Maan e bu e wiengu’m be akunndan e wla be fanngan
“Maan e bu e wiengu’m be akunndan e wla be fanngan naan be klo be wun yɛ be yo sran ye.”—EBR. 10:24.
?AMÚN TƐ́ SU SƐ?
?Kɛ be se kɛ be bu be wiengu akunndan’n, i bo yɛle benin?
?Wafa sɛ yɛ é wlá e niaan’m be fanngan naan be klo be wun yɛ be yo sran ye ɔ?
?Wafa sɛ yɛ “e tu e wun fɔ” ɔ?
1, 2. ?Ngue yɛ ɔ ukali Zoova i Lalofuɛ 230 mɔ i ti yɛ b’a wuman ɔn?
KƐ ALƐ dan nɲɔn su’n wá wíe’n, lika’n yoli kekle kpa mannin Itilɛli i sonja mun. Afin be kpɔfuɛ’m be su kwla be. Blɛ sɔ nun’n, Itilɛli nin i minniɛn’m be fali ajalɛ kɛ bé núnnún be bisuafuɛ akpiakpi nga be kali lɛ’n. Be waan bisuafuɛ nga be o Alemaɲi lɔ klɔ ng’ɔ suan Zaksɛnaozɛn su’n, bé fá be nánti atin tɛnndɛn kpa kun su bé jú mmeli jranwlɛ’m be nun. Kɛ be ko ju lɔ’n, bé fá be mmeli’m be nun kpɛkun jenvie’n i afiɛn lɔ’n, bé mlɔ́n mmeli mun. I sɔ’n ti’n, be flɛli ajalɛ nga be fali’n kɛ wie atin.
2 Bisuafuɛ nga be o Zaksɛnaozɛn lɔ’n, be ti akpiakpi ablasan nin nsan. Zoova i Lalofuɛ nga be o be nun’n, be ti 230, yɛ be fin nvlenvle nsiɛn nun. Sonja’m be seli bisuafuɛ’m be kwlaa kɛ be nanti lele kilo 250 be wɔ Lubɛki. Klɔ sɔ’n ti mmeli jranwlɛ. Zoova i Lalofuɛ’m be liɛ’n, be seli be kɛ be kwla nanti likawlɛ. Awe’n nin tukpaciɛ ti’n, bisuafuɛ’m be yoli fakafaka. Be nun kpanngban be wuli atin’n nun. Sanngɛ aniaan’m be liɛ’n, be nun wie fi w’a wuman. Like nga ti yɛ b’a wuman’n, aniaan bian kun kɛnnin i ndɛ. Ɔ seli kɛ: “E wlali e wiengu fanngan titi kɛ e tra e awlɛn e nanti.” Ɔ maan, klolɛ mɔ aniaan’m be kloli be wiengu mɔ i ti be wlali be wiengu fanngan’n, i ti yɛ be fiteli nun ɔn. Asa ekun’n, “Nyanmiɛn b’ɔ kwla like kwlaa yo’n” ɔ suannin be bo.—2 Kor. 4:7.
3. ?Ngue ti yɛ ɔ ti cinnjin kɛ e wla e wiengu fanngan ɔn?
3 Sa ng’ɔ tɔli aniaan’m be su blɛ sɔ nun’n, nɛ́n i kunngba’n yɛ ɔ o e su andɛ ɔ. Sanngɛ sa nga be tɔ e su’n be timan blɛblɛ. Afin kɛ ɔ fɛ i afuɛ nga be flɛ i 1914 nun mɔ Ɲanmiɛn Sielɛ’n boli i junman’n i dilɛ bo’n, be kannin Satan bo ɲanmiɛn su lɔ yili i asiɛ’n su wa. I sɔ’n ti’n, w’a fa ya ble kpa yɛle kɛ “ɔ si kɛ i cɛn’n w’a sɔn-man kun.” (Ngl. 12:7-9, 12) Ɔ maan, kɛ Armagedɔn alɛ’n mántan koko kpa’n, nn ɔ́ fá sa mun gúa e su naan e yaci Ɲanmiɛn i su lafilɛ. Mɛn w’a yo kekle. (Zɔb 14:1; Aku. 2:23) Wie liɛ’n, sa’m be tin e su lele, e sa sin bubu e. Yɛ kannzɛ e yo sɛ, e yo sɛ, e sa sin yaciman e bubulɛ. E niaan kun m’ɔ wlali aniaan sunman be fanngan afuɛ kaka kpa’n, ɔ yoli i sɔ wie. Aniaan’n nin i yi’n be yoli kpɛnngbɛn yɛ tukpacɛ’n tinnin be su. Kɛ ɔ yoli sɔ’n, blɛblɛblɛ be sa sin wa bubuli be kpa. Kɛ aniaan sɔ’n sa’n, e kwlaa e kunndɛ kɛ “Nyanmiɛn b’ɔ kwla like kwlaa yo’n,” ɔ man e wunmiɛn. Kpɛkun, e kunndɛ kɛ e niaan’m be wla e fanngan.
