Nán be ‘sanngan amun akunndan kpɛkun kɛ nga sa’

‘Aniaan mun, é srɛ́ amun, nán maan be sanngan amun akunndan kpɛkun kɛ nga sa.’​—2 TƐS. 2:1, 2.

?AMÚN TƐ́ SU SƐ?

?Tɛsalonikfuɛ’m be fluwa nga Pɔlu klɛ ko mannin be nun’n, afɔtuɛ benin yɛ ɔ mannin be blɛ ng’ɔ ti su’n i su ɔ?

?Ngue yɛ é yó naan b’a lakaman e ɔ?

?Sɛ e bo jasin fɛ’n i juejue su’n, i su ye benin yɛ é ɲɛ́n i ɔ?

1, 2. ?Ngue ti yɛ gblɛ nin ato bualɛ’n yɛ ɔ ti andɛ sran’m be nzuɛn ɔn? ?Nin yɛ be buɛ i sɔ ato liɛ mun ɔn? (An nian desɛn ng’ɔ o kan like suanlɛ’n bo i bo lɛ’n.)

GBLƐ nin ato bualɛ’n yɛ ɔ ti sran’m be nzuɛn ɔn. Ɔ fataman kɛ i sɔ’n bo e nuan kaan sa. Afin Biblu’n kle weiin kɛ sran ng’ɔ sie mɛn wunmuan’n, ɔ ti gblɛ kpɛfuɛ dan kpa. Sran sɔ’n yɛle mmusu’m be si Satan. (1 Tim. 2:14; 1 Zan 5:19) Kɛ mɛn kɔ́ i bue nuan’n, nn Satan fá ya kpa, afin “i cɛn’n w’a sɔn-man kun.” (Ngl. 12:12) Kɛ ɔ́ yó sɔ nn be nga be lo be wun mɛn i’n, bé kpɛ́ gblɛ láka sran mun trá laa’n. Sran nga be kunndɛ kɛ bé láka be kpa’n, yɛle Zoova i sufuɛ mun.

² Sran’m be bua Zoova i sufuɛ’m be su ato titi. Wie liɛ’n, zronali nin televiziɔn nun, ɔ nin ɛntɛnɛti su yɛ be tɛ i sɔ ato ndɛ’m be kan ɔn. Kɛ sran wie’m be ti ndɛ sɔ mun’n, be ka lɛ fa su kpɛkun be akunndan sanngan.

3. ?Ngue yɛ ɔ uka e naan y’a faman ato ndɛ’m be su ɔ?

³ E liɛ’n, Ɲanmiɛn Ndɛ’n uka e naan y’a faman Satan i ato ndɛ’m be su. Afin Nyanmiɛn Ndɛ nga be klɛli’n, “be fa kle sran mun lele be wun nanwlɛ’n.” (2 Tim. 3:16) Pɔlu klɛli Tɛsaloniki lɔ Klistfuɛ’m be fluwa. Ɔ seli be kɛ: ‘É srɛ́ amun, nán maan be sanngan amun akunndan kpɛkun kɛ nga sa.’ (2 Tɛs. 2:1, 2) Ndɛ sɔ m’ɔ kannin’n, ɔ kle kɛ be lakali Tɛsaloniki lɔ Klistfuɛ wie mun be ɲannin be. ?Afɔtuɛ benin yɛ ndɛ nga Pɔlu kannin’n man e ɔ? ?Yɛ wafa sɛ yɛ e kwla fa afɔtuɛ sɔ’n su ɔ?

AFƆTUƐ MƆ BE MƐNNIN I BLƐ NG’Ɔ TI SU’N I SU’N

4. ?Ngue ti yɛ Pɔlu kannin e “Min’n i balɛ cɛn’n,” i ndɛ kleli Tɛsaloniki lɔ Klistfuɛ mun ɔn? ?Ndɛ benin yɛ be kan kle e flan nun naan Zoova i cɛn’n w’a fuman e nun ɔn?

