Be bua ato kɛ be kwlá siman Ɲanmiɛn

NDƐ NGA SRAN KPANNGBAN LAFI SU’N:

Fluwa kun waan: ‘Asɔnun Katoliki nin Ɔrtodɔks nin Plotɛstan mɔ be yɛ be ti mɛn’n nun asɔnun dandan’n, be kan kɛ sran nsan yɛ be kan boli nun be kacili Ɲanmiɛn ɔn. Be yɛle Siɛ, Ba, nin Wawɛ. Be waan i sɔ mɔ be kan’n, ɔ kleman kɛ Ɲanmiɛn ti sran nsan kusu. Sanngɛ, sran nsan yɛ be kacili sran wunmuan kun ɔn.’​—The New Encyclopædia Britannica.

NDƐ NGA BIBLU’N KAN’N:

Zezi m’ɔ ti Ɲanmiɛn i Wa’n, w’a fɛmɛn i wun w’a sunnzunman i Si’n cɛn kun sa le. Asa ekun’n, w’a seman kɛ i bɔbɔ yɛ ɔ ti Siɛ’n niɔn. Sanngɛ ɔ seli kɛ: ‘N su kɔ e Si sin, [...] afin e Si’n lɛ nyrun tra min.’ (Zan 14:28) Kpɛkun, ɔ seli i sɔnnzɔnfuɛ’m be nun kun kɛ: “Ń fú kɔ́ min nin amun e Si’n b’ɔ ti min nin amun e Nyanmiɛn’n i wun lɔ.”​—Zan 20:17.

Wawɛ mɔ be kɛn i ndɛ’n kusu timan sran, yɛ ɔ timan Ɲanmiɛn. Sanngɛ, ɔ ti Ɲanmiɛn i fanngan. Afin Ɲanmiɛn Ndɛ’n se kɛ: ‘Nyanmiɛn Wawɛ’n wluli’ Klistfuɛ klikli’m be nun. Kpɛkun Zoova seli kɛ: ‘Ń fá n Wawɛ’n mán sran kwlaa.’​—Sa Nga Be Yoli’n 2:1-4, 17.

LIKE NGA TI YƐ NDƐ SƆ’N TI CINNJIN’N:

Katoliki fluwa sifuɛ dandan nɲɔn mɔ kun suan Karli Rahnɛr yɛ kun suan Ɛrbɛrt Fɔrglimlɛr, be kannin atre nsan’n i ndɛ. Be waan sɛ ‘Ɲanmiɛn bɔbɔ w’a yiyiman ndɛ sɔ’n nun w’a kleman sran kun’n, sran’n bɔbɔ kwlá wunmɛn i wlɛ. Kannzɛ Ɲanmiɛn yiyi nun kle sran’n bɔbɔ’n, sanngɛ ɔ su kwlá wunmɛn i wlɛ kpa sa.’ ?Sɛ a kwlá siman sran kun’n, ɔ́ yó sɛ naan w’a klo i? Kɛ be se kɛ Ɲanmiɛn ti atre nsan ti’n, sran’m be siman Ɲanmiɛn yɛ be klomɛn i.

Ndɛ klikli nga e yiyili nun fluwa nga nun’n, ɔ kannin sran kun m’ɔ suan Marko i ndɛ. Marko waan ndɛ nga be kɛn i kɛ Ɲanmiɛn ti atre san’n, ɔ tɛnndɛnnin i ɲrun. Ɔ seli kɛ: ‘M buli i kɛ Ɲanmiɛn su fɛ i wun fia min wun naan ɔ nin min o mmua dan, naan n kwlá simɛn i yɛ n kwlá faman min wun m mɛntɛnmɛn i.’ Sanngɛ Biblu’n se kɛ Ɲanmiɛn “nin e nun wie fi nun-man mmua.” (Sa Nga Be Yoli’n 17:27) Ɲanmiɛn fɛmɛn i wun fiaman e wun. Ɔ kunndɛ kɛ e si i. Zezi seli kɛ maan “e si sran nga e koto i bo e mɛnmɛn i’n.”​—Zan 4:22.

Marko waan: “Kɛ n wa wunnin i wlɛ kɛ Ɲanmiɛn timan atre nsan’n, n wa fɛli i n yoli min janvuɛ.” E kusu e kwla si Zoova kpa. Kɛ e ko si i’n, i klolɛ su yoman kekle kun. Biblu’n se kɛ: “Sran ng’ɔ klo-man sran’n, wuun ɔ si-man Nyanmiɛn, afin Nyanmiɛn’n yɛ ɔ ti sran klofuɛ nin-ɔn.”​—1 Zan 4:8.