4. ?Sɛ e waan é yó sran m’ɔ wla i wiengu fanngan’n, akoto Pɔlu i afɔtuɛ onin yɛ ɔ fata kɛ ɔ yo e cinnjin kpa ɔ?
4 Pɔlu kannin ndɛ kun m’ɔ fata kɛ ɔ yo e cinnjin ɔn. I liɛ’n, é wlá sran’m be fanngan kpa. Ɔ seli kɛ: “Maan e bu e wiengu’m be akunndan e wla be fanngan naan be klo be wun yɛ be yo sran ye. Nán maan e yaci yialɛ’n kɛ sran wie’m be yo’n sa. Sanngɛ maan e yia e tu e wun fɔ. Siɛn’n bɔ an wun kɛ e Min’n i cɛn’n su mantan’n, an yo i sɔ tra su.” (Ebr. 10:24, 25) ?Wafa sɛ yɛ e kwla fa afɔtuɛ cinnjin kpa sɔ’n su ɔ?
“MAAN E BU E WIENGU’M BE AKUNNDAN”
5. ?Kɛ be se kɛ be bu be wiengu akunndan’n, i bo yɛle benin? ?Sran nga i waan ɔ́ yó sɔ sakpa’n, ngue yɛ ɔ fata kɛ ɔ miɛn i ɲin yo ɔ?
5 Sran ng’ɔ ‘bu i wiengu’m be akunndan’n,’ i wiengu’m be ndɛ lo i yɛ ɔ nian be lika. I sɔ’n ti’n, nán maan e nin aniaan mun e koko ninnge ngbɛnngbɛn’m be su yalɛ annzɛ asɔnun lɔ’n, be like ngunmin yɛ e yo ɔ. Sanngɛ maan e nin be e koko yalɛ naan e si afɛ ng’ɔ o be su’n. Nɛ́n i sɔ kusu ti yɛ be ‘ndɛ ng’ɔ ti-man e ndɛ’n,’ é fá e nuan wlá nun ɔn. (1 Tɛs. 4:11; 1 Tim. 5:13) Sɛ e waan é klé kɛ e bu e wiengu’m be akunndan sakpa’n, ɔ fata kɛ e fa e wun e mantan be naan e si be kpa. Yɛle kɛ maan e usa be su sa mun, yɛ e si sran wafa nga be ti’n. Wafa nga be klo Ɲanmiɛn’n, ɔ nin ninnge nga be nun’n, ɔ fata kɛ be kaci be sa’n, yɛ ninnge nga be si be yo’n, maan e si be wie. Nán e minndɛ kɛ sa tɔ be su’n naan y’a kle kɛ e bu be akunndan. Sɛ e yo sɔ’n, bé wún i wlɛ kɛ e klo be naan e ti be janvuɛ.—Rɔm. 12:13.
6. ?Ngue yɛ asɔnun kpɛnngbɛn kun yó naan w’a kle kɛ ɔ bu asɔnun’n nunfuɛ’m be akunndan ɔn?
