naan sɛ ɔ nunman nun kun’n, b’a kwla niɛn i sɔnnzɔnfuɛ’m be lika naan b’a su Ɲanmiɛn titi. (Efɛ. 1:22) I wie yɛle kɛ afuɛ nɲɔn lele naan b’a kun i’n, ɔ fali ajalɛ cinnjin kpa kun. Ɔ kpali sran akpasua kan nga ɔ́ wá fɛ́ i kɛ ɔ nian sran kpanngban lika’n. Amun e nian wafa ng’ɔ yoli’n.

⁶ Le kun’n, Zezi srɛli Ɲanmiɛn kɔnguɛ lelee aliɛ cɛnnin. Kɛ aliɛ cɛnnin’n, ɔ flɛli i sɔnnzɔnfuɛ mun naan w’a fa be nun 12. Ɔ tɔnnin be dunman kɛ i sunmanfuɛ mun.b (Lik 6:12-16) Afuɛ nɲɔn ng’ɔ́ bɛ́ i sin nun’n, Zezi nin be 12 sɔ mun sannin nun kpa. Ɔ yoli ninnge wie mun naan be nian su be yo. Kɛ mɔ be kunngba’n be ti i “sɔnnzɔnfuɛ” wie ti’n, w’a yaciman be like klelɛ le. (Mat. 11:1; 20:17) Ɔ mannin be afɔtuɛ, kpɛkun ɔ kleli be wafa ng’ɔ fata kɛ be bo jasin fɛ’n. (Mat. 10:1-42; 20:20-23; Lik 8:1; 9:52-55) Nanwlɛ, junman cinnjin nga akoto sɔ’m bé wá dí’n yɛ Zezi kleli be ɔ.

7. ?Ndɛ benin yɛ Zezi kannin m’ɔ yi like ng’ɔ fata kɛ ɔ dun mmua yo i akoto’m be cinnjin’n i nglo ɔ?

⁷ ?Junman benin yɛ akoto’m bé wá dí ɔ? Kɛ afuɛ nga be flɛ i 33 nun Pantekɔtu’n kɔ́ i bue nuan’n, sran kwlaa wunnin kɛ akoto mun yɛ bé wá nían “junman’n” su ɔ. (Yol. 1:20) ?Junman benin yɛ ɔ fata kɛ ɔ yo be cinnjin ɔn? Yalɛ nga kɛ Ɲanmiɛn cɛnnin Zezi’n, Zezi nin Piɛli be kokoli’n tɛ su weiin. (An kanngan Zan 21:1, 2, 15-17 nun.) I akoto wie’m be ɲrun lɛ’n, ɔ seli Piɛli kɛ: “Nian m bua mma’m be lika.” I lɛ nun’n, Zezi kleli kɛ sran akpasua kan nga ɔ́ wá fá be naan w’a nian sran kpanngban lika Ɲanmiɛn sulɛ nun’n, i akoto’m bé trán be nun wie. Nanwlɛ, wafa nga Zezi i “bua mma” mun be ndɛ lo i’n, ɔ yo ɲɛnmɛn o!c

KƐ Ɔ FƐ I PANTEKƆTU NUN’N, SRAN KAN NIANNIN SRAN KPANNGBAN LIKA

8. ?Afuɛ nga be flɛ i 33 nun Pantekɔtu nun’n, ngue yɛ be nga be lafili Zezi su uflɛuflɛ’n be yoli m’ɔ kle kɛ be sɔli Akoto’m be nun klanman ɔn?

⁸ Kɛ ɔ fɛ i afuɛ nga be flɛ i 33 nun Pantekɔtu nun’n, Zezi fɛli i akoto mun naan be nian i sɔnnzɔnfuɛ onga mɔ Ɲanmiɛn kpali be sieli be ngunmin’n be lika. (An kanngan Sa Nga Be Yoli’n 2:41, 42 nun.) Zuifu nin be mɔ be kacili Zuifu mɔ Ɲanmiɛn fɛli i wawɛ’n mannin be blɛ sɔ nun’n, be kwlaa be sɔli akoto’m be nun klanman. B’a sisiman be bo lele, be “fa be su sie be bɔ Jésus sunmannin be’n be ndɛ’n su kpa.” Be nga be lafili Zezi su uflɛuflɛ’n, be wun bliblili be kɛ bé tíe Ɲanmiɛn ndɛ’n. Be wunnin i wlɛ kɛ akoto mun yɛ ɔ fata kɛ be fa be wun mantan be naan b’a tie Ɲanmiɛn ndɛ’n niɔn. Akoto’m be kusu’n, be yiyi ndɛ nga Zezi kannin be’n, ɔ nin sa ng’ɔ yoli be’n nin ndɛ wie mɔ be wlɛ wunlɛ ti kekle’n, be nun kleli be.d​—Yol. 2:22-36.