⁴ Fluwa klikli nga Pɔlu klɛli ko mannin Tɛsaloniki lɔ Klistfuɛ mun’n i nun’n, ɔ kannin e “Min’n i balɛ cɛn’n” i ndɛ kleli be. I waan ɔ́ kán klé be naan b’a yoman kɛ sran mɔ be o aosin’n nun mɔ cɛn sɔ’n fú’n be nun’n sa. Sanngɛ kɛ mɔ be “ti kɛ sran b’ɔ yo sa wia nun” sa’n ti’n, ɔ fata kɛ ‘be nian be wun su be tran minndɛ.’ (An kanngan 1 Tɛsalonikfuɛ Mun 5:1-6 nun.) Kɛ é sé yɛ’n, Babilɔni klɔ dan’n mɔ yɛle mɛn wunmuan’n nun Ɲanmiɛn sulɛ wafa ng’ɔ timan su’n, e su minndɛ i nunnunlɛ’n. I nunnunlɛ’n su yɛ Zoova i cɛn dan’n bó i bo ɔ. Ɲanmiɛn sa, e si wafa nga Ɲanmiɛn i klun sa’n wá kpɛ́n su’n. Asa ekun’n, asɔnun’n aɲia’m be bo’n, be kpɛn e wla titi kɛ Zoova i cɛn’n ti’n, e buabua e wun e sie. Maan ndɛ sɔ mɔ be kan kle e flan nun’n, be ka e klun titi. I liɛ’n, sran’m be su ‘sannganman e akunndan’n,’ yɛ é kwlá sú Ɲanmiɛn juejue su kpa titi.​—2 Tɛs. 2:1, 2.

5, 6. (a) ?Fluwa i nɲɔn su nga Pɔlu klɛ ko mannin Tɛsaloniki lɔ Klistfuɛ mun’n i nun’n, ngue yɛ ɔ kɛnnin i ndɛ ɔ? (b) ?Ngue yɛ ɔ ka kan’n, Zezi wá yó ɔ? ?Kosan benin ɔ fata kɛ e tinuntinun e fa usa e wun ɔn?

⁵ Pɔlu wa klɛli fluwa kun ekun ko mannin Tɛsaloniki lɔ Klistfuɛ mun. I lifuɛ nun’n, ɔ kannin ɲrɛnnɛn mɔ e Min Zezi wá klé “be nga be si-man Ɲanmiɛn’n nin be nga be fa-man e Min Jesus i jasin fɛ’n su’n,” i ndɛ kleli be. (2 Tɛs. 1:6-8) Fluwa sɔ’n i ndɛ tre 2 nun’n, Pɔlu kannin kɛ Zoova i cɛn’n ti’n, “srɛ kun” Klistfuɛ wie mun. Afin, be buli i kɛ cɛn’n w’a mantan koko kpa. (An kanngan 2 Tɛsalonikfuɛ Mun 2:1, 2 nun.) Be ayeliɛ sɔ’n kle kɛ b’a wunman wafa nga Zoova i klun sa’n kpɛ́n su’n, i wlɛ wein kpa. Pɔlu bɔbɔ wunnin i wlɛ sɔ. Afin ɔ seli kɛ: “Nán sa ngba yɛ e wun i wlɛ-ɔ, Nyanmiɛn nuan ndɛ’n i bue kaan sa yɛ e kan-an, afin e si-mɛn i ngba. Sanngɛ kɛ be ko nyan like ng’ɔ ti klonglo’n, bé gúa buebuefuɛ’n blo.” (1 Kor. 13:9, 10) Ɔ nin i sɔ ngba’n, sɛ Klistfuɛ sɔ’m be tie ndɛ nga Zoova maan Pɔlu nin Piɛli, ɔ nin aniaan nga Zoova kpali be sieli be ngunmin’n be kan kpɛn be wla’n, bé láfi Zoova su titi.