6 Ɲanmiɛn Ndɛ’n se asɔnun kpɛnngbɛn’m be kɛ be ‘nian Nyanmiɛn i bua fa b’ɔ fa be mannin be’n be lika.’ Nán maan be yo i mianlɛ su. Sanngɛ be tu be klun yo. (1 Piɛ. 5:1-3) ?Yɛ sɛ asɔnun kpɛnngbɛn’m be siman aniaan bian nin aniaan bla mun’n, ɔ́ yó sɛ naan b’a kwla nian be lika kpa? (An kanngan Zan 10:14 nun.) I sɔ’n ti’n, maan asɔnun kpɛnngbɛn’m be fa be wun mantan be niaan Klistfuɛ mun naan be kle kɛ be kunndɛ kɛ bé úka be. I liɛ’n, asɔnunfuɛ’m be su sisiman be bo naan b’a kunndɛ ukalɛ be sa nun. Asa ekun’n, bé úsa be ngwlɛlɛ afɛ yɛ be su fiaman be klun ndɛ wie fi su. Kɛ ɔ ko yo sɔ’n, asɔnun kpɛnngbɛn’m bé kwlá úka be tinuntinun kɛ ng’ɔ nin i fata’n sa.
7. ?Kɛ be nga be wla w’a bo’n bé kán ndɛ’n, ngue yɛ ɔ fata kɛ ɔ tran e klun ɔn?
7 Pɔlu seli Tɛsaloniki lɔ Klistfuɛ’m be kɛ be “uka be nga be lɛ-man wunmiɛn’n.” (An kanngan 1 Tɛsalonikfuɛ Mun 5:14 nun.) Be nga be akunndan w’a sanngan’n annzɛ be wla w’a bo’n, “be lɛ-man wunmiɛn’n.” I sɔ wie yɛ Nyanndra Mun 24:10 kan ɔn. Ɔ se kɛ: “Sɛ sa kekle wie tɔ wɔ su naan ɔ sa sin bubu wɔ’n, wuun a lɛ-man anwlɛn.” Be nga be wla w’a bo e wun’n, kɛ é cící be wla’n, ɔ fata kɛ ɔ tran e klun kɛ wie liɛ’n, kɛ bé ‘kán ndɛ’n be tɔtɔ nun.’ (Zɔb 6:2, 3) Yɛle kɛ be kan ndɛ wie mɔ be ɲin jrɛiin su’n, be su kanman’n. Aniaan bla Rasɛli mɔ i nin’n i ti nun sanngannin kpa’n, ɔ sieli i sɔ liɛ’n i nzɔliɛ. Rasɛli se kɛ: “Blɛ sunman nun’n, manmin kan ndɛ tɛtɛ mun. Kɛ ɔ yo sɔ’n, min wla kpɛn sran wafa nga manmin ti sakpa’n i su. Yɛle kɛ manmin klo sran, sran wun yo i fɛ kpɛkun i klun ti ufue. Ɔ maan n wa wunnin i wlɛ kɛ be nga be akunndan’n sanngan’n, be kan ndɛ kpanngban kpa mɔ be ɲin jrɛiin su’n, be su kanman’n. Like kpa ng’ɔ fata kɛ e yo’n, yɛle kɛ ndɛ tɛ nga be kan’n annzɛ like tɛ nga be yo’n, nán e yi e man be.” Nyanndra Mun 19:11 se kɛ: “Sran ng’ɔ si ngwlɛlɛ’n ɔ fa-man ya ndɛndɛ. Sa nga be yo i’n, ɔ yaci cɛ, i sɔ yolɛ yɛ ɔ kunndɛ-ɔ.”
8. ?Wan mun yɛ ɔ ti cinnjin kpa kɛ e ‘kle be kɛ e klo be’ ɔ? ?Ngue ti ɔ?
8 Sa tɛ nga aniaan wie yoli i laa’n ti’n, ɔ ju wie’n i wla bo i wun. Sanngɛ nn ɔ wlali sa tɛ sɔ’n i ase. ?Wafa sɛ yɛ e kwla kle kɛ e bu i sɔfuɛ’n i akunndan ɔn? Akoto Pɔlu ɔ yiyi nun kle e. Kɛ ɔ́ klɛ́ Korɛnti lɔfuɛ’m be fluwa kán sran kun m’ɔ kacili i nzuɛn’n i ndɛ’n, ɔ kleli like ng’ɔ fata kɛ be yo’n. Ɔ seli kɛ: “An yaci i wun sa cɛ i, an yo maan i wla gua ase, sɛ w’a yo-man sɔ-ɔ, ɔ cɛ-man naan awlaboɛ’n w’a kun i. I sɔ’n ti’n, ń srɛ́ amun kɛ an yo like ng’ɔ kle kɛ an klo i’n.” (2 Kor. 2:7, 8) Ninnge nga é yó be’n nin ndɛ nga é kán’n, yɛ e niaan’n fá síe i nzɔliɛ kɛ e klo i ɔ.