9. ?Ngue yɛ ɔ kle kɛ akoto’m be niannin Zezi i bua’m be lika sakpa ɔ?

⁹ Kɛ Zezi se kɛ be niɛn i bua’m be lika’n, akoto’m be niannin be lika sakpa. Amun e fa ndɛ kun m’ɔ tɔli be blɛ su asɔnunfuɛ’m be afiɛn’n, naan e nian wafa nga akoto’m be siesieli’n. Aliɛ ndɛ yɛ ɔ tɔli be afiɛn ɔn. Ndɛ sɔ’n ti’n, ɔ ka kan naan asɔnun’n i nun w’a bu. Yɛle kɛ be mɔ be ijɔ Grɛki’n, be plannin be mɔ be ijɔ Ebre’n be su kɛ cɛn kwlaa kɛ bé cɛ́ aliɛ’n, be buman be angbeti mmla’m be akunndan. Wafa sɛ yɛ akoto’m be siesieli ndɛ sɔ’n niɔn? Be “sran blu-nin-nnyɔn bɔ Jésus sunmannin be’n,” be kpali aniaan nso mɔ sran’m be bo be dunman kpa’n, naan b’a fa aliɛ cɛlɛ “junman sɔ’n” b’a man be. I nun nga Zezi yoli abonuan sa naan sran kpanngban b’a ɲan like b’a di’n, akoto’m be nun sunman yɛ be cɛli aliɛ’n niɔn. Sanngɛ siɛn’n, b’a wun i wlɛ kɛ like ng’ɔ fata kɛ ɔ yo be cinnjin kpa’n yɛle kɛ, be kan Ɲanmiɛn Ndɛ’n. I sɔ’n ti’n, be tuli be klun be ‘kannin Ɲanmiɛn ndɛ’n titi.’​—Yol. 6:1-6.

10. ?Junman benin yɛ Zezi fa wlali akoto nin kpɛnngbɛn nga be o Zerizalɛmu lɔ’n be sa nun ɔn?

¹⁰ Afuɛ nga be flɛ i 49 nun’n, asɔnun kpɛnngbɛn wie’m be wa ukali akoto nga be ɲin tɛ o su’n. (An kanngan Sa Nga Be Yoli’n 15:1, 2 nun.) Blɛ sɔ nun’n, “be mɔ Jésus sunmannin be’n be nin kpɛnngbɛn” nga be o Zerizalɛmu lɔ’n, be yɛ be yoli anuannzɛ’n i Ɲrun dinfuɛ mun ɔn. Klist m’ɔ ti asɔnun’n i ti’n, ɔ fali sran akpasua kan sɔ naan akplowa ng’ɔ tɔ Ɲanmiɛn ndɛ’n i su falɛ’n su’n, be siesie. Asa ekun’n, Ɲanmiɛn Sielɛ’n i jasin fɛ bolɛ’n, ɔ nin sran’m be like klelɛ junman’n i su nianlɛ’n, ɔ fa wlali be sa nun.​—Yol. 15:6-29; 21:17-19; Kol. 1:18

11, 12. (a) ?Ngue yɛ ɔ kle kɛ ajalɛ nga Zezi fali naan w’a nian asɔnun’n lika’n, Zoova yrali su ɔ? (b) ?Ngue yɛ be fa sieli sran akpasua kan nga Zezi fɛli i’n, i nzɔliɛ ɔ?

¹¹ ?Kɛ Zezi fali sran sɔ mun kɛ be nian asɔnun’n su’n, Zoova yrali su? E kɛnmɛn i lele. Afin, Sa Nga be Yoli’n fluwa’n waan: “Kɛ [akoto Pɔlu nin i wiengu ngaliɛ difuɛ mun] bé sín klɔ’m be su’n, be kan be bɔ Jésus sunmannin be’n be nin kpɛnngbɛn bɔ be o Zerizalɛm’n be ngaliɛ’n kle be kɛ be fa su. Asɔnunfuɛ’m be lafi Nyanmiɛn su kpa, yɛ sran’m be uka su tititi.” (Yol. 16:4, 5) Kɛ mɔ asɔnunfuɛ’m be fa ndɛ nga be Ɲrun dinfuɛ m’ɔ o Zerizalɛmu lɔ’n kan’n i su’n, i ti yɛ sran’m be uka su titi ɔ. ?Sanngɛ, sɛ Zoova bɔbɔ i sa nunman nun’n, ɔ́ yó sɛ naan w’a yo ye? Nanwlɛ, kɛ ɔ́ fá jú mɔ bé úka su titi kɛ ngalɛ’n sa’n, ɔ kle weiin kɛ Zoova yɛ ɔ yra be su ɔ.​—Nya. 10:22; 1 Kor. 3:6, 7.