⁶ Zoova kunndɛli kɛ Klistfuɛ sɔ’m be wun sa’m be wlɛ weinwein kpa. Ɔ maan i fanngan nun’n, Pɔlu kleli be kɛ saan “sran’m bé jáo Nyanmiɛn wun,” yɛ “bian b’ɔ di-man mmla’n su’n,” ɔ́ yí i wun nglo naan Zoova i cɛn’n w’a ju.a I sin’n, blɛ ng’ɔ ti Ɲanmiɛn liɛ su’n i nun’n, Zezi “kún bian b’ɔ di-man mmla’n su’n ɔ́ núnkun i” nin be kwlaa ng’ɔ lakali be’n. Pɔlu waan “ndɛ nanwlɛ b’ɔ maan be kwla nyan be ti’n bɔ be klo-mɛn i, bɔ b’a fa-man su’n,” i ti yɛ Klist yó be sɔ ɔ. I sɔ’n ti’n, maan e tinuntinun e usa e wun kɛ: ‘?N klo ndɛ nanwlɛ’n i kpa? ?Fluwa Sasafuɛ Tranwlɛ’n nin fluwa onga nga anuannzɛ’n yi be’n, n suan be nun like? ?N yo sɔ naan m’an si ndɛ’m be nun yiyilɛ uflɛ nga dɔ nga su’n e di be su’n?

NÁN E FA E WUN MANTAN SRAN NGBA

7, 8. (a) ?Klistfuɛ klikli’m be blɛ su’n, ninnge ng’ɔ kwla saci be’n, i wie yɛle benin? (b) ?Andɛ kusu’n, ngue yɛ ɔ kwla saci e ɔ?

⁷ Nán like nga sran nga b’a jaso Ɲanmiɛn wun’n be kle’n i ngunmin yɛ ɔ kwla saci Klistfuɛ mun ɔn. Pɔlu klɛli Timote i fluwa seli kɛ “sika klolɛ’n yɛ ɔ ti sa tɛtɛ’n kwlaa i bo nin-ɔn.” Naan ‘sran wie’m be fa be nyin bloli nun lele be lafi-man Nyanmiɛn su kun, ɔ maan awlaboɛ’n w’a kun be kpo.’ (1 Tim. 6:10) Like ng’ɔ kwla saci Klistfuɛ mun ndɛndɛ kpa wie’n, yɛle “klɔ sran i nzuɛn’n.”​—Gal. 5:19-21.

⁸ Pɔlu wlali Tɛsaloniki lɔ Klistfuɛ’m be su nun kpa kɛ be nian be wun be mɔ “be yo be wun kɛ Klist yɛ ɔ sunmannin” be’n, be lika. Sran sɔ’m be nun wie’m “bé wá jáo bé kán ndɛ b’ɔ ti-mɛn i su’n bé fá láka Kristfuɛ mun naan be su be su.” (2 Kor. 11:4, 13; Yol. 20:30) Kɛ i osu lali nun’n, Zezi yili Efɛzi lɔ Klistfuɛ’m be ayɛ, afin b’a yaciman “sran tɛtɛ mun” asɔnun’n nun. Be ‘sali be niannin.’ Be wunnin kɛ sran sɔ’m be tɔn be wun suɛn kɛ Zezi sunmannin be, yɛ be bua ato. (Ngl. 2:2) Tɛsaloniki lɔ Klistfuɛ mun be fluwa i nɲɔn su nun’n, Pɔlu seli ekun kɛ: “Aniaan mun, é srɛ́ amun, an nian e Min Jésus-Krist ti nán an fa amun wun mantan sran kwlaa ng’ɔ ti nvɛɛfuɛ bɔ like ng’ɔ yo’n nin ndɛ nga e kan kleli amun’n ti-man kun’n.” Asa ekun’n, ɔ kannin Klistfuɛ nga be ‘waan be di-man junman’n,’ be ndɛ. (2 Tɛs. 3:6, 10) ?Sɛ ɔ fataman kɛ be fa be wun mantan nvɛɛfuɛ nin be nga be waan be diman junman’n, yɛ be nga be jao Nyanmiɛn wun mun yɛ bé fá be wun mántan be ɔ? Nanwlɛ, sɛ be fa be wun mantan i sɔfuɛ mun’n, bé mlín. I sɔ’n ti’n, ɔ fata kɛ be nian be wun sran sɔ’m be lika. I sɔ wie yɛ ɔ fata kɛ e yo i andɛ ɔ.​—Nya. 13:20.