“E WLA BE FANNGAN NAAN BE KLO BE WUN YƐ BE YO SRAN YE”
9. ?Wafa sɛ yɛ é wlá e niaan’m be fanngan kɛ be klo be wun yɛ be yo sran ye ɔ?
9 Pɔlu klɛli kɛ: “Maan e bu e wiengu’m be akunndan e wla be fanngan naan be klo be wun yɛ be yo sran ye.” I sɔ yɛ ɔ fata kɛ e yo ɔ. Sɛ e fa yie e trɔ sin naan e kunndɛman kɛ ɔ nuan’n, é wláwlá nun kpɛkun é fíta nun. (2 Tim. 1:6) I sɔ kunngba’n, ɔ le ninnge wie m’ɔ fata kɛ e yo naan e niaan’m b’a su Zoova juejue su titi ɔ. Ninnge sɔ’m be nun cinnjin’n yɛle kɛ, maan e yo e niaan’m be mo.
10, 11. (a) ?Wan yɛ ɔ kunndɛ kɛ be yo i mo ɔ? (b) ?Kɛ sran kun ‘su yo sa wie m’ɔ timan kpa’ mɔ be yo i mo laa sa kpa ng’ɔ yoli be’n ti’n, wafa sɛ yɛ i bo’n gua ɔ? An fa sa kun yiyi nun.
10 Sran kwlaa kunndɛ kɛ be yo i mo. Aniaan bian kun seli kɛ: “Min bakan nun’n, kannzɛ n di junman’n i kpa sɛ, ɔ leman cɛn kun sa mɔ min si yoli min mo ɔ. Ɔ maan lele mɔ ń fá ń ɲín’n, m buli i titi kɛ n yoman like kpa. [...] Dɔ nga su’n, n le afuɛ 50 yɛ n ti asɔnun kpɛnngbɛn. Kɛ aniaan’m be yo min mo asɔnun’n i nun junman mɔ n di’n ti’n, ɔ yo min fɛ dan. [...] N wunnin i wlɛ kɛ sran mo yolɛ’n ti like cinnjin kpa. Ɔ maan n yaciman sran mo yolɛ.” I sɔ’n kle kɛ, nán sran nga i wla w’a bo i wun’n i ngunmin yɛ ɔ fata kɛ be wlɛ i fanngan ɔn. Sanngɛ atin bofuɛ mun o, sran kpɛnngbɛn mun o, e kwlaa e kunndɛ kɛ be yo e mo be wla e fanngan.—Rɔm. 12:10.
11 Kɛ aniaan kun yo sa tɛ mɔ asɔnun kpɛnngbɛn’m bé úkɛ i’n, ɔ fata kɛ be wla kpɛn sa kpa nga aniaan’n yoli be laa’n be su naan be yo i mo sa sɔ’m be ti. I liɛ’n, aniaan’n wún i wlɛ kɛ sa ng’ɔ yoli’n yɛ ɔ timan kpa ɔ. Kpɛkun, ɔ́ káci. (Gal. 6:1) I sɔ yɛ asɔnun kpɛnngbɛn’m be yoli naan aniaan bla kun mɔ be flɛ i Miriam w’a su Zoova kpa ekun ɔn. Aniaan bla’n seli kɛ: “Blɛ wie nun’n, m’an wunman min wun fɛ mlɔnmlɔn. Ɔ yoli kekle kpa min su. Yɛle kɛ, min janvuɛ wie’m be wa yacili Zoova sulɛ. Kpɛkun blɛ kunngba sɔ nun’n, min si wa tɔli tukpacɛ kekle kpa. Yɛle kɛ, mmoja sinnin i ti nun miɛn’n nun. I sɔ’n boli min wla dan. Ɔ maan, min nin gbanflɛn kun m’ɔ suman Zoova’n, e wa sannin nun. M buli i kɛ i lɛ nun yɛ min wla gúa ase ɔ.” Sanngɛ i sɔ mɔ aniaan bla’n yoli’n, w’a yomɛn i wun sa ye mlɔnmlɔn. Afin ɔ wa buli i kɛ Zoova su klomɛn i kun naan ɔ fata kɛ ɔ yaci i sulɛ. Asɔnun kpɛnngbɛn’m be wa ukɛli i. Wafa ng’ɔ suli Zoova klanman laa’n, be fa kpɛnnin i wla. I sɔ’n wlali aniaan bla’n i fanngan kɛ ɔ su Zoova ekun. Ɔ maan, ɔ nin gbanflɛn’n be wa yacili nantilɛ. Kpɛkun, ɔ wa suli Zoova kɛ laa’n sa.