¹² Y’a wun kɛ ajalɛ nga Zezi fali naan wa man sran kpanngban be aliɛ’n, i kunngba’n yɛ ɔ fali naan wa nian i sɔnnzɔnfuɛ’m be lika ɔ. Yɛle kɛ, ɔ fali sran akpasua kan kun kɛ ɔ niɛn i sɔnnzɔnfuɛ’m be lika naan b’a kwla su Ɲanmiɛn kpa. Sran’m be kwla sieli i nzɔliɛ kɛ akoto mun yɛ Zezi fali be ɔ. Be yɛ be yoli Anuannzɛ’n i ɲrun dinfuɛ’n niɔn. Be kleli kɛ Ɲanmiɛn wawɛ’n o be nun. Sa Nga Be Yoli’n 5:12 waan: “Be bɔ Jésus sunmannin be’n be yi atrɛ, be yo abonuan sa kpanngban, yɛ be yo sran’m be ye. Be kwlaa be bo ti kun be gua Salomɔn ala’n bo lɛ.”e I sɔ’n ti’n, be mɔ be wa kacili Klistfuɛ’n, b’a usaman be wun lele kɛ wan yɛ Klist fɛli i kɛ ɔ niɛn i bua’m be lika ɔ. Sanngɛ kɛ be blɛ liɛ’n wieli’n, lika’n wa kacili.

AWIE IJRE’N WA TINNIN AWIE’N SU BLƐ KUN NUN

13, 14. (a) ?Ndɛ benin yɛ Zezi kannin m’ɔ kle kɛ sran wie’m bé wá sáci asɔnun’n niɔn? ?Blɛ benin yɛ i ndɛ sɔ’n kpɛnnin su ɔ? (b) ?Sran fa nɲɔn benin mun yɛ bé wá sáci asɔnun’n niɔn? (An nian lika nga be klɛli kɛ “ndɛ wie mun ekun” i nun.)

¹³ Zezi kleli kɛ sran wie’m bé wá sáci asɔnun’n. Maan e wla kpɛn awie nin awie ijre’n be wun ɲanndra ng’ɔ buli’n su. Ɲanndra sɔ nun’n, awie ijre’n yɛle be mɔ be tɔn be wun suɛn kɛ be ti Klistfuɛ’n. Awie fie’n yɛle Klistfuɛ nga Ɲanmiɛn kpali be sieli be ngunmin’n. Zezi seli kɛ be nɲɔn’n be fifili, yɛ be kali lɛ lele ɔ juli awie’n i kpɛlɛ blɛ. Blɛ sɔ’n yɛle ‘mɛn’n i awieliɛ’n.’ (Mat. 13:24-30, 36-43) Ndɛ sɔ mɔ Zezi kannin’n, ɔ wa kpɛnnin su sɛsɛsɛ.f

¹⁴ Akoto’m be ɲin su’n, sran wie’m be wa jasoli Ɲanmiɛn wun. Sanngɛ akoto’m be ‘trali be ase’ naan ato like nga sran sɔ’m be kle’n w’a saciman asɔnun’n. (2 Tɛs. 2:3, 6, 7) Sanngɛ kɛ akoto’m be wuli’n, be mɔ be jasoli Ɲanmiɛn wun’n be wa yili be wun nglo kpa. Sɛ é kwlá sé’n, be kpali kɛ nje mun sa. Be kali lɛ lele afuɛ ya kpanngban kpa. Blɛ kpanngban sɔ nun’n, sran sɔ mɔ be ti kɛ awie ijre sa’n, be buali awie’n su. Ɔ maan sran akpasua ng’ɔ kwla kle sran’m be Ɲanmiɛn ndɛ’n, b’a kwlá wunmɛn i trele kun. Sanngɛ, ɔ su kaman sa trilili. ?Blɛ onin yɛ i sɔ liɛ’n, ɔ́ wíe ɔ?

?WAN YƐ Ɔ́ NÍAN SRAN’M BE LIKA AWIE KPƐLƐ BLƐ’N NUN ƆN?

15, 16. ?Mmlusuɛ benin yɛ Biblu’n nun like suanfuɛ’m be ɲɛnnin i ɔ? ?Be su kosan benin yɛ e kwla fa usa e wun ɔn?