9. ?Sɛ sran kun si ndɛ nga Biblu’n w’a yiyiman be nun’n be su akplowa’n, annzɛ ɔ kan aniaan wie’m be wun ndɛ’n, ngue yɛ ɔ fata kɛ e yo ɔ?

⁹ Ɲrɛnnɛn dan’n ɔ nin mɛn tɛ nga i nunnunlɛ blɛ’n su mantan koko kpa. I sɔ’n ti’n, afɔtuɛ nga Zoova fa mannin Klistfuɛ klikli mun’n, ɔ fata kɛ be yo e cinnjin kpa wie. E kunndɛman kaan sa kɛ ‘ye nga Nyanmiɛn yoli e’n ɔ yo ngbɛn.’ Sɛ ɔ yo sɔ’n, e su ɲanman anannganman nguan. (2 Kor. 6:1) I sɔ’n ti’n, sɛ sran kun ba e aɲia’m be bo naan ɔ si ndɛ nga Biblu’n w’a yiyiman be nun’n be su akplowa’n, annzɛ ɔ kan asɔnun kpɛnngbɛn nin Zoova i sufuɛ wie mun be wun ndɛ tɛtɛ’n, nán e fa e wun e mɛntɛn i kaan sa.​—2 Tɛs. 3:13-15.

MAAN E FA ‘LIKE NGA BE KLELI E’N’ SU

10. ?Like nga be kleli Tɛsaloniki lɔ Klistfuɛ mun mɔ Pɔlu waan be fa su’n, yɛle benin?

¹⁰ Pɔlu seli i niaan Tɛsalonikifuɛ mun kɛ be “jran kekle” naan be fa like nga be kleli be’n su titi. (An kanngan 2 Tɛsalonikfuɛ Mun 2:15 nun.) ?Like nga be kleli be mɔ Pɔlu kɛn i ndɛ’n yɛle benin? E si kɛ nɛ́n i yɛle like nga Ɲanmiɛn sulɛ wafa nga be timan su’n be kle mɔ be waan be fɛli i Ɲanmiɛn Ndɛ’n nun’n. Sanngɛ, like nga Zezi kleli Pɔlu nin i wiengu mun mɔ be kusu be fa kleli be’n, ɔ nin ndɛ nga Zoova wawɛ’n maan akoto’m be kan kleli be’n, be ndɛ yɛ Pɔlu kan. Like sɔ’n i dan lika o Ɲanmiɛn Ndɛ’n mɔ Ɲanmiɛn wawɛ’n maan be klɛli’n nun. Like nga be kleli Korɛnti lɔ Klistfuɛ mun mɔ be fali su’n ti’n, Pɔlu yoli be mo. Ɔ seli kɛ: “Amun mo, yɛlɛ kɛ amun wla o n su titi yɛ ndɛ nga be fa mannin min bɔ n kusu n fa mannin amun’n, an fa su kpa.” (1 Kor. 11:2) Kɛ mɔ like nga be kleli be’n fin Zoova nin Zezi ti’n, ɔ ti nanwlɛ yɛ be kwla lafi su.

11. ?Wafa sɛ yɛ be laka sran wie mun be ɲan be ɔ?