12. ?Sɛ e fa e niaan mun e sunnzun sran uflɛ’n, annzɛ e ijɔ be’n, i bo gúa sɛ?
12 Sɛ e waan é wlá e niaan’m be fanngan naan be su Ɲanmiɛn juejue su’n, ɔ fata kɛ e si i yo. Yɛle kɛ nán e fa be e sunnzun sran uflɛ. Yɛ like nga e bu i kɛ ɔ ti kpa mɔ b’a yoman ti’n, nán e ijɔ be. Sɛ e yo sɔ’n, bé fá e nuan ndɛ’n su. Sanngɛ i agualiɛ su’n, be sa sin’n búbú be. I sɔ’n ti’n, like ng’ɔ ti kpa kɛ e yo’n yɛle kɛ e yo e niaan’m be mo. E kle be kɛ klolɛ mɔ be klo Ɲanmiɛn’n, i ti yɛ be ɲan wunmiɛn be su i ɔ. Ɔ maan, bé sú Ɲanmiɛn kpa titi.—An kanngan Filipfuɛ Mun 2:1-4 nun.
MAAN “E TU E WUN FƆ”
13. ?Wafa sɛ yɛ e tu e wun fɔ ɔ? (An nian like suanlɛ’n i foto klikli’n.)
13 Pɔlu guɛli i ndɛ’n i bo seli kɛ: ‘E tu e wun fɔ. Siɛn’n bɔ e wun kɛ e Min’n i cɛn’n su mantan’n, e yo i sɔ tra su.’ Kɛ Pɔlu se kɛ e tu e wun fɔ’n, yɛle kɛ e suansuan e wiengu bo naan e su Ɲanmiɛn titi. Afin sran’n i fanngan yɛle i wiengu. Ɔ maan sɛ e su wla e niaan’m be fanngan’n, maan e si ndɛ’n i kan. (Nya. 12:18) Asa ekun’n, maan e ‘sie e su e tie ndɛ nga be kan’n kpa, nán maan e kan ndɛ ndɛndɛ.’ (Zak 1:19) Sɛ e yo sɔ’n, é wún like ng’ɔ bubu e niaan i sa sin’n i wlɛ naan y’a ukɛ i.
14. ?Wafa sɛ yɛ asɔnun kpɛnngbɛn kun ukali aniaan kun ɔn?
14 Aniaan kun mɔ i wla boli i wun’n, ɔ yacili jasin fɛ’n i bolɛ’n, ɔ cɛli kpa. Sanngɛ w’a yaciman Sasafuɛ Tranwlɛ’n i nun like suanlɛ, yɛ ɔ miɛnnin i ɲin ɔli aɲia’m be bo titi. Sa wie mɔ be yoli i asɔnun nun’n, i ti yɛ i wla boli i wun ɔn. ?Kɛ ɔ yoli sɔ’n, ngue yɛ asɔnun kpɛnngbɛn kun yoli naan w’a ukɛ i ɔ? Ɔ sieli i su aniaan’n i nuan bo kpa, w’a ijɔmɛn i. Ɔ maan, ɔ wunnin i wlɛ kɛ aniaan’n tɛ klo Zoova kpa. Asɔnun kpɛnngbɛn’n wlɛli i fanngan seli i kɛ aniaan’m be klo i sa kpa naan i ndɛ lo be. Aniaan’n wa wunnin i wlɛ kɛ nán sa wie mɔ w’a yomɛn i fɛ’n, i ti yɛ ɔ́ yáci Ɲanmiɛn sulɛ ɔ. Asɔnun kpɛnngbɛn’n flɛli i kɛ ɔ ko sunmɛn i naan be bo jasin fɛ’n. I sin’n, aniaan’n wa boli jasin fɛ’n i kpa kɛ laa’n sa. Kpɛkun kɛ ɔ́ kɔ́ i ɲrun’n, ɔ wa sɛli i sin yoli asɔnun kpɛnngbɛn ekun.