¹⁵ Kɛ awie’n i kpɛlɛ blɛ’n mántán koko’n, sran’m be wa kunndɛli kpa kɛ bé sí Biblu’n nun ndɛ m’ɔ ti nanwlɛ’n. Afuɛ 1870 nun’n, sran akpasua kaan kun kleli kɛ ɔ timan awie ijre. Yɛle kɛ i nunfuɛ’m be fin be mɔ be tɔn be wun suɛn kɛ be ti Klistfuɛ’n, be afiɛn fiteli. Be yia be suan Biblu’n nun like. Ɔ maan be flɛli be kɛ Biblu’n nun like suanfuɛ mun. Be kannin be wun ase, be boli be ɲin ase be suannin Ɲanmiɛn Ndɛ’n naan bé sí ndɛ nanwlɛ’n.​—Mat. 11:25.

¹⁶ Biblu’n nun like suanfuɛ yasua nin bla sɔ’m be ɲannin be like suanlɛ’n i su mmlusuɛ kpa. Ndɛ ng’ɔ ti ato’n, be kan kleli sran mun kɛ ɔ ti ato. Kpɛkun, be fali ndɛ ng’ɔ ti nanwlɛ’n kleli be. Be yili ndɛ sɔ’m be su fluwa mun, be fa mannin sran mun mɛn wunmuan’n nun. Be nga be kunndɛ kɛ bé sí ndɛ nanwlɛ’n, be kanngannin fluwa sɔ’m be nun. Yɛ be wunnin ndɛ nanwlɛ’n i wlɛ. ?I sɔ’n ti’n, é sé kɛ kwlaa naan afuɛ 1914 w’a ju’n, Biblu’n nun like suanfuɛ mun yɛ Zezi seli kɛ ɔ́ fá be naan be niɛn i bua’m be lika ɔ? Cɛcɛ. Afin blɛ sɔ nun’n, awie nin awie ijre’n be tɛ o likawlɛ. Blɛ m’ɔ fata kɛ be kpɛ awie ijre’n naan awie’n ka lɛ’n, ɔ nin a juman. Ɔ maan blɛ mɔ Zezi fá sran akpasua kun kɛ ɔ kle sran’m be Ɲanmiɛn ndɛ’n, ɔ nin a juman.

17. ?Kɛ ɔ fɛ i afuɛ 1914 nun’n, sa cinnjin benin mun yɛ be juli ɔ?

¹⁷ Like suanlɛ ng’ɔ sinnin’n kleli kɛ awie kpɛlɛ blɛ’n boli i bo afuɛ 1914 nun. Afuɛ sɔ nun’n, sa cinnjin sunman juli. Yɛle kɛ Ɲanmiɛn sieli Zezi i famiɛn. Kpɛkun, awieliɛ blɛ’n boli i bo. (Ngl. 11:15) Kɛ ɔ fɛ i afuɛ 1914 nun m’ɔ́ fá jú afuɛ 1919 i bo bolɛ nun’n, Zezi nin i Si be wa niannin be kwlaa nga be se be wun kɛ be ti i sɔnnzɔnfuɛ’n. Kpɛkun, ɔ yoli wie’m be saun.g (Mal. 3:1-4) Afuɛ 1919 nun’n, awie’n i kpɛlɛ’n boli i bo. ?Blɛ m’ɔ fata kɛ Klist fa sran naan ɔ niɛn i bua’m be lika’n, w’a ju siɛn’n? E kɛnmɛn i lele.

18. ?Ngue yɛ Zezi seli kɛ ɔ́ wá yó ɔ? ?Kosan cinnjin benin yɛ e kwla fa usa e wun ɔn?

¹⁸ Zezi seli kɛ, kɛ mɛn’n ɔ́ kɔ́ i bue nuan’n, ɔ́ fá sran kun síe i sran’m be su kɛ ɔ man be “aliɛ blɛ ng’ɔ ti i nuan su’n i su.” (Mat. 24:45-47) ?Sran sɔ’n yɛle wan? Laa’n, Zezi fali sran kan niannin sran kpanngban lika. Like kunngba’n, yɛ ɔ yo i mɛn’n i awieliɛ blɛ nga nun ɔn. ?Wan yɛ Zezi fɛ́ i kɛ ɔ nian sran kpanngban lika ɔ? Like suanlɛ ng’ɔ́ bá lɛ’n wá tɛ́ kosan sɔ’n, ɔ nin kosan uflɛ wie mun ekun be su.

NDƐ WIE MUN EKUN: (Kɛ amun wun nzraama kun’n, an kɛnngɛn i su ndɛ’n.)

[Ja ngua lɛ ndɛ mun]

[Ja ngua lɛ ndɛ’n]

[Foto, bue 21]

[Foto, bue 23]

Sran kaan sa be mannin sran kpanngban be aliɛ. (An nian ndɛ kpɔlɛ 4 nun.)

[Foto, bue 25]

Akoto’m be blɛ su’n, sran’m be kwla wunnin i wlɛ kɛ akoto mun yɛ Zezi fali be kɛ be nian asɔnun’n i lika ɔ. (An nian ndɛ kpɔlɛ 12 nun.)