¹¹ Pɔlu klɛli Klistfuɛ nga be ti Ebre’n, be fluwa wie. Ɔ kannin wafa nɲɔn nga Klistfuɛ kun kwla yaci Ɲanmiɛn su lafilɛ’n mɔ i sin’n ɔ kpɔci Ɲanmiɛn’n, be ndɛ. (An kanngan Ebre Mun 2:1 nin 3:12 nun.) Pɔlu kannin kɛ sran’n ‘to fuan atin’n,’ annzɛ ɔ ‘yaci Nyanmiɛn.’ Sran ng’ɔ to fuan atin’n, ɔ ti kɛ alie kanfuɛ m’ɔ́ bá jranlɛ’n kpɛkun i bli m’ɔ́ bó’n, w’a mlin’n sa. Sran ng’ɔ yaci Ɲanmiɛn’n i liɛ’n, i bɔbɔ i ɲinfu yɛ ɔ fa atin uflɛ ɔ. Ɔ ti kɛ alie kanfuɛ kun mɔ i bɔbɔ tu alie’n i bo kɔ’n sa. Sunnzun ase nɲɔn sɔ’n, be kle wafa nga sran wie’m be yacili ndɛ nanwlɛ’n i su lafilɛ’n.

12. ?Ajulisu ninnge benin yɛ be yolɛ ti’n, Klistfuɛ kun kwla kpɔnzɔ ɔ?

¹² Tɛsaloniki lɔ Klistfuɛ wie’m be yacili ndɛ nanwlɛ’n i su lafilɛ. I sɔ sa’n kwla ɲan e wie. Sɛ y’a nianman e wun kpa’n, ninnge sunman be kwla saci e blɛ’n. Ɔ kwla yo e ɲin su yiyilɛ’n, ɛntɛnɛti nun yalɛ kokolɛ’n, selilɛli nin ɛntɛnɛti su fluwa nga be klɛ blɛ e’n be nun kannganlɛ’n nin be su tɛlɛ’n, nin balɔn nun ndɛ kwlaa silɛ’n. Klistfuɛ ng’ɔ fɛ i sɔ ninnge’m be yolɛ cici i ti’n, ɔ cɛman naan i ɲin w’a kpa Ɲanmiɛn junman’n i dilɛ’n su naan w’a kpɔnzɔ. Kɛ ɔ ko yo sɔ’n, ɔ tumɛn i klun srɛman Ɲanmiɛn kun. Ɔ ɲɛnmɛn i ti suanman Biblu’n nun like kpa kun. Aɲia’m be bo kɔlɛ’n nin jasin fɛ’n i bolɛ’n yo tankantankan i sa nun. ?Ngue yɛ é yó naan ninnge sɔ mun annzɛ like uflɛ w’a sannganman e akunndan’n niɔn?

LIKE NGA É YÓ NAAN B’A SANNGANMAN E AKUNNDAN’N

13. ?Kɛ Biblu’n fa kannin’n sa’n, ngue yɛ sran sunman be yo i andɛ ɔ? ?Ngue yɛ é yó naan y’a lafi Ɲanmiɛn su kpa titi ɔ?

