BIBLU’N I SU KOSAN’M BE SU TƐLƐ
?Ɲanmiɛn nuan ndɛ yɛ ɔ o Biblu’n nun sakpa ɔ?
A kwla se kɛ fluwa ng’ɔ ti Ɲanmiɛn ndɛ fluwa’n, ɔ fata kɛ ɔ yo i liɛ ngunmin. I sɔ kusu yɛ Biblu’n ti ɔ. Be yili i akpi ngbinngbin kpanngban, aniɛnaniɛn kaka kpa nun. Ngwlɛlɛ ndɛ ng’ɔ o Biblu’n nun’n ti’n, sran’m be nzuɛn’n kwla yo kpa tra laa’n.—An kanngan 2 Timote 3:16 nin 1 Tɛsalonikfuɛ Mun 2:13 nun.
E si kɛ ndɛ ng’ɔ o Biblu’n nun’n, ɔ fin Ɲanmiɛn. Afin sa ng’ɔ kan be ndɛ’n, be kpɛn su sɛsɛsɛ. Klɔ sran fi kwlá kpɛmɛn i ti nun kanman ndɛ mɔ kwla yo sɔ ɔ. Maan e bu Ezai fluwa’n i akunndan kan e nian. Be wunnin kun jenvie ng’ɔ ti njin nzue klakla’n i wun lɛ yɛbuɛ buɛ kun nun. Kɛ be klɛli’n ɔ dili afuɛ ya tra su i sin naan b’a wu Zezi. Fluwa sɔ’n waan cɛn wie lele’n, Babilɔni klɔ’n yó klɔ nvuɛn. Kɛ Zezi wa dili i junman’n asiɛ’n su wa mɔ afuɛ kpanngban sinnin’n, yɛ ndɛ sɔ’n kpɛnnin su ɔ.—An kanngan Ezai 13:19, 20 nin 2 Piɛr 1:20, 21 nun.
?Ɔ yoli sɛ yɛ be kwla klɛli Biblu’n niɔn?
Afuɛ 1.600 yɛ be fa klɛli Biblu’n niɔn. Sran 40 yɛ be klɛli ɔ. Ndɛ nga be klɛli’n, be sansanman be wun. Be kwlaa be ti yia ndɛ kunngba su. ?Wafa sɛ yɛ i sɔ liɛ’n kwla yoli ye ɔ? Ɲanmiɛn yɛ maan ɔ kwla yoli sɔ ɔ.—An kanngan 2 Samiɛl 23:2 nun.
Ndɛ nga Biblu’n i klɛfuɛ’m be klɛli’n, wie liɛ’n, Ɲanmiɛn sunmannin anzi mun yɛ be kan kleli be ɔ. Wie liɛ kusu’n, ɔ yili sa’m be nglo aolia nun annzɛ laliɛ nun kleli be. Kpɛ sunman’n, kɛ Ɲanmiɛn fɛ i ndɛ’n man be’n, ɔ yaci be nun naan be bɔbɔ be kpa ndɛ mma nga bé fá klɛ́’n.—An kanngan Sa Nglo Yilɛ 1:1 nin 21:3-5 nun.
Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 2 nun. Zoova i Lalofuɛ mun yɛ be yili ɔ.
A kwla ko fɛ i ɛntɛnɛti lika nga nun lɔ: www.jw.org