15. ?Kɛ sran kun i wla bo i wun’n, ajalɛ kpa benin yɛ Zoova kle ɔ?
15 Sran nga i wla w’a bo i wun’n, wie liɛ’n, i wun fɛmɛn i feke ndɛndɛ. Wie liɛ ekun’n, ɔ kaman lɛ kplinman su kɛ be ukɛ i. I sɔ’n ti’n, ɔ fata kɛ e tra e awlɛn i sɔfuɛ’n i wun. Pɔlu seli kɛ: “An uka be nga be lɛ-man wunmiɛn’n, an tra amun anwlɛn sran’m be kwlaa be wun.” (1 Tɛs. 5:14) Yɛle kɛ sran sɔ mɔ be leman wunmiɛn’n, maan e uka be titi naan nán e sa sin bubu e le. I sɔ yɛ laa Zoova nin i sufuɛ wie mɔ be wla boli be wun’n, be trannin ɔn. I sufuɛ sɔ’m be nun kun yɛle i nuan ijɔfuɛ Eli. Zoova trɛli i awlɛn Eli wun yɛ ɔ buli i sran. Kpɛkun, ɔ niɛnnin i lika kpa naan w’a kwla di i junman’n i titi. (1 Fam. 19:1-18) Davidi kusu’n, kɛ ɔ yoli sa tɛ mɔ i sɔ’n yoli i nsisɔ’n, Zoova yaci cɛli i klun ufue su. (Jue. 51:9, 19) Azafu m’ɔ klɛli Jue 73 su’n, Ɲanmiɛn ukɛli i wie. I liɛ’n, ɔ kali kan naan w’a yaci Ɲanmiɛn sulɛ. (Jue. 73: 13, 16, 17) Andɛ kusu’n, Zoova si e kwlakwla e aunnvuɛ, yɛ ɔ yo e ye. I li kɛ e wla bo e wun’n, yɛ ɔ si e aunnvuɛ ɔ yo e ye kpa’n niɔn. (Tul. 34:6) Zoova i “sran klolɛ’n ɔ tɛ o lɛ,” yɛ “aliɛ kwlaa ng’ɔ cɛn’n,” ɔ yi i klun ufue’n i nglo. (Ngw. 3:22, 23) Zoova kunndɛ kɛ e nin e niaan mun e tran kɛ nga ɔ nin e tran’n sa. Yɛle kɛ be nga be wla bo be wun’n, nán e yo be kpokokpoko.
MAAN E WLA E WIENGU FANNGAN NAAN E KA NGUAN ATIN’N SU
16, 17. ?Kɛ mɔ y’a ju Satan i mɛn tɛ’n i bue nuan’n ti’n, ngue yɛ ɔ fata kɛ e yo ɔ?
16 Bisuafuɛ nga be o Zaksɛnaozɛn i bisua nun mɔ b’a kwlá nantiman lele guɛmɛn i ti nin i bo mɔ be wuli’n, be sɔnnin. Sanngɛ Zoova i Lalofuɛ 230 nga be o be afiɛn’n, be kwlaa be fiteli nun. Afin be suansuannin be wiengu bo.
17 “Atin nga be sin nun-ɔn be nyan nguan’n,” i su yɛ Zoova i Lalofuɛ’m be o ɔ. (Mat. 7:14) Ɔ cɛ kaan be kwlaa bé fíte nun. Kpɛkun bé trán mɛn uflɛ m’ɔ́ yó be nga be yo sa kpa’n be liɛ’n, i nun. (2 Piɛ. 3:13) Y’a ju Satan i mɛn tɛ’n i bue nuan. I sɔ’n ti’n, maan e suansuan e wiengu bo naan e nanti atin nga be sin nun ɔn be ɲan nguan’n, i su titi.
[Foto, bue 18]
[Foto, bue 20]
Maan amun nin amun wiengu’m be bo jasin fɛ’n.
[Foto, bue 20]
Maan e wla e wiengu’m be fanngan naan be klo be wun yɛ be yo sran ye.
[Foto, bue 21]
Maan e nin sran kpa mun e san nun.
[Foto, bue 22]
Maan e sie e su sran’n i nuan bo kpa naan y’a wlɛ i fanngan. (An nian ndɛ kpɔlɛ 14, 15 nun.)