¹³ Maan ɔ tran e klun titi kɛ Satan i mɛn’n su ‘kɔ i bue nuan.’ Ɔ maan sɛ e nin sran nga be bumɛn i sɔ’n e san nun’n, i bo gúa tɛ mán e. Akoto Piɛli klɛli kɛ kɛ mɛn’n wá kɔ́ i bue nuan’n, “sran wie’m bé bá, bé yó sa nga be klun klo’n, yɛ bé srí amun, bé sé kɛ: ‘?Ɔ seli amun kɛ ɔ́ bá, nɛ́n i-ɔ? ?Yɛ ɔ o nin? Kɛ ɔ fin lalaa’n bɔ e nannan’m be wuli’n, like nga Nyanmiɛn yili be’n, be kwlaa be tɛ o be osu’n nun.’” (2 Piɛ. 3:3, 4) Sɛ e kanngan Ɲanmiɛn Ndɛ’n nun cɛn kwlaa naan e suan i nun like titi’n, é láfi Ɲanmiɛn su kpa. Kpɛkun, e wla su fiman su kɛ ‘mɛn’n su kɔ i bue nuan.’ Be nga Biblu’n kannin be ndɛ kɛ bé jáso Ɲanmiɛn wun’n, nán e blɛ su yɛ be boli i bo ɔ. Be boli i bo w’a cɛ. “Bian b’ɔ di-man mmla’n su’n” kusu te o lɛ. Ɔ te tanndan Ɲanmiɛn i sufuɛ’m be ɲrun. I kwlaa sɔ’n ti’n, maan ɔ tran e klun titi kɛ Zoova i cɛn’n w’a mantan koko.​—Sof. 1:7.

14. ?Sɛ e bo jasin fɛ’n i juejue su’n, i su ye benin yɛ é ɲɛ́n i ɔ?

¹⁴ Like kun ekun nga é yó naan e akunndan’n w’a sannganman’n yɛle kɛ e bo jasin fɛ’n titi. Zezi Klist m’ɔ ti asɔnun’n i su kpɛn’n, ɔ seli i sɔnnzɔnfuɛ mun kɛ be kle nvlenvle’n kwlaa be like maan be kaci i sɔnnzɔnfuɛ. Yɛ like kwlaa ng’ɔ kleli be’n, be fa kle be naan be fa su. Junman sɔ’n i dilɛ’n wá sásá be. (Mat. 28:19, 20) Sran ng’ɔ fa Zezi i ndɛ sɔ’n su’n, ɔ bo jasin fɛ’n i juejue su. ?Amun bu i kɛ i sɔ yɛ Tɛsaloniki lɔ Klistfuɛ’m be yoli ɔ? Maan e wla kpɛn ndɛ nga Pɔlu kan kleli be’n su. Ɔ seli be kɛ: “Nyanmiɛn Wawɛ’n ti kɛ sin sa, nán amun nuɛn i. Nán an bu Nyanmiɛn nuan ndɛ nga be kan’n kɛ ɔ ti ngbɛn.” (1 Tɛs. 5:19, 20) Ɲanmiɛn i nuan ndɛ nga e suan mɔ e kɛn i ndɛ kle sran uflɛ’n, i suanlɛ nin i ndɛ kanlɛ yo fɛ.

15. ?Kɛ e nin e awlofuɛ mun é sú Ɲanmiɛn awlo lɔ’n, ngue yɛ e kwla yo ɔ?

¹⁵ E kwlakwla e kunndɛ kɛ e awlofuɛ’m be si jasin fɛ’n i bo kpa. I sɔ’n ti’n, kɛ aniaan wie’m be nin be awlofuɛ’m bé sú Ɲanmiɛn awlo lɔ’n, be fa blɛ kan be yi wafa nga be kwla bo jasin fɛ’n i nglo. Wie liɛ’n, be kan sran’m be osu nianlɛ’n i ndɛ. ?Ndɛ benin yɛ bé kán naan sran’n w’a kunndɛ kɛ be ko niɛn i osu titi ɔ? ?Blɛ benin nun yɛ sɛ be ko niɛn i osu’n, ɔ́ yó i fɛ ɔ? Be bu i kwlaa sɔ’n i akunndan, kpɛkun be yi i nglo kan. Aniaan wie’m be liɛ’n, like nga bé wá súɛn i aɲia’m be bo lɔ’n, be nin be awlobo’n be fa blɛ kan be koko su yalɛ. É wlá amun fanngan kɛ amun nin amun awlobo’n, be yo sɔ wie. Sɛ aɲia’m be bo lɔ’n, amun tɛ kosan’m be su wie’n, i sɔ’n úka amun kpa. Yɛle kɛ amún láfi Ɲanmiɛn su kpa, yɛ be su sannganman amun akunndan’n. (Jue. 35:18) Nanwlɛ, Ɲanmiɛn sulɛ awlo lɔ’n, ɔ sasa e naan y’a siman ninnge nga Biblu’n w’a kanman be ndɛ’n be su akplowa ngbɛnngbɛn, naan kusu e akunndan w’a yoman nɲɔnnɲɔn ndɛ wie’m be su.

16. ?Ngue ti yɛ Klistfuɛ nga Ɲanmiɛn kpali be sieli be ngunmin’n, be tranman lɛ naan sran wie sanngan be akunndan ɔn?

¹⁶ Kɛ afuɛ’m bé sín’n, nn Zoova tíke i sufuɛ’m be ɲin. Ɔ maan be wun sa nga bé wá jú mɔ Biblu’n kan be ndɛ’n, be wlɛ. I sɔ’n ti’n, e lafi su kɛ like kpa sie e ɲrun lɔ mɔ é ɲɛ́n i ɔ. Be nga be kpali be sieli be ngunmin’n, be lafi su kɛ bé tó Zezi Klist ɲanmiɛn su lɔ. I sɔ’n ti’n, be tranman lɛ naan sran wie sanngan be akunndan. Ndɛ nga Pɔlu kan kleli Tɛsalonikifuɛ mun’n, ɔ ti andɛ Klistfuɛ nga be kpali be sieli be ngunmin’n, be liɛ wie. Ɔ seli be kɛ: “Aniaan mun, amun bɔ an ti e Min’n i sran kpa’n, amun ti ɔ fata kɛ e la Nyanmiɛn ase tititi. Afin [...] ɔ fali amun kɛ i Wawɛ’n maan an kaci i liɛ yɛ an lafi nanwlɛ’n su naan an nyan amun ti.”​—2 Tɛs. 2:13.

17. ?Afɔtuɛ benin yɛ 2 Tɛsalonikfuɛ Mun 3:1-5 man e ɔ?

¹⁷ Be nga be lafi su kɛ bé ɲán anannganman nguan asiɛ’n su wa’n kusu’n, ɔ fataman kɛ be tran lɛ naan sran wie sanngan be akunndan’n. Sɛ amun o be nun wie’n, afɔtuɛ nga Pɔlu mɛnnin i wiengu nga be o Tɛsaloniki lɔ mɔ bé kɔ́ ɲanmiɛn su’n, maan amun fa su. (An kanngan 2 Tɛsalonikfuɛ Mun 3:1-5 nun.) Ɔ fata kɛ ndɛ sɔ mɔ Pɔlu kɛnnin i klolɛ su’n, ɔ yo e tinuntinun e cinnjin kpa. Fluwa nɲɔn nga Pɔlu klɛ ko mannin Tɛsaloniki lɔfuɛ mun’n, be wla e su nun kɛ nán e si ninnge nga Biblu’n w’a kanman be ndɛ’n be su akplowa. Yɛ nán e lafi ndɛ ngbɛnngbɛn mɔ be nin Biblu’n nun ndɛ’n be timan kun’n, be su. Afɔtuɛ sɔ’m be ti e cinnjin kpa, afin e o mɛn’n i blɛ kasiɛn’n nun.

[Ja ngua lɛ ndɛ’n]

[Foto, bue 8]

[Foto, bue 9]

Fluwa nga Pɔlu klɛli be’n be nun’n, ɔ mannin Klistfuɛ’m be afɔtuɛ blɛ ng’ɔ ti su’n i su. (An nian ndɛ kpɔlɛ 4 nin 5 be nun.)

[Foto, bue 12]

Sɛ e siesie e wun kpa naan e bo jasin fɛ’n be su kwlá sannganman e akunndan’n. (An nian ndɛ kpɔlɛ 14 nin 15 be